Baibul Stiuden Ba Durudia Iehova Ena Hesiai Taudia ai Baela Totona

1-2. (a) Dahaka dainai stiuden haida na e garimu Witnes ai baela? (b) Ina atikol ai ita be dahaka baita herevalaimu?

DAHAKA dainai gunaguna oi na o gariva Iehova ena Witnes ta ai baola totona? Reana oi na turamu eiava varavaramu ese bae badu henimu garina o gariva, a? Eiava reana oi na Dirava ena taravatu ba utu garidia o gariva, a? Bema oibe, anina na hari oi na o lalopararamu dahaka dainai stiuden haida na e garimu Witnes taudia ai bainela.

² Iesu dibana gari karana ese ta baine koua neganai, ia na lauma dalanai basine tubu dibamu. (Met. 13:​20-22) Taunimanima haida na e daradarava Iesu murinai bae raka totona, to ia ese aposetolo e hadibadia edena dala ai unu bamona taudia bae durudia (1) idia e koudiamu ḡaudia bae dibadia, (2) Iehova bae lalokau henia, (3) edia mauri lalonai Iehova bae atoa guna, bona (4) hahetoho bae hanaidia. Edena dala ai Iesu ese aposetolo e hamaorodia herevadia baita badina diba? Edena dala ai Mauri Ba Moalelaia Hanaihanai! bukana amo Baibul stiuden ta baita durua Iehova ena hesiai tauna ai bainela?

STIUDEN BA DURUA IA E KOUAMU ḠAUDIA BAINE DIBADIA

3. Dahaka dainai Nikodemo na e gari Iesu ena hahediba tauna ai bainela?

³ Nikodemo na ḡau ta dainai e gariva Iesu ena hahediba tauna ta ai bainela totona. Iesu na haroro ḡaukara e hamatamaia bena hua 6 muridiai, Nikodemo dibana Iesu na Mesia. (Jon 3:​1, 2) To, ia na “Iuda taudia garidia e gariva” dainai, hanuaboi ai Iesu dekena ela. (Jon 7:13; 12:42) Reana ia na e laloava bema ia na Iesu ena hahediba tauna ta ai be laomu, ia ese ena dagi bona kohu na be haboiomu.a

4. Nikodemo ese Dirava ena ura baine lalopararalaia totona, Iesu be dahaka e kara?

⁴ Ena be Nikodemo na Mose ena Taravatu mai dibana namonamo, to edena dala ai Iesu ese e durua Iehova ena ura baine lalopararalaia totona? Ena be hanuaboi, to Iesu na mai ena ura ida nega e atoa Nikodemo ida bae herevahereva. Bona Nikodemo na hahediba tauna ai bainela totona, Iesu ese e hamaoroa, namona na ia na (1) baine helalo-kerehai, (2) ranu lalonai baine bapatiso, bona (3) Dirava Natuna baine abidadama henia.—Jon 3:​5, 14-21.

5. Edena dala ai ita ese stiuden ta baita durua ia e kouamu ḡaudia baine dibadia?

⁵ Ena be stiuden ta na Baibul mai dibana namonamo, to ita ese baita durua ia e kouamu ḡaudia baine dibadia. Bema ia na ena moni ḡaukara o ena ruma taudia ese e kouamu, namona na oi ese nega bavato ia ba durua totona. Reana oi ese ia ba boiria tea ba inu hebou o ia ida ba raka loaloa—reana unu negai, ia ese ia e kouamu gaudia na oi emu ai be herevalaimu. Una negana ai oi ese ia ba durua baine itaia, ia be dahaka senisi haida baine kara unu amo Iehova baine hamoalea, dia oi.

