Iehova Imana Na Se Tunamu

1. Mose ese Israel taudia na Aigupito amo e hakaudia lasi neganai, edena dala ai e hahedinaraia ia ese Iehova e abidadama heniava?

HEBERU bukana na abidadama taudia momo e herevalaidia, bona idia ta na Mose. (Heb. 3:​2-5; 11:​23-25) Ia na mai ena abidadama ida Israel taudia na Aigupito amo e hakaudia lasi. Ia ese Farao bona ena tuari oreana garidia na se gariva. Ia na Iehova e abidadama heniava dainai, Israel taudia na Davara Kakakakana amo e hakaudia hanai bona gabeai tano ḡaḡaena ai e nohova. (Heb. 11:​27-29) Israel taudia momo na e daradarava Iehova ese idia be naridiamu eiava lasi, to Mose na dounu ena Dirava e abidadama heniava. Bona ia na e moale badina tano ḡaḡaena ai Dirava ese hoa dalana ai aniani bona ranu amo Israel taudia e durudiava.a—Eso. 15:​22-25; Sal. 78:​23-25.

2. Dahaka dainai Dirava ese Mose e nanadaia, eto: “Iehova imana e tunamu a”? (Numera 11:​21-23)

² Iehova ese Israel taudia na Aigupito amo e hakaudia lasi karana ese Mose ena abidadama na e hagoadaia. To laḡani ta murinai, ia ese Iehova e nanadaia Israel taudia adia vamu be henimu o lasi. Tano ḡaḡaena ai aniani na lasi bona Israel taudia na hutuma herea dainai, reana Mose na e lalova Iehova ese ina hutuma na vamu ai basine ubudia dibamu. Bena Iehova ese Mose e nanadaia, eto: “Iehova imana e tunamu a?” (Numera 11:​21-23 ba duahidia.) Ina hereva, “Iehova imana” anina na Dirava ena lauma helaḡa o ia ese e ḡaukaralaiamu siahuna. Una dainai, ita-itana na Iehova ese Mose e hamaoroa, eto: ‘Lau egu siahu na bada dainai, lau na uramu baina kara ḡaudia na baina kara.’

3. Dahaka dainai ita edai Mose bona Israel taudia edia sivarai na mai anina bada?

³ Nega ta o daradaramu bema Iehova ese oi bona emu femli emui dabu ḡaudia be henimu eiava lasi, a? Namona na Mose bona Israel taudia edia sivarai aita lalo, badina idia na e lalova Iehova ese edia ura ḡaudia na basine heni diba. Baibul amo baita dibamu Iehova imana na se tunamu.

MOSE BONA ISRAEL TAUDIA EDIA AMO TA DIBAMU ḠAUDIA

4. Dahaka dainai Israel taudia momo na e maumau?

⁴ Dahaka dainai Israel taudia na e maumau? Israel besena bona “orea idau-idau taudia” momo na Aigupito amo e raka lasi. Una neganai idia na tano ḡaḡaena ai laḡani momo e raka Gwauhamata Tanona e lao heniava. (Eso. 12:38; Deu. 8:15) Una neganai Iehova ese mana amo e ubudiava. To Idia na mana ianina ai vada e hesiku bena de maumau. (Num. 11:​4-6) Idia na Aigupito ai e aniva vamudia bona aniani namodia e lalodia louva. Taunimanima edia maumau dainai Mose na e lalo idia daidiai vamu baine tahu, to asi dibana edena dala amo bona edeseni ai baine abi.—Num. 11:​13, 14.

5-6. Orea idau-idau taudia edia kara ese Israel taudia e hahekwakwanaidia karana amo dahaka ta dibamu?

⁵ Israel taudia ida e raka hebou idau bese taudia na Iehova ese e henidiava hahenamodia na asie lalodia badava, una kara ese Israel taudia na e hahekwakwanaidia. Bema ita badidai e nohomu taudia ese Iehova ena hahenamo asie lalo badamu, una kara ese ita danu baine hahekwakwanaida diba bena ita danu Iehova ese e henidamu hahenamodia basita lalo badamu. Una na be varamu bema ita ese ta dadarai ḡaudia ma baita lalodia loumu eiava haida ese e abimu hahenamodia dainai baita mamamu. To, bema baita lalomu ita ta davarimu ḡaudia na heḡereḡere, baita moalemu, herevana eda noho dalana be ede bamona.

