Kongrigeisin ese Baibul Stadi Bae Durudia ela Bona Bae Bapatiso

1-2. Daika ese Baibul stadi baine durua ela bona baine bapatiso?

FIJI ai e nohomu hahinena, Amy, na e gwa: “Baibul amo na dibava ḡaudia na, na ura henidiava. Mai dibagu una na hereva momokani. To, tadikaka taihu na bamodia neganai, egu mauri na haidaua bena na goada ela bona na bapatiso.” Amy enai e vara ḡauna ese ina mai anina bada ḡauna e hadibadamu: Baibul stadi ta na baine goada ela bona baine bapatiso diba bema kongrigeisin taudia ese bae durua.

² Pablisa ta ta ese kongrigeisin ena tubu baine durua diba. (Efe. 4:16) Vanuatu ai e nohomu painia ladana Leilani na e gwa: “Hanua taudia ese maraḡina ta be durua dibamu. Na laloamu una na momokani, hahediba ihalaodia ḡaukaranai danu; kongrigeisin taudia ese ta na bae durua diba hereva momokani lalonai baine vareai.” Ruma bese taudia, tura, bona skuli hahedibadia ese maraḡina ta bae durua diba taunimanima badana ta ai bainela. Idia ese natu e hagoadaiamu, bona mai anina bada sisibadia e hadibaiamu. Una heḡereḡerena, pablisa iboudiai ese Baibul stadi tauna na sisiba, hahegoada, bona haheitalai namodia amo bae durua ela bona baine bapatiso.​—Her. 15:22.

3. Ana, Dorin, bona Leilani edia hereva amo dahaka o dibamu?

³ Dahaka dainai stadi e karaiamu pablisana ese tadikaka taihu edia heduru baine abi dae na namo? Moldova ai e spesol painiamu taihuna, Ana na e gwa, “Taunimanima tamona ese Baibul stiuden baine goada totona baine durulaia ḡaudia iboudiai na basine henia dibamu.” Una hanua tamona ai e spesol painiamu tadikakana, Dorin na e gwa, “Nega momo, pablisa haida ese e gwauraimu ḡaudia ese egu Baibul stiuden kudouna na e hamarereamu, unu na lau ese asina lalo herevadia.” Leilani ese badi ma ta e gwauraia, “Baibul stiuden baita lalokau heniamu bona baita kara namo heniamu neganai, ia na be lalopararamu ita na Iehova ena taunimanima.”​—Ioa. 13:35.

4. Ina stadi ai dahaka baita herevalaimu?

⁴ To, reana bo laloamu, ‘Edena dalai, Baibul stadi ta baina durua ela bona baine bapatiso bema ia na dia lau ese na stadi heniamu?’ Edia stadi ai ta helai vareaimu neganai baita kara diba ḡaudia bona hebou e maimu neganai baita kara diba ḡaudia baita herevalaimu. Bona elda ese Baibul stadi bae durua ela bona bae bapatiso daladia baita herevalaimu.

BAIBUL STADI TA AI BA HELAI VAREAI NEGANAI

5. Baibul stadi ta lalonai ba helai vareai neganai dahaka ba kara?

⁵ Baibul stadi ai, stadi e karaiamu tauna ena maduna badana na, stadi tauna baine durua Dirava ena Hereva baine lalopararalaia. Bema stadi ikarana tauna ese baine boirimu ia ba bamoa, namona na ba laloa oi na ia iduruna tauna. (Koh. 4:9, 10) Dahaka ba kara diba una stadi negana baine heau namonamo totona?

6. Bema oi na ta ena stadi ai bo helai vareaiamu, edena dalai Hereva Lada-isidia 20:18 ena hahekau herevana ba badinaia diba?

⁶ Baibul stadi totona ba heḡaeḡae. Ḡau ginigunana na, stadi ikarana tauna ba noia stadi tauna sivaraina taina baine herevalaia. (Hereva Lada-isidia 20:18 ba duahia.) Reana ba nanadaia: “Stadi tauna ena mauri dalana be ede bamona? Edena topik bo ha herevalaiamu? Ina stadi ai o uramu stadi tauna be dahaka baine diba? Stadi ai be dahaka baina kara o baina gwaurai diba? Stadi tauna be ede baina hagoadaia toma?” Momokani, stadi ikarana tauna ese ena stadi tauna ena hehuni herevadia na basine gwauraimu, to baine gwaurai diba ḡaudia ese oi baine durumu diba. Misinari ta ladana Joy ese ini henanadai na ia e bamoamu tauna ida e herevalaimu. Ia na e gwa: “E bamogumu tauna ida unu a herevalaimu dainai, e duruamu stadi tauna baine laloa bada bona stadi ai heduru hereva namodia baine gwaurai diba.”

