Iesu Ena Haroro Goadagoada Karana Baita Tohotohoa

1. Dahaka dainai Iehova ena Witnes na dia dubu taudia ma haida heḡereḡeredia?

IEHOVA ena Witnes na haroro ḡaukara e goadalaiamu taudia dainai, idia na dia dubu taudia ma haida heḡereḡeredia. (Tito 2:14) To, nega haida, reana oi ese emu haroro ḡaukara na so moalelaiamu. Reana oi emu hemami na elda goadana ta ena hemami heḡereḡerena, ia na eto, “Hora haida ai, haroro urana na lalogu amo e boiomu na heto.”

2. Dahaka dainai nega haida haroro ḡaukara baita goadalaia na auka?

² Dahaka dainai reana ita na Iehova ena hesiai ḡaukara haida be baita moalelaidia dikadikamu to haroro ḡaukara ilao henina be auka? Badina Kingdom Hall ta haginimu o tadikaka ta durudiamu bena anina namona ta itaiamu neganai, ita na ta moalemu. Bona ita na ta moalemu badina be tadikaka ida ta ḡaukara hebou namonamomu bona ta itaiamu tadikaka ese eda heduru na e moalelaiamu. To, haroro ḡaukara ilao henina e aukamu badina be reana laḡani momo teritori tamona ai ta haroro louloumu, a taunimanima be asie kamonaimu. Eiava haida na eda haroro ḡaukara na asie moalelaiamu. Eiava ita ese ta itaiamu nega dokona e kahikahimu lalonai, daḡedaḡe na be bada be laomu. (Mat. 10:22) To haroro ḡaukara baita goadalaia totona, dahaka baita kara be namo?

3. Luka 13:​6-9 ena parabole ese Iesu ena haroro goadagoada karana be ede e herevalaia toma?

³ Iesu ena haheitalai amo haroro ḡaukara baita goadalaia dalana na baita dibaiamu. Tanobada ai, Iesu na haroro ḡaukara e goadalaiava. Momokani, ia ese ena haroro ḡaukara na taina ruana e habadaiava. (Luka 13:​6-9 ba duahidia.) Imea ireḡuna tauna na laḡani toi lalodiai e hekwarahiva suke auna e nariava to anina na se vara. Una heḡereḡerena, Iesu na laḡani toi lalodiai Iuda taudia e haroro henidia, to idia momo na asie kamonaiva. Danu, imea ireḡuna tauna na se ura suke auna na baine utua, una heḡereḡerena Iesu na se ura ena haroro ḡaukara na baine hadokoa. Ia na e haroro goadagoada ela bona Iuda taudia ese sivarai namona e abia dae.

4. Iesu ena haheitalai amo dahaka ḡau foa baita dibamu?

⁴ Tanobada ai hua ginigabedia siks lalodiai, Iesu na haroro ḡaukara e goadalaiava. Ina atikol ai, ita ese una na baita herevalaiamu. (Luka 10:1) Ita ese haroro ḡaukara na baita goadalaiamu bema Iesu ena hahediba dalana bona kara baita tohotohoamu. Dala foa na ini: (1) Iehova ena ura e laloa bada, (2) peroveta herevadia anidia e lalopararalai bona e badina, (3) Iehova enai e tabekau, bona (4) e diba momokani haida ese ia na be kamonai heniamu.

IEHOVA ENA URA BAITA LALOA BADA

5. Edena dala ai Iesu ese e hahedinaraia Dirava ena ura na e laloa bada?

⁵ Iesu ese “Basileia sivaraina namona” na e harorolaia goadagoada badina mai dibana una na Dirava ese e urava ia ese baine karaia ḡaukarana. (Luka 4:​43, NWT) Iesu ena mauri lalonai haroro ḡaukara na mai anina bada. Ena haroro ḡaukara dinadia ginigabedia ai, ia na “hanua badadia bona maraḡidia lalodiai” taunimanima e hadibadiava. (Luka 13:22) Danu ia ese hahediba taudia ma haida na haroro ḡaukara ikarana dalana e hadibadia.—Luka 10:1.

