Edena Nega ai Ina Tanobada Dokona be Kaumu? Iesu be Dahaka Eto?

IESU BE DAHAKA ETO:

“Taunabunai, ba gima: badina be dina bona hora na asi dibamui.”​—MATAIO 25:13.

“Umui na nahuamui ba toho: ba gima, ba ḡuriḡuri, badina be nega [“Dirava ese e abia hidi negana,” NWT] na asi dibamui.”​—MAREKO 13:33.

Ina “tanobada na baine lao bubuni” negana na asi dibada. To, “Dirava ese e abia hidi negana”​—“dina bona hora”​—ai ina tanobada baine haorea. (Mataio 24:36) To ede baita diba toma, ina tanobada dokona na vada kairakaira? Iesu ese aposetolo e hamaorodia, idia na toa haida amo bae laloparara, Dirava ese tanobada baine haorea negana na kairakaira.

IESU ESE E GWAURAI TOADIA

Iesu ese “tanobada dokona” toadia haida na e herevalaidia. Ia eto: “Badina be bese ta bese ta ida bae heala-ala heheni, bona [gavamani] ta [gavamani] ta ida bae tuari. Gabu idau-idau ai doe bona . . . tano danu bae laga.” (Mataio 24:3, 7) Iesu ma eto, epidemic eiava “dai-hanai goreredia bae vara.” (Luka 21:11) Iesu ese e perovetalai ḡaudia e varamu be oi ese o itamu danu, a?

Ina negai, tanobada ai tuari, hitolo, tano laga bona gorere idauidau na e vara louloumu. Laḡani 2004 lalonai, Indian Ocean ai e vara tano laga badana ta ese hurehure bada hereana (tsunami) ta e havaraia​—una ese taunimanima 225,000 e hamasedia. Laḡani 2019 bona 2020 lalodiai, gorere ladana COVID-19 pandemic ese taunimanima 2.6 milion e hamasedia. Iesu na eto, ḡau unuhetomadia amo ba diba ina system o tanobada dokona na kairakaira.

“DINA GABEDIA” O “NEGA DOKONA”

Baibul ese ina tanobada dokona na e gwauraia danu, dina gabedia eiava “nega dokona.” (2 Petro 3:3, 4) Baibul na eto, “dina gabedia” ai taunimanima na kara namodia bae dadarai. (2 Timoteo 3:1-5; Maua ladana “Tanobada Dokona Toadia” ba duahia.) Hari ina nega ai, taunimanima na e hekokorokumu, e mataḡaniḡanimu, e daḡedaḡemu, bona lalokau na asi dibadia​—unu o itamu, a? Kara unuhetomadia amo danu baita dibamu, ita na “dina gabedia” o “nega dokona” ai vada ta nohomu.

Baibul na eto, ini “dina gabedia” o “nega dokona” na “kwadoḡi.” Bona dina ginigabena ai, Dirava ese “tanobada ihadikana taudia” na baine hamasedia.​—Apokalupo 11:15-18; 12:12.

TANOBADA MAI HAIRAINA NA KAHIRAKAHIRA!

Dirava ese ina tanobada, Satana ena system dikana, baine haorea dinana bona horana na vada e abia hidi. (Mataio 24:36; NWT) To, sivarai namona ma ta binai: Dirava na “se uramu ta baine mase.” (2 Petro 3:9) Ia na e uramu ena taravatu baita dibadia bona baita badinadia. Dahaka dainai? Badina ia na e uramu ina tanobada dokona ai baita roho mauri bona tanobada matamatana mai hairaina lalonai baita noho.

Dirava ese taunimanima na e hadibadia namonamomu, badina ia na e uramu idia na tanobada matamatana ai bae noho bona guba Gavamanina ese baine lohiadia. Iesu na eto, Dirava ena Gavamani sivaraina namona na “tanobada idoinai” bae harorolaia. (Mataio 24:14) Laḡani 2019 ai, tanobada heḡeḡemadai, Iehova ena Witnes ese hora 2 bilion mai kahana e ḡaukaralai, Baibul amo sivarai namona e harorolaia bona e hahedibalaia. Iesu na eto, ina haroro ḡaukara na tanobada idoinai bae karaia, bena dokona vada baine kau.

Taunimanima edia gavamani iboudiai na kairakaira be oremu. To sivarai namona binai: Dirava ese ina tanobada baine haorea neganai, oi na ba roho mauri bena tanobada mai hairaina ai ba noho diba, Dirava e gwauhamata heḡereḡerena. Rau 10-12 sivaraina na tanobada matamatana ai ba noho dalana be herevalaiamu.