Bavabia Dae Iehova ese Emu Dika na Vada E Gwauatao

1-2. Ita na eda kerere amo baita helalo-kerehaimu neganai, Iehova be dahaka be karamu? (Rau 1 laulauna danu ba itaia.)

KING David na ena kerere gunadia haida daidiai e lalohisihisiva. (Sal. 40:12; 51:3) To, ia ese Iehova e sori henia bona senisi e kara neganai, Dirava ese ena dika na e gwaudia tao. (2 Sa. 12:13) David na Dirava ese dika e gwautaomu karana e lalopararalaia neganai, ia na e moale dikadika.—Sal. 32:1.

² Ita danu Dirava ese e bogadahisimu bona eda dika e gwautaomu karana ta dibamu neganai ta moalemu. Momokani, Iehova na e uramu eda dika, kerere dika rohorohodia danu, baine gwauatao, bema ita Ia baita sori heniamu, Ia baita noiamu eda dika baine gwautao, eda kerere na elda taudia baita hadibalaidiamu, bona bema eda kerere na basita karadia loumu. (Prov. 28:13; Apos. 26:20; 1 Jo. 1:9) Danu ita na ta moalemu badina dibada Iehova ese e gwautaomu kara dikana na se laloatao loumu.—Esek. 33:16.

3-4. (a) Taihu Jennifer e bapatiso murinai, ia be dahaka e lalo? (b) Ina atikol ai dahaka baita herevalaimu?

³ Nega haida ai, haida na e daradaramu Iehova ese edia dika e gwauatao eiava lasi. Jennifer ena sivarai aita laloa. Ia maraḡina neganai, tamana bona sinana ese Iehova sivaraina na ia e hadibalaia. To ia taina e bada neganai, ia na kerere lalodiai e vareai bona tamana o sinana na se hadibadiava. Laḡani haida muridiai, ia ese senisi e kara, ena mauri na Iehova enai e gwauhamatalaia bona e bapatiso. Jennifer eto: “Gunaguna, launa nega momo matabodaḡa karadia na karava, bia na inuinu momova, na badu haraḡava, bona moni momo na tahuva. Lau dibagu Baibul na eto, Keriso ena mauri idavalaina boubouna dainai, Iehova ese eda dika na baine gwaudiatao diba. To launa na laloava Iehova ese egu dika na reana se gwauatao.”

⁴ Nega haida ai, oi danu o laloamu emu kerere gunadia haida daidiai Iehova ese oi na doini e badu henimumu, a? To Iehova e uramu ita na baita diba ia na hebogahisi Diravana, badina ia ese David ena dika na e gwauatao. Ina atikol ai ita ese ina baita herevalaiamu, dahaka dainai bona edena dala ai ita ese baita abia dae Iehova ese dika na e gwautaomu?

DAHAKA DAINAI ITA ESE BAITA ABIA DAE IEHOVA ESE DIKA NA E GWAUTAOMU?

5. Satana be e uramu ita ese dahaka baita abia dae? Haheitalai ba gwauraia.

⁵ Iehova ese ita e lalokau henidamu bona eda dika e gwautaomu karana baita abia daemu neganai, ita ese Satana ena koikoi karadia na baita dadaraimu. Ita ese baita laloatao: Satana e uramu ita ese Iehova isiaina na basita lao heni. Una dainai, Satana na e uramu ita na baita abia dae Iehova ese eda dika na basine gwautaomu. Elda taudia ese Korinto kongrigeisin ai matabodaḡa kererena e karaia tauna e atoa lasi sivaraina aita laloa. (1 Ko. 5:​1, 5, 13) Una tau na gabeai e helalo kerehai. To, Satana na e urava kongrigeisin taudia ese una tau ena dika basie gwauatao bona kongrigeisin ai basie abia dae. Danu, Satana na e urava una tau ese baine abia dae kongrigeisin bona Iehova ese ena dika na basie gwauataomu. Momokani, Satana na se uramu una tau na Iehova baine hesiai henia. Hari ina negai, Satana ese ita danu unu e tohoda tomamu. To, ita ese Satana ena “[koikoi] karadia na dibada.”—2 Ko. 2:​5-11; NWT.

