Taunimanima Edia Henanadai

Dahaka dainai Iehova ena Witnes edia pablikeisen na websait ma ta eiava social media ai basita ato?

Eda pablikeisen ta hariharilaimu na asi davadia dainai, haida na e laloamu kopedia bae kara bona websait haida ai eiava social media ai bae ato na maoro. To, unu e kara tomamu neganai eda websait ena Terms of Usea eiava websait bae ḡaukaralaia taravatudia na e utumu bona hekwakwanai badadia e havaramu. Unu taravatu ai e hahedinaraia ḡoevaḡoeva, ta ese “ina websait ai laulau, pablikeisen, kampani ta ladana eiava ena logo, miusik, foto, o vidio na basie ato, eiava ina websait amo atikol basine abi bona Intanet (websait ma ta, file-sharing site, video-sharing site, eiava social network) ai basine ato.” Dahaka dainai una taravatu na mai anina bada?

Eda websait ai e ato pablikeisen iboudiai na mai edia copyright taravatuna. Aposteit bona inai taudia ma haida na e uramu eda pablikeisen na edia websait ai bae ḡaukaralai unu amo Iehova ena Witnes taudia bona ma haida bae veridia. Unu websait lalodiai e ato ḡaudia na e karadia bae duahi taudia lalodia bae hadaradara. (Sal. 26:4; Her. 22:5) Taunimanima haida ese iseda pablikeisen herevadia o laulaudia eiava jw.org ena logo na edia advataismen ai bona bae hoihoilai kohudia ai e ḡaukaralaimu, bona edia mobael fon app ai e atomu. Una dainai, eda websait ena copyright bona trademark bae gimaia taravatudia baita abia na namo, unu amo dala kereredia unu bamona bae kara taudia na taravatu ese bae ḡuidia. (Her. 27:12) To bema ita na mai dibada taunimanima haida, eiava tadikaka taihu danu, ese eda websait amo pablikeisen bona ma ḡau haida na websait haida ai bae ato eiava jw.org ena logo bae ḡaukaralaia edia kohu bae hoihoilai to basita koudia, kota ese ita na basine durudamu, unu inai taudia bona bisnes oreadia bae koudia totona.

Eda pablikeisen na websait ma haida amo to dia jw.org amo baita daonloudimu karana ese dika baine havaraia. Iehova ese “hesiai tauna mai ena kamonai bona mai ena kara maoromaoro” mo e abia hidi, lauma aniani baine heni. (Mat. 24:45) Una “hesiai tauna” ese lauma aniani na ini websait amo e halasimu: www.pr2711.com, tv.jw.org, bona wol.jw.org. Bona mobael fon ai eda app na toi hona​—JW Language^®, JW Library^®, bona JW Library Sign Language^®. Unu na websait bona app maorodia bona baita ḡaukaralaidia diba, badina unuseni ai Satana ena tanobada ese e halasimu ḡaudia na lasi bona basie hakauda kerere dibamu. Bema lauma aniani na ma websait haida amo bae halasi, basita dibamu hereva haida na e haidau eiava e koki.​—Sal. 18:26; 19:8.

Danu, koment bae tore diba websait ai eda pablikeisen bae ato karana ese dala baine kehoa diba aposteit bona hereva momokani e inai heniamu taudia ese Iehova ena orea bae hadikaia diba. Tadikaka haida na Intanet ai debate karana ai e vareaimu dainai, Iehova ladana e hadikaiamu. Intanet ai ba debate karana na dia dala maorona, mai manauda ida hereva momokani “e gwaua tubumu taudia” baita sisiba henidia. (2 Tim. 2:23-25; 1 Tim. 6:3-5) Danu, haida ese orea ladana ai, eiava Gavanin Bodi, bona Gavanin Bodi taudia ta ta ladadia ai social media account bona websait koikoidia haida e kehomu. To, Gavanin Bodi taudia na asi edia Web page eiava social media ta ai asie vareai.

Taunimanima ediai jw.org baita hahedinaraia karana amo ‘sivarai namona’ iharorolaina ḡaukarana baita durua. (Mat. 24:14) Intanet ai eda haroro ḡaukara ai ta ḡaukaralaimu tuludia na hanaihanai e hanamodiamu. Ta uramu taunimanima iboudiai na unu tulu idauidau amo namo bae davari. Una dainai, websait baita ḡaukaralai taravatudia ai e hahedinarai heḡereḡerena, jw.org ai pablikeisen ta ena kope na ta ba siai henia diba eiava jw.org ai eda pablikeisen edia link ba siai diba. Ita ese eda websait na kamonai taudia ta hadibalaidiamu neganai, ta durudiamu lauma aniani e halasiamu taudia korikori, “hesiai tauna mai ena kamonai bona mai ena kara maoromaoro,” bae dibaia.