Iehova Ena Taunimanima ese Kara Maoromaoro Na E Ura Heniamu

1. Iosef be edena hahetoho e davaria, bona dahaka e kara?

IAKOBO natuna Iosef na hahetoho aukana ta e davaria. Hahine ta na ia e hamaoroa: “Raruosi bae eno bou.” Una hahine na Iosef biaguna, Potifara adavana. Iosef ese una hahine ena ura na e dadaraia. Readia hari ina negai ta na be lalomu, ‘Dahaka dainai Iosef ese una hedibaḡani na e dadaraia?’ Potifara na gabu ta ela. Danu, iena ruma ai Iosef na hesiai tauna; bema iena ura be dadaraiamu, una hahine ese iena mauri na be hadikaiamu. To, Iosef ese una hahine ena hedibaḡani karadia na e dadarai loulouva. Dahaka dainai? E gwa: “Ina kerere badana baina karaia, Dirava vairanai baina kara havara, be edeheto?”​—Gen. 39:7-12.

2. Edena dalai Iosef na e diba Dirava vairanai heudahanai karana na kara dikana?

² Edena dalai Iosef na e diba Dirava ese heudahanai na “kerere badana” heḡereḡerena e laloa? Israel taudia ese laḡani 200 muridiai Mose ena Taravatu ai, ina haheḡani “basio heuda hanai” e abia. (Eso. 20:14) To, dounu Iosef na e laloparara Iehova ese matabodaḡa karadia na e inai henidia momokanimu. Heḡereḡere, Iosef na e diba Iehova ese headava na tau tamona bona hahine tamona mo e henidia bae moalelaia. Bona ia na reana e kamonai Iehova ese nega rua kara ta e karaia ia tubuna hahinena sinana, Sara na daḡedaḡe karana amo e gimaia. Una heḡereḡerena, Dirava ese Isako adavana, Rebeka danu e gimaia. (Gen. 2:24; 12:14-20; 20:2-7; 26:6-11) Iosef ese unu badi idauidau e lalodia neganai, e diba Dirava matanai dahaka be maoro bona dahaka be kerere. Iosef ese ena Dirava e lalokau henia dainai, Ena kara maoromaoro taravatudia danu e ura henidia, bona lalona e hadaia baine badinadia.

3. Ina atikol ai dahaka baita herevalaimu?

³ Oi ese kara maoromaoro o ura heniamu, a? A dibamu emu haere na, oibe. To, ita iboudai na dia ḡoevadae tauda, bona bema basita henari namonamomu, taunimanima ese kara maoromaoro e laloamu dalana ese ita na be tohoda haraḡa dibamu. (Isa. 5:20; Roma 12:2) Una dainai, kara maoromaoro anina bona baita ura heniamu amo namo baita abimu dalana baita herevalaiamu. Bena, dala toi baita herevalaimu, unu dala ese be durudamu eda ura Iehova ena taravatu ai baita hagoadaia totona.

KARA MAOROMAORO ANINA BE DAHAKA?

4. Taunimanima momo ese kara maoromaoro be ede e laloa kerere tomamu?

⁴ Taunimanima ese kara maoromaoro tauna ta e laloamu neganai, momo na be lalomu ia na hekokoroku, haida e herevalaidia dikamu, eiava e lalomu ia ese haida na e hereadia tauna. To, Dirava ese unu kara na se ura henimu. Iesu tanobada ai e nohova neganai, tomadiho igunalaina taudia na e gwau henidia badina idia sibodia ese kara maoromaoro taravatudia e atova. (Koh. 7:16; Luka 16:15) Iehova ena kara maoromaoro e badinamu tauna na se laloamu ia na maoromaoro.

5. Baibul ena hereva heḡereḡerena, kara maoromaoro anina be dahaka? Haheitalai haida a gwaurai.

⁵ Kara maoromaoro na kara namo hereana. Eiava baita gwau dibamu, una na Iehova Dirava vairanai kara maorodia baita kara karana. Baibul ai, “kara maoromaoro” e herevalaia herevadia na, eda mauri ai Iehova ena taravatu baita badina karana e herevalaiamu. Heḡereḡere Iehova na e haheḡani, namona na hoihoi taudia ese “hahetoho” ḡaudia momokanidia bae ḡaukaralai. (Deu. 25:15) Heberu gado herevana “momokani” e hahanaia neganai, ia anina na “maoromaoro” danu. Una dainai, Dirava vairanai e uramu baine kara maoromaoro Kristen tauna na ena bisnes karadia iboudiai lalodiai, momokani ai baine ḡaukara. E uramu baine kara maoromaoro tauna na se uramu baine itaia, ta na e hahemaoro henia gagevamu. Bona e kara maoromaoromu tauna na ena ‘kara iboudiai [Iehova] baine hamoalea’ totona, e karamu abi hididia ai Ena lalohadai e laloa gunamu.​—Kol. 1:10.