7. Bema oi na stadi ta lalonai bo helai vareaimu, dahaka dainai ba heḡaeḡae na namo?

⁷ Bema oi na stadi ta lalonai ba helai vareai, namona na bo stadilaiamu kahana ba heḡaeḡaelaia na namo. (Esra 7:10) Dorin, matamanai tame herevalaia tadikakana, na e gwa: “Na moalemu, bema e bamogumu tauna na stadi totona e heḡaeḡaemu. Unu amo heduru hereva namodia baine gwaurai diba.” Danu, stadi tauna ese baine itaia diba umui raruosi na o heḡaeḡae namonamo, bona ienai una na haheitalai namona. Ena be ba stadilaia ḡauna ibounai na so heḡaeḡaelaia ḡoevaḡoeva, to namona na hereva badadia haida ba lalodia tao.

8. Edena dalai stadi ai ḡuriḡuri namona ba gwauraia diba?

⁸ Ḡuriḡuri na mai anina bada ḡauna ta. Una dainai stadi ikarana tauna ese be noimumu ḡuriḡuri ba gwauraia neganai, namona na bo gwauraimu herevadia ba lalo guna. Unu amo bo gwauraimu herevadia na mai anidia bada. (Sal. 141:2) Japan ai e nohomu hahinena, Hanae, na ena stadi lalonai e helai vareai taihuna ena ḡuriḡuri na doini e laloataomu. E gwa: “Na itaia iena hetura karana Iehova ida na goada. Bona na uramu ia heḡereḡerena ai bainala. Na mamia e lalokau henigumu badina ena ḡuriḡuri ai ladagu danu e gwauraia.”

9. Iakobo 1:19 ena hereva heḡereḡerena, dahaka ba kara diba hebamo tauna namona ai baola?

⁹ Stadi ikarana tauna ba durua. Omamuyovbi, spesol painia ta Nigeria ai na e gwa: “Hebamo tauna namona na stadi lalonai baine kamonai namonamo. Heduru herevadia baine gwaurai, to basine hereva momo, namona na baine diba stadi na mai ihakauna.” To edena negai bona edena dalai stadi ba durua diba? (Her. 25:11) Stadi e hakauamu tauna bona stadi tauna e herevaherevamu neganai ba hakala namonamo. (Iakobo 1:19 ba duahia.) Unu amo ba heḡaeḡae diba ba heduru totona. To momokani, namona na ḡau ba haero namonamo bena gabeai ba hereva. Heḡereḡere, dia namo ba hereva momo, eiava stadi e karaiamu tauna ena hereva ba utua, o topik idauna ta ba herevalaia. To hereva kwadoḡina, haheitalai ta, o henanadai ta amo e herevalaiamu ḡauna ba hahedinaraia. Nega haida be reana hereva haida basio gwauraimu. To bema ena kara ta dainai ba hanamoa bona ba hahedinaraia ia na o laloa badamu, una ese be duruamu lauma dalanai baine goada.

10. Edena dalai emu ekspiriens ese stadi tauna baine durua diba?

¹⁰ Emu ekspiriens ba gwauraia. Bema heḡereḡere, hereva momokani o abia dalana, hahetoho ta o hanaia dalana, o Iehova ese e durumu dalana taina ba herevalaia. (Sal. 78:4, 7) Reana emu ekspiriens ese ena abidadama be hagoadaia dibamu bona be duruamu baine goada ela bona baine bapatiso. Bona reana una ese baine durua e davariamu hahetohona baine hahanaia. (1 Pet. 5:9) Gabriel, Brazil ai e painiamu, na Baibul e stadilaiava neganai e abi hahenamodia e lalodia taomu. E gwa: “Tadikaka ena ekspiriens na kamonai neganai, na diba Iehova ese ta davarimu hahetohodia na e itamu. Bona bema idia ese na e hanaia, lau ese danu baina hanaia diba.”

BAIBUL STADI NA HEBOU BAINEMA NEGANAI

11-12. Dahaka dainai stadi tauna hebou bainema neganai baita abia dae?

