Iboudai Baita Tamona Iehova Bona Iesu E Tamonamu Heḡereḡerena

1, 2. (a) Iesu na ena aposetolo ida ḡuriḡuri ginigabena e gwauraia neganai, dahaka e noi? (b) Dahaka dainai Iesu ese lalotamona karana e laloa bada?

IESU na ena aposetolo ida edia aniani hebou ginigabena ai, ia ese lalotamona karana na e laloa bada. Idia ida e ḡuriḡuri neganai, ena ura ḡauna e herevalaia, una na ena hahediba iboudiai bae tamona, ia bona Tamana e tamona heḡereḡerena. (Ioane 17:20, 21 ba duahi.) Edia lalotamona karana ese baine hahedinaraia, Iehova ese Iesu na e siaia tanobada ai Dirava ena ura baine karaia totona. Lalokau na Iesu ena hahediba korikoridia edia kara badana ta, una kara ese edia lalotamona karana baine habadaia.​—Ioa. 13:34, 35.

² Ta dibamu dahaka dainai Iesu ese lalotamona karana e herevalaia momo. Ena aposetolo ida aniani hebou ginigabena e karaia neganai e itaia idia na asie lalotamonava. Guna e vara heḡereḡerena, idia na sibodia e hepapahuahu heheni “daika vada e herea.” (Luka 22:24-27; Mar. 9:33, 34) Nega ma ta ai, Iakobo bona Ioane na Iesu e noia ena Basileia baine abia neganai ia badinai bae helai.​—Mar. 10:35-40.

3. Dahaka dainai Keriso ena hahediba taudia na asie lalotamonava, bona ededia henanadai baita herevalaimu?

³ To, lada bada iura henina karana ese Keriso ena hahediba edia lalotamona karana baine hadikaia diba, to dia una mo. Taunimanima na ma haida inai henidia karana ese e hapararadiava. Iesu ena hahediba ese hemami unu bamodia bae hanaidia na namo. Ina atikol ai, ita ese ini henanadai baita herevalaimu: Edena dala ai Iesu ese ma haida i’inai henidia karana e dadaraia? Edena dala ai ia murinai e rakava taudia e durudia ma haida bae kara namo henidia bona bae lalotamona? Bona edena dala ai ena hahediba herevadia ese ita e durudamu baita lalotamona totona?

IESU BONA ENA HAHEDIBA NA HAIDA ESE E INAI HENIDIAVA

4. Iesu e inai heniava sivaraidia haida a gwauraidia.

⁴ Iesu sibona na haida ese e inai heniava. Filipi ese Natanael e hamaoroa Mesia e davaria neganai, Natanael na eto: “Nasaret amo ḡau namona ta bainema a?” (Ioa. 1:46) Reana Natanael na Mika 5:2 ena peroveta herevana na mai dibana bona e laloava Mesia na dia heḡereḡere Nasaret ai baine noho. Una heḡereḡerena, mai edia dagi bada Iudea taudia ese Iesu na e inai heniava badina ia na Galilea tauna. (Ioa. 7:52) Iudea taudia momo ese Galilea taudia na asie lalodia badava. Iuda taudia ma haida na e urava Iesu bae gwau henia dainai e gwauraiava Samaria tauna. (Ioa. 8:48) Samaria taudia na bese idaudia bona edia tomadiho na Iuda taudia edia amo idau. Iudea bona Galilea taudia ese Samaria taudia na asie matauraidiava bona e dadaraidiava.​—Ioa. 4:9.

5. Iesu murinai e rakava taudia be ede e inai henidia tomava?

⁵ Iuda igunalaina taudia ese danu Iesu murinai e rakava taudia na asie matauraidiava. Farisea taudia ese idia na ini e gwauraidia toma, ‘vada e baia’ taudia. (Ioa. 7:47-49) Oibe, e laloava Iuda tomadiho edia sikuli asiela eiava edia sene karadia asie badinava taudia na asi aonegadia. (Kara 4:13) Haida na edia tomadiho, dagi, bona bese idau dainai Iesu bona ena hahediba e inai henidiava. Hahediba taudia ese danu ma haida na e inai henidiava. Lalotamona ai bae noho totona, edia lalohadai bae haidau na namo.

6. Haheitalai haida amo ma haida i’inai henidia karana ese baine hakauda kerere dalana ba herevalaia.

⁶ Hari ina negai, ita na inai heheni karana lalonai ta nohomu. Reana haida ese e inai henidamu, eiava ita ese ma haida baita inai henidiamu. Australia ai, hari e painiamu taihuna ta na eto: “Guna bona hari Aboriginal taudia ediai e karaiava hahemaoro kereredia na lalova neganai, kopi kuro taudia na na inai henidiava. Una inai heheni karana na e goada badina guna egu ai danu e vara.” Canada tadikakana ta ese gado idauna e inai heniava karana e herevalaia neganai, eto: “Na laloava French gado taudia ese ma haida na e hereadia. Una dainai English gado taudia na asina ura henidiava.”