6. Iehova ese haroro ḡaukara be ede e laloa tomamu? (Laulau danu ba itaia.)

⁶ Hari ina negai danu, Iehova bona Iesu na e uramu sivarai namona iharorolaina na baita laloa bada. (Mat. 24:14; 28:​19, 20) Iehova dainai ta karamu hesiai ḡaukara idauidau ese haroro ḡaukara e duruamu. Heḡereḡere, Kingdom Hall ta haginimu unu amo ta haroro henidiamu taudia na unuseniai Iehova bae tomadiho henia. Bona Betele ai ta karamu ḡaukaradia amo haroro ḡaukara ta duruamu. Disasta e varamu gabudia ai ta hedurumu na dia tadikaka taihu edia dabu ḡaudia mo ta henimu, to ta durudiamu hebou bona haroro ḡaukara bae karaia lou. Bema haroro ḡaukara ta karaiamu badina bona Iehova ena ura haroro ḡaukara ai baita lalopararalaiamu, una ese be durudamu haroro ḡaukara baita goadalaia. Hungary ai elda ta ladana János na e gwa: “Hanaihanai na laloataomu ḡauna na ina, Iehova dainai ta karamu ḡaukaradia ma haida ese haroro ḡaukara gabuna na basine abia diba. Badina iseda ḡaukara badana be una.”

7. Dahaka dainai Iehova na e uramu doini baita haroro? (1 Timoteo 2:​3, 4)

⁷ Bema ita ese taunimanima na Iehova ese e lalodiamu dalana ai baita lalodiamu, eda haroro ḡaukara na baita goadalaiamu. Ia na e uramu taunimanima iboudiai ese sivarai namona bae kamonai bona bae abia dae. (1 Timoteo 2:​3, 4 ba duahidia.) Una dainai, Iehova ese hahemauri sivaraina iharorolaina dalana na e hadibadamu. Heḡereḡere, Ba Lalokau Henidia Bona Hahediba ai Ba Halaodia buklet-na amo taunimanima ida herevahereva baita hamatama daladia e hadibadamu, unu amo baita durudia Iesu ena hahediba ai baela. Ena be hari ina negai momo ese Iehova na do asie hesiai heniamu, to hisihisi badana dokona do se kau ai idia momo na be uramu Iehova bae hesiai henia. To una baine vara totona, namona na hanaihanai baita haroro.

PEROVETA HEREVADIA ANIDIA E LALOPARARALAI BONA E BADINA

8. Edena peroveta herevana ese Iesu e durua ena nega e ḡaukaralaia namonamo?

⁸ Iesu na mai dibana Baibul ena peroveta herevadia be ede be ḡuḡuru tomamu. Ia na dibana tanobada ai haroro ḡaukara na laḡani toi mai kahana mo be karaiamu. (Dan. 9:​26, 27) Danu edena negai bona ede bae hamasea toma peroveta herevana danu mai dibana. (Luka 18:​31-34) Iesu na e diba ḡaudia ese e durua ena nega baine ḡaukaralaia namonamo. Una dainai mai ena ura ida haroro ḡaukara e goadalaia unu amo e henia ḡaukarana baine haḡuḡurua.

9. Dahaka dainai Baibul ena peroveta herevadia ilalopararalaidia karana ese be durudamu haroro ḡaukara baita goadalaia?

⁹ Baibul ena peroveta herevadia ilalopararalaidia karana ese be durudamu, haroro ḡaukara baita goadalaia. Ita na mai dibada ina nega dikana oromana na kahirakahira be oremu. Baibul ese dina gabediai taunimanima edia kara bona ina nega lalonai bae vara ḡaudia na e perovetalai, bona ta itaiamu unu peroveta herevadia na e ḡuḡurumu. Danu Baibul na e peroveta “nega dokona ai” not pavapavana bona saut pavapavana bae hetuari hehenimu. Anglo-American World Power bona Russia mai ena orea ida e heinai hehenimu karana ese una peroveta herevana e haḡuḡuruamu. (Dan. 11:40) Danu, ta laloparara Daniel 2:​43-45 ai e gwauraia kaivakuku aena palapalana na Anglo-American World Power e laulaulaia. Baibul ena peroveta herevadia ta stadilaimu amo ta dibamu, kahirakahira Dirava ena Gavamani ese tanobada gavamanidia iboudiai be haorediamu. Ini peroveta herevadia iboudiai ese e hahedinaraiamu dokona na vada kahirakahira dainai, namona na eda nega baita ḡaukaralaia namonamo sivarai namona baita harorolaia.

