‘Dirava Badibadinai Baita Nohomu be Namo’!

1-2. (a) Ta turana namona ai baitala totona ita be dahaka baita kara? (b) Ina atikol ai dahaka baita herevalaimu?

OI BE mai turamu namona ta, a? Ia turana ai baola totona oi be dahaka o kara? Reana nega haida ia o bamoamu, ia ese e davarimu hekwakwanaidia o dibadiamu, bona turamu ese se ura henimu ḡaudia bona e ura henimu ḡaudia danu o dibadiamu. Ena kara namodia o itamu dainai o uramu ena kara ba tohotohodia. Bona oi ese ia na o lalokau heniamu.

² Ta ida ba hetura namonamo totona ia ida nega bavato ia ida ba herevahereva bona ba hediba heheni. Una heḡereḡerena, Iehova baita hetura henia namonamo totona nega baita ato ia baita dibaia namonamo. Ina atikol ai Iehova badibadinai baita noho dalana bona unu baita kara tomamu neganai baita davarimu hahenamodia baita herevalaimu. Ginigunana, mani a laloa dahaka dainai Turada namona, Iehova, badibadinai baita noho na mai ena namo.

3. Dahaka dainai Iehova baita raka henia kahi ena namo baita laloa dobu? Haheitalai ta ba gwauraia.

³ Vaia o abia daemu Iehova bo raka henia kahimu na mai ena namo. To una ena namo bo laloa dobumu karana ese oi na be hagoadamumu ia badibadinai ba noho. (Sal. 63:​6-8, NWT) Heḡereḡere, ita na mai dibada eda diet ta badinaiamu, ta eksasais-mu, ta laḡa-ani namonamomu, bona ranu momo ta inumu na mai ena namo. To, momo ese unu kara na se badinamu, bona edia helt danu se laloa badamu. Unu kara ese be havaramu namo baita lalodia louloumu neganai, ita be durudamu unu kara ta ta na baita badinadiamu. Una heḡereḡerena, ita na mai dibada Iehova baita raka henia kahimu na mai ena namo. To unu baita kara toma ena namo baita laloa dobumu neganai, una ese be hagoadadamu Turada namona, Iehova, baita raka henia kahimu.—Sal. 119:​27-30.

4. Salamo 73:28 e torea tauna be dahaka e gwa?

⁴ Salamo 73:28 ba duahia. Salamo 73 e torea tauna na Levi iduhuna amo, bona ia na Iehova ena dubu ai miusik igadaralaina tauna ta. Ia na laḡani momo lalodiai Iehova e tomadiho heniava. To, ia na mai dibana Dirava badibadinai baine noho ena namo baine laloa tao na ḡau badana, bona e urava ma haida baine hagoadadia “Dirava badibadinai” bae noho. Dahaka dainai Iehova baita dibaia namonamo bona ia ida eda hetura karana baita hagoadaia na namo?

‘DIRAVA BADIBADINAI BAITA NOHOMU’ NEGANAI BAITA MOALEMU

5. (a) Dahaka dainai Iehova iraka heni kahina ese moale e havaraiamu? (b) Edena dala ai Iehova ena amo e maimu aonegana ese oi e durumumu bona e gimamumu? (Hereva Lada-isidia 2:​6-16)

⁵ Iehova ta raka henia kahimu neganai, eda moale danu e badamu. (Sal. 65:4) Heḡereḡere, Baibul ai iena aonega herevadia ta duahimu bona ta badinamu neganai namo ta davarimu. Una aonega ese ḡau dikadia bona kerere badadia amo e gimadamu. (Hereva Lada-isidia 2:​6-16 ba duahidia.) Una dainai Baibul na e gwa: “Aonega e davariamu tauna na namo, bona lalo-parara e abiamu tauna danu.”—Her. 3:13.

6. Dahaka dainai Salamo itorena tauna ese ena moale e haboioa?

⁶ Momokani, nega haida Iehova turana na e lalohisihisimu danu. Salamo 73 e torea tauna na ma haida ida ena mauri e haheḡereḡereava dainai se moaleva. Ia na e lalohisihisiva bona e baduva, badina e itaiava Dirava asie laloa badava taudia na mai edia ḡau namodia momo, to ia be lasi. Salamo itorena tauna na e laloava daḡedaḡe bona hekokoroku taudia na ḡau ta ai asie dabuva, tauanidia na gogoada, bona asie hisihisiva. (Sal. 73:​3-7, 12) Ia na unu ḡau e itava dainai, e laloava Iehova e hesiai heniava karana na asi anina. Bona e lalohisihisi bada herea dainai e gwa: “Asi badina lalogu vada na haḡoevaia, asi badina imagu na kerere amo vada na huridia.”—Sal. 73:13.