7. Edena dala ai Iesu ese inai heheni karana e dadaraia?

⁷ Iesu ena nega heḡereḡerena, hari ina negai ma haida inai henidia hemamina na goada bona baita haidaua na auka. Iesu be dahaka e kara? Ginigunana na, ia ese inai heheni karana e dadaraia, bona taunimanima iboudiai e kara namo henidiava. Ia ese taḡa taudia, ogoḡami taudia, Farisea taudia, Samaria taudia, tax gogo taudia bona kara dika taudia e haroro henidiava. Iharuana na, Iesu na ena hereva bona kara amo ena hahediba e hadibadia, ma haida basie lalodia kerere bona basie gwauraidia dika.

LALOKAU BONA MANAU KARADIA AMO HEINAI HEHENI KARANA BA HADAREREA

8. Edena hahekau hereva badana ese Kristen lalotamona karana e hahedinaraia? Ba herevalaia.

⁸ Iesu ese murinai e rakava taudia ediai mai anina bada hahekau herevana ta amo lalotamona karana e hadibadia. Eto: “Iboumui ai na tadikaka.” (Mataio 23:8, 9 ba duahi.) Momokani, ita iboudai na “tadikaka” badina ita na Adam besena. (Kara 17:26) To danu dala ma haida ai ita na tadikaka. Iesu na eto ena hahediba na tadikaka bona taihu badina mai dibadia Iehova na idia Tamadia guba ai. (Mat. 12:50) Danu, lauma dalanai idia na ruma bese badana ta, lalokau bona abidadama karana ese e hatamonadiamu. Una dainai, aposetolo taudia na edia revareva ai, nega momo hahediba taudia ma haida na e gwauraidiava ‘tadikaka bona taihu.’​—Roma 1:13; 1 Pet. 2:17; 1 Ioa. 3:13.a

9, 10. (a) Dahaka dainai Iuda taudia ese edia bese bae heaḡilaia na asi badina? (b) Edena dala ai Iesu ese e hadibadamu bese ma ta inai henina karana na dia maoro? (Rau 8 ai laulau ba itaia.)

⁹ Iesu ese e hahedinaraia ta ta na tadikaka bona taihu heḡereḡeredia baita lalodia, una murinai ia na eto baita manau na namo. (Mataio 23:11, 12 ba duahi.) Paragraf matamadiai tame herevalai heḡereḡerena, aposetolo taudia na hekokoroku dainai asie lalotamonava. Bese iheaḡilaina karana ese danu hekwakwanai e havarava. Iuda taudia na Abraham besena dainai bae hekokoroku be maoro, eiava? Iuda taudia momo na e abia daeva idia ese ma haida e hereadia. To Ioane Bapatiso ese e hamaorodia: “Dirava na mai siahuna ini nadi amo natuna bema havaradia Abraham ena.”​—Luka 3:8.

¹⁰ Iesu ese bese iheaḡilaina karana na e gwauraia dika. Ia ese itorena tauna ta ena henanadai amo una e hahedinaraia, itorena tauna na eto: “Lau dekegu tauna be daika?” Una baine haerelaia totona, Iesu ese Samaria tauna ta ena haheitalai e gwauraia, laolao tauna ta​—Iuda tauna​—na dala ai henaohenao taudia ese e dadabaia, to una Samaria tauna ese e durua. Iuda taudia ma haida ese una tau na e rakaia hanai, to Samaria tauna ese e bogaia hisi. Iesu na ena sivarai dokonai itorena tauna e hamaoroa Samaria tauna baine tohotohoa. (Luka 10:25-37) Iesu ese e hahedinaraia Samaria tauna ese Iuda taudia baine hadibadia diba, dekedia taudia be ede bae lalokau henidia toma.

11. Dahaka dainai Keriso ena hahediba ese idau taudia bae kara namo henidia, bona Iesu be edena dala ai idia e durudia una bae lalopararalaia totona?