10. Ededia dala ma haida ai Baibul ena peroveta herevadia ese be durudamu haroro ḡaukara baita goadalaia?

¹⁰ Baibul ena peroveta herevadia ta lalopararalaimu dainai, ta ura dikadikamu ma haida edia ta diba ḡaudia baita herevalai. Dominican Republic ai e nohomu taihuna ta ladana Carrie na e gwa: “Iehova ese e gwauhamatalai vaira negai baine havara ḡau namo hereadia na lalomu neganai, na uramu ma haida ediai baina herevalai.” Danu, ma e gwa: “Na itaiamu taunimanima na hekwakwanai idauidau e davarimu neganai, na lalopararamu idia danu unu gwauhamata namodia bae diba na namo.” Baibul ena peroveta herevadia ese e hahedinaraiamu Iehova ese ita e durudamu ina ḡaukara baita karaia, bona una ese e hagoadadamu haroro ḡaukara baita goadalaia. Hungary ai e nohomu taihuna ta ladana Leila, na e gwa: “Isaia 11:​6-9 ese e hahedinaraiamu Iehova ena heduru amo ta na ena mauri baine haidaua diba. Una ese e hagoadagumu sivarai namona baina harorolaia ena be reana ba hereva henidiamu taudia haida na basie kamonaimu.” Zambia ai e nohomu tadikakana ta ladana Christopher, na e gwa: “Mareko 13:10 ena peroveta herevana heḡereḡerena, sivarai namona na tanobada heḡeḡemadai e harorolaiamu, bona na moalemu una peroveta herevana na duruamu.” Ededia Baibul peroveta herevadia ese e hagoadamumu haroro ḡaukara ba karaia?

IEHOVA ENAI E TABEKAU

11. Iesu na haroro ḡaukara baine goadalaia totona, dahaka dainai Iehova enai e tabekau? (Luka 12:​49, 53)

¹¹ Iesu na Iehova enai e tabekauva unu amo ena haroro ḡaukara baine goadalaia. Ena be mai aonegana ida taunimanima e haroro henidiava, to Iesu na mai dibana haida ese Basileia sivaraina namona dainai ia be badu heniamu bona be inai heniamu. (Luka 12:​49, 53 ba duahidia.) Tomadiho e gunalaiava taudia ese Iesu e harorolaiava sivaraina na se urava bae abia dae una dainai ialana dalana e tahua loulouva. (Ioa. 8:59; 10:​31, 39) To Iesu na dounu e harorova badina dibana Iehova na ia ida. Ia na e gwa: “Lau na dia sibogu, a Tamagu, e siaigu tauna, ese e bamogumu. . . . Ia ese se rakatanigu, sibogu asina nohomu; badina be iena ura karadia nega idoidiai na karamu.”—Ioa. 8:​16, 29.

12. Iesu ese ena hahediba e haheḡaeḡaedia daḡedaḡe negadia ai haroro ḡaukara bae goadalaia. Edena dala ai?

¹² Iesu ese ena hahediba taudia na e hadibadia loulouva Iehova enai bae tabekau. Danu e hamaorodia ena be daḡedaḡe momo bae davari, Iehova ese idia na baine durudia. (Mat. 10:​18-20; Luka 12:​11, 12) To danu bae henahua toho na namo. (Mat. 10:16; Luka 10:3) Bona e hamaorodia bema taunimanima na se uramu idia bae kamonai henidia, basie doridia. (Luka 10:​10, 11) Bona bae daḡedaḡe henidia neganai, una gabu bae rakatania. (Mat. 10:23) Vaia Iesu na lalogoada bona Iehova e abidadama heniava tauna, to hekwakwanai bae vara gabudia amo na e raka siriva.—Ioa. 11:​53, 54.

13. Dahaka dainai o abia daemu Iehova ese oi na be durumumu?

¹³ Hari ina negai momo ese eda ḡaukara na e inai heniamu dainai, namona na Iehova enai baita tabekau, unu amo haroro ḡaukara baita goadalaia. (Apok. 12:17) Dahaka dainai bavabia dae Iehova ese oi na be durumumu? Mani Ioane karoa 17 ai Iesu ena ḡuriḡuri aita laloa. Iesu ese Iehova e noia ena hahediba taudia baine gimadia, bona Iehova ese una noinoi na e haerelaia. Aposetolo Edia Kara bukana ese e hahedinaraiamu aposetolo taudia na Iehova ena heduru dainai daḡedaḡe negana ai dounu e harorova. Iesu na ena ḡuriḡuri ai Iehova e noia aposetolo taudia ese e harorolaiva herevadia bae abidadama heni taudia baine naridia. Iehova ese Iesu ena ḡuriḡuri na doini e haerelaiamu; Iesu ena hahediba taudia e durudia heḡereḡerena, Iehova ese oi danu be durumumu.—Ioa. 17:​11, 15, 20.