6. Dahaka dainai eda kerere gunadia basita lalodia loulou?

⁶ Iehova ese ita eda dika e gwautaomu karana baita abia daemu neganai, ita na eda kerere gunadia daidiai basita lalohisihisimu. Ita ese kerere ta karaiamu neganai, vaia ta lalohisihisimu. (Sal. 51:17) Ita unu baita lalohisihisi toma be namo, a? Oibe, badina unu amo ita na senisi baita karamu bona ḡau maorona baita karaiamu. (2 Ko. 7:​10, 11) To, bema Iehova ese eda dika e gwautao murinai ita na dounu ta lalohisihisimu, ita ese Dirava ihesiai henina karana vada baita hadokoamu. Iehova ese dika e gwautaomu karana baita abia daemu neganai, ita na basita lalohisihisimu. Dia una mo, to danu, ita na mai moaleda ida Iehova ena ura dalana ai ia baita hesiai heniamu. (Kol. 1:​10, 11; 2 Tim. 1:3) To, edena dala ai ita ese baita abia dae Dirava ese dika na e gwautaomu?

EDENA DALA AI ITA ESE BAITA ABIA DAE IEHOVA ESE DIKA NA E GWAUTAOMU?

7-8. Iehova be Dirava ede bamona? (Esodo 34:​6, 7)

⁷ Iehova ese ena kara e herevalai dalana na ita ese baita laloa. Heḡereḡere, Sinai Ororona ai Iehova ese Mose be dahaka e hamaoroa?a (Esodo 34:​6, 7 ba duahidia.) Iehova ese ena kara namodia iboudiai amo edena be e herevalaia badabada? Ia eto: “[Launa] hebogahisi bada Diravana.” Una dainai, bema Iehova e lalokau heniamu tauna ta na baine kara dika murinai baine helalo-kerehai momokani, o laloamu ena dika be Iehova ese baine gwauatao, a? Bema Iehova ese una tau ena dika basine gwautaomu, anina na ia na Dirava dikana bona asi ena hebogahisi. To lasi, ita dibada Iehova na Dirava namona bona mai ena hebogahisi.

⁸ Ita na ta dibamu Iehova ena hereva na momokani, ia na hebogahisi Diravana. (Sal. 31:5; NWT) To bema oi na emu kerere gunadia daidiai doini o daradaramu Iehova ese emu dika e gwaudiatao eiava lasi, namona na oi sibomu na ini ba henanadai toma: ‘Lau ese na abia dae vaitanimu Iehova na mai ena hebogahisi bona helalo-kerehai tauna ena dika be e gwautaomu, a? Bema oi ese bo abia daemu Iehova na mai ena hebogahisi, namona na bavabia dae danu Dirava ese emu dika na vada e gwauatao.’

9. Salamo 32:5 ai, Iehova be edena dala ai eda dika e gwautaomu?

⁹ Iehova ese dika e gwautaomu dalana na Baibul lalonai e gwauraia, bona ita ese una na baita laloa. Baibul itorena tauna David ese Iehova ena kara e herevalaia dalana mani aita itaia. (Salamo 32:5 ba duahia.) David eto: “Oi ese egu kara dika ena metau o abia oho.” Iehova ese David ena dika e gwauatao neganai, David na e mamia ia ese e huaiava ḡau metauna na Dirava ese e abia oho na heto. Bona David na e moale badina e diba Iehova ese ena dika na e gwauatao. (Sal. 32:​2-4) Ita danu eda kerere amo ta helalo-kerehaimu neganai, una kerere na basita laloa louloumu, to baita moalemu badina Iehova ese eda dika na e gwauatao.

10-11. Iehova na ‘noho heḡaeḡae dika baine gwautao,’ una hereva amo dahaka ta dibamu? (Salamo 86:5)