6. Edena dala ai oi ese stiuden ba durua, unu amo ia ese goada baine abia bena Baibul ena taravatu baine badinadia? (1 Korinto 16:13)

⁶ Bema stiuden ese be abia daemu Iehova na ia be durumu Baibul ena taravatu baine badinadia, una ese ia na be hagoadaiamu e dibamu ḡaudia baine badina totona. (1 Korinto 16:13 ba duahia.) Oi emu maduna na sports coach ta ena ida aita haheḡereḡerea. Nega momo coach namona ta na dia treinini mo be henimu, to danu, ia ese tim taudia be hagoadadiamu be gwaumu: ‘Umui na gadara taudia namodia bona gadara dalana na mai dibamu.’ Una heḡereḡerena, namona na oi na dia Dirava ena ura mo ba hahedibalaia, to danu, stiuden ba hagoadaia, baoto, ‘Iehova na oi be durumu emu mauri ai senisi ba kara totona.’ Edena dalai oi ese emu maduna ba huaia namonamo diba?

STIUDENT BA DURUA IEHOVA BAINE LALOKAU HENIA

7. Edena dala ai Iesu ese kamonai taudia e durudia Iehova bae lalokau henia?

⁷ Iesu dibana ena aposetolo na Dirava e lalokau heniava dainai, idia na e diba ḡaudia e badinava. Nega momo ia ese sivarai maorodia amo aposetolo e durudiava Dirava bae lalokau henia totona. Heḡereḡere, Iesu ese Iehova na tama namona ta ida e haheḡereḡerea, badina ia ese ḡau namodia na natuna e henidiamu. (Met. 7:​9-11) Una sivarai e hakala heniava taudia haida tamadia na reana dia lalokau taudia. Reana idia na e moale dikadika badina Iesu ena sivarai ta lalonai e kamonai, eto, tama ta na natuna e lalokau henia bona e abia dae, ena be natuna na ḡau dikadia momo e kara. Iesu na una sivarai amo idia e durudia dainai, idia ese e itaia, Iehova na idia e lalokau henidiamu bona ia na e uramu idia baine durudia.—Luk 15:​20-24.

8. Edena dala ai oi ese stiuden ba durua Iehova baine lalokau henia?

⁸ Oi ese Iehova ena kara namodia na stiuden ba hadibalaia, unu amo ia bo duruamu Iehova baine lalokau henia totona. Stadi ta ta negadia ai, oi ese stiuden ba hamaoroa, baoto: ‘Oi ese o dibadiamu ḡaudia amo bo itaiamu Iehova ese oi na e lalokau heniamu.’ Eiava umui ese Iesu ena boubou kahana o stadilaiamu neganai, oi ese stiuden ba hamaoroa, baoto: ‘Iehova ese Iesu e heni badina ia na oi e lalokau henimumu.’ (Rom. 5:8; 1 Jo. 4:10) Stiuden na Iehova ese ia e lalokau heniamu dalana be itaiamu neganai, reana ia danu Iehova be lalokau heniamu.—Gal. 2:20.

9. Dahaka dainai Michael na ena mauri e haidaua?

⁹ Mani Indonesia tauna ladana Michael aita laloa. Ia na hereva momokani mai dibana to se bapatiso. Ia laḡanina 18 neganai, tano ma ta ela bona motuka tari ḡaukarana e karaiava. Gabeai ia na e headava to ena ruma taudia e rakatanidia, ela tano ma ta ai e ḡaukarava. To, ia adavana bona natuna kekenina na Baibul e stadilaia bona lauma dalanai e goada. Michael na sinana e mase murinai, ia na ena gabu e lou henia badina e ura tamana baine naria, bona ia ese Baibul stadi e abia dae. Ia na Mauri Ba Moalelaia Hanaihanai! bukana ena lesen 27 ai “Poin ma Haida” kahana e stadilaia neganai, una ese ia na e durua bada herea. Michael na e tai badina e itaia, Iehova na e lalohisihisi badina e itaia Iesu na e hisihisiva. Michael na e laloparara Iehova bona Iesu ese ia na e lalokau heniamu. Una dainai, ia ese ena mauri e haidaua bona e bapatiso.