⁶ Israel taudia ese bema laloatao ḡauna na, Dirava ese idia na e gwauhamata henidia Gwauhamata Tanona ai tauanina ena heduru ḡaudia momo herea be moalelaimu. Una gwauhamata na be ḡuḡurumu, to dia tano ḡaḡaena. Una heḡereḡerena, hari ina nega ai asita davarimu ḡaudia daidiai basita lalohekwarahi, to Iehova ese tanobada matamatana ai be henidamu ḡau namodia baita lalo. Namona na eda abidadama baine hagoadaia Baibul siridia baita lalodia dobu.

7. Dahaka dainai baita abia dae momokani Iehova ese hanaihanai ita na be durudamu?

⁷ Reana bo lalomu dahaka dainai Dirava ese Mose e nanadaia eto, “Iehova imana e tunamu a?” Iehova ese una henanadai na Mose e henia badina e ura Mose ese ḡau rua baine lalodia: (1) Iena siahu na asi hetoana, bona (2) Ia na heḡereḡere vaitani, gabu idauidau ai ena siahu baine ḡaukaralaia. Ena be Israel taudia na tano ḡaḡaena bogaraḡina ai, to Iehova ese idia na vamu momo herea e henidia. Iehova “imana na mai goadana ida e toia roro,” amo e hahedinaraiamu ia ese ena taunimanima na gabu idauidau ai baine durudia diba. (Sal. 136:​11, 12) Bema ita edai hahetoho ta e varamu neganai, basita daradara Iehova ese ita na be durudamu.—Sal. 138:​6, 7.

8. Dahaka ese baine duruda unu amo tano ḡaḡaena ai Israel taudia e karava karadia basita tohotoho? (Laulau danu ba itaia.)

⁸ Iehova na ena gwauhamata heḡereḡerena ai e kara, bona kibi manudia momo herea e harohodia diho edia taruha ai. To una hoa karana e vara neganai, Israel taudia ese Dirava na se tenkiu henia. Momo na mataḡaniḡani dainai e urava manu momo herea bae abi. Dina ta mai kahana, idia ese kibi manudia momo herea e gogo. Una neganai, Iehova ena badu na e siahu unu mataḡaniḡani taudia ediai bona e panisidia. (Num. 11:​31-34) Edia haheitalai amo ḡau ta ta dibaiamu. Baita henahua toho mataḡaniḡani ena idoa ai baita moru na garina. Ena be ita na taḡa eiava ogoḡami tauda, namona na laloda baita hadai eda “kohu na guba ai [baita] habou.” (Mat. 6:​19, 20; Luka 16:9) Bema unu baita kara tomamu, baita diba momokanimu Iehova ese eda dabu ḡaudia na be henidamu.

9. Ededia nega ai baita abia dae momokani Dirava ese ita na be durudamu?

⁹ Hari ina nega ai Iehova na noho heḡaeḡae ena taunimanima baine durudia. To, basitato ita na nega ta ḡau ta ai basita dabumu bona basita hitolomu.b Lasi. Baita dabu o baita hitolo diba. To Iehova ese ita na basine rakatanida vaitanimu. Eda hekwakwanai negadiai ia ese be durudamu. Edena dala amo baita hahedinaraia Iehova ese eda dabu ḡaudia na be henidamu? Mani ini ḡau rua aita itadia; (1) moni hekwakwanaidia e varamu negadiai bona (2) vaira negai eda noho daladia ta lalohekwarahilaimu.

