Emu Baibul Duahiduahi amo Namo Ba Davari

1. Dahaka ese e hahedinaraiamu Iesu ese Toretore Helaḡadia na lalodia bada?

MANI a laloa, Iesu ena hahediba dalana na namo herea. Nega momo ia na Toretore Helaḡadia amo e lalotaova ḡaudia e gwauraiva! Ia e bapatiso murinai bona do se mase ai, e gwaurai herevadia na Toretore Helaḡadia amo e abi.b (Deu. 8:3; Sal. 31:5; Luka 4:4; 23:46) Bona laḡani toi mai kahana lalodiai, Iesu na Toretore Helaḡadia e duahiva, e gwauraiva bona anidia e herevalaiva.​—Mat. 5:17, 18, 21, 22, 27, 28; Luka 4:16-20.

2. Dahaka ese Iesu e durua Toretore Helaḡadia e diba namonamo? (Rau 1 ai laulau ba itaia.)

² Iesu ese ena hesiai ḡaukara do se hamatamaia neganai, hanaihanai Dirava ena Hereva e duahiava bona e kamonaiava. Ruma ai Maria bona Iosef na dina ta ta ai edia herevahereva lalodiai, Toretore Helaḡadia ena hereva e gwauraiva bona Iesu na e hakalava.c (Deu. 6:6, 7) Danu, ta dibamu Sabati negadiai Iesu na ena ruma bese ida sinagoga e laova. (Luka 4:16) Unuseni ai, Toretore Helaḡadia e duahiava neganai Iesu na e hakala namonamova. Gabeai, Iesu ese unu Toretore Helaḡadia iduahina karana e dibaia. Una dainai, ia na dia Toretore Helaḡadia mo e diba to e ura henidia bona e badinadia danu. Heḡereḡere, Iesu laḡanina 12 neganai dubu helaḡa ai e vara ḡauna mani a laloa. Mose ena Taravatu mai dibadia namonamo hahediba taudia ese Iesu ena “lalo-parara bona ena haere e hoalai.”​—Luka 2:46, 47, 52.

3. Ina atikol ai dahaka baita herevalaimu?

³ Ita danu hanaihanai Baibul baita duahiamu neganai, Dirava ena hereva baita dibamu bona baita ura heniamu. To, edena dala ai Baibul iduahina karana amo namo baita abi? Iesu ese Taravatu mai dibadia taudia, itorena taudia, Farisea taudia, bona Sadukea taudia danu, e herevalai henidia ḡaudia amo ḡau haida baita dibamu. Idia na nega momo Toretore Helaḡadia e duahiva, to asie badinava. Unu tatau ese asie kara ḡaudia toi na Iesu ese e herevalai. Ena hereva ese be durudamu Baibul iduahina karana baita hanamoa, unu amo (1) ta duahiamu ḡauna baita lalopararalaia, (2) hereva momokanidia baita dibadia, bona (3) eda mauri baita haidaua.

O DUAHIAMU ḠAUNA BA LALOPARARALAIA

4. Luka 10:25-29 amo dahaka ta dibamu?

⁴ Ita na ta uramu Dirava ena Hereva ai ta duahiamu ḡauna anina baita lalopararalaia. Bema basita lalopararalaiamu, eda duahiduahi amo namo ta basita davariamu. Mani Iesu bona “Taravatu tauna ta” e herevahereva sivaraina aita laloa. (Luka 10:25-29 ba duahidia.) Una tau na mauri hanaihanai iabina totona baine karaia ḡauna e henanadailaia neganai, Iesu na eto: “Taravatu bukana lalonai ede e torea toma? Ede o duahia toma?” Una tau na toretore helaḡadia amo haere maorona e heni, eto Dirava baine lalokau henia bona dekena tauna baine lalokau henia. (Lev. 19:18; Deu. 6:5) To ia na ma e henanadai: “Lau dekegu tauna be daika?” Unu amo e hahedinaraia e duahia ḡauna na se lalopararalaia namonamo. Una dainai, se diba ena mauri lalonai unu hereva be ede baine badina toma.