¹⁰ Salamo 86:5 ba duahia. David eto, Iehova na e ‘noho heḡaeḡaemu dika e gwaua taomu.’ (NWT) Una anina na ita ese kerere ta karamu neganai, Iehova na se badu haraḡamu. Bona dahaka dainai ia na hanaihanai e uramu helalo-kerehai taudia edia dika baine gwautao? Salamo 86:5 eto: “Emu [lalokau] na bada herea, oi e tai henimumu taudia iboudiai ediai.” (NWT) Vanegai stadi atikol 33 ese e hahedinaraia, Iehova ese ia e tomadiho heniamu taudia na e lalokau henidiamu. Una dainai, bema ta na ena kerere amo baine helalo-kerehai momokani, ia na dounu Iehova ese be lalokau heniamu bona ena dika na be gwautaomu. (Isa. 55:7) To bema oi na emu kerere gunana ta dainai doini o daradaramu Iehova ese emu dika e gwaudiatao eiava lasi, namona na oi sibomu ini ba henanadai toma: ‘Bema ta na e helalo-kerehaimu bona Dirava e noiamu baine bogaiahisi, lau ese na abia daemu iena dika be Iehova ese e gwautaomu, a? Bema lau ese una na abia daemu, anina na, bema lau baina helalo-kerehai bona Dirava baina noia baine bogaguhisi, namona na lau ese baina abia dae egu dika na Iehova ese be gwautaomu.’

¹¹ Baibul ese danu ita e hadibadamu, Iehova na e lalopararamu ita na dia ḡoevadae. (Sal. 139:​1, 2) Salamo bukana ena karoa ma haida ai David ese una na e herevalaia, bona mani aita itaia badina unu hereva daidiai ita ese baita abia daemu Iehova na dika e gwautaomu.

IEHOVA BE ITA EDAI DAHAKA E LALOTAOMU?

12-13. Iehova ese ita edai dahaka e lalotaomu, bona Ia ese ita be ede e kara henida tomamu? (Salamo 103:14)

¹² Salamo 103:14 ba duahia. David eto, Iehova “vada e [laloataomu], ita na tano ḡahuna mo.” (NWT) David na una hereva amo e hahedinaraia, Dirava ese eda dika e gwautaomu badina be ina: Ia dibana ita na dia ḡoevadae. To, ita ese una baita lalopararalaia namonamo totona, David ena hereva anina ma aita tahua.

¹³ David eto, “Ede e karada toma na [Iehova] dibana.” Ia ese Adam na “tano ḡahuna amo e karaia.” Una dainai, Dirava dibana ia ese taunimanima be ede e karadia toma. Danu ia dibana idia—ḡoevadae o dia ḡoevadae—e uramu bae aniani, bae mahuta, bona bae hahodi na ḡau badana. (Gen. 2:7) To, Adam bona Heva e kara dika dainai, ina hereva “ita na tano ḡahuna mo” anina ma ta na: Ita na kara dika ai ta vara dainai, ita ese eda manoka ḡaudia idauidau na baita tuari henidiamu. David eto, Iehova dibana ita bona e laloataomu ita na tano ḡahuna mo, anina na ia etomu, Dirava dibana ita na dia ḡoevadae dainai, nega haida ita na kerere baita karamu. To ita na eda kerere amo baita helalo-kerehaimu neganai, ia ese be bogadahisimu bona eda dika be gwautaomu.—Sal. 78:​38, 39.

14. (a) David ese Iehova dika e gwautaomu karana be ede e herevalaia toma? (Salamo 103:12) (b) Iehova ese David ena dika e gwauatao dalana amo dahaka ta dibamu? (Maua ladana “Iehova ese Dika E Gwautaomu Bona E Lalodia Boiomu Dalana” ba itaia.)

¹⁴ Iehova ese dika e gwautaomu karana amo dahaka ta dibamu? (Salamo 103:12 ba duahia.) David eto, Iehova ese dika e gwautaomu neganai, ia ese ita eda dika na e atodia daudaumu, “dina ena dae [ist] kahana bona dina ena diho [west] kahana padadia” edia daudau na heto. Dina ena dae kahana bona dina ena diho kahana padadia na daudau herea. Una ese dahaka e hadibadamu? Ita ese ta dibaiamu ḡauna be ina, Iehova ese eda dika na e gwautaomu bona se lalodia loumu. Una na vaitani Ia ese eda dika na gabu daudau hereadia ai e negediamu, unu amo Ia ese ita ihadikada o ipanisida lalohadaina na basine abia.—Esek. 18:​21, 22; Apos. 3:19.