MONI ENA HEKWAKWANAI E VARAMU NEGANAI

10. Dahaka ese moni ena hekwakwanai e havaraiamu?

¹⁰ Ina nega oromana dokona e kahikahimu lalonai, moni ena hekwakwanai na be badamu. Politikol heiriheiridia, tuari, disasta, eiava gorere idauidau dainai eda moni na be oremu. Eiava eda moni ḡaukara, eda kohu o eda noho gabuna baita haboioamu. Unu ḡau daidiai baita uramu moni ḡaukara matamatana ta ma baita tahua, eiava eda femli ida gabu ma ta baitala, unu amo eda ruma bese baita naria. Dahaka ese baine duruda bena eda abi hidi amo baita hahedinaraia Iehova na ta abidadama heniamu?

11. Dahaka ese baine durumu moni ena hekwakwanai ba haheaukalaia? (Luka 12:​29-31)

¹¹ Mai anina bada ḡauna na emu lalohekwarahi ḡaudia na Iehova ba hamaorolaia, una kara ese oi na be durumumu. (Her. 16:3) Iehova ba noia baine durumu abi hidi maorona ba karaia, bona lalomaino baine henimu unu amo o davarimu hekwakwanaidia lalodiai ‘lalomu basine daradara.’ (Luka 12:​29-31 ba duahidia.) Iehova ba noia loulou unu amo baine durumu mauri ena dabu ḡaudia ai lalohadai maorona bavabia. (1 Tim. 6:​7, 8) Moni ena hekwakwanai o davarimu neganai, eda pablikeisin idauidau ai heduru daladia ba tahu. Momo na jw.org ai vidio bona atikol momo ese e durudia moni ena hekwakwanai e haheaukalai.

12. Ededia henanadai ese Kristen tauna ta baine durua diba ena femli dainai abi hidi maorona baine karaia?

¹² Haida na moni ḡaukara dainai edia ruma bese e rakatanimu, to gabeai e lalopararamu una na dia abi hidi maorona. Ḡaukara matamatana ta do so abia lalonai, dia una ḡaukara ai bavabia monina mo ba laloa, to una ese oi bona emu femli emui hetura karana Iehova ida baine hagoadaia o baine hamanokaia ḡaudia ba lalo. (Luka 14:28) Sibomu ba henanadai: ‘Bema lau na moni ḡaukara dainai adavagu ba rakataniamu bona gabu ma ta ai ba ha nohomu, emai headava maurina be ede be hetomu? Lau be kongrigeisin heboudia iboudiai ba laomu, nega ba atomu ba haroromu eiava tadikaka taihu ba bamodiamu, a?’ Bema oi na mai natumu, mani ina henanadai ba laloa: ‘“[Iehova] ena hahediba herevadia bona ena sisiba herevadia” amo natugu be ede baina durudia toma bema lau na dia idia ida?’ (Efe. 6:4) Namona na Dirava ena lalohadai ese baine hakaumu, to Dirava ena Hereva asie laloa badamu taudia na basio kamonai henidia—herevana idia na oi varavaramu o turamu.c Western Asia ai e nohova tauna Tony, na tano ma ta amo moni ḡaukara dainai kampani momo ese e noia, bona be ha karaiamu ḡaukarana peina na bada. Abi hidi ta do se karaia lalonai Iehova e ḡuriḡuri henia bona adavana ida una e herevalaia bena lalona e hadaia unu kampani edia noinoi ta basine abia dae. To edia mauri ai sensi haida bae kara unu amo moni momo basie haore kava. Hari, Tony na e gwaumu: “Una abia hidi a karaia dainai, lau ese haida na durudia Iehova e dibaia bona natumai ese Iehova ihesiai henina na e laloa badamu. Emai femli ai a dibaia ḡauna na, bema Mataio 6:33 baia badinaiamu, Iehova ese ai na be narimaimu.”

EDA VAIRA NEGA MAURINA DAINAI BAITA HEḠAEḠAE

13. Eda mauri laḡanidia e bada e laomu neganai, ta uramu ita na mai eda moni. To dahaka baita kara na namo?

¹³ Ena be eda mauri laḡanidia e bada e laomu, to palani ta karamu negadiai, namona na baita hahedinaraia ita ese Iehova ta abidadama heniamu. Baibul ese ita e hamaorodamu baita ḡaukara na namo, unu amo moni baita habou, gabeai siboda baita henari totona. (Her. 6:​6-11) Vaia moni haida baita ato tabe, gabeai baita ḡaukaralaidia totona na asi ena kerere. Oibe, moni danu mai ena heduru. (Koh. 7:12) To, ita na asita uramu eda mauri lalonai moni na ḡau badana ai baita halaoa.