6. Dahaka dainai Iehova ena kara maoromaoro taravatudia maoro bona kerere ai, na mai anina bada? (Isaia 55:8, 9)

⁶ Baibul ese e hahedinaraiamu Iehova na kara maoromaoro Badina. Una badi dainai, ia na e gwauraia “Iehova, edia noho gabuna korikorina.” (Ier. 50:7) Ia na ita e Havarada Tauna dainai, ia na mai ena maoro dahaka be maoro bona dahaka be kerere ai taravatu baine ato. Ita na kara dika bona dia ḡoevadae tauda dainai, asi dibada dahaka be maoro bona dahaka be kerere, to Iehova na ḡoevadae tauna dainai ia na mai dibana dahaka be maoro bona dahaka be kerere. (Her. 14:12; Isaia 55:8, 9 ba duahi.) To, ita na Dirava heidaidana e karada dainai, ita ese ena kara maoromaoro taravatudia na baita badina diba. (Gen. 1:27) Bona ta uramu unu baita kara toma. Eda lalokau Tamada enai ese be doridamu baita hekwarahimu iena kara baita tohotoho totona.​—Efe. 5:1.

7. Dahaka dainai taravatu maorodia baita badina na namo? Hahetalai ta a gwauraia.

⁷ Maoro bona kerere ai, Iehova ena taravatu baita badinamu amo namo baita abimu. Dahaka dainai? Mani a laloa dahaka be varamu, bema banka iboudiai na moni ena bada bona ena maraḡi dalanai sibodia edia taravatu be atomu eiava konstraksen kampani iboudiai na measurement dalanai sibodia edia taravatu be atomu. Hekwakwanai bada herea be varamu. Bona bema dokta bona nesi na patient bae kara henidia daladiai taravatu maorodia basie badinamu, reana patient haida na be masemu. Momokani, taunimanima ese ḡau ikaradia ai taravatu maorodia be badinamu neganai, namo be varamu bona be gimadiamu danu. Una heḡereḡerena, Dirava ena taravatu maoro bona kerere ai ese ita na be gimadamu.

8. Kara maoro e ura heniamu bona e badinaiamu taudia edia hahenamo be dahaka?

⁸ E hekwarahimu Iehova ena taravatu e badinamu taudia na Ia ese e hanamodiamu. Ia na e gwauhamata: “Kara maoromaoro taudia ese tano bae abia, bae noholaia hanaihanai.” (Sal. 37:29) Mani a laloa, taunimanima iboudiai ese Iehova ena taravatu bae badina neganai, idia na be lalotamonamu, be mainomu, bona be moalemu, ani? Iehova na e uramu oi na mauri unu bamona ba moalelaia. Momokani, ita ta ta na badi namodia daidiai kara maoromaoro na ta ura heniamu! Edena dalai una kara ai eda ura baita hagoadaia? Mani baita badina daladia toi aita herevalai.

IEHOVA ENA TARAVATU AI EMU URA BA HAGOADAIA

9. Dahaka ese be durudamu kara maoromaoro baita ura henia totona?

⁹ Dala ginigunana na: Taravatu e ato Tauna ba lalokau henia. Kara maoromaoro baita ura henia totona, namona na maoro bona kerere ai taravatu e ato Tauna enai eda lalokau baita habadaia. Iehova baita lalokau henia badamu neganai, baita ura badamu eda mauri ai iena kara maoromaoro taravatudia baita badina. Ini baita haheitalaia toma: Bema Adam bona Heva na Iehova bema lalokau henia, idia ese Iena taravatu na bema badina.​—Gen. 3:1-6, 16-19.

