Kongrigeisin Ena Lalokau E Mamia

YOMARA bona taihuna Marcelo bona Hiver na Guatemala ena hanua maraḡina ta ai e nohomu. Yomara na Witnes Taudia ida Baibul e stadilaia matama, bona gabeai taihuna danu e stadi. To idia na mai edia hekwakwanai. Idia tatoiosi matadia na kekepulu, bona braille iduahina na asi dibadia. Una dainai, edia stadi tauna ese paragraf bona siri na idia e duahi henidiava.

Edia hekwakwanai ma ta na, kongrigeisin heboudia baela na auka. Idia e nohomu gabuna amo Kingdom Hall ena daudau na miniti 40 dainai sibodia na basiela diba, to kongrigeisin taudia ese e durudia. Idia na wiki heboudia ai tok asainmen e abiva neganai, tadikaka taihu ese e durudiava edia tok bae lalodiatao.

May 2019 ai, edia hanua ai kongrigeisin heboudia e abi matama. Una nega ai, regula painia tadikaka ta bona adavana na una hanua ela. Idia danu braille iduahina bona itorena dalana na asi dibadia, to e hekwarahi Yomara taihuna ida e durudia braille iduahina bona itorena dalana e dibaia. Idia na library ta ela bona braille bukadia e abi, unu amo bae stadilai bona haida bae hadibadia.

Hua haida muridiai, Yomara mai taihuna ida na braille iduahina dalana e dibaia, bona una ese e durudia lauma dalanai e goada.a Hari Yomara, Marcelo, bona Hiver na regula painia, bona Marcelo be hesiai tauna. Wiki ibounai lalonai, idia na Iehova ena hesiai ḡaukaradia e goadalaimu. Edia haheitalai dainai ma haida danu e goadamu.   

Yomara, Marcelo, bona Hiver na kongrigeisin taudia edia heduru dainai e moale bada. Yomara na e gwa: “Witnes Taudia a hedavari henidia matama negana amo, idia ese Kristen lalokau korikorina e hahedinaraia.” Marcelo na e gwa: “Emai kongrigeisin lalonai turamai namodia na momo, bona lalokau bona lalotamona tadikakadia padadiai a nohomu.” Yomara mai taihuna ida na e ura dikadikamu Iehova ese tanobada na paradaiso ai baine halaoa neganai bae itaia.​—Sal. 37:10, 11; Isa. 35:5.