Ura Dikadia Ba Tuari Henidia Ela Bona Ba Kwalimu Dalana

1. Ita iboudai be dahaka ta tuari heniamu?

NEGA ta ai, oi be o urava Iehova ese e inai heniamu ḡauna ta ba karaia, a? Hahetoho unuhetomana na ma haida ediai danu e varamu. Baibul eto: “[Umui] e butumui taomu hedibaḡanidia na taunimanima iboudiai ese e haheaukalai hedibaḡanidia heḡereḡeredia.” (1 Ko. 10:13) Una anina na oi ese o tuari heniamu ura dikana na ma haida ese danu e tuari heniamu. Iehova ese oi na be durumumu, ura dikana ba tuari henia ela bona ba kwalimu.

2. Tadikaka, taihu, bona Baibul stiudent haida ese e tuari henimu ura dikadia haida be dahaka? (Laulau danu ba itadia.)

² Baibul eto: “Taunimanima ta sibona ena ura dikadia ese lalona e aniamu bona e koiamu.” (Jei. 1:14) Una siri amo ita na ta dibamu, taunimanima ta ta edia ura dikadia na i’idaui’idau. Heḡereḡere, Kristen mero ta be reana ena ura dikana ese e doriamu kekeni ta ida matabodaḡa karana bae karaia hebou. Eiava Kristen mero ta be reana ena ura dikana ese e doriamu mero ma ta ida matabodaḡa karana bae karaia hebou. Eiava ponografi i’itana e hadokoa tauna na reana ena ura dikana ese e doriamu laulau dikadia ma baine ita lou. Eiava drag e rakatani tauna na ena ura dikana ese nega haida ai e doriamu drag baine ani lou totona. Eiava bia o alkahol inu momo karana e hadokoa tauna na reana ena ura dikana ese e doriamu inuinu momo karana ma baine hamatamaia lou. Ura dikadia unuhetomadia na tadikaka, taihu, bona Baibul stiudent ese doini e tuari henimu. Nega haida ai, reana ita ese apostol Paulo ena lalohadai ta abiamu, ia na eto: “Kara namo baina karaia na tomu, to dika na egu ai e miamu.”—Rom. 7:21.

3. Bema oi na ura dikana ta o hadokoamu to e vara louloumu, oi ese ededia lalohadai kereredia bo abimu?

³ Bema oi na ura dikana ta o hadokoamu to e vara louloumu, reana oi na bo laloamu, ḡau maorona na basio karaia dibamu. Danu reana oi na bo laloamu, Iehova ese mauri hanaihanai ahuna na basine henimumu badina oi lalomu ai una ura dikana na doini mia. To, dahaka dainai ba laloatao lalohadai unu bamodia o abimu na kerere? Haere baita diba totona, namona na ina stadi atikol ese ini henanadai rua baine haerelaidia guna: (1) Daika be e uramu oi na lalohadai unu bamodia bavabi? Bona (2) Oi ese ura dikadia be ede ba tuari henidia toma ela bona ba kwalimu?

SATANA E URAMU ITA BE DAHAKA BAITA LALO?

4. (a) Satana e uramu ita be dahaka baita laloa? (b) Dahaka dainai ta diba vaitanimu ita ese ura dikadia na baita dadarai dibamu?