10. Abraham be dahaka e kara, unu amo Iehova ena lalohadai baine lalopararalaia namonamo totona?

¹⁰ Ita na asita uramu Adam bona Heva ese e karaia kererena baita karaia. Una kerere basita karaia totona, dounu Iehova baita dibaia, iena kara baita lalodia bada, bona baita hekwarahi ena lalohadai baita lalopararalaidia. Unu baita kara tomamu neganai, eda lalokau Iehova enai na be badamu. Mani Abraham a laloa. Ia ese Iehova na e lalokau henia momokani. Ena be Iehova ena abi hidi ilalopararalaina na e auka, to Abraham na se gwau-edeede. To, e hekwarahi Iehova baine dibaia namonamo. Heḡereḡere, Abraham na e diba Iehova na abi hidi e karaia Sodom bona Gomora baine hadikadia neganai, matamanai Abraham na e gari badina “tanobada idoinai ihahemaoro-henina Diravana” ese kara maoromaoro taudia na kara dika taudia ida baine hamasedia hebou. Abraham na e lalo unu na basine vara toma diba, una dainai mai manauna ida Iehova e nanadaia. Iehova na mai haheaukana ida e haere henia. Gabeai, Abraham na e laloparara Iehova ese taunimanima ta ta kudoudia na e itamu bona Ia ese kara maoromaoro taudia na kara dika taudia ida basine panisidia diba.​—Gen. 18:20-32.

11. Edena dalai Abraham ese e hahedinaraia Iehova na e lalokau henia bona e abidadama henia?

¹¹ Abraham ese Sodom bona Gomora hanuadia daidiai Iehova ida e herevahereva karana na e laloa bada. Ta dibamu ia ese Tamana na e lalokau henia bona e matauraia bada. Laḡani momo e ore muridiai, ḡau ta e vara dainai Abraham enai na e auka Iehova baine abidadama henia. Iehova ese e noia Isako, natuna merona lalokauna baine bouboulaia. To, una negai Abraham ena hetura karana ena Dirava ida na goada dainai, ia ese Iehova na se nanadaia. Abraham ese Iehova ena noinoi ḡauna na e badinaia bona e karaia. To dounu, unu baine kara toma dainai e heḡaeḡaeva lalonai, mani ia lalona e hisihisi badava a laloa! Reana Abraham na Iehova enai e dibaia ḡauna na e laloa dobu. Ia na e diba Iehova na dia kara gageva tauna eiava asi ena lalokau. Aposetolo Paulo ena hereva heḡereḡerena, Abraham na e diba Iehova ese ia natuna lalokauna Isako na baine hatoreaisi lou diba. (Heb. 11:17-19) Bona, Iehova na e gwauhamata Isako na bese ta tamadia ai bainela, bona una negai Isako na do asi natuna. Abraham ese Iehova na e lalokau henia dainai, e diba Tamana na nega iboudiai be kara maoromaoromu. Ena be enai na e auka, to mai abidadamana ida e kamonai.​—Gen. 22:1-12.

12. Abraham be ede baita tohotohoa toma diba? (Salamo 73:28)

¹² Abraham be ede baita tohotohoa toma diba? Ia e kara heḡereḡerena, namona na dounu Iehova baita dibaia. Unu baita kara tomamu neganai, Iehova baita hakahikahiamu bona eda lalokau iena na be badamu. (Salamo 73:28 ba duahia.) Laloda mamina baita hadibaiamu amo Dirava ena lalohadai baita hahedinaraiamu. (Heb. 5:14) Ta ese be dibaḡanidamu ḡau kererena ta baita karaiamu neganai, una na baita dadaraia dibamu. Basita uramu Tamada lalona ihahisina karana ta baita karaia bona Ia ida eda hetura karana baita hadikaia. Edena dala ma ta amo baita hahedinaraia kara maoromaoro na ta ura heniamu?

13. Kara maoromaoro be ede baita ḡavaia toma diba? (Hereva Lada-isidia 15:9)

¹³ Dala iharuana na: Ba hekwarahi dina ta ta ai emu ura kara maoromaoro ai ba habadaia. Bema ta uramu eda masolo na baine goada, baita hekwarahimu dina iboudiai baita eksasais-mu, una heḡereḡerena baita hekwarahi Iehova ena kara maoromaoro taravatudia ai eda ura baita habadaia. Una na dina iboudiai baita karaia ḡauna. Iehova na mai dibana eda goada na mai hetoana, bona basine doridamu basita karaia diba ḡauna baita karaia totona. (Sal. 103:14) Iehova na ita e hadibadamu “kara maoromaoro e ḡavaiamu tauna na ia ese e lalokau heniamu.” (Hereva Lada-isidia 15:9 ba duahia.) Bema ita na Iehova ena hesiai ḡaukara ai ta uramu baita karaia ḡauna ta baita ḡavaiamu, una ikarana totona ita na baita hekwarahimu. Kara maoromaoro iḡavanai danu unu bamona. Bona Iehova na mai haheaukana ida ita be durudamu ta uramu baita karaia ḡauna baita haḡuḡurua, unu amo baita goada.​—Sal. 84:5, 7.

