Oi Be Dahaka Ba Kara Bema Haida ese E Kara Auka Henimumu?

1-2. Haida edia kara auka daidiai, taunimanima momo be dahaka e karamu? Bona dahaka baita herevalaimu?

TAUNIMANIMA momo na haida ese se kara namo henidiamu. Badina e itaiamu idia na ogoḡami, tano ma ta amo ema, toadia, eiava badi ma haida daidia se kara namo henidiamu. Momo na e hisihisimu badina bisnesi taudia bona politikol ḡaukaradia e gunalaimu taudia na sibodia mo e helalomu eiava edia moni bae habada daladia mo e lalomu. Oibe, kara unu bamodia ese ita eiava ma haida na e hahisidiamu.

² Momo na ini badi rua daidiai e badumu: (1) ma haida ese asie kara namo henidiamu, bona (2) e itaiamu haida ese ma haida na asie kara namo henidiamu. Ita iboudai na ta uramu maino ai baita noho. Taunimanima haida na e ḡaukara goadamu e varamu hekwakwanaidia bae hamaoromaoro. Una dainai e protestimu, eiava unu hekwakwanai bae hamaoromaoroa taudia e sapotidiamu. To, ita na Kristen tauda dainai, ta dibamu ita na “dia tanobada ena” bona ta abia daemu Dirava ena Gavamani ese taunimanima edia kara auka karana na be haoreamu. (Jon 17:16) To, ita na dounu ta hebogahisimu bona nega haida ta lalohisihisimu. Bema ta itaiamu taunimanima haida ese ma haida asi e kara namo henidiamu, reana ini baita lalo tomamu: ‘Lau be dahaka baina kara bema una e varamu? Hari e varamu kara auka karadia daidiai lau be dahaka baina kara?’ Unu henanadai baita haerelaidia totona, ina baita laloa guna, Iehova bona Iesu edia hemami be ede bamona, bema e itaiamu taunimanima ese ma haida na e kara auka henidiamu.

IEHOVA BONA IESU ESE KARA AUKA KARANA NA E INAI HENIAMU

3. Dahaka dainai ita na asi ta uramu taunimanima ese ma haida bae kara auka henidia? (Isaia 5:7)

³ Baibul ese e hahedinaraia ḡoevaḡoevamu dahaka dainai ita na asi ta uramu taunimanima ese ma haida bae kara auka henidia. Unu ta lalo tomamu badina Iehova ese ita na ia heida-idana ai e karada, danu ia na “kara maoromaoro bona hahemaoro [maoromaoro] e ura henidiamu.” (Sal. 33:5; Gen. 1:26) Ia ese taunimanima na se kara auka henidiamu dainai, se uramu taunimanima ese ma haida bae e kara auka henidia. (Deut. 32:​3, 4; Maik. 6:8; Sek. 7:9) Heḡereḡere, peroveta tauna Isaia ena nega ai Israel taudia momo na edia gabu taudia ese e kara auka henidiava. Una [“lalohisihisi dainai e taitaiva,” NWT] taudia na Iehova ese e kamonai henidia. (Isaia 5:7 ba duahia.) Una dainai Ia ese ena taravatu e utuava bona ma e kara auka henidia loulouva taudia na e panisidia.—Isa. 5:​5, 13.

4. Iesu ese ma haida ikara auka henidia karana be ede e laloa toma? (Laulau danu ba itaia.)

⁴ Iesu danu, Iehova heḡereḡerena kara maoromaoro e ura heniamu, a kara auka be e inai heniamu. Dina ta Iesu na tau ta e itaia imana na dika, ia ese una tau na e bogaiahisi dainai imana e hanamoa. To dubu igunalaina taudia ese una e itaia neganai e badu. Idia na e gwa Iesu na Sabati taravatuna e utuamu. Idia na Iesu ese una tau ena hisihisi amo e hanamoa karana na se laloa bada. Iesu ese edia kara be ede e laloa toma? Ia na e “lalohisihisi bada badina idia kudoudiai hebogahisi na lasi.”—Mak 3:​1-6, NWT.

5. Ta ese e kara auka henidamu neganai dahaka dainai basita badu haraḡa?

⁵ Taunimanima ese ma haida e kara auka henidiamu neganai, Iehova bona Iesu na e badumu. Una dainai ma haida edia kara auka daidiai unu ta hemami tomamu na asi ena kerere. (Efe. 4:26) To, namona na ita ese eda badu na baita biagua bona baita helalotao ita ese hisihisi na basita haorea dibamu. Danu bema ita na baita badu noho badu nohomu, be goreredamu bona kwara gorerena ese be abida dibamu. (Sal. 37:​1, 8; Jei. 1:20) Ita eiava ma haida e kara auka henidamu neganai, dahaka baita kara? Iesu ena haheitalai amo diba baita abi.

TAUNIMANIMA EDIA KARA AUKA DAIDIAI IESU BE DAHAKA E KARA?

6. Iesu tanobada ai e nohova neganai, ededia kara auka karadia e ita? (Laulau danu ba itaia.)

⁶ Iesu tanobada ai e nohova neganai, ia na taunimanima ediai kara aukadia momo e ita. Ia na mai dibana dubu e igunalaina taudia ese taravatu momo herea e ato, una ese taunimanima edia mauri na e ha-aukaia. (Met. 23:​2-4) Danu, Iesu na mai dibana Roma lohiadia ese taunimanima na e kara auka henidiava. Jew taudia momo na e urava Roma edia amo bae heruha. Haida na orea ai e hebou Roma taudia e tuari henidia. To, Iesu na unu orea ta lalodiai se vareai. Danu taunimanima haida na e ura Iesu na King ai bae halaoa neganai ia na e raka oho.—Jon 6:15.

7-8. Dahaka dainai Iesu na se ura hisihisi iboudiai baine hamaoromaorodia? (Jon 18:36)

⁷ Iesu tanobada ai e nohova neganai, hekwakwanai ihamaoromaorodia totona politikol karadiai na se vareai. Dahaka dainai Iesu ese una abi hidi e karaia? Badina ia na mai dibana taunimanima na asi edia maoro taunimanima ma haida bae lohiadia, eiava idia na dia heḡereḡere sibodia bae helohia. (Sal. 146:3; Jer. 10:23) Bona idia na dia heḡereḡere e varamu hisihisidia iboudiai bae haoredia. Ina nega oromana na Satana Diabolo ese e lohiaiamu. Ia na daḡedaḡe tauna bona taunimanima momo ese ia tohotohoamu. (Jon 8:44; Efe. 2:2) Taunimanima na dia ḡoḡoevadae, una dainai ena be idia haida na taunimanima namodia, to nega haida e hekwarahimu kara namodia bae hahedinarai.—Had. 7:20.

⁸ Iesu na mai dibana Dirava ena Gavamani sibona ese hari e varamu hekwakwanai iboudiai be haorediamu. Una dainai ia na e ḡaukara goada “Dirava ena [Gavamani] sivaraina namona e harorolaia.” (Luk 8:1) Ia ese “kara maoromaoro hitolona e hitolomu bona ranu-masena e ranu masemu taudia” e hadibadia, hisihisi bona ḡau dikadia iboudiai bae ore negana na e maimu. (Met. 5:6; Luk 18:​7, 8) Taunimanima edia gavamani ese una senisi na basie karaia dibamu, to Dirava ena Gavamani sibona ese una be karaiamu, una Gavamani na “dia ina tanobada ḡauna.”—Jon 18:36 ba duahia.

TAUNIMANIMA E KARA AUKAMU NEGADIAI IESU BA TOHOTOHOA

9. Dahaka dainai o abia daemu Dirava ena Gavamani sibona ese hisihisi iboudiai be haorediamu?

⁹ Ita na “dina ginigabedia” ai vada ta nohomu. Una dainai hari hekwakwanai na vada bada herea dia Iesu ena nega ai e varava hekwakwanaidia heḡereḡeredia. To Iesu ena nega amo ema bona hari unu hekwakwanai iboudia na Satana bona ena taunimanima ese e havaramu. (2 Tim. 3:​1-5, 13; Rev. 12:12) Iesu heḡereḡerena ita danu ta dibamu Dirava ena Gavamani sibona ese kara dikadia, Satana bona ena taunimanima iboudiai be haorediamu. Ita na Dirava ena Gavamani sivaraina namona ta harorolaiamu dainai asi ta protestimu, eiava gavamani e uramu kara auka bae haorea karadia lalodiai asita vareaimu. Mani taihu Stacya ena sivarai aita laloa. Ia hereva momokani do se dibaia neganai, ia na kara auka bae haorea totona, protest karadia e durudiava. To nega ta ia na e karava ḡaudia daidia e daradara. Ia na e gwa: “Protest gabuna ai sibogu na henanadaiva lau be kara maorona na karaiamu eiava? To hari name laloparara Dirava ena Gavamani sibona ese hekwakwanai iboudiai be haorediamu. Na dibamu lau ese hisihisi na basina haoredia dibamu to Iehova sibona ese una be karaiamu.”—Sal. 72:​1, 4.

10. Metiu 5:​43-48 heḡereḡerena, dahaka dainai taravatu bona gavamani isensidia karadia ai basita vareai? (Laulau danu ba itaia.)

¹⁰ Hari taunimanima momo na e hekwarahimu gavamani bae sensidia. To idia momo na e lalo hisihisimu, taravatu se badinamu bona ma haida e hahisidiamu. Una na dia Iesu ese e hahedibalaia dalana. (Efe. 4:31) Mani tadikaka Jeffrey ese e gwauraia herevana aita laloa, ia na e gwa: “Lau dibagu taunimanima e protestimu negadia ai idia na be badu haraḡamu bena ḡau be hadikamu, be henaohenaomu bona ma haida be hahisidiamu.” To Iesu ese ita na e hadibada taunimanima iboudiai na mai lalokauda ida baita kara henidia, ena be se abida daemu eiava e daḡedaḡe henidamu. (Metiu 5:​43-48 ba duahidia.) Ita na Kristen tauda dainai baita hekwarahi Iesu ena haheitalai baita tohotohoa.

11. Dahaka dainai nega haida edai na be aukamu Iesu baita tohotohoa?

¹¹ Ita na haida ese e kara auka henidamu neganai, ta hekwarahimu Iesu baita tohotohoa. To mai dibada Dirava ena Basileia sibona ese mo hekwakwanai ibounai be haorediamu. Mani taihu Janiya ena sivarai aita laloa. Ia na kopina kalana dainai taunimanima ese e kara auka heniava. Ia na eto: “Taunimanima ese unu e kara henigu tomava dainai na baduva bona na urava edia kara davadia baina halou. Una kara dainai na laloava protest karana baina sapotia, unu amo egu badu karana baina halasia.” To Janiya na e laloparara ia ese ena mauri baine haidaua na namo. Ia na ma eto: “Lau na dia Iehova ena lalohadai ai na tabekauva, to taunimanima edia kara daidiai, na urava unu baina kara toma. Lalogu na hadaia, edia amo baina raka oho.” Namona na nahuada baita toho, dia namo badu karana ese baine dorida bena politikol bona gavamani idurudia karadia ai baita vareai.—Jon 15:19.

12. Dahaka dainai ta dibamu ḡaudia baita haero namonamo na aonega karana?

¹² Haida ese e kara auka henidamu