STUDEN BA DURUA ENA MAURI LALONAI IEHOVA BAINE ATOA GUNA

10. Edena dala ai Iesu ese aposetolo e durudia Iehova e atoa guna? (Luk 5:​5-11) (Laulau danu ba itaia.)

¹⁰ Vaia aposetolo na maoromaoro e laloparara Iesu na Mesia, to dounu idia ese heduru bae abi na namo, unu amo edia mauri lalonai haroro ḡaukara bae atoa guna. Iesu ese idia e boiridia ia murinai bae raka neganai, Petro bona Andrea na ena hahediba ai vada ela guna. (Met. 4:​18, 19) Idia raruosi na Iakobo bona Ioane ida haoda bisnesi e karaiava. (Mak 1:​16-20) Petro bona Andrea ese edia haoda e rakatania, reana edia plan na idia na dia Iesu murinai mo bae raka, to danu, idia ese tauanina dalanai edia ruma taudia bae durudia. To dahaka dainai idia ese Iehova e atoa guna? Luka ena sivarai amo ta dibamu, Iesu ena hoa karana dainai, aposetolo e abia dae Iehova ese edia dabu ḡaudia na be henidiamu.—Luk 5:​5-11 ba duahia.

11. Edena dala ai ita na eda ekspiriens amo stiuden ena abidadama baita hagoadaia diba?

¹¹ Vaia ita ese hoa karadia na basita kara dibamu, to Iehova ese ia e atoa gunamu taudia e durudiamu daladia edia ekspiriens baita sivarailai diba. Heḡereḡere, oi ese hebou ilao henina karana o hamatamaia neganai, Iehova ese oi be ede e durumu toma? Reana oi na emu bos ida o hebou bena ia o hadibaia oi na hebou dinadia ai ovataim na basio karamu. Oi ese una ekspiriens na stiuden enai o herevalaimu neganai, namona na Iehova o atoa guna bena ia ese emu abidadama e hagoadaia dalana na ba herevalaia.

12. (a) Oi ese pablisa idauidau ba boiridia emu Baibul stadi lalonai bae helai vareai ena namo be dahaka? (b) Edena dala ai vidio ba ḡaukaralaia stiuden ba hadibaia? Haheitalai ta ba gwauraia.

¹² Pablisa ma haida ese Iehova e atoa guna sivaraidia be herevalaimu neganai, una ese emu stiuden na baine hagoadaia danu. Una dainai, pablisa idauidau ba boiridia emu Baibul stadi lalonai bae helai vareai. Oi ese pablisa ba noia diba ia ese hereva momokani e abia dalana bona Iehova ena hesiai ḡaukara e atoa gunamu dalana baine sivarailaidia. Danu, nega ta bavabia hidi emu stiuden ida vidio ta ba itaia hebou—una vidio na Mauri Ba Moalelaia Hanaihanai! bukana ai “Poin ma Haida” kahana ai bo itaiamu eiava “Heduru Ḡaudia ma Haida” kahadia ai bo itaiamu. Haheitalai: Umui ese Mauri Ba Moalelaia Hanaihanai! bukana ena lesen 37 o herevalaiamu neganai, Jehovah Will Care for Our Needs vidiona ena point namodia haida ba herevalai diba.

STIUDEN BA DURUA HAHETOHO BAINE HANAIDIA

13. Edena dala ai Iesu ese aposetolo e durudia gabeai daḡedaḡe bae hahanaidia?

¹³ Iesu ese aposetolo e hamaorodia loulouva, idia na gabeai varavaradia o haida ese bae daḡedaḡe henidia. (Met. 5:11; 10:​22, 36) Iesu ena mase negana e kahikahiva lalonai, ia ese aposetolo e hadibadia, idia na gabeai bae hamasedia badina Iehova e tomadiho heniamu. (Met. 24:9; Jon 15:20; 16:2) Ia ese idia e hamaorodia, namona na haroro ḡaukara ai nahuadia bae toho. Heḡereḡere, ia ese idia e hadibadia, idia ese haroro ḡaukara na bae karaia namonamo diba, bema haroro ai idia na nahuadia bae toho bona daḡedaḡe taudia ida basie hepapahuahu.