7. Ta lalohisihisimu neganai dahaka baita kara? (Rau 1 ai danu ba itaia.)

⁷ Ena be Salamo itorena tauna na e lalohisihisi bada herea, to kara ta e karaia ena lalohadai baine haidaua totona. Ia na “Dirava ena dubu helaḡa badana” ai e vareai, unuseniai Iehova ese ena lalohadai e hamaoromaoroa. (Sal. 73:​17-19, NWT) Ita ta lalohisihisimu neganai, ita Turada namona, Iehova, na mai dibana. Namona na ia baita ḡuriḡuri henia baine duruda totona. Baibul bona tadikaka taihu amo ta abimu hahegoada herevadia ese be hagoadadamu ta lalohisihisimu neganai, dounu Dirava baita hesiai heniamu. Bona lalohekwarahi ese e butuda taomu neganai, Iehova ese be durudamu bona lalomaino be henidamu.—Sal. 94:19.a

‘DIRAVA BADIBADINAI BAITA NOHOMU’ ESE EDA MAURI BAINE HANAMOA

8. Dirava badibadinai baita noho karana ena namo haida be dahaka?

⁸ Badi rua amo baita dibamu Dirava badibadinai baita nohomu karana na mai ena namo. Ginigunana, bema Dirava kahirakahira baita nohomu eda mauri na baita moalelaiamu. Iharuana, baita abia daemu vaira nega ai ḡau namodia momo be varamu. (Ier. 29:11) Mani bae vara ḡau namodia haida aita herevalai.

9. Iehova kahirakahira ta laomu karana ese ita be ede e hamoaleda tomamu?

⁹ Iehova na turada korikorina ai baita halaoamu neganai eda mauri na be namomu. Momo na e gwaumu Dirava na lasi, una dainai asi dibadia dahaka dainai taunimanima na tanobada ai e maurimu, bona e laloamu nega vaira ai taunimanima iboudiai be oremu. To, Dirava ena Hereva ta stadilaia amo ta abia dae momokani “Dirava na e maurimu, bona mai momokanidia ida ia e tahuamu taudia na davadia namodia baine henidia.” (Heb. 11:​6, NWT) Iehova ese e karada badina na ia baita hesiai henia, una dainai unu ta kara tomamu neganai moale korikorina ta davariamu.—Deut. 10:​12, 13.

10. Iehova ese ia e abidadama heniamu taudia ediai be dahaka e gwauhamatalai? (Salamo 37:29)

¹⁰ Momo na e lalomu mauri na ina mo, heḡereḡere, e ḡaukaramu, e headavamu, natudia e havaramu, bona ḡaukara amo be dokomu neganai ede bae henari toma heḡaeḡaedia mo e karamu. Idia na asi dibadia Dirava be vaira nega totona dahaka e gwauhamatalai. To, ita na mai dibada Iehova ese ena hesiai taudia na be naridiamu. (Sal. 25:​3-5; 1 Tim. 6:17) Ita ese eda Dirava bona Turada na ta abidadama heniamu, bona mai dibada ita daidai e gwauhamatalai ḡaudia na be haḡuḡurudiamu. Ita ese vaira negai bae vara ḡau namodia momo ta narimu, heḡereḡere, Paradaiso ai Iehova baita tomadiho henia hanaihanai.—Salamo 37:29 ba duahia.

11. Dirava badibadinai baita nohomu ena namo be dahaka, bona Iehova ena hemami be ede bamona?

¹¹ Badi momo daidia Dirava badibadinai baita nohomu na mai ena namo. Heḡereḡere, Iehova na e gwauhamata bema ta ena kerere amo baine helalo-kerehai, ia ese ena dika na baine gwauatao. (Isa. 1:18) Una dainai, guna ta kara kereredia na asita lalodia louloumu. (Sal. 32:​1-5) Bona Iehova ta hamoaleamu neganai ita danu ta moalemu. (Her. 23:15) Momokani, ita na Iehova turana dainai ḡau namodia momo herea ta moalelaimu. To, edena dala ai dounu Dirava badibadinai ba noho?

“DIRAVA BADIBADINAI” BAITA NOHOMU DALANA

12. Oi be dahaka o kara unu amo Dirava turana ai ola?

¹² Do asita bapatiso ai, ita na ḡau momo ta kara Iehova turana ai baitala totona. Oi na Iehova Dirava bona Iesu Keriso o dibadia, emu kerere gunadia amo o helalo-kerehai, Dirava enai emu abidadama o hahedinaraia, bona o hekwarahi Ia ba badinaia. To, ia dounu ba hetura henia totona, namona na unu ḡau na ba karadia hanaihanai.—Kol. 2:6.

13. Dahaka ḡau toi ese be durudamu Iehova kahirakahira baita laomu?

¹³ Dahaka ese baine duruda dounu Iehova kahirakahira baitala? (1) Hanaihanai Baibul baita duahia bona baita stadilaia. Unu baita kara tomamu neganai, ita ese Dirava na baita dibaia namonamomu. Ita ese Dirava ena lalohadai na baita lalopararalaiamu, iena ura baita dibamu, bona unu hahekau herevadia heḡereḡeredia ai baita maurimu. (Efe. 5:​15-17) (2) Iehova ese ita ta ta edai dala idauidau ai ena lalokau e hahedinaraimu daladia baita lalo dobumu neganai, una ese eda abidadama be hagoadaiamu. (3) Namona na Iehova ese e inai henimu ḡaudia baita dadarai hanaihanai bona kara dikadia e karamu taudia basita bamodia.—Sal. 1:1; 101:3.