14. Edena dala ai Heberu 13:5 ena hereva ese be durudamu basita lalohekwarahi momo?

¹⁴ Iesu ese sivarai ta amo e hahedinaraia, moni mo e haboumu to “asi ena taḡa Dirava enai tauna” na kava tauna. (Luka 12:​16-21) Ita na asi dibada kerukeru be dahaka be varamu. (Her. 23:​4, 5; Iak. 4:​13-15) Keriso ena aposetolo taudia ese e davariva metaudia na ita ese danu ta davarimu. Iesu eto, namona na ḡau iboudiai baita “rakatani,” unu amo ita na iena hesiai taudia ai baitala. (Luka 14:33) Aposetolo edia nega ai, Iudea ai, Kristen taudia momo na mai moaledia ida ḡau iboudiai e dadarai. (Heb. 10:34) Hari ina nega ai, tadikaka momo ese edia moni ḡaukara na e haboio badina idia na asie vouti o politikol pati ta asie durua. (Apok. 13:​16, 17) Dahaka dainai idia na unu e kara toma? Badina Iehova ena gwauhamata binai: “Lau na basina negemu bona basina rakatanimu, lasi ona lasi vaitani.” (Heberu 13:5 ba duahia.) Una dainai, vaira negadiai totona palani baita kara namonamo, unu amo nega dikadia ai baita abia dae Iehova na ita be durudamu.

15. Kristen tama sina ese natudia be ede bae lalodia toma? (Laulau danu ba itaia.)

¹⁵ Tano haida ai, taunimanima na e uramu natu bae havara, bena unu natu na gabeai moni amo edia iahu bae durudia diba. To Baibul na e gwa, namona na tama bona sina ese kohu bae habou natudia edia. (2 Kor. 12:14) Vaia, tama sina e burukamu negadiai moni o ḡau ma haida bae abi na maoro, bona natu momo na mai moaledia ida unu heduru na e henimu. (1 Tim. 5:4) To tama bona sina dibadia idia ese moale bada-herea be abiamu bema natudia be durudiamu Iehova ena hesiai taudia ai be laomu. Danu, idia dibadia bema natudia bae durudia, bena gabeai moni amo tama o sina bae naridia ena moale na maraḡi.—3 Ioa. 4.

16. Namona na natu ese moni bae habou, unu amo gabeai idia na sibodia bae henari diba. To tama o sina ese natudia be ede bae durudia toma? (Efeso 4:28)

¹⁶ Bema oi na natumu o duruamu gabeai sibona baine henari daladia o hadibalaiamu, namona na emu kara amo ba hahedinaraia Iehova na o abidadama heniamu. Idia e bada e laomu lalonai, ḡaukara goadagoada ena namo danu ba hadibadia. (Her. 29:21; Efeso 4:28 ba duahia.) E bada e laomu bona e skulimu neganai, ba durudia edia skuli bae lalo bada. Ḡau badana na tama sina ese Baibul ena hahekau herevadia bae tahu namonamo unu amo natudia bae durudia skuli amo e dibamu ḡaudia na bae ḡaukaralai namonamo. Edia tahua ḡauna na natu bae durudia unu amo sibodia bae henari daladia bae diba, haroro ḡaukara bae laloa bada bona bae painia.

17. Dahaka baita abia dae be namo?

¹⁷ Iehova e abidadama heniamu hesiai taudia na bae abia dae momokani ia ese edia dabu ḡaudia na be henimu. Ina nega oromana dokona ta lao heniamu lalonai, namona na Iehova baita abidadama henia momokani. Herevana dahaka bae vara, ḡau badana na mai kudouda idoinai ida baita abia dae Iehova ese ena siahu na be ḡaukaralaiamu tauanina dalana ai be naridamu. Baita abia dae momokani Iehova imana siahuna na heḡereḡere vaitani ita baine narida eda noho gabudia idauidau lalodiai.