“Baola . . . Hahediba ai Ba Halaodia”

1-2. (a) Mataio 28:18-20 ai Iesu ena haheḡani heḡereḡerena, Kristen kongrigeisin ena ḡaukara badana ta be dahaka? (b) Ina atikol ai ededia henanadai baita haerelaimu?

APOSETOLO taudia na mai moaledia ida ororo ai e hebou. Iesu e toreisi lou murinai, e noidia unuseniai bae hedavari. (Mat. 28:16) Reana una ‘nega tamona ai varavara sinahu-ima mai dikoana’ (o 500) ediai e hedinarai. (1 Kor. 15:6) Dahaka dainai Iesu ese ena hahediba e boiridia unuseni ai bae hebou? Ina haheḡani baine henidia: “Taunabunai baola, bese iboudiai hahediba ai ba halaodia.”​—⁠Mataio 28:18-20 ba duahi.

² Iesu ena hereva e kamonai hahediba taudia na Kristen kongrigeisin ginigunana kahana ai ela. Una kongrigeisin ena ḡaukara badana na, momo bae durudia Keriso ena hahediba ai baela.b Hari ina negai, tanobada heḡeḡemadai Kristen momokanidia edia kongrigeisin na momo, bona iboudiai na una ḡaukara tamona e karaiamu. Ina atikol ai, henanadai hani baita herevalaimu: Dahaka dainai hahediba ihalaodia ḡaukarana na mai anina bada? Baita kara ḡaudia haida be dahaka? Una ḡaukara be Kristen taudia iboudiai ese bae karaia eiava? Bona dahaka dainai mai haheaukada ida una ḡaukara baita karaia?

DAHAKA DAINAI HAHEDIBA IHALAODIA ḠAUKARANA NA MAI ANINA BADA?

3. Ioane 14:6 bona 17:3 edia hereva heḡereḡerena, dahaka dainai hahediba ihalaodia ḡaukarana na mai anina bada?

³ Dahaka dainai hahediba ihalaodia ḡaukarana na mai anina bada? Badina Keriso ena hahediba taudia sibodia mo Dirava turana ai baela diba. Danu, Keriso e badinaiamu taudia ese hari edia mauri e hanamomu bona edia helaro na vaira negana ai bae mauri hanaihanai. (Ioane 14:6; 17:3 ba duahi.) Momokani, Iesu ese ita na maduna badana ta e henida, to una ḡaukara na ita siboda ese asita karaiamu. Aposetolo Paulo ese ia sibona bona ia e bamoava taudia na ini e herevalaidia toma: “Ai na Dirava ida a ḡaukara heboumu.” (1 Kor. 3:9) Iehova bona Keriso ese una ḡaukara na dia ḡoevadae taudia e henidia na hahenamo ta!

4. Ivan bona Matilde edia ekspiriens amo dahaka ta dibamu?

⁴ Hahediba ihalaodia ḡaukarana na mai moalena. Colombia ai, Ivan bona adavana, Matilde, edia sivarai mani aita laloa. Idia ese eregabe tauna ta ladana Davier e haroro henia, bena Davier ese e hamaorodia eto: “Lau na na uramu egu mauri baina haidaua, to egu ai na auka.” Davier na boksin tauna ta, bona drag e ḡaukaralaiva, e inu kekerova, bona ena kekeni Erika ida e noho hebouva. Ivan na e gwa: “Davier ena hanua na daudau, una dainai ia baia vadivadia totona ai na emai baskele amo hora momo kopukopu daladia ai a heauva. Erika na e itaia Davier ese ena kara bona lalohadai e haidau neganai, ia danu Baibul stadi ai e helai vareai.” Gabeai, Davier ese drag e rakatani, inu kekero karadia e hadoko bona boksin danu. Bona Erika ida edia headava e hamaoromaoroa. Matilde eto: “Davier bona Erika na laḡani 2016 ai e bapatiso neganai, Davier ese guna e gwauraia herevana a laloa, eto, ‘Lau na na uramu egu mauri baina haidaua, to egu ai na auka.’ Ai na a moale dainai a tai.” Momokani, taunimanima ta durudiamu bena Keriso ena hahediba ai e laomu neganai, ita na ta moale dikadikamu.

