Dika Bae Vara Neganai

Ena be bo hekwarahimu emu headava bona ruma bese lalonai ba moale, to be vara kavamu ḡaudia ese emu moale be hadikaiamu. (Kohelete 9:11) Hekwakwanai baita davarimu neganai Dirava na mai lalokauna ida ita be durudamu. Bema ini Baibul ena hahekau herevadia bo badinadiamu, oi bona emu ruma bese ese hekwakwanai badadia danu bo haheaukalaimu.

1 IEHOVA ENAI BA TABEKAU

BAIBUL NA E GWAUMU: “Emui lalo-haguhi na ia enai ba tahoa kau, badina be ia ese e lalomuimu.” (1 Petro 5:7) Nega iboudiai ba helalotao, emui ai e varamu hisihisidia gwaudia na Dirava basio henia. (Iakobo 1:13) Ia bo raka henia kahimu neganai, heduru namodia be henimumu. (Isaia 41:10) “Lalomui anidia na ia vairanai ba hahedinarai.”​—Salamo 62:8.

Danu, dina ta ta ai Baibul bo duahiamu bona bo stadilaiamu neganai, tauhalo bo davarimu. Unu amo bo mamiamu Iehova ese ‘hisihisi iboudiai lalodiai tauda e halodiamu.’ (2 Korinto 1:3, 4; Roma 15:4) Dirava na e gwauhamata “ena maino, eda diba idoinai e hereaiamu mainona,” baine henida.​—Filipi 4:6, 7, 13.

BA KARA DIBA ḠAUDIA:

• Iehova ba noia, baine durumu basio badu bona lalohadai maorona bavabia

• Ba kara diba ḡaudia ba lalodia lou, bena dala namona ta bavabia hidi

2 SIBOMU BA HENARI BONA EMU RUMA BESE DANU

BAIBUL NA E GWAUMU: “Mai darana tauna lalona ese lalo-parara e davariamu, bona aonega tauna taiana ese lalo-parara e tahuamu.” (Hereva Lada-isidia 18:15) Ḡau iboudiai ba tahu namonamo. Emu ruma bese taudia iboudiai edia ura ḡaudia ba diba. Idia ida ba herevahereva, bona ba hakala henidia.​—Hereva Lada-isidia 20:5.

Bema o lalokau heniamu tauna ta be masemu neganai, dahaka bo karamu? Ba tai na asi ena kerere. Ba helalotao, Iesu danu “e tai.” (Ioane 11:35; Kohelete 3:4) Ba laḡa-ani namonamo. (Kohelete 4:6) Una ese baine durumu lalometau negana ba haheaukalaia.

BA KARA DIBA ḠAUDIA:

• Hekwakwanai do se vara neganai, namona na emu ruma bese ida herevahereva hebou karana ba manadalaia. Bena hekwakwanai bae vara neganai, oi ihereva henimu na basie garimu

• Unu hekwakwanai e davari guna taudia ba hereva henidia

3 HEDURU BAVABI DAE

BAIBUL NA E GWAUMU: “Tau ta turana ese nega iboudiai e lalokau heniamu; bona tadikakana ena lalokau na dika negana ai e hedinaraimu.” (Hereva Lada-isidia 17:17) Bamomu na be uramu bae durumu, to reana asi dibadia dahaka bae kara. Namona na emu ura ḡaudia na ba hamaorolaidia. (Hereva Lada-isidia 12:25) Danu, Baibul e lalopararalaiamu taudia edia amo heduru ba tahu. Baibul amo be henimumu heduru herevadia ese be durumumu.​—Iakobo 5:14.

Hanaihanai Dirava bona ena gwauhamata e abidadama henimu taudia bo bamodiamu neganai, be durumumu. Danu, heduru e uramu taudia bo hagoadadiamu neganai, oi danu bo goadamu. Idia ediai emu abidadama Iehova bona ena gwauhamata ai ba herevalai. Heduru e uramu taudia ba durudia bona sibomu na basio noho, to e lalokau henimumu bona e lalomu badamu taudia ba bamodia.​—Hereva Lada-isidia 18:1; 1 Korinto 15:58.

BA KARA DIBA ḠAUDIA:

• Bamomu namona ta ba hereva henia bona ena heduru bavabia dae

• Emu ura ḡaudia na mai momokanimu ida ba gwaurai hedinarai