¹¹ Baibul stadi baine goada ela bona baine bapatiso totona, baine hebou hanaihanai bona unu hebou amo heduru baine abi na namo. (Heb. 10:24, 25) E stadi heniamu tauna ese hebou ginigunana totona be vaveamu. Bema e maimu, ita iboudai ese baita hagoadaia Kingdom Hall bainema hanaihanai. Edena dalai unu baita kara toma diba?

¹² Stadi tauna baita abia dae. (Roma 15:7) Bema hebou neganai stadi tauna na baine mamia ia na ta abia daemu, be uramu Kingdom Hall bainema hanaihanai. Basine hemarai totona, mai eda lalokau ida baita abia dae, bona baita laohaia ma haida baine hedavari henidia. Dia baitato, ia na mai itataona; reana e stadi heniamu tauna na e leidi o mai ena maduna haida. Stadi tauna e herevamu neganai, baita kamonai namonamo, bona baita hahedinaraia ia na ta laloa badamu. Emu heabidae karana namona dainai dahaka baine vara diba? Mani Dmitrii, laḡani haida gunanai e bapatiso bona hari ia na hesiai tauna, enai e vara ḡauna a laloa. Hebou ginigunana ela negana e laloamu neganai, e gwa: “Tadikaka ta ese Kingdom Hall murimurinai e itagu mai hemaraigu ida gini, bona ema bena e hakaugu vareai Kingdom Hall ai. Momo ema e hedavari henigu. Una na na moalelaia bada dainai na urava dina iboudiai baina hebou. Na mamia ma gabu ta ai unu bamona hemamina na asina abia.”

13. Emu kara dainai stadi tauna be dahaka be karamu?

¹³ Haheitalai namona ba hahedinaraia. Emu kara ese stadi tauna baine durua diba, baine abia dae ia ese hereva momokani e davaria. (Mat. 5:16) Vitalii, hari Moldova ai e painiamu na e gwa: “Kongrigeisin taudia haida edia noho dalana bona edia kara na diba. Una ese e durugu, na abia dae Iehova ena Witnes na tomadiho momokanina.”

14. Edena dalai emu kara ese ta baine durua, lauma dalanai baine goada?

¹⁴ Stiuden ta baine bapatiso totona, ia ese e dibamu ḡaudia baine badina na namo. To una na dia haraḡa. Bema stiuden ese Baibul ena hahekau herevadia o badinamu karana ese e durumumu dalana be itaiamu neganai, una ese be hagoadaiamu oi baine tohotohomu. (1 Kor. 11:1) Mani Hanae, matamanai tame herevalaia taihuna enai e vara ḡauna a laloa. E gwa: “Lau na dibava ḡaudia na tadikaka taihu ediai na itava. Edia kara amo, ma haida baina hagoadadia, edia dika baina gwautao, bona baina lalokau henidia daladia na diba. Idia na hanaihanai ma haida edia kara namodia e herevalaiva. Na uramu baina tohotohodia.”

15. Hereva Lada-isidia 27:17 heḡereḡerena, dahaka dainai stadi tauna hebou e maimu neganai baita hetura henia?

¹⁵ Stadi tauna ba hetura henia. Stadi tauna na hebou e maimu neganai, ba hahedinaraia o laloa badamu. (Fili. 2:4) Namona na ba hereva henia. Dia iena mauri ibounai ba diba, to ena kara e haidau dainai ba hanamoa, bona ena Baibul stadi, ena ruma bese, bona ena moni ḡaukara daidiai ba henanadai. Unu bamona herevahereva karana ese emui hetura karana baine hanamoa diba. Stadi tauna bo hetura heniamu neganai, bo duruamu baine goada ela bona baine bapatiso. (Hereva Lada-isidia 27:17 ba duahia.) Hanae, hari na de painiamu. Nega ginigunana hebou ela e laloamu neganai, e gwa: “Kongrigeisin taudia ida na hetura neganai, na urava hebou bainala, bona ena be na hesikuva to na laova. Turagu matamatadia edia hebamo na na moalelaiava, bona una ese e durugu Iehova asie tomadiho heniava taudia na dadaraidia. Na urava Iehova bona tadikaka taihu baina hakahikahidia. Una dainai, na bapatiso.”