14. Edena dala ai ita ese stiuden baita durua vaira negadiai daḡedaḡe baine hahanaidia? (2 Timoteo 3:12)

¹⁴ Ita ese danu stiuden baita durua namonamo, vaira negadiai ia ese daḡedaḡe baine hahanaidia totona. Heḡereḡere, ita ese ia baita nanadaia: ‘Reana oi na hari Baibul o stadilaimu dainai, o laloamu turamu eiava emu ruma taudia be dahaka be karamu o be gwauraimu?’ (2 Timoteo 3:12 ba duahia.) Stiuden ena mauri na e idaumu dainai, reana ia turana haida na ia e hevasehalaiamu. Eiava stiuden na hahediba hereva matamatadia e abi daemu dainai, reana ia na varavarana eiava ma haida ese e gwau heniamu. Bema hari ita ese stiuden baita durua namonamo, vaira negana ai ia ese daḡedaḡe be haheaukalaiamu o hekwakwanai be hahanaidiamu.

15. Ena be ruma taudia bae daḡedaḡe, to dahaka ese stiuden baine durua baine haheauka?

¹⁵ Bema stiuden na ruma taudia ese e daḡedaḡe heniamu, namona na ena ruma taudia ese ia e badu heniamu badina na oi ese ia ba hadibalaia. Reana ia ena ruma taudia na e laloamu stiuden na Iehova ena Witnes taudia ese e hakaua kereremu, eiava idia na e laloamu Iehova ena Witnes taudia na taunimanima dikadia. Iesu varavarana haida danu e gwauva: “[Iesu] na vada e kavaia.” (Mak 3:21; Jon 7:5) Namona na oi ese stiuden ba durua baine haheauka, bona mai manauna ida ena ruma taudia eiava ma haida baine hereva henidia.

16. Edena dala ai stiuden baita durua mai aonegana ida baine haroro?

¹⁶ Ena be stiuden varavarana haida na e kamonaimu, to stiuden ese ḡau iboudiai na nega tamona ai basine gwaurai. Bema ia na unu be kara tomamu, reana ia varavarana na be hesikumu bona basine uramu gabeai sivarai namona bae kamonai. Una dainai, oi ese stiuden ba hagoadaia gau haida mo baine herevalai, una amo dala bae hekeho gabeai bae herevahereva totona. (Kol. 4:6) Reana stiuden na varavarana baine durudia jw.org websait ai bae vareai. Unu amo gabeai idia na nega idauidau ai jw.org bae kehoa bena Iehova ena Witnes sivaraidia ma haida bae duahi diba.

17. Edena dala ai oi ese stiuden ba durua ma haida edia henanadai baine haerelaidia namonamo? (Laulau danu ba itaia.)

¹⁷ Oi ese stiuden ba durua jw.org ai “Frequently Asked Questions” baine dibaia, bena ia ese gabeai una baine ḡaukaralaia varavarana eiava turana edia henanadai baine haerelaidia. (2 Tim. 2:​24, 25) Baibul stadi dokodiai, Mauri Ba Moalelaia Hanaihanai! bukana ai “Taunimanima Haida Na E Gwaumu” kahana na oi bona stiuden ida ba tohoa. Heḡereḡere, oi ese stiuden ba noia, ia baine haere dalana baine gwauraia bena oi ba kamonai. Oi ese heduru hereva haida ba gwaurai, unu amo ena haere dalana baine hanamoa. Unu bamona practice o heduru daidiai, stiuden ese ma haida edia henanadai na baine haerelaidia namonamo diba.