¹¹ Iesu ena hahediba na e abia haheḡanina bae haḡuḡurua totona, hekokoroku bona heinai heheni karana bae dadaraia na namo. Iesu na guba do sela neganai, ḡaukara e henidia “Iudea idoinai bona Samaria kahana idoinai, ela bona tanobada heḡeḡe-madai” ai bae haroro. (Kara 1:8) Una ḡaukara badana bae karaia totona Iesu ese e haheḡaeḡaedia guna, e hadibadia idau taudia ediai kara namodia bae hahedinarai. Ia ese tuari lohiana ta na ena abidadama dainai e hanamoa. (Mat. 8:5-10) Iesu ese ena hanua Nasaret ai, Iehova ese idau bese taudia, heḡereḡere Sarefata ai Foenikia vabuna bona Suria ai lepra tauna Namana, e hanamodia daladia e herevalai. (Luka 4:25-27) Bona Iesu ese Samaria hahinena na dia e haroro henia mo to Samaria taonina ai dina rua e noho danu, badina taunimanima na e urava ena hereva bae kamonai.​—Ioa. 4:21-24, 40.

APOSETOLO EDIA NEGAI HEINAI HEHENI KARANA E DADARAIA DALANA

12, 13. (a) Iesu ese Samaria hahinena e haroro henia neganai aposetolo taudia be dahaka e kara? (Rau 8 ai laulau ba itaia.) (b) Dahaka ese e hahedinaraia Iakobo bona Ioane na asie laloparara?

¹² To, aposetolo taudia ese heinai heheni karana bae dadaraia na auka. Idia ese Iesu e itaia mai ena ura ida Samaria hahinena ta e hadibaia neganai e hoa. (Ioa. 4:9, 27) Iuda tomadiho igunalaina taudia ese taunimanima vairadiai hahine na asie hereva henidiava, bona Samaria hahinena ta baine hereva henia tauna na bae gwauraia dika. Aposetolo taudia ese Iesu e hamaoroa baine aniani. To ena haere ese e hahedinaraia ia na e ura dikadikava lauma ḡaudia baine herevalai, una dainai aniani na se laloa bada. Ma haida​—Samaria hahinena danu​—baine haroro henidia karana na ia Tamana ena ura, bona una na ana aniani heḡereḡerena.​—Ioa. 4:31-34.

¹³ Iakobo bona Ioane ese una na asie lalopararalaia. Hahediba taudia na Iesu ida Samaria ela neganai, Samaria hanuana ta ai mahuta gabudia e tahuva. Samaria taudia na asie ura bae abidia dae, una dainai Iakobo bona Ioane na mai badudia ida eto lahi na guba amo bae hadihoa bena una hanua ibounai baine hadikaia. To Iesu ese e gwau henidia. (Luka 9:51-56) Reana baita lalomu Iakobo bona Ioane na unu basiema kara toma bema una hanua na edia hanua Galilea ai. Toana na una hanua taudia e inai henidia dainai e badu. Aposetolo Ioane na Samaria hanuana idoinai e haroro bona momo e kamonai neganai, reana ena badu haraḡa karana dainai e hemarai dikadika.​—Kara 8:14, 25.

14. Idau gado dainai e vara hekwakwanaina be ede e hamaoromaoroa toma?

¹⁴ Pentekoste 33 C.E. murinai, hekwakwanai ta e vara. Tadikaka ese ogoḡami vabudia na aniani e henidia neganai, Grik gado ai e herevava vabudia na asie lalodia. (Kara 6:1) Reana una e vara badina idia na idau gado taudia. Aposetolo taudia ese una hekwakwanai bae hamaoromaoroa haraḡa totona, lo tataudia haida e abidia hidi aniani iharina ḡaukarana bae karaia. Unu lo Kristen tataudia ladadia na Grik ladadia. Una dainai Grik vabudia na e moale.

15. Edena dala ai Petro na e diba taunimanima oromadia basine lalo na namo? (Rau 8 ai laulau ba itaia.)

¹⁵ Laḡani 36 C.E. ai, Iesu ena hahediba ese hahediba ḡaukarana na tanobada ibounai lalonai e karaia. Una do se vara neganai, aposetolo Petro na nega momo Iuda taudia mo e bamodiava. To gabeai Dirava ese e hahedinaraia Kristen taudia ese taunimanima oromadia na basie lalo, una dainai Petro ese Korenelio, Roma edia tuari tauna ta, e haroro henia. (Kara 10:28, 34, 35 ba duahi.) Una murinai, Petro na Idau Bese taudia ida e aniani hebouva bona e bamodiava. To, laḡani haida muridiai, Antioka hanuana ai Petro na Idau Bese taudia ida se aniani hebouva. (Gal. 2:11-14) Una dainai, Paulo ese Petro e sisiba henia, bona Petro ese una sisiba na e abia dae. Petro ese Asia Minor ai Iuda bona Idau Bese Kristen taudia ediai ena revareva ginigunana e torea neganai, tadikaka ilalokau henidia karana e herevalaia.​—1 Pet. 1:1; 2:17.