15. Bema ita na dounu eda kerere gunadia ta lalomu, dahaka baita laloatao?

¹⁵ Bema Iehova ese dika e gwautaomu karana baita abia dae na auka, Salamo 103 ai David ena hereva ese edena dala ai ita baine duruda? Bema ita na dounu eda kerere gunadia ta lalomu, namona na ini baita lalotao: Iehova na dibana ita na dia ḡoevadae tauda. Bona edia mauri e haidau bona e helalo-kerehai taudia edia dika na Ia ese e gwautaomu. Danu guna ita ese ta kara kereredia na Iehova ese vada e lalodia boio vaitani, bona eda dika na e gwautao. Una dainai Ia ese ita na basine gwau henidamu eiava basine hahisidamu. Bema Iehova ese eda kerere gunadia na vada e lalodia boio, ita ese danu baita lalodia boio na namo. (Sal. 130:3) Iehova ese eda dika e gwautaomu karana baita abia daemu neganai, una ese ita be durudamu eda kerere gunadia na baita lalodia boiomu bona mai moaleda ida Iehova na dounu baita hesiai heniamu.

16. Kerere gunadia ilalo loudia karana ese hekwakwanai be havaramu ena haheitalai ta mani a gwaurai. (Laulau danu ba itaia.)

¹⁶ Ina haheitalai mani aita laloa: Bema ta na motuka e tarimu, ia na muri kahana e itaiamu galasina amo ia murinai e maimu motukadia be itadiamu. Ia na nega ta ta ai mo unu be kara tomamu, to bema ia na una galasi mo be itaia noho itaia nohomu, reana be hekwakwanai dibamu. Motuka e tariamu tauna basine hekwakwanai totona, ia ese e lao heniamu dalana mo baine itaia na namo. Una heḡereḡerena, vaia nega ta ta ai eda kerere gunadia baita lalo lou na namo. Badina una ese ita be durudamu una kara na ma basita karaia loumu. To bema nega iboudiai eda kerere gunadia baita lalodiamu, ita ese eda moale baita haboioamu bona Iehova ihesiai henina karana vada baita hadokoamu. Ḡau badana na ita na Iehova ihesiai henina ai baita bisi bona mauri e lao heniamu dalana mo baita itaia, anina na Dirava ese e gwauhamatalaia tanobada matamatana mo baita laloa, una negana ai ita ese kerere gunadia na ‘basita lalodia unemu.’—Isa. 65:17; Prov. 4:25.

BAITA ABIA DAE IEHOVA NA ITA E LALOKAU HENIDAMU BONA EDA DIKA E GWAUTAOMU

17. Dahaka dainai baita abia dae Iehova ese ita na e lalokau henidamu bona eda dika na e gwautaomu?

¹⁷ Iehova ese ita na e lalokau henidamu bona ia na noho heḡaeḡae eda dika baine gwautao, una baita abia dae momokani na ḡau badana. (1 Jon 3:19) Dahaka dainai? Badina Satana na e uramu baita abia dae ita eda dika na bada herea dainai Iehova ese ita na se lalokau henidamu bona eda dika na se gwautaomu. Herevana dahaka, to Satana ena ura badana na ina: Ita ese Iehova ihesiai henina karana baita hadokoa. Bona Satana na dibana ena nega na kwadoḡi herea dainai, ia na be ḡaukara goadamu ita baine hamoruda. (Rev. 12:12) To, ita ese Satana na baita tuari henia bona dounu mai eda abidadama ida Iehova baita hesiai henia!

18. Oi be dahaka ba kara unu amo bavabia dae Iehova ese oi na e lalokau henimumu bona emu dika na e gwautaomu?

¹⁸ Iehova ese oi e lalokau henimumu karana bavabia dae totona, namona na atikol 33 ese e herevalai ḡaudia ba badina. Bona ina atikol ai, Iehova ese sibona ena kara e herevalaia dalana bo laloamu amo bo abia dae momokanimu Ia ese emu dika na e gwautaomu. Baibul ai Iehova ese dika e gwautaomu dalana ba laloa dobu. Danu ina ba laloatao: Iehova na dibana oi na dia ḡoevadae bona Ia na hebogahisi Diravana dainai, oi o kereremu neganai emu dika na e gwautaomu bona e lalodia boio vaitanimu. Oibe, oi na bo moalemu badina o abia daemu Iehova ese e bogamu hisimu, bona David heḡereḡerena ini bo gwau tomamu, “Tenkiu Iehova, badina ‘egu kara dika ena metau o abia oho’!”—Sal. 32:5.