⁴ Satana e uramu ita na baita laloa, ita ese ura dikadia na basita koudia dibamu. Iesu ese apostol na ḡuriḡuri dalana e hadibalaidia neganai, ia ese e hahedinaraia, Satana ese ita na be tohodamu. Iesu eto: “Hedibaḡani ai basio hakaumai vareai, a [Satana ena] amo ba hamaurimai.” (Met. 6:13) Satana e gwaumu taunimanima na ura dikadia be abimu neganai, idia ese Iehova ena taravatu na be utumu. (Job 2:​4, 5) Satana unu e gwau tomamu badina be dahaka? Badina matamana negana ai ura dikana ese e koia tauna ginigunana na Satana, bona ia na se ura vaitaniva Iehova baine kamonai henia. Ia na e laloamu hahetoho lalodiai ita ese Iehova na baita dadaraiamu ia heḡereḡerena. Danu ia na e laloava, ia ese Dirava Natuna ḡoevadaena na hahetoho lalonai baine hamorua diba. (Met. 4:​8, 9) To, dahaka badi dainai ita ese ura dikadia na baita dadarai dibamu? Ita ese Paulo ena hereva na ta abia daemu, eto: “Goada e henigumu Diravana dainai lau na ḡau iboudiai ikaradia ai na goadamu.”—Flp. 4:13.

5. Dahaka dainai Iehova na e abia dae momokanimu ita ese ura dikadia na baita koudia dibamu?

⁵ Iehova na e abia dae momokanimu, ita ese ura dikadia na baita koudia dibamu. Dahaka dainai ita na unu ta gwau tomamu? Badina Iehova e peroveta, eto, hutuma bada-herea na ia bae abidadama henia ela bona hisihisi bada hereana lalonai bae roho mauri. Una anina be dahaka? Iehova, koikoi asi dibana Diravana, e gwaumu taunimanima momo herea na Paradaiso ai bae vareai neganai, “edia dabua na kukuro-kukuro,” anina na Iehova matana ai idia na ḡoeva. (Rev. 7:​9, 13, 14) Una ese e hahedinaraiamu, Iehova na dibana ita ese ura dikadia na baita koudia dibamu.

6-7. Satana e uramu ita be edena lalohadai ma ta baita laloa?

⁶ Satana na ma e uramu ita na baita laloa, Iehova ese mauri hanaihanai ahuna na basine henidamu badina ita laloda ai ura dikadia na doini mimia. Satana e uramu una lalohadai baita abia badina be dahaka? Badina matamana negana amo, Satana na Iehova ese vada e dadaraia vaitani, ia na basine noho hanaihanaimu, bona ia na be ore vaitanimu. (Gen. 3:15; Rev. 20:10) Satana na e mamamu badina ita be mauri hanaihanai baita abiamu. Una dainai, ia ese ita e tohodamu badina e uramu ia baita tohotohoa bena mauri hanaihanai baita haboioa. To, ita na dia Satana heḡereḡerena, badina Baibul ese ita e hamaorodamu Iehova na e uramu ita baine duruda, unu amo baita mauri hanaihanai. Oibe, Baibul eto: “[Dirava] na se uramu ta baine mase; e uramu iboumui ai ba helalo kerehai.”—2 Pi. 3:9.

⁷ Bema ita na lalohadai kereredia baita abimu eiava ura dikadia basita tuari henidiamu, ita ese Satana vada baita tohotohoamu. Ita na una baita lalopararalaiamu neganai, una ese be durudamu Satana baita laoa ahumu bona abidadama ai baita gini tutuka-tutukamu.—1 Pi. 5:​8, 9.

ITA NA DIA ḠOEVADAE TAUDA DAINAI, DAHAKA BAITA LALOMU?

8. Ina hereva “kara dika” anina ma ta be dahaka? (Salamo 51:5) (“Hereva Anina” danu ba itaia.)

⁸ Dia Satana ese mo ita e tohodamu dainai lalohadai kereredia ta abimu eiava ura dikadia asi ta tuari henidiamu. To danu ḡau ma ta dainai ita na unu baita kara tomamu. Una be dahaka? Una na Adam bona Heva edia amo ta abia hanai kara dikana.a—Job 14:4; Salamo 51:5 ba duahia.

9-10. (a) Adam bona Heva e kara dika murinai dahaka e vara? (Laulau danu ba itaia.) (b) Ita na kara dika ai ta vara o dia ḡoevadae tauda dainai, edena hemami baita abi dibamu?