5. Edena dala ai ḡuriḡuri bona metairametaira duahiduahi karana ese baine duruda?

⁵ Dirava ena Hereva baita duahia namonamomu neganai, eda laloparara baita habadaiamu. Heduru herevadia haida be ini: Baibul do so duahia lalonai ba ḡuriḡuri guna. Iehova ba noia ena lauma helaḡa amo baine durumu Baibul ai o duahiamu ḡauna ba lalopararalaia bona ba laloa bada totona. Bena metairametaira ba duahia, unu amo o duahiamu ḡauna ba lalopararalaia. Heduru ḡauna ma ta na, Baibul ba duahia badabada eiava audio rekodin ai Baibul duahiduahi ba hakalaia bona emu Baibul ai ba badinaia. Unu bo kara tomamu neganai, Dirava ena Hereva bo lalopararalaiamu, bo laloataomu, bona diba ma haida bo abimu. (Ios. 1:8) Emu duahiduahi e oremu neganai, Iehova ba ḡuriḡuri henia lou, ena Hereva dainai ba tenkiu henia bona ba noia baine durumu o dibaia ḡauna ba badinaia totona.

6. Dahaka dainai emu duahiduahi lalonai henanadai haida ba lalo bona point haida ba tore? (Laulau danu ba itaia.)

⁶ Baibul amo emu laloparara ba habadaia totona, heduru herevadia ma rua be ini: Emu duahiduahi lalonai henanadai haida ba lalo. Heḡereḡere sivarai ta o duahiamu neganai, ba henanadai: ‘Daidia e herevalaidiamu? Daika e herevamu? Daidia e hereva henidiamu, bona dahaka dainai? Edeseniai bona edena negai una e vara?’ Unu henanadai ese be durumumu o duahiamu ḡauna ena hereva badana ba laloa. Danu, point haida ba tore. Una ese be durumumu, o duahiamu ḡauna bo laloa dobumu bona bo lalopararalaia namonamomu. Bona be durumumu o duahiamu ḡauna bo laloataomu. Ba tore ḡaudia haida bini: Henanadai, emu hetahu amo o davari ḡaudia, point badadia, ba badina daladia, eiava emu hemami. Unu amo bo dibamu Dirava ese ena Hereva amo oi e hereva henimumu.   

7. Baibul ta duahimu neganai dahaka baita kara, bona dahaka dainai? (Mataio 24:15)

⁷ Iesu ese e hahedinaraia Dirava ena Hereva baita lalopararalaia totona, namona na ta duahiamu ḡauna baita haeroa namonamo. (Mataio 24:15 ba duahia.) Edena dala ai unu baita kara toma? Ita ese lalohadai ta na ma lalohadai ta ida baita haheḡereḡerea bona edia idau dalana baita diba, bona se hedinarai namonamo ḡaudia baita lalopararalaidia. Danu, Iesu ese e hahedinaraia, Baibul ena peroveta herevadia e haḡuḡurumu ḡaudia baita haerodia namonamo. Haerohaero namonamo karana ese be durudamu Baibul ai ta duahimu ḡaudia amo namo baita davari.   

8. Edena dala ai ta duahiamu ḡauna baita haeroa namonamo?

⁸ Iehova ese ena hesiai taudia na haero namonamo karana o laloparara e henidiamu. Una dainai ba noia laloparara baine henimu. (Her. 2:6) Edena dala ai emu noinoi heḡereḡerena ba kara? Ba duahia ḡauna ba laloa namonamo, bona o dibadia ḡaudia ida ba haheḡereḡeredia. Baibul istadilaina bukadia, heḡereḡere Research Guide for Jehovah’s Witnesses ba ḡaukaralai diba. Unu ese be durumumu Baibul sirina ta anina bo lalopararalaiamu bona ibadinana dalana bo dibamu. (Heb. 5:14) Baibul ai o duahimu ḡaudia bo haerodia namonamomu neganai, emu laloparara na be badamu.