HAHEDIBA IHALAODIA ḠAUKARANA AI DAHAKA BAITA KARA?

5. Hahediba ihalaodia ḡaukarana ai baita karaia ḡauna ginigunana be dahaka?

⁵ Taunimanima na hahediba ai baita halaodia totona baita karaia ḡauna ginigunana na, kudou maoro taudia ‘baita tahudia.’ (Mat. 10:11) Ta davaridiamu taudia iboudiai ta haroro henidiamu neganai, ta hamomokaniamu ita na Iehova ena Witnes taudia. Danu Keriso ese e heni haheḡanina ta badinaiamu neganai, ta hahedinaraiamu ita na Kristen taudia korikoridia.

6. Taunimanima ese eda hereva bae kamonai totona dahaka baita kara na namo?

⁶ Taunimanima haida na e ura dikadikamu Baibul ena hereva momokanidia bae diba, to ta davaridiamu taudia momo na matamanai asie uramu bae kamonai. Namona na lalodia baita veri bae kamonai totona. Haroro ḡaukara baita moalelaia totona baita heḡaeḡae namonamo. Ba davaridia taudia ese bae ura heni topik haida bavabi. Bena unu topik ta ta ba herevalai daladia ba haerodia.

7. Emu hereva be ede ba hamatamaia toma, bona dahaka dainai baita hakala bona baita hemataurai na ḡau badana?

⁷ Heḡereḡere, reana ruma tauna ba nanadaia: “Na uramu ina henanadai amo emu lalohadai baina diba. Tanobada heḡeḡemadai ta davarimu hekwakwanaidia ese taunimanima edia mauri e hadikaiamu. O laloamu gavamani ta ese ini hekwakwanai baine haore diba?” Bena Daniel 2:44 ba herevalaia diba. Eiava reana dekemu tauna ta ba nanadaia: “Natu be edena dala ai baita hadibadia unu amo kara namodia bae hahedinarai? Emu lalohadai be dahaka?” Bena Deuteronomi 6:6, 7 ba herevalaia. Ba herevalaia topik o abia hidimu neganai, kamonai taudia ba lalodia. Baibul ena hereva ese bae durudia dalana ba laloa. Idia ida o herevaherevamu neganai, ḡau badana na edia hereva ba hakala bona edia lalohadai ba matauraia. Unu amo bo lalopararalaidia namonamomu, bona idia danu be uramu oi bae kamonai henimu.

8. Dahaka dainai kamonai tauna na baita vadivadia loulou?

⁸ Ta ese Baibul stadi baine abia dae totona, namona na ba vadivadia loulou. Dahaka dainai? Badina ta o lou heniamu neganai, reana ena rumai na basio davariamu. Danu, ruma tauna ba lou henia loulou ela bona oi baine manadamu, una murinai reana be uramu Baibul baine stadilaia. Ba helalotao, au ta na bo dairia hanaihanaimu neganai be tubumu. Una heḡereḡerena, kamonai tauna ida Dirava ena Hereva baita herevalaia hanaihanaimu neganai, iena lalokau Iehova bona Keriso ediai na be badamu.

KRISTEN TAUDIA IBOUDIAI ESE HAHEDIBA IHALAODIA ḠAUKARANA BAE KARAIA DIBA EIAVA?

9-10. Dahaka dainai baita gwau dibamu Kristen taudia iboudiai ese kudou maoro taudia bae davaridia totona bae ḡaukara hebou na namo?

