Dirava Ena Taravatu Bona Hahekau Herevadia ese Lalomu Mamina Bae Hadibaia
“Emu hahediba herevadia na egu haero-haero ḡaudia.”—SAL. 119:99.
ANE: 29, 11
1. Dahaka ese e hahedinaraiamu ita taunimanima ese animal na ta hereadia?
ITA taunimanima ese animal ta hereadia dalana ta na, ita na mai laloda mamina. Taunimanima tanobada ai e noho matama negana amo ema bona hari una na momokani. Adam bona Heva ese Iehova ena taravatu e utua murinai, idia na e komu. Una ese e hahedinaraia lalodia mamina ese e hahemaoro henidiava.
2. Edena dala ai laloda mamina na kampas ta heḡereḡerena? (Rau 16 ai laulau ba itaia.)
2 Lalodia mamina asie hadibaia namonamo taudia na vaitani kada ta mai ena kampas dikana ta na heto. Laolao ta lalonai kampas dikana ese kada na baine hakaua kerere diba. Lai bona davara hurehuredia ese kada ena heau na bae hakererea diba. To kampas namona ese kapten baine durua diba kada na gabu maorona baine taria lao totona. Laloda mamina na una kampas namona ida baita haheḡereḡerea diba. Lalomamina ese baine duruda maoro bona kerere edia idau baita diba bona dala maorona ai baine hakauda diba. To laloda mamina ese baine hakauda namonamo totona, baita hadibaia namonamo na namo.
3. Laloda mamina basita hadibaia namonamomu neganai dahaka be vara dibamu?
3 Ta na lalona mamina basine hadibaia namonamo neganai, basine durua dibamu kara kereredia baine dadarai totona. (1 Tim. 4:1, 2) Lalodia mamina unu hetomana taudia ese ‘namo na e gwauraiamu dika.’ (Isa. 5:20) Iesu ese ia murinai e raka taudia e hadibadia, eto: “Negana vada be maimu, baine alamui mase tauna na lalona ai baineto ia na Dirava isiaina e lao heniamu.” (Ioa. 16:2) Hahediba tauna Stefano e alaia taudia bona ma haida ediai una na e vara. (Kara 6:8, 12; 7:54-60) Tomadiho taudia momo na e ala-alava, bona e laloava Dirava dainai unu e kara tomava. To una kara amo idia ese Dirava ena taravatu e utuava! (Eso. 20:13) E hahedinaraiamu, lalodia mamina ese e hakaudia kerere!
4. Edena dala ai laloda mamina baine ḡaukara namonamo diba?
4 Edena dala ai laloda mamina baine ḡaukara namonamo diba? Dirava ena Hereva lalonai e miamu taravatudia bona hahekau herevadia na “mai siahudia taunimanima ihadibadia, bona ihahelalo-kerehaidia, bona isisiba-henidia, bona kara maoromaoro ai ihakaulaidia.” (2 Tim. 3:16) Una dainai, Baibul baita stadilaia namonamo, ena hereva baita lalodia dobu, bona eda mauri ai baita badinadia neganai, laloda mamina na Dirava ena lalohadai heḡereḡerena ai baita hadibaia, bena baine hakauda namonamo diba. Namona na Iehova ena taravatu bona hahekau herevadia amo laloda mamina baita hadibaia daladia baita lalodia.
DIRAVA ENA TARAVATU ESE BAINE HADIBAMU
5, 6. Edena dala ai Dirava ena taravatu ibadinadia karana amo namo baita davarimu?
5 Dirava ena taravatu amo namo baita davari totona, unu taravatu baita duahi bona baita dibadia mo na dia heḡereḡere. Namona na baita ura henidia bona baita matauraidia. Baibul na e gwaumu: “Dika ba inai henia, namo ba ura henia.” (Amos 5:15) To edena dala ai unu baita kara toma? Ḡau iboudiai na Iehova ese e haeromu heḡereḡerenai baita haerodia na namo. Ina haheitalai aita laloa: Oi na o hekwarahimu ba mahuta namonamo totona. Emu dokta ese e hadibamu aniani namodia bavani, ba eksasais, bona emu mauri ai ḡau haida ba haidau. Unu dala o badinadia neganai, o davaria oi na e durumu! Reana dokta ese e durumu emu mauri o hanamoa dainai bo tenkiu heniamu.