14. “Kememui ai kara maoromaoro” ena dabua be dahaka, bona dahaka dainai baita hahedokilaia na namo?

¹⁴ Iehova na mai lalokauna ida ita e hadibadamu kara maoromaoro ikarana na dia metau ḡauna. (1 Ioa. 5:3) To, kara maoromaoro ese ita na be gimadamu, una na dina iboudiai baita hahedinaraia ḡauna badana. Baita helalotao aposetolo Paulo ese lauma tuari dabuana e herevalaia. (Efe. 6:14-18) Edena kaha ese tuari tauna kudouna e gimaia? Ia na kesi, ‘keme’ e kouamu kahana, una na Iehova ena abi hidi kara maorodia ai e herevalaiamu. Kesi ese kudou e gimaiamu heḡereḡerena, laulau dalanai Iehova ena kara maoromaoro taravatudia ese oi kudoumu baine gimaia diba, una na oi lalomu e herevalaiamu. Una dainai, emu lauma tuari dabuana ai kememu eiava kudoumu baine gimaia ḡauna, kara maoromaoro danu baine mia na ḡau badana!​—Her. 4:23.

15. “Kememui ai kara maoromaoro” ena dabua be ede ba hahedokilaia toma?

¹⁵ “Kememui ai kara maoromaoro” ena dabua be ede ba hahedokilaia toma? Dina iboudiai emu abi hidi o karamu neganai, Dirava ena taravatu ba lalodia. Ba herevalai ḡaudia, ba kamonai miusik-dia, ba ita muvi-dia, eiava ba duahi bukadia ai abi hidi o uramu ba kara neganai, sibomu ba henanadai: ‘Kudougu be ede na gimaia tomamu? Lau ini ba kara tomamu neganai Iehova be, be moalemu, a? Eiava matabodaḡa, daḡedaḡe, mataḡaniḡani, bona ta sibona e helalo badamu karana​—unu na Iehova ese se moalelaimu karadia e hahedinaraimu, a?’ (Fili. 4:8) Bema o karamu abi hididia na Iehova ena ura heḡereḡerena, oi na o uramu iena kara maoromaoro taravatudia ese kudoumu baine gimaia.

16-17. Edena dalai Isaia 48:18 ese e hadibadamu, Iehova ena kara maoromaoro taravatudia na dounu baita badina diba ela bona hanaihanai?

¹⁶ Oi ese dina bona laḡani iboudiai Iehova ena kara maoromaoro taravatudia ba badina diba eiava lasi o laloa momomu, a? Mani Iehova ese e ḡaukaralaia haheitalaina ta aita herevalaia, una na Isaia 48:18 ai baita davariamu. (Ba duahia.) Iehova na e gwauhamata eda kara maoromaoro na “davara hurehuredia” heḡereḡeredia. Mani a laloa, oi na kone lata hereana ta ai gini, asie ore dibamu hurehuredia, na murina murina e laomu e maimu o itadiamu. Una maino dalana heḡereḡerena, oi be bo lalomu dina ta unu hurehure be, be dokomu, a? Lasi! Oi na mai dibamu laḡani tausen momo lalodiai hurehure na kone ai e tubumu, bona unu hurehure na asi edia doko daladia.

¹⁷ Emu kara maoromaoro na davara hurehuredia heḡereḡeredia ai baela diba! Edena dalai? Abi hidi ta o uramu ba karaia neganai, Iehova ena ura oi o uramu ba karaia ḡauna ai, ba laloa guna na namo. Bena una ba badinaia. Herevana o karaiamu abi hidina na auka, to Tamamu lalokauna na nega iboudiai oi be hagoadamumu bona be durumumu emu mauri ai dina iboudiai Iena kara maoromaoro taravatudia ba badinadia totona.​—Isa. 40:29-31.