14. Dahaka dainai ta abia daemu nega aukadia ai dounu baita haroro diba? (Laulau danu ba itaia.)

¹⁴ Nega dokona ta lao heniamu lalonai, sivarai namona iharorolaina na be aukamu, to Iesu na e gwa heduru na baita abimu una dala amo haroro ḡaukara na baita goadalaiamu. (Luka 21:​12-15) Iesu bona ena hahediba taudia e kara bamona, taunimanima na basita doridia ita bae kamonai henida totona bona, taunimanima ida na basita hepapahuahu. Eda ḡaukara e kouamu tanodia ai, tadikaka na dounu sivarai namona na e harorolaiamu badina Iehova enai e tabekaumu. Kristen ginigunadia edia nega ai Iehova ese ena hesiai taudia na goada e henidiava heḡereḡerena, hari ina negai danu goada e henidamu, iena ura dalana ai “sivarai namo baine hedinarai ḡoevaḡoeva.” (2 Tim. 4:17) Ba helalotao bema Iehova enai bo tabekaumu, haroro ḡaukara na bo goadalaiamu.

E DIBA MOMOKANI HAIDA ESE IA NA BE KAMONAI HENIAMU

15. Ede ta diba tomamu Iesu na e abia dae momokani ena haroro ḡaukara na anina namona be havaraiamu?

¹⁵ Iesu na mai dibana taunimanima haida ese sivarai namona na be abia daemu. Una ese e durua ena haroro ḡaukara na mai moalena ida e karaiava. Heḡereḡere, laḡani 30 C.E. dokonai, Iesu na e itaia momo na e urava sivarai namona bae kamonaia, bona ia ese una na uma anidia vada e lo iutuna sivaraina ida e haheḡereḡerea. (Ioa. 4:35) Laḡani ta murinai, ia ese ena hahediba e hamaorodia: “Uit vada e lo ḡoevaḡoeva.” (Mat. 9:​37, 38) Gabeai ia ese una hereva na ma e gwauraia lou, eto: “Uit vada e lo ḡoevaḡoeva . . . Uma biaguna ba noia, ia ese iutuna taudia haida ma baine siaidia, ena uit bae utua.” (Luka 10:2) Iesu na hanaihanai e abia daeva taunimanima haida ese sivarai namona na be kamonaimu, bona idia ese sivarai namona e abia daeva neganai, e moaleva.—Luka 10:21.

16. Iesu ese e herevalaiva haheitalaidia amo dahaka ta dibamu? (Luka 13:​18-21) (Laulau danu ba itaia.)

¹⁶ Iesu ese ena hahediba taudia e hamaorodia e harorolaiamu sivaraina ese anina namona be havaraiamu. Heḡereḡere, mani haheitalai rua aita lalo. (Luka 13:​18-21 ba duahidia.) Iesu ese sinapi nadinadina ta (mustard grain) e tubumu bona au badana ai e laomu karana na Basileia sivaraina baine tubu haraḡa dalana ida e haheḡereḡerea. Bona haheitalai ma ta ai, Iesu ese Basileia sivaraina na hatubu muramurana ida e haheḡereḡerea. Badina Basileia sivaraina danu gabu momo ai bae harorolaia bona una ese taunimanima bae durudia edia mauri bae haidau, ena be haida ese una senisi na basie itaia haraḡamu. Unu haheitalai amo Iesu ese ena hahediba taudia na e durudia bae laloparara idia e harorolaiava sivaraina ese taunimanima momo be durudiamu.

17. Dahaka dainai eda haroro ḡaukara ai lalohadai maorona baita abia?

¹⁷ Ta itaiamu tanobada heḡeḡemadai haroro ḡaukara ese taunimanima momo e durudiamu, una ese ita e hagoadadamu haroro ḡaukara na baita goadalaia. Laḡani ta ta ai, taunimanima milion momo na Memorial heboudia e maimu bona ita ida Baibul e stadilaiamu. Danu, taunimanima tausen momo e bapatisomu bona ita dia sivarai namona ta harorolaiamu. Ita na asi dibada taunimanima hida ese hereva momokani be abia daemu, to ta dibamu Iehova ese hutuma bada herea e gogodiamu hisihisi badana amo bae roho mauri. (Apok. 7:​9, 14) Iehova na uma Biaguna bona ia na mai dibana taunimanima momo ese hereva momokani na be abia daemu, una dainai dounu baita haroro.

18. Ita be ta uramu e itadamu taudia ese dahaka bae lalopararalaia?

¹⁸ Iesu ena hahediba taudia na haroro goadagoada taudia. Taunimanima ese aposetolo taudia e itadia asi garidia ida e harorova neganai, “lalodia e parara idia na Iesu bamona.” (Apos. 4:13) Namona na ita danu, asi garida ida sivarai namona baita harorolaia goadagaoada, unu amo taunimanima na bae diba ita danu Iesu ta tohotohoamu.