⁹ Adam bona Heva e kara dika murinai dahaka e vara? Idia ese Iehova e gwau-edeede henia murinai, idia na e komu bona fig raudia amo tauanidia e koudia. Buka ta (Insight on the Scriptures) ese Adam bona Heva e karaia karana e herevalaia neganai, eto: “Kara dika dainai idia na e hemarai bona e lalohisihisi.” Adam bona Heva na Iehova turana ai vada sela lou. Bona herevana idia ese dahaka e kara, to idia na hemarai bona lalohisihisi ai e noho badina idia na dia ḡoevadae.

¹⁰ Dahaka dainai ita ese Adam bona Heva na ta hereadia? Badina Iesu ena mauri idavalaina boubouna ese Adam bona Heva na basine durudia dibamu, to ita hari be durudamu. Una mauri idavalaina boubouna dainai Dirava ese eda dika e gwau-taomu bona Dirava turana ai ta laomu. (1 Ko. 6:11) To ita na dia ḡoevadae o kara dika tauda dainai, nega haida ai baita hemaraimu bona baita lalohisihisimu. Momokani, Baibul eto kara dika ese taunimanima iboudiai na e biagudia aukamu, “ena be haida ese Adam ena kara dika asie tohotohoa.” (Rom. 5:14) To, dia namo baita lalo ita na dia ḡoevadae o kara dika tauda dainai ita ese kara maorona na basita karaia dibamu o mauri hanaihanai na basita abiamu. Ita ese unu lalohadai kereredia na baita dadaraidia dibamu. Edena dala ai?

11. Nega haida ai reana baita laloamu ura dikadia na basita kou dibamu, to Roma 6:12 ese ita be dahaka e hadibadamu?

¹¹ Ita na kara dika ai ta vara o dia ḡoevadae tauda dainai, nega haida ai reana baita laloamu ura dikadia na basita kou dibamu. Toana na ita kwarada lalonai ere ta ta kamonaiamu, etomu, ‘Ura dikadia na basio koudia dibamu.’ To, dahaka dainai ita ese una ere na basita kamonai henia? Badina Baibul ese ita e hadibadamu, kara dika na eda king ai basita halaoa o ia ese tauanida na basine “lohiadia.” (Roma 6:12 ba duahia.) Una anina na, ita ese tauanida ena ura dikadia na baita koudia diba. (Gal. 5:16) Iehova dibana ita ese hahetoho na baita hanaidia diba, badina e hamaoroda unu baita kara toma. (Deut. 30:​11-14; Rom. 6:6; 1 Te. 4:3) Oibe, ita ese ura dikadia na baita koudia diba.

12. Nega haida ai ita laloda ai na ura dikadia mimia dainai baita laloamu Iehova ese mauri hanaihanai ahuna na vada basine henidamu. To dahaka dainai una lalohadai baita dadaraia?

¹² Ita na dia ḡoevadae tauda dainai, reana nega haida ai ita na baita laloamu, Iehova ese mauri hanaihanai ahuna na vada basine henidamu badina ita laloda ai na ura dikadia mimia. Toana na ita kwarada lalonai ere ta ta kamonaimu, etomu, ‘Ura dikadia na basio koudia dibamu.’ To, dahaka dainai ita ese una ere na basita kamonai henia? Badina Baibul ese ita e hadibadamu, Iehova dibana ita na kara dika ai ta vara. (Sal. 103:​13, 14) Ia na “ḡau iboudiai dibana”—kara dika ese ita ede e biaguda tomamu daladia danu Ia na mai dibana. (1 Jon 3:​19, 20) Ḡau badana na ura dikadia ese ita na basine halusida o ḡau kereredia na basita kara, unu amo Iehova vairanai baita ḡoeva. Dahaka dainai ita na unu ta gwau tomamu?

13-14. Iehova ese ura dikadia e abimu taudia be e dadaraidiamu, a? Ba herevalaia.