18. Dahaka dainai haida na basita hahemaoro henidia bona siboda basita lalo ita na mamaoro-mamaoro?

¹⁸ Dala ihatoina na: Hahemaoro karana na Iehova enai ba rakatania. Ta hekwarahimu eda mauri ai Iehova ena kara maoromaoro taravatudia ta badinamu lalonai, haida na basita hahemaoro henidia bona siboda basita lalo ita na mamaoro-mamaoro. Bona, namona na ta karamu ḡaudia na ma haida ese e karamu ḡaudia ida basita haheḡereḡeredia bona basita lalo ita ese haida na ta hereadia, baita helalotao Iehova sibona na “tanobada idoinai ihahemaoro-henina Diravana.” (Gen. 18:25) Iehova ese haida ihahemaoro henidia karana na dia ita e henida. Iesu ena haheḡani ai, eto: “Taunimanima basio hahemaoro henidia, bena idia ese danu basie hahemaoro henimui.”​—Mat. 7:1.b

19. Edena dalai Iosef ese e hahedinaraia Iehova ena hahemaoro karana na e abidadama henia?

¹⁹ Mani kara maoromaoro tauna, Iosef ena haheitalai aita herevalaia lou. Ia ese ma haida bona ia e kara dika heniava taudia danu se hahemaoro henidia. Tadikakana ese eto bae alaia, hesiai tauna ta heḡereḡerena e hoihoilaia, bona tamadia vairanai e gwaurai herevadia amo e hahedinaraia Iosef na e mase. Laḡani momo e ore muridiai, Iosef na ena ruma bese e lou henia. Una negai Iosef na lohia tauna ta, bona ia bema ura neganai tadikakana bema hahemaoro henidia bona edia kara davadia bema halou. Ena be Iosef tadikakana na mai kudoudia idoidiai ida e kara karadia daidiai e sori, to idia na Iosef ese edia kara davadia baine halou garidia e gari. To, Iosef ese e hamaorodia: “Basio gari; lau be Dirava ibolona a?” (Gen. 37:18-20, 27, 28, 31-35; 50:15-21) Iosef na mai manauna ida e laloparara, Iehova sibona ese ia tadikakana baine hahemaoro henidia.

20-21. Edena dalai siboda baita helalo ita na mamaoro-mamaoro karana, baita dadaraia diba?

²⁰ Iosef heḡereḡerena, hahemaoro karana na Iehova enai baita rakatania. Heḡereḡere, basita lalo tadikakada ese e karamu ḡaudia na badi kereredia daidiai e karamu. Ita ese ta kudouna na basita itaia diba; a Iehova sibona mo “ese lalo e tohodiamu.” (Her. 16:2) Ia ese taunimanima iboudiai, noho daladia idauidau bona tano idauidau taudia na e lalokau henidiamu. Bona Iehova ese e hagoadadamu “[eda] lalokau na baita habadaia.” (2 Kor. 6:13) Baita hekwarahi tadikaka taihu iboudiai baita lalokau henidia, dia baita hahemaoro henidia.

²¹ Una anina na kongrigeisin murimurina taudia danu basita hahemaoro henidia. (1 Tim. 2:3, 4) Oi ese varavaramu, dia Iehova ena Witnes tauna bo hahemaoro heniamu, bo tomu, “Ia na hereva momokani na basine abia dae dibamu”? Lasi, baita gwau dibamu, una na siboda ta helalomu ta tomu ita na mamaoro-mamaoro karana. Iehova na doini dala kehoamu “taunimanima iboudiai gabu idoidiai” bae helalo-kerehai totona. (Apos. 17:30) Nega iboudiai ba helalotao sibomu o helalomu oi na maoromaoro karana na dia kara maoromaoro karana.

22. Dahaka dainai lalomu ba hadaia kara maoromaoro ba ura henia?

²² Namona na Iehova ena kara maoromaoro taravatudia iura henina karana ese moale baine havaraia bona baine duruda haheitalai namodia ai baitala, unu amo haida baita durudia Dirava bona ita ida eda hetura karana baine hagoadaia. Nega iboudiai ‘kara maoromaoro hitolona baita hitolo’ bona ‘ranu-masena baita ranu mase.’ (Mat. 5:6) Namona na ba diba, Iehova na e moalemu bema oi na o hekwarahimu kara maorona ba karaia. Ina tanobada ai taunimanima ese edia kara gagevadia e habadamu neganai, ba goada! Nega iboudiai ba helalotao, “Iehova ese kara maoromaoro taudia e lalokau henidiamu.”​—Sal. 146:8.