6 Una heḡereḡerena, Ihavarada Tauna ese igimada totona taravatu e henida, unu amo kara dika dainai e varamu dika idauidau baita dadarai bona eda mauri baita hanamoa. Baibul ena taravatu koikoi karadia ai, henaohenao, matabodaḡa, daḡedaḡe, bona babalau karadia ai ta badinadia neganai, namo ta davari daladia ba lalodia. (Hereva Lada-isidia 6:16-19 ba duahi; Apok. 21:8) Iehova ena dala baita badinadiamu karana amo namo baita davarimu neganai, eda lalokau Ienai na be badamu bona ena taravatu danu baita lalodia badamu.
7. Baibul sivaraidia baita duahimu bona baita lalodia dobumu karana ese be durudamu dahaka baita kara?
7 Dia namo Dirava ena taravatu iutudia karana amo hisihisi baita davari bena mai anina bada ḡaudia baita diba. Baibul ai e herevalaidia taudia edia kerere amo ḡau haida baita diba. Hereva Lada-isidia 1:5 na eto: “Aonega tauna danu baine kamonai, bena ena diba baine habadaia.” Momokani, Baibul sivaraidia baita duahimu bona baita lalodia dobumu neganai, Dirava ena amo diba hereadaena baita abiamu. Heḡereḡere, King David ese Iehova ena haheḡani se badinaia bona Bataseba ida e heudahanai neganai, e mamia hisihisina a laloa. (2 Sam. 12:7-14) Una sivarai baita duahiamu bona baita laloa dobumu neganai, siboda baita henanadaimu: ‘King David na Bataseba ida e heudahanai dainai e mamia hisihisina be ede bema hanaia toma? Bema lau na una hedibaḡani baina davaria, mai goadagu ida baina dadaraia, a? Lau be Iosef heḡereḡerena baina heau, eiava David heḡereḡerena una hedibaḡani ai baina moru?’ (Gen. 39:11-15) Kara dika ese e havaramu hisihisidia baita haeromu neganai, laloda baita hagoadaiamu ‘dika baita inai henia’ totona.
8, 9. (a) Laloda mamina ese be durudamu dahaka baita kara? (b) Edena dala ai Iehova ena hahekau herevadia bona laloda mamina na e ḡaukara heboumu?
8 Dirava ese e inai henimu karadia na baita dadarai. To, kara haida eiava mauri ai e varamu ḡaudia haida na Baibul ese se taravatudia. Unu negadia ai, Dirava ese e moalelaimu bona e abi daemu ḡaudia be ede baita dibadia tomamu? Baibul amo ta hadibaia laloda mamina ese baine duruda abi hidi maorodia baita kara.
9 Iehova na mai lalokauna ida hahekau herevadia e henida, Baibul amo ta hadibaia laloda mamina baine gimaia totona. Ia na eto: “Lau binai Iehova, emu Dirava; emu namo ihabadana dalana na hadibalaimumu, emu raka dalana namona ai na hakaumumu.” (Isa. 48:17, 18) Darada bona kudouda ai Baibul ena hahekau herevadia baita lalodiamu neganai, laloda mamina baita hamaoromaoroamu, baita hakauamu, bona baita haidauamu. Una ese be durudamu abi hidi maorodia baita karamu.
DIRAVA ENA HAHEKAU HEREVADIA ESE BAINE HAKAUMU
10. Hahekau herevadia be dahaka, bona edena dala ai Iesu ese e ḡaukaralaidia namonamo?
10 Hahekau herevana na mai anina bada hereva momokanina ta eiava hahediba herevana ta ese eda lalohadai o kara baine hamaoromaoroa. Hahekau herevana baita lalopararalaia totona, Taravatu Ihenina Tauna ena lalohadai bona taravatu e henida badidia baita lalopararalai. Iesu na ena haroro ḡaukara lalonai, hereva momokani badadia amo ena hahediba e durudia kara haida edia dika bae lalopararalai. Heḡereḡere, e hadibadia badu karana ese daḡedaḡe baine havaraia diba, bona matabodaḡa lalohadaidia ese heudahanai baine havaraia diba. (Mat. 5:21, 22, 27, 28) Laloda mamina baita hadibaia namonamo totona, namona na Dirava ena hahekau herevadia ese baine hakauda bona Dirava baita heatolaia.—1 Kor. 10:31.