14. Iehova ihamoalena totona dina ta ta ai dahaka baita kara? (1 Korinto 10:31; Laulau danu ba itadia.)

¹⁴ 1 Korinto 10:31 ba duahia. Iehova ihamoalena ḡaudia baita kara hanaihanai na mai anina bada. Haroro ḡaukara bona hebou baita lao henidia na ḡau badana. To dia una mo, dina ta ta ai ta karamu ḡaudia amo Iehova baita hamoalea. Heḡereḡere, ḡau iboudiai lalodiai ta kara momokanimu bona hariharibada karana ta hahedinaraiamu neganai, Iehova ta hamoaleamu. (2 Kor. 8:21; 9:7) Danu ia na e uramu baita hahedinaraia mauri na ta laloa badamu. Anina na, ta animu bona ta inumu ḡaudia na ta haeoro namonamomu bona eda helt baine durua ḡaudia ma haida danu ta karamu. Bema Iehova ese e itadamu ita na ta hekwarahimu ia ihamoalena ḡaudia ta karamu, ia ese ita na be lalokau henida badamu.—Luka 16:10.

15. Iehova be e uramu ma haida be ede baita kara henidia toma?

¹⁵ Iehova na ia e hesiai heniamu eiava se hesiai heniamu taudia iboudiai na e kara namo henidiamu. (Mat. 5:45) Ia na e uramu ita danu ma haida ediai unu baita kara toma. Heḡereḡere, ‘tau ta dikana basita gwauraia; basita heai, . . . taunimanima iboudiai baita kara namo henidia.’ (Tito 3:2) Herevana haida na Iehova asie abia daemu, to dounu baita kara namo henidia. (2 Tim. 2:​23-25) Nega iboudiai ma haida baita kara namo henidiamu bona baita lalodiamu neganai, Iehova kahirakahira baita laomu.

TA MORUMU NEGANAI ‘DIRAVA BADIBADINAI BAITA NOHO’ DIBA

16. Nega taina e daudau murinai Salamo 73 e torea tauna enai be ma dahaka e vara?

¹⁶ Nega haida o hemamimu guna o kara kereredia daidiai Iehova na oi emu amo e daudaumu, a? Salamo 73 e torea tauna danu unu e hemami toma. Ia na eto: “Aegu mokona e hetutuhi, egu raka ai mokona na dedi.” (Sal. 73:2) Danu ma eto: “Lau kudougu na e hisihisiva . . . Asina lalo namonamova . . . bona [Iehova vairanai] lau na kavakava animal ta na heto.” (Sal. 73:​21, 22, NWT) To, ia be e lalo ena dika daidiai Iehova ese ia vada se lalokau heniava, a?

17. (a) Ena be Salamo e torea tauna na e lalomanoka, to ia be dahaka e kara? (b) Iena haheitalai amo dahaka ta dibamu? (Laulau danu ba itadia.)

¹⁷ Salamo itorena tauna na e mamia Iehova ese e rakatania, to una hemami na se noho daudau. Ia na e laloparara Iehova kahirakahira bainela na namo, badina ia na ini e gwau toma: “Ḡau tamona, lau na hanaihanai oi [Iehova] ida, oi ese imagu idibana o dogoa taomu. Emu sisiba amo o hakaugumu, gabe amo hairai ai bavabigu dae.” (Sal. 73:​23, 24) Ita danu bema eda kerere daidiai ta lalomanokamu, Iehova baita noia baine hagoadada. (Sal. 73:26; 94:18) Ena be baita moru, namona na Iehova baita lou henia bona baita abia dae ia na “noho heḡaeḡae eda dika baine gwauatao.” (Sal. 86:​5, NWT) Ta mamiamu ita na ta lalomanokamu neganai, Dirava kahirakahira baitala na mai anina bada.—Sal. 103:​13, 14.

“DIRAVA BADIBADINAI” BA NOHO HANAIHANAI

18. Dahaka dainai Iehova badibadinai baita noho hanaihanai?

¹⁸ Iehova badibadinai na baita noho hanaihanai diba. Bona ia idibana karana na asi dokona. Badina Baibul ese e hahedinaraia Iehova ena dala, iena aonega, bona iena diba na asi hetoana.—Roma 11:33.

19. Salamo 73 ese ita be ede e hagoadada tomamu?

¹⁹ Salamo 79:13 na etomu: “Ai, emu bese taudia, emu seri mamoedia, baia imodaimu hanaihanai; uru ta ela bona ma uru ta oi ihanamomu baia gwaurai hesiriu-hesiriu.” Oi danu bema dounu Dirava kahirakahira bo laomu, ia ese na be hanamomu hanaihanaimu. Salamo e torea tauna heḡereḡerena, oi na bo gwau dibamu: “Dirava na lau kudougu e gimaiamu, ia na egu nadi badana, bona lau ahugu ela bona hanaihanai.”—Sal. 73:​26, NWT.