KRISTEN EDIA MAURI
Iehova Ena Kara Maoromaoro Taravatudia Baita Badina
Iehova Dirava ese kara maoromaoro taravatudia na e ato taunimanima ese bae badina helaoreana. Heḡereḡere, Ia na eto headava na baine mia hanaihanai ḡauna. (Mt 19:4-6, 9) Ia ese matabodaḡa karadia iboudiai na e inai henidiamu. (1Ko 6:9, 10) Ia ese danu dabua bona heḡoeva daladia ai hahekau herevadia e ato, unu amo ena taunimanima na taunimanima ma haida amo bae idau.—De 22:5; 1Ti 2:9, 10.
Hari ina negai, momo ese Iehova ena taravatu na e dadaraimu. (Ro 1:18-32) Idia ese taunimanima edia lalohadai dabua bona heḡoeva daladia ai, bona kara ai e badinamu. Momo ese kara dikadia na asie kara garimu bona idia asie badinadiamu taudia na e maumauraidiamu.—1Pe 4:3, 4.
Ita na Iehova ena Witnes tauda dainai, namona na basita gari to Dirava ena kara maoromaoro taravatudia baita badina. (Ro 12:9) Edena dalai? Namona na taunimanima baita hadibadia ededia kara be Dirava ese e abi daemu. To danu, namona na eda mauri lalonai Iena kara maoromaoro taravatudia baita badina. Heḡereḡere, dabua bona heḡoeva daladia baita abi hidi neganai, siboda baita henanadai: ‘Egu abi hidi ese Iehova ena taravatu e hahedinaraiamu eiava tanobada ena lalohadai e hahedinaraiamu? Egu dabua bona heḡoeva dalana ese e hahedinaraiamu lau be Dirava na gari heniamu, a?’ Eiava TV program o muvi ta baita abia hidi neganai, siboda baita henanadai: ‘Iehova ese ina program be e abia daemu, a? Daika ena ura e hahedinaraimu? Na abi hidimu moale karadia ese kara maoromaoro taravatudia baina badina urana e hamaraḡiamu, a? (Sa 101:3) Una ese egu ruma bese o ma haida baine hahekwakwanaidia diba, eiava?’—1Ko 10:31-33.
Dahaka dainai Iehova ena kara maoromaoro taravatudia baita badina na mai anina bada? Kahirakahira Keriso Iesu ese bese idauidau bona kara dikadia iboudiai baine haoredia. (Ese 9:4-7) To Dirava ena ura e karaiamu taudia mo bae mauri. (1Io 2:15-17) Una dainai, namona na Iehova ena kara maoromaoro taravatudia baita badina, unu amo eda kara namodia bae ita taudia ese Dirava bae imodaia.—1Pe 2:11, 12.
Egu dabua bona heḡoeva dalana ese egu kara be ede hahedinaraia tomamu?
VIDIO LADANA IEHOVA TURANA AI BAOLA—TAU TAMONA, HAHINE TAMONA, BA ITAIA, BENA INI HENANADAI BA HEREVALAI:
Dahaka dainai Iehova ena taravatu baita badina na aonega karana?
Dahaka dainai tama sina ese natudia na maraḡidiai Iehova ena kara maoromaoro taravatudia bae hadibalaidia?
Edena dalai eregabe bona burukadia ese taunimanima bae durudia Dirava ena kara namo amo hahenamo bae abi?