18. Edena dala ai oi ese stiuden ba durua bapatiso lasi pablisa ai bainela? (Metiu 10:27)

¹⁸ Iesu ese aposetolo e hagoadadia, ruma-ta-ruma-ta ai sivarai namona bae harorolaia. (Metiu 10:27 ba duahia.) Stiuden na ruma-ta-ruma-ta ai haroro ḡaukarana be karaia matamamu neganai, ia ese Iehova enai tabekau karana be dibaiamu. Edena dala ai oi ese stiuden ba durua bapatiso lasi pablisa ai bainela? Bema kongrigeisin na kahirakahira spesol haroro ḡaukarana be karaiamu, namona na nega bada lalonai oi ese stiuden ba durua pablisa ai bainela karana baine lalohadailaia. Oi ese ia ba hadibaia, dahaka dainai nega unu bamodia ai momo na pablisa ai e laomu. Wiki ta ta ai, hebou lalodiai, stiuden na tok baine heni karana ese be duruamu danu. Ena be gabeai stiuden na tok be henimu, to unu ese be duruamu sivarai namona baine harorolaia namonamo totona.

BAVABIA DAE EMU STIUDEN ESE IEHOVA NA BE HAMOALEAMU

19. Edena dala ai Iesu ese e hahedinaraia ia na e abia daeva aposetolo na Iehova be hamoaleamu? Ita ese Iesu be ede baita tohotohoa toma?

¹⁹ Iesu do se mase bona guba do sela neganai, ia na aposetolo e hamaorodia, nega ta ai idia na bae noho hebou. Idia ese una hereva anina na asie lalopararalaia. To, Iesu ena hereva anina na, idia na guba baela. Ena be aposetolo taudia na e daradarava, to Iesu na mai dibana idia na e urava Iehova bae hamoalea. (Jon 14:​1-5, 8) Iesu dibana, gabeai idia ese guba helarona bona ḡau ma haida anidia na bae lalopararalaidia. (Jon 16:12) Namona na ita danu baita abia dae stiuden ese Iehova na baine hamoalea diba.

20. Edena dala ai taihu ta ese e hahedinaraia, ia na e abia daeva ena stiuden na kara maorona baine karaia?

²⁰ Namona na ita ese baita abia dae, stiuden na e uramu kara maorona baine karaia. Malawi ai taihu Chifundo aita laloa. Ia bona Katolik hahinena, Alinafe na Mauri Ba Moalelaia Hanaihanai! bukana e stadilaiava. Lesen 14 dokonai, Chifundo ese ena stiuden e nanadaia, eto, ‘Oi ese kaivakuku itomadiho henidia karana be ede o laloa tomamu?’ Alinafe na mai baduna ida eto, “Lau baina ura kaivakuku baina ḡaukaralaia o lasi na lau sibogu!” Chifundo e laloa Baibul stadi vada be dokomu. To taihu na mai haheaukana ida Alinafe e stadi heniava, badina ia dibana gabeai Alinafe na be lalopararamu kaivakuku iḡaukaralaina karana na kerere. Hua haida muridiai, Chifundo ese Alinafe na lesen 34 ai ina henanadai e henia, eto: “Oi ese Baibul bona Dirava momokanina, Iehova, ome stadilaia amo be dahaka ome dibaia?” Chifundo ese Alinafe ena haere na ini e gwauraia toma, eto: “Ia na point namo hereadia momo e herevalai. Point ta na eto, Iehova ena Witnes taudia na Baibul ena taravatu iboudiai na e badinamu.” Gabeai, Alinafe na kaivakuku iḡaukaralaina karana e hadokoa bona e bapatiso.

21. Edena dala ai stiuden ta baita durua Iehova ihesiai henina karana baine abia hidi?

²¹ Vaia Iehova ese stiuden ta kudouna ai hereva momokani uhena e hatubuamu, to iseda maduna be, una stiuden baita durua lauma dalanai baine goada. (1 Ko. 3:7) Ita ese Dirava ena taravatu na stiuden baita hadibalaia. Danu, ia baita durua Iehova baine lalokau henia. Ma danu, ita ese stiuden baita hagoadaia ena mauri lalonai Iehova baine atoa guna. Bona ia baita hadibaia baine abia dae Iehova ese ia na be durumu haida edia daḡedaḡe karana baine haheaukalaia totona. Ita ese eda stiuden na unu baita durua tomamu neganai, una ese ia na be hagoadaiamu Iehova ena taravatu be badinamu bona be gini goada dibamu.