Lo Kristen tauna ese ma haida lalodia mamina na e matauraiamu (Paragraf 11, 12 ba ita)
11. Edena dala ai laloda mamina na idauidau?
11 Baibul amo lalodia mamina e hadibaia Kristen taudia edia lalohadai ḡau haida ai na idau. Haheitalai na, kekero muramura iḡaukaralaina karana. Baibul ese kekero muramura iḡaukaralaina karana na se taravatua. To, e hadibadamu kekero muramurana basita inua momo eiava basita kekero. (Her. 20:1; 1 Tim. 3:8) Una anina be Kristen tauna ta na se inu kekeromu dainai, abi hidi baine kara neganai ḡau ta basine laloa, a? Lasi. Ena be lalona mamina heḡereḡerena ai kekero muramurana baine ḡaukaralaia, to ma haida lalodia mamina baine laloa na namo.
12. Edena dala ai Roma 14:21 ena hereva ese e hagoadadamu ma haida lalodia mamina baita matauraia?
12 Paulo ese e hahedinaraia Kristen tauna ese ma haida lalodia mamina baine matauraia na namo, eto: “Vamu basita ania, vine ranuna basita inua, bona varavarada ihahekwakwanaina karana ta basita karaia, unu hari namo.” (Roma 14:21) Bema o laloamu ba karaia ḡauna ta na maoro, to o dibamu una ese tadikaka ta baine hahekwakwanaia diba, oi be mai emu ura ida una ba dadaraia, a? Oibe. Tadikakada haida na hereva momokani do asie diba neganai kekero karana e manadalaia, to hari lalodia e hadai una bae dadaraia. Momokani, asita uramu baita karaia ḡauna ta dainai tadikakada ta ese ena kara gunana baine lou henia. (1 Kor. 6:9, 10) Una dainai, bema tadikakada na basine ura kekero muramurana baine inua to baita doria, una na dia lalokau karana.
13. Edena dala ai Timoteo na haheitalai namona e hahedinaraia Basileia baine harorolaia totona?
13 Timoteo na laḡanina 20 heḡereḡerena ai e ura bae peritomea, unu amo baine haroro henidia Iuda taudia basine hahekwakwanaidia, herevana una na mai hisihisina. Iena kara na aposetolo Paulo heḡereḡerena. (Kara 16:3; 1 Kor. 9:19-23) Timoteo heḡereḡerena, mai emu ura ida ḡau haida o dadaraimu ma haida ba durudia totona, a?
BAITA HEKWARAHI LO TAUDIA AI BAITALA
14, 15. (a) Edena dala ai lo taudia ai baitala? (b) Edena dala ai ma haida baita lalokau henidia karana amo baita hahedinaraiamu ita na lo Kristen tauda?
14 Namona na Kristen taudia iboudiai ese Keriso ena hahediba hereva badadia bae diba, bona lo taudia ai baela. (Heb. 6:1, NWT) Una na se vara kavamu. Namona na baita hekwarahi eiava baita ḡaukara goada. Lo tauna ai baola anina na emu diba bona laloparara karana ba habadaia. Una dainai hanaihanai e hagoadadamu dina ta ta ai Baibul baita duahia. (Sal. 1:1-3) Oi be una o karaiamu, a? Unu bo kara tomamu neganai, Baibul ai Iehova ena taravatu bona hahekau herevadia bo lalopararalai namonamomu.
