Ruma Bese Maurina Baine Hanamoa Ḡauna Badana be Dahaka?

BAIBUL NA E TOMAMU

“Dirava ena hereva e kamonaimu bona e badinamu taudia hari nanamo heherea.”​​—Luka 11:​28, Buka Helaḡa.

UNA SISIBA ENA NAMO

 Bo helalokau hehenimu.​​—Efeso 5:​28, 29.

 Bo hemataurai hehenimu.​​—Efeso 5:33.

 Bo noho namonamomu.​​—Mareko 10:​6-9.

BAIBUL BAITA ABIDADAMA HENIA DIBA, EIAVA?

Oibe, ini badi rua daidiai:

•  Dirava ese ruma bese e havaraia. Baibul na e gwaumu Iehova Dirava ese tau bona hahine ginigunadia e haheadavadia. (Genese 2:​18-24) Baita gwau dibamu, Iehova ese ruma bese e havaraia. Dahaka dainai?

  Mani a laloa: Bema oi na aniani namona ta o moalelaiamu bona o uramu una aniani lalonai e miksi ḡaudia ba dibadia, oi be daika bo nanadaiamu? Vaia, oi na una aniani e nadua tauna o hahinena bo nanadaiamu, ani?

  Una heḡereḡerena, bema ta uramu eda ruma bese maurina baita hanamoa dalana baita dibaia, namona na ruma bese e havaraia Diravana, Iehova, enai heduru baita tahu.​​—Genese 2:​18-​24.

•  Dirava ese oi na e lalomumu. Ruma bese iboudiai ese Baibul ai Iehova ena heduru bae tahua na aonega karana. Dahaka dainai? “Badina be ia ese e lalomuimu.” (1 Petro 5:​6, 7) Iehova na emu namo e laloamu​—bona hanaihanai iena sisiba ese taunimanima e durudiamu!​​—Hereva Lada-isidia 3:​5, 6; Isaia 48:​17, 18.