⁹ Kristen taudia iboudiai ese kudou maoro taudia bae davaridia totona bae ḡaukara hebou na namo. Una ḡaukara na e boio maraḡina ta itahuna ḡaukarana ida baita haheḡereḡerea. Edena dala ai? Mani e vara momokani sivaraina ta aita laloa. Laḡanina 3 merona ta na e raka boio, bena taunimanima 500 bamona e volentia ia bae tahua. Hora 20 heḡereḡerena murinai, volentia ta ese koni umana ta ai una mero maraḡina e davaria. To una volentia na se ura taunimanima ese bae imodaia. Una dainai, ia na e gwa: “Taunimanima momo e ḡaukara hebou una mero e davaria.”

¹⁰ Taunimanima momo na una boio merona heḡereḡerena. Idia na asi edia helaro, to heduru e uramu. (Efe. 2:12) Ita iboudai 8 milion mai kahana na ta ḡaukara heboumu taunimanima unu bamodia baita davaridia. Reana oi ese Baibul e uramu baine stadilaia tauna ta basio davariamu. To, una teritori tamona ai pablisa haida ese hereva momokani e uramu baine dibaia tauna ta be davariamu. Tadikaka o taihu ta ese e davaria tauna ta na Keriso ena hahediba ai e laomu neganai, una ḡaukara ai e heduru taudia iboudiai na e moalemu.

11. Bema oi na do asi emu Baibul stadi ta, ededia dala haida ai hahediba ihalaodia ḡaukarana ai ba heduru diba?

¹¹ Ena be oi na do asi emu Baibul stadi ta, to dala haida ai hahediba ihalaodia ḡaukarana ai ba heduru diba. Heḡereḡere, kamonai taudia matamatadia na Kingdom Hall e maimu neganai ba welkam henidia. Dala unu bamodia ai, lalokau bo hahedinaraiamu neganai, idia na be diba momokanimu ita na Kristen taudia korikoridia. (Ioa. 13:34, 35) Hebou negadiai emu haere o henimu daladia amo kamonai taudia o hadibadiamu, idia danu edia abidadama na una dala ai bae gwauraia hedinarai. Danu, haroro ḡaukara ai pablisa matamata ta ida ba ḡaukara hebou diba bona ba durua Baibul amo taunimanima baine hadibadia namonamo. Bema unu bo kara tomamu, Keriso baine tohotohoa daladia bo hadibaiamu.​—Luka 10:25-28.

12. Haida hahediba ai baita halaodia totona eda diba baita habadaia guna be namo, eiava? Ba herevalaia.

¹² Basitato eda diba baita habadaia guna bena haida baita durudia Iesu ena hahediba ai baela. Dahaka dainai? Bolivia ai e nohomu hahinena ta, Faustina, ena sivarai mani aita laloa. Iehova ena Witnes taudia e hedavari henidia matama neganai, ia na asi duahiduahi dibana. Una nega amo, ia na taina ruana duahiduahi e diba. Hari ia na bapatiso taihu ta, bona haida ihadibadia karana na e moalelaiamu. Wiki ta ta ia na Baibul stadi 5 e karamu. Ena be Faustina na se duahiduahi namonamomu to ena stadi taudia 6 e durudia ela bona e bapatiso.​—Luka 10:21.

13. Ena be ta bisimu, to hahediba ihalaodia ḡaukarana amo baita davari hahenamodia haida be dahaka?

¹³ Kristen taudia momo na mai anina bada madunadia e huamu dainai e bisimu. To dounu, nega e atomu Baibul stadi bae kara, bona una ḡaukara na e moalelaiamu. Heḡereḡere, Alaska ai taihu ta ladana Melanie na natuna kekenina laḡanina 8 ida sibodia e nohomu. Ia na fultaim moni ḡaukara e karaiamu bona tamana, kensa gorere e abia tauna, e nariamu. Danu Melanie e nohomu taonina na daudau bona unuseniai ia sibona mo Witnes. Iena ḡuriḡuri ai Dirava e noiava goada baine henia, unu amo keru negana lalonai baine haroro, badina e ura dikadikava Baibul stadi ta baine davaria. Gabeai Sara e davaria; Sara ese Dirava ladana korikorina e dibaia neganai e moale. Dina haida muridiai, Sara na Baibul stadi e abia dae. Melanie eto: “Friday adorahi iboudiai, tauanigu na e hesikuva, to natugu ida a laova Sara ena stadi baia karaia, bona una ese ai na e durumai. Sara ena henanadai haeredia itahudia karana na a moalelaiava, bona ia na Iehova turana ai ela neganai ai na a moale bada.” Sara na daḡedaḡe bada e davari to e haheauka, ena dubu e rakatania, bona e bapatiso.