15 Kristen taudia ediai taravatu hereadaena na, lalokau. Iesu ese ena hahediba e hamaorodia: “Unu amo taunimanima iboudiai bae diba umui na lauegu hahediba: ba helalokau heheni dainai.” (Ioa. 13:35) Iesu tadikakana Iakobo na eto, lalokau na “haheḡani herea-daena.” (Iak. 2:8) Paulo na eto: “Lalokau na taravatu ihaḡuḡuruna.” (Roma 13:10) Una lalokau e herevalaia dalana dainai basita daradara, badina Baibul na eto: “Dirava na lalokau.” (1 Ioa. 4:8) Dirava ena lalokau na dia hemami ai mo e hahedinaraia. Ioane na eto: “Dirava ena lalokau na ini e hahedinarai henida toma: Dirava ese ia Natuna vara-edeana tanobada ai e siaia, ia bagunai baita mauri helaoreana.” (1 Ioa. 4:9) Oibe, Dirava ese ena lalokau na kara amo e hahedinaraia. Ita ese Iehova, Natuna, eda Kristen tadikaka, bona ma haida ediai lalokau baita hahedinaraia neganai, baita hamomokaniamu ita na lo Kristen tauda.—Mat. 22:37-39.
Dirava ena hahekau herevadia baita lalodia badamu neganai, laloda mamina baita hadibaia namonamomu (Paragraf 16 ba itaia)
16. Lo taudia ai baita laomu neganai, dahaka dainai hahekau herevadia baita lalodia bada?
16 Lo Kristen tauna ai bo laomu neganai, bo davariamu hahekau herevadia na mai anidia bada. Badina taravatu ese ḡau tamona e herevalaia, to hahekau herevadia ese ḡau momo e herevalaidia. Heḡereḡere, natu maraḡina ta ese hebamo dikadia ena dika na basine lalopararalaimu, una dainai tamana bona sinana ese ia igimana totona taravatu haida be atomu. (1 Kor. 15:33) To una natu be badamu neganai, Baibul ena hahekau herevadia ihaerodia dalana be dibaiamu. Unu amo ena hebamo karana ai abia hidi maorodia be kara dibamu. (1 Korinto 13:11; 14:20 ba duahi.) Dirava ena hahekau herevadia baita lalodia badamu neganai, laloda mamina baita hadibaia namonamomu, unu amo Dirava ena lalohadai baita badinaiamu.
17. Dahaka dainai baita gwau dibamu, ita na mai iduruda ḡaudia abi hidi maorodia baita kara totona?
17 Iehova ese e moalelaimu abi hididia baita kara totona iduruda ḡaudia e heni, a? Oibe. Dirava ena Hereva lalonai e maimu hahekau herevadia bona taravatu baita badinadia namonamomu neganai, “kara namo iboudiai ikaradia ai” baita kwalimumu. (2 Tim. 3:16, 17) Una dainai, Baibul ena hahekau herevadia baita tahudia namonamo, unu amo Iehova “ena ura” baita diba ḡoevaḡoevamu. (Efe. 5:17) Kristen kongrigeisen amo ta abimu heduru ḡaudia, heḡereḡere Watch Tower Publication Index, Research Guide for Jehovah’s Witnesses, Watchtower Library, Watchtower ONLINE LIBRARY, bona JW Library app baita ḡaukaralaidia namonamo. Unu tulu na siboda eda stadi bona ruma bese stadi ai baita ḡaukaralaimu neganai be durudamu.
BAIBUL AMO TA HADIBAIA LALODA MAMINA ENA HAHENAMO
18. Iehova ena taravatu bona hahekau herevadia baita badinamu neganai dahaka hahenamo baita davarimu?
18 Iehova ena taravatu bona hahekau herevadia baita badinamu neganai hahenamo baita davarimu. Salamo 119:97-100 na eto: “Emu taravatu na ura henia lalodikamu; ia na egu haero-haero ḡauna dina idoinai. Egu aonega ese inaigu edia aonega e hereaiamu, emu haheḡani ese lalogu vada e hapararaia dainai; badina be ia na egu ai hanaihanai. Egu lalo-parara ese e hadibagu taudia iboudiai edia lalo-parara e hereadiamu, badina be emu hahediba herevadia na egu haero-haero ḡaudia. Egu diba ese tatau burukadia edia diba na e hereaiamu, badina be emu hahedua herevadia na badinadiamu.” Bema nega baita atomu Dirava ena taravatu bona hahekau herevadia baita haerodiamu, aonega bona laloparara karana baita habadaia dibamu. Bona Dirava ena taravatu bona hahekau herevadia amo laloda mamina baita hadibaia namonamo neganai, “tauda bae lo, Keriso tauna e lo hahetohona heḡereḡerena.”—Efe. 4:13.