¹³ Baibul ese e hahedinaraia ḡoevaḡoeva, ura dikana ta baita abia be idau bona ura dikana baita haḡuḡurua be ma idau. Heḡereḡere, apostol edia negai haida na Kristen taudia ai do asiela neganai, idia na gay edia matabodaḡa karadia e karava. Paulo eto: “Umui haida danu gunaguna unuheto.” Una anina be idia ese matabodaḡa urana be basie abia loumu, a? Reana ura dikana na dounu be vara loumu. To Kristen taudia na e haheauka bona ura dikana se haḡuḡurua dainai, Iehova ese idia na e abidia dae. Baibul eto, Dirava ese idia na ‘vada e huridia’ o e haḡoevadia. (1 Ko. 6:​9-11, NWT) Oi ese danu ḡau maorona na ba karaia diba.

¹⁴ Oi ese ura dikadia idauidau bo tuari henidiamu neganai, oi na bo kwalimu dibamu. Bema ura dikadia na e vara louloumu, namona na oi na ba haheauka bona nega iboudiai ‘tau-animu ena ura bona lalomu ena ura’ na ba biagudia. (Efe. 2:3) Edena dala ai oi ese ura dikadia ba tuari henidia ela bona ba kwalimu diba?

BA KWALIMU DALANA

15. Oi ese ura dikadia ba halusidia totona, dahaka dainai emu manoka ḡaudia ba diba na namo?

¹⁵ Oi ese ura dikadia ba halusidia totona, dala ginigunana na, oi ese emu manoka ḡaudia na ba diba. Baibul eto, ‘sibomu basio hekoi.’ (Jei. 1:22) Heḡereḡere, bia e inu momomu tauna na reana be laloamu ena hekwakwanai na maraḡi badina ia be bia rua o toi mo e inumu to ma haida be bia momo e inumu. Eiava ponografi e ita momomu tauna be reana gwau na ma haida be henidiamu, be gwaumu, ‘Lau ese matabodaḡa laulaudia i’itana urana na basina abi, bema adavagu ese e lalokau henigumu karadia bema karamu.’ Lalohadai unuhetomadia e abimu taudia na gabeai hahetoho lalodiai e moru haraḡamu. Una dainai, dia namo oi ese eskius ba gwaurai o lalohadai kereredia bavabi badina o uramu ḡau kererena ta ba karaia. Namona na oi sibomu ese abi hidi maorona hari ba karaia.—Gal. 6:7.

16. Edena dala ai kara maorona ikarana ba hagoadaia?

¹⁶ Dala iharuana be, namona na oi ese ḡau maorona ba karaia mai goadamu idoinai ida. (1 Ko. 9:​26, 27; 1 Te. 4:4; 1 Pi. 1:​15, 16) Oi e tohomumu ḡauna bona negana ba dibadia. Reana dina idauidau o dala idauidau ai una ura dikana na emu ai e varamu. Heḡereḡere, oi be o hesikumu negadia ai ura dikadia o abimu eiava malo kahadia ai ura dikadia o abimu, a? Namona na nega bada lalonai ba heḡaeḡae guna, bona hahetoho lalodiai sibomu ba hegima daladia ba lalo. Hahetoho do asie vara negadiai, unu ba heḡaeḡae toma na namo herea.—Prov. 22:3.

17. Iosef ena sivarai amo ita be dahaka ta dibamu? (Genese 39:​7-9) (Laulau danu ba itadia.)

¹⁷ Potifara adavana ese Iosef lalona e ania bae mahuta hebou neganai, Iosef be dahaka e kara? Una horana ai ia ese Potifara adavana ena ura e dadaraia. (Genese 39:​7-9 ba duahidia.) Iosef ena sivarai amo ita be dahaka ta dibamu? Hahetoho do se vara neganai, ia na idaunegai lalona e hadaia ia ese ta adavana na basine mahuta henia. Oi danu hahetoho do se vara lalodiai, lalomu ba hadaia kerere ta basio karaia. Bena gabeai hahetoho baine vara neganai, oi ese kara dika na ba dadaraia haraḡa.