16. Dahaka danu ba kara diba stadi tauna ba durua baine mamia kongrigeisin ese e abia daemu?

¹⁶ Stadi tauna na baine goada bona ena mauri baine haidaua neganai, ba durua bena baine mamia ia danu kongrigeisin tauna ta. Una na heabidae karana amo ba hahedinaraia diba. (Heb. 13:2) Denis, Moldova ai hesiai ḡaukara e karaiamu, ese Baibul e stadilaiava negana e laloa lou neganai, e gwa: “Nega haida tadikaka ese lau bona adavagu e boirimaiva, idia ida baia moale hebou. Iehova ese e durudia dalana e herevalaiava neganai, una ese e hagoadamai. Nega unu bamodia ese e durumai a abia dae ai danu a urava Iehova baia hesiai henia bona mauri hereana vaira neganai baia abia.” Stadi tauna na e heḡereḡeremu pablisa ai bainela neganai, ba noia oi ida ba haroro hebou. Diego, Brazil ai e nohomu pablisana, na e gwa: “Tadikaka momo ese e boirigu idia ida baia haroro. Una na dala namona idia baina dibadia namonamo. Unu na kara toma neganai, ḡau momo na diba, bona na mamia egu hetura karana Iehova bona Iesu ida na e hagoadaia.”

EDENA DALAI ELDA BAE HEDURU DIBA?

17. Edena dalai elda ese stadi tauna bae durua diba?

¹⁷ Stadi tauna totona nega bavato. Elda e, stadi tauna ba laloa bada karana ese baine durua, baine goada ela bona baine bapatiso. Hanaihanai stadi taudia o hereva henidiamu, a? Be mamiamu o lalodiamu bema ladadia na bo lalotaomu, una na mai anina e haere matamamu neganai. Nega ta ta emu sediual ba haidaua diba pablisa ida ena stadi ba karaia. Reana basio laloamu, to emu kara ese stadi tauna baine durua diba. Nigeria ai e nohomu painiana ladana Jackie na e gwa: “Egu stadi momo na e hoamu bema e dibamu lau e bamogu tadikakana na elda tauna. Egu stadi ta na e gwa: ‘Emai haroro tauna na unu na se kara tomamu. Taḡa taudia mo e vadivadi henidiamu bona e vadivadimu bema moni bae henia!’” Hari una stadi tauna na e heboumu.

18. Edena dalai elda ese Aposetolo Edia Kara 20:28 ese e gwauraia madunana bae haḡuḡurua diba?

¹⁸ Baibul stadi e hakaumu taudia ba hadibadia bona ba hagoadadia. Elda e, emui maduna na bada pablisa ba durudia hesiai ḡaukara bae karaia namonamo, anina na Baibul stadi karana danu. (Aposetolo Edia Kara 20:28 ba duahia.) Bema pablisa na oi noho dainai e hemaraimu stadi baine karaia, ba noia oi ese stadi ba karaia. Jackie, guna tame herevalaia, na e gwa: “Elda na nega iboudiai egu Baibul stadi totodia e henanadaimu. Baibul stadi ikaranai na hekwarahimu neganai, heduru hereva namodia e gwauraimu.” Elda ese hahediba taudia bae durudia bada bona bae hagoadadia diba bae haheauka totona. (1 Tes. 5:11) Jackie na ma e gwa: “Na moalemu elda ese e hagoadagumu bona e hamaorogumu egu hekwarahi na e laloa badamu. Hereva unu bamodia ese e hagoadagumu, vaitani dina siahuna ai ranu parakana ta na inuamu na heto. Edia hahenamo herevadia ese egu ura na e habadaiamu bona mai moalegu ida egu Baibul stadi na karadia namonamomu.”​—Her. 25:25.

19. Ita iboudai ese dahaka baita moalelaia diba?

¹⁹ Ena be hari Baibul stadi ta do asita karaiamu, to ta baita durua diba lauma dalanai baine goada. Basita hereva momo, to eda heḡaeḡae namonamo karana dainai heduru hereva namodia amo stadi lalonai, stadi e hakauamu tauna baita durua diba. Stadi taudia na hebou baema neganai baita hetura henidia, bona idia ediai haheitalai namona baita hahedinaraia. Bona elda ese stadi taudia bona stadi ihakauna taudia bae hagoadadia diba, bema idia totodia nega bae ato bae hadibadia bona bae hanamodia. Momokani, dala maraḡina ai ta baita duruamu Tamada Iehova be lalokau heniamu bona be hesiai heniamu neganai, baita moalemu.