DAHAKA DAINAI BAITA HAHEAUKA NA NAMO?

14. (a) Edena dala ai hahediba ihalaodia ḡaukarana na haoda ḡaukarana heḡereḡerena? (b) 2 Timoteo 4:1, 2 ai Paulo ena hereva ese oi be ede e durumu tomamu?

¹⁴ Bema o haroromu to stadi ta so davariamu, namona na basio hesiku ela bona ta ba davaria. Ba helalotao Iesu ese hahediba ihalaodia ḡaukarana na haoda ḡaukarana ida e haheḡereḡerea. Haoda taudia na hora momo e haodamu gwarume bae abi helaoreana. Nega momo e haodamu ela bona malo eiava daba kahana, bona nega haida gabu daudaudia e laomu. (Luka 5:5) Una heḡereḡerena, pablisa haida na hora momo lalodiai mai haheaukadia ida nega bona gabu idauidau ai e haroromu. Dahaka dainai? Badina e uramu taunimanima momo bae hereva henidia. Unu e ḡaukara goadagoada tomamu dainai, kamonai taudia momo e davaridiamu. O uramu taunimanima ba davaridia negana eiava gabuna ta ai ba haroro, a?​—2 Timoteo 4:1, 2 ba duahi.

15. Dahaka dainai Baibul stadi ta karamu neganai baita haheauka?

¹⁵ Dahaka dainai Baibul stadi ta karamu neganai baita haheauka na mai anina bada? Badi ta na, stiuden baita durua Baibul ena hahediba herevadia baine diba bona baine ura henidia. Dia una mo, to baita durua Baibul Itorena Tauna, Iehova, baine dibaia bona baine lalokau henia. Danu Iesu ese e haheḡanilai ḡaudia bona unu haheḡani baine badina daladia baita hadibaia. Bema stiuden na e hekwarahimu Baibul ena hahekau herevadia baine badina, namona na mai haheaukada ida baita durua. Stiuden haida be hua haida lalodiai edia lalohadai bona kara e haidaumu. A haida ese edia lalohadai bona kara na se haidau haraḡamu.

16. Raúl ena sivarai amo dahaka o dibamu?

¹⁶ Peru ai, misinari tauna ta na e haheauka dainai anina namona e vara. Ia na ini e gwau toma: “Baibul stiuden ta ladana Raúl ida buka rua a stadilai. To ia na ena mauri lalonai hekwakwanai badadia haida na dounu e davariva. Ena headava maurina na dia namo, hereva dikadia e gwaurai momova, bona ena kara dainai natuna ese se matauraiava. To, ia na hanaihanai hebou e maiva dainai dounu na vadivadi heniava bona ena ruma bese ida na durudiava. Laḡani toi mai kahana murinai, ia na e heḡereḡere bapatiso baine abi.”

17. Atikol gabena ai dahaka baita herevalaiamu?

¹⁷ Iesu na ita e haḡanida, eto, “baola, bese iboudiai hahediba ai ba halaodia.” Una ḡaukara baita haḡuḡurua totona, taunimanima idauidau ta hereva henidiamu; idia momo edia lalohadai na ita eda amo idau, ma haida be dubu asie laomu eiava asie abia daemu Dirava na e nohomu. Atikol gabena ai, taunimanima idauidau ediai sivarai namona baita harorolaia dalana baita herevalaiamu.