HEREVA MOMOKANIDIA BA DIBADIA

9. Sadukea taudia ese edena hereva momokanina na asie abia dae?

⁹ Sadukea taudia na Heberu bukadia ginigunadia faiv na mai dibadia namonamo, to ena hereva momokani badadia na asie abi daeva. Heḡereḡere, Iesu enai toreisi lou e henanadailaia neganai, mani Iesu ena haere aita laloa. Ia na eto: “Mose ena buka ai, au ginigini sivaraina lalonai, asio duahia a? Dirava ese e hereva henia, eto, Lau na Abraham ena Dirava, Isaak ena Dirava, Iakob ena Dirava.” (Mar. 12:18, 26) Iesu ena hereva ese e hahedinaraia, ena be Sadukea taudia ese una hereva na nega momo e duahia, to Baibul ena hereva momokanina ta, toreisi lou, na asie abia dae.​—Mar. 12:27; Luka 20:38.d

10. Baibul ta duahiamu neganai, dahaka baita laloa be namo?

¹⁰ Sadukea taudia edia kara amo dahaka ta dibamu? Baibul ai siri ta eiava sivarai ta, ta duahiamu neganai, e hadibadamu ḡauna baita laloa. Ita na ta uramu dia Baibul ena hahediba hereva badadia mo baita diba, to ena hereva momokani dobudia bona hahekau herevadia danu baita diba.

11. Timoteo Iharuana 3:16, 17 heḡereḡerena, Baibul ai hereva momokanidia be ede ba davari toma?

¹¹ Baibul o duahiamu neganai, hereva momokanidia be ede ba davari toma? Mani 2 Timoteo 3:16, 17 edia hereva aita lalodia. (Ba duahidia.) Unu siri na e gwaumu “revareva helaḡadia iboudiai na Dirava ena heuda-roha dainai e tore . . . idia na mai siahudia” taunimanima (1) e hadibadiamu, (2) e hahelalo-kerehaidiamu, (3) e sisiba henidiamu o e hamaoromaorodiamu, bona (4) kara maoromaoro ai e hakaudiamu. So ḡaukaralai momomu Baibul bukadia ai unu point 4 na bo davarimu. Baibul ena sivarai ta o duahiamu neganai, ba haeroa edena dala ai Iehova, ena ura, bona hahekau herevadia e hadibamumu. Ena sisiba ese baine hahelalomu-kerehai dalana ba laloa. Ba itaia unu siri ese edena dala ai oi bae durumu ura dikadia o kara dikadia ba dadaraidia bona Iehova ba badinaia. Ba tahua edena dala ai unu siri ese oi bae durumu haroro ḡaukara ai ta ena lalohadai kererena ba hamaoromaoroa. Danu unu siri ese e gwauraimu herevadia o kara maoromaoro ai baine hakaumu daladia ba tahu, una ese be durumumu Iehova ena lalohadai bo badinaiamu. Emu duahiduahi lalonai, unu point 4 bo ḡaukaralaimu neganai, hereva momokanidia bo davarimu.

BAIBUL ESE EMU MAURI BAINE HAIDAUA

12. Dahaka dainai Iesu ese Farisea e nanadaidia, “asio duahia, a?”

¹² Iesu ese ina henanadai danu e gwauraia, “asio duahia, a?” unu amo Farisea taudia ese Baibul ai e abia lalohadai kererena e hahedinaraia. (Mat. 12:1-7)e Una nega ai, Farisea taudia na e gwa Iesu ena hahediba ese Sabati taravatuna na e utua. Iesu ese Baibul sivaraidia rua e gwaurai bona Hosea bukana amo siri ta e gwauraia, unu amo e hahedinaraia Farisea taudia ese Sabati taravatuna anina na se lalopararalaia bona hebogahisi na se hahedinaraia. Dahaka dainai idia na Dirava ena Hereva e duahiava, to edia kara na se haidau? Badina haida e gwauraidia dikava bona e hekokorokuva. Una dainai e duahiva ḡaudia na se lalopararalaiva.​—Mat. 23:23; Ioa. 5:39, 40.