16. Kristen ginigunadia edia kara be ede bamona?

¹⁶ E hahedinaraia ḡoevaḡoevamu, aposetolo taudia na Iesu ena haheitalai amo “taunimanima iboudiai” ilalokau henidia karana e dibaia. (Ioa. 12:32; 1 Tim. 4:10) Ena be nega daudau lalonai e hekwarahi, to edia lalohadai dalana na e haidaua. Momo na e diba Kristen ginigunadia ese ma haida na e lalokau henidiava. Laḡani 200 heḡereḡerena ai, toretore tauna Tertullian ese haida edia hereva Kristen taudia ediai na ini e gwauraia toma: “Idia na e helalokau hehenimu . . . Bona idia na noho heḡaeḡae bamodia daidiai bae mase totona.” Unu Kristen ginigunadia na “tau matamatana” e hahedokilaia dainai, e diba Dirava matanai taunimanima iboudiai na heheḡereḡere.​—Kol. 3:10, 11.

17. Edena dala ai kudouda amo ma haida inai henidia karana baita kokia? Haheitalai haida ba herevalaia.

¹⁷ Hari ina negai, ita danu nega daudau lalonai baita hekwarahimu kudouda amo ma haida inai henidia karana baita kokia totona. France ai, taihu ta ese ena hekwakwanai na ini e herevalaia toma: “Iehova ese lalokau anina, harihari karana, bona taunimanima iboudiai ilalokau henidia karana na e hadibagu. To lau ese ma haida inai henidia karana baina dadaraia dalana na dounu na dibaiamu, bona una na auka. Una dainai una na na ḡuriḡurilaia hanaihanaimu.” Spain taihuna ta ena hekwakwanai danu unu bamona. Ia na eto: “Nega haida na hekwarahiva idau gado taudia ibadu henidia hemamina baina dadaraia, bona nega momo na kwalimuva. To mai dibagu dounu baina hekwarahi na namo. Iehova na tenkiu heniamu, bona lalotamona ruma besena ta ai na nohomu dainai na moalemu.” Namona na ita ta ta ese eda kara eiava lalohadai baita haeroa. Unu taihu raruosi heḡereḡeredia, ita ese ma haida inai henidia hemamina baita dadaraia diba, a?

LALOKAU E BADAMU NEGANAI MA HAIDA INAI HENIDIA KARANA E OREMU

18, 19. (a) Dahaka badi dainai taunimanima iboudiai baita abidia dae? (b) Edena dala ai unu baita kara toma?

¹⁸ Namona na baita helalotao, guna ita na Dirava ena amo ta daudau. (Efe. 2:12) To Iehova ese “lalokau iḡuidia” amo e verida mai. (Hos. 11:4; Ioa. 6:44) Bona Keriso ese e abida dae. Una na vaitani iduara e kehoa, unu amo Dirava ena ruma bese lalonai baita vareai diba. (Roma 15:7 ba duahia.) Ena be ita na dia ḡoevadae, to Iesu ese mai moalena ida e abida dae, una dainai ma haida baita dadaraidia na dia lalohadai maorona!

¹⁹ Ina nega oromana dikana dokona e kahikahimu lalonai, taunimanima na e pararamu, e heinai hehenimu bona e hebadu hehenimu. (Gal. 5:19-21; 2 Tim. 3:13) To, ita na Iehova ena hesiai tauda dainai, atai amo e maimu aonega ta tahuamu, unu amo taunimanima toadia basita lalo bona maino baita havara. (Iak. 3:17, 18) Ta moalemu badina idau tano taudia ida ta heturamu, edia mauri dalana ta abia daemu bona edia gado ta dibaiamu. Unu baita kara tomamu neganai, maino na be arumu sinavai heḡereḡerena, bona kara maoromaoro na davara hurehuredia ida be heḡereḡeremu.​—Isa. 48:17, 18.

20. Lalokau ese darada bona kudouda be haidaumu neganai dahaka be varamu?

²⁰ Matamanai ta herevalaia Australia taihuna na Baibul e stadilaia karana ese e durua dalana e herevalaia, eto: “Diba maoromaorona na abia neganai, kudougu bona daragu na na hamatamata. Una dainai ma haida inai henidia karana na dadaraia.” Bona Canada tadikakana na eto, hari e lalopararamu “nega momo taunimanima asi dibadia taudia na e inai henidiamu bona taunimanima na dia edia vara gabuna dainai edia kara na idau.” Ia na English gado taihuna ta e adavaia! Unu haheitalai ese e hahedinaraimu Kristen lalokauna ese heinai heheni karana baine hadarerea diba. Lalokau na ihatamonada ḡauna hereadaena.​—Kol. 3:14.