Headava Ihanamona Totona Dirava Ba Tahua

Iehovaa Dirava ese tau bona hahine ginigunadia e haheadavadia. Baibul na e gwaumu, Ia ese hahine ta e karaia bena “Adam dekena e laohaia.” Adam na e moale dikadika dainai, eto: “Ina na turiagu turiana bona hidiogu hidiona.” (Genese 2:22, 23) Iehova na dounu e uramu headava taudia na bae moale.

Bo headavamu neganai, reana bo laloamu ḡau iboudiai na da be heau namonamomu. To vaia, ena be tau bona hahine na e helalokau hehenimu to hekwakwanai na be varamu. (1 Korinto 7:28) Ina buklet lalonai na Baibul ena hahekau herevadia mimia, bo badinadiamu neganai, emu headava bona ruma bese maurina be namomu.​—Salamo 19:8-11.

1 IEHOVA E HENI MADUNANA BA HUAIA

BAIBUL NA E GWAUMU: Tau na ruma bese kwarana.​—Efeso 5:23.

Bema oi na tau, Iehova na e uramu mai lalokaumu ida adavamu ba naria. (1 Petro 3:7) Iehova ese ia e karaia na oi ibamomu, bona e uramu ba matauraia bona ba lalokau henia. (Genese 2:18) Adavamu o lalokau henia badamu dainai, ena ura bavatoa guna.​—Efeso 5:25-29.

Bema oi na hahine, Iehova na e uramu adavamu ba matauraia bona ba durua ena maduna baine huaia. (1 Korinto 11:3; Efeso 5:33) Ena abi hidi karana ba durua bona ia ida ba ḡaukara hebou namonamo. (Kolose 3:18) Bema unu bo kara tomamu, adavamu bona Iehova vairadiai oi na mai hairaimu.​—1 Petro 3:1-6.

BA KARA DIBA ḠAUDIA:

• Adavamu ba nanadaia dahaka ba kara, unu amo tau eiava hahine namona ai baola. Ba kamonai namonamo, bona ba hekwarahi emu kara ba hanamodia

• Ba haheauka. Bo nohomu lalonai, adavamu ihamoalena daladia bo dibamu

2 ADAVAMU ENA HEMAMI BA LALOA

BAIBUL NA E GWAUMU: Namona na adavamu ena namo ba tahua. (Filipi 2:3, 4) Adavamu ba naria namonamo bona ba helalotao, Iehova na e uramu ena hesiai taudia ese ‘taunimanima iboudiai bae gado namo henidia.’ (2 Timoteo 2:24) “E hereva haraḡa-haraḡamu tauna ena hereva na dare e hegwadamu na heto, a aonega tauna malana ese hahemauri e mailaiamu.” Una dainai emu hereva na ba lalodia namonamo. (Hereva Lada-isidia 12:18) Iehova ena lauma ese baine durumu hebogahisi bona lalokau dalanai ba hereva.​—Galatia 5:22, 23; Kolose 4:6.

BA KARA DIBA ḠAUDIA:

• Basio badu totona ba ḡuriḡuri, bona adavamu ida ḡau badadia ba herevalai

• Ba herevalai ḡaudia bona ba gwauraidia daladia ba haerodia namonamo

3 BA ḠAUKARA HEBOU

BAIBUL NA E GWAUMU: Bo headavamu neganai, umui raruosi na “vada tamona.” (Mataio 19:5) To umui na taunimanima idaudia rarua bona emui lalohadai danu idauidau. Una dainai emui lalohadai bona hemami bae tamona na namo. (Filipi 2:2) Abi hidi ba kara neganai lalotamona na ḡau badana. Baibul na e gwaumu: “Hahealo amo lalo-hata e ginimu.” (Hereva Lada-isidia 20:18) Baibul ena hahekau herevadia ese baine durumui abi hidi badadia ba karadia hebou.​—Hereva Lada-isidia 8:32, 33.

BA KARA DIBA ḠAUDIA:

• Emu hemami na adavamu ida ba herevalaia, dia emu lalohadai mo

• Gwauhamata ta do so karaia lalonai, adavamu ida ba herevalaia guna