13. Baibul ta duahiamu neganai, edena kara na mai anina bada, bona dahaka dainai?

¹³ Iesu ena hereva amo ta dibamu, Baibul ta duahiamu neganai, lalohadai maorona baita abia na namo. Farisea taudia na basita tohotohodia, to baita manau bona Baibul amo diba baita abi. Namona na Dirava ese ‘laloda ai vada e hadoa herevana, baita abia dae, mai manauda ida.’ (Iak. 1:21) Bema baita manaumu, Dirava ena Hereva ese eda mauri na be haidauamu. Haida basita gwauraidia dikamu bona hekokoroku karana baita dadaraiamu neganai, hebogahisi bona lalokau baita hahedinaraimu.

14. Ede ta diba tomamu Baibul ese eda mauri na e haidauamu? (Laulau danu ba itaia.)

¹⁴ Ma haida ta kara henidiamu dalana ese be hahedinaraiamu bema Dirava ena Hereva ese eda mauri e haidaua eiava lasi. Farisea taudia ese Dirava ena Hereva na se abia dae dainai, ‘asi edia kerere taudia e habadelaidia.’ (Mat. 12:7) Una heḡereḡerena, haida ta lalodiamu bona ta kara henidiamu dalana ese be hahedinaraiamu, Dirava ena Hereva ese iseda kara e haidaua eiava lasi. Heḡereḡere, ita be haida edia kara namodia ta itamu bona ta herevalaimu, o edia kerere ta herevalaimu? Ita be ta hebogahisimu bona dika ta gwautaomu, o haida ta gwauraidia dikamu bona ta badu henidiamu, a? Eda haere ese be hahedinaraiamu, Baibul ese eda lalohadai, hemami, bona kara e haidau eiava lasi.​—1 Tim. 4:12, 15; Heb. 4:12.

BAIBUL IDUAHINA KARANA ESE MOALE E HAVARAIAMU

15. Iesu ese Toretore Helaḡadia be ede e laloa toma?

¹⁵ Iesu ese Toretore Helaḡadia na e ura henia bada, bona Salamo 40:8 ese una e hahedinaraia, eto: “Egu Dirava e, oiemu ura ikarana na moalelaiamu, oiemu taravatu na lalogu ai e miamu.” Una dainai, ia na mai moalena ida Iehova e hesiai henia. Ita danu mai moaleda ida Dirava baita hesiai heniamu bema iena Hereva baita duahiamu bona baita ura heniamu.​—Sal. 1:1-3.

16. Ededia dala ai Baibul duahiduahi karana amo namo baita davari? (Ina maua ba itaia, “Iesu Ena Hereva ese Baine Durumu Baibul Ba Lalopararalaia.”)

¹⁶ Iesu ena hereva bona kara ese e durudamu, eda Baibul duahiduahi karana baita hanamoa. Baibul baita lalopararalaia totona, baita ḡuriḡuri, metairametaira baita duahia, henanadai haida baita lalo, bona point haida baita tore. Eda pablikeisin idauidau baita ḡaukaralaidia, unu amo ta duahiamu ḡauna baita haeroa namonamo bona baita lalopararalaia. Ena be siri haida na asi dibada namonamo, to unu siri ai hereva momokanidia baita tahumu neganai, eda diba baita habadaiamu. Bona Dirava ena Hereva ese eda mauri baine haidaua totona, namona na ta duahiduahimu neganai, lalohadai maorona baita abia. Unu dala idauidau amo Baibul baita duahiamu neganai, namo bada baita davarimu bona Iehova baita hetura henia namonamomu.​—Sal. 19:17, 18; Iak. 4:8.