NEGA IBOUDIAI “SIBOMUI BA HETAHU”

18. Oi ese ura dikadia ba halusidia dalana ma ta be dahaka? (2 Korinto 13:5)

¹⁸ Oi ese ura dikadia ba halusidia totona, dala ihatoina be, ‘sibomu ba hetahu.’ (2 Korinto 13:5 ba duahia.) Una anina na, nega iboudiai oi ese emu lalohadai bona kara ba sekedia bona senisi ba kara na namo. Heḡereḡere, oi na lalohadai dikadia haida o abimu to o uramu ba hadoko. Ena be oi ese una hahetoho o hahanaia, to sibomu ba henanadai: ‘Lau ese lalohadai dikana be na koua haraḡa o lasi?’ Bema oi ese lalohadai dikana na so koua haraḡa, basio lalohisihisi. To, oi ese vaira negana ai sibomu ba hegima o ba henari namonamo daladia ba lalohadailaidia. Mani sibomu ba henanadai: ‘Lalohadai dikana ta e varamu neganai, lau ese una lalohadai be maoromaoro na kouamu, a? Lau be na itamu laulaudia daidiai o na duahimu sivaraidia daidiai o na kamonaimu anedia daidiai, na hekwarahimu hahetoho baina hanaia totona, a? Lau matagu be na biagua haraḡamu dainai, matabodaḡa laulau dikadia na asina itamu, a? Lau be na lalopararamu Iehova ena taravatu na nega iboudiai nanamo, ena be na hekwarahimu baina haheauka bona baina manadalaia, a?’—Sal. 101:3.

19. Edena dala ai abi hidi kerere maraḡidia e karamu tauna na e hekwarahimu ura dikadia baine koudia?

¹⁹ Oi sibomu o hetahu negadiai, dia namo eskius herevadia ba gwaurai badina o uramu kerere ta ba karaia. Baibul eto: “Taunimanima lalodia na koikoi herea bona dika rohoroho.” (Jer. 17:9) Iesu eto ‘tau lalona amo e daemu ḡauna na, lalo-hadai dikadia.’ (Met. 15:19) Heḡereḡere, tau ta ese ponografi o matabodaḡa vidio i’itana karana na idaunegai e hadokoa, to hari, ia na e laloamu matabodaḡa fotodia baine ita na namo badina foto ai e hedinarai taudia na dabua maraḡidia e rio. Eiava ia na reana be gwaumu, ‘Lau ese ḡau kererena ta basina karaia momokani, to kwaragu lalona ai baina piksaia hari be namo.’ Anina na unu bamona tauna na palani e karaia gunamu, gabeai tauanina ena ura baine haḡuḡurua totona. (Rom. 13:​14, NWT) To oi ese dahaka ba karaia be maoro? Namona na oi ese kerere maraḡidia na ba dadarai, unu amo kerere badadia danu ba dadarai diba.b Danu, oi ese “lalo-hadai dikadia” iboudiai ba dadarai, unu amo kerere lalodiai basio vareaimu.

20. Vaira nega ai ura dikadia be ede be hetomu, bona hari dahaka baita abia dae?

²⁰ Ina atikol ai tame dibaia heḡereḡerena, Iehova ena heduru dainai ita ese hahetoho na baita koua dibamu. Danu Iesu ena mauri idavalaina boubouna dainai Dirava ese eda dika na be gwautaomu, bona tanobada matamatana ai baita noho hanaihanaimu. Oibe, una negai ura dikadia na vada basita abimu dainai, ita na mai moaleda ida Iehova baita hesiai heniamu. To hari, namona na baita abia dae momokani ita ese ura dikadika na baita koudia dibamu bona Iehova ese be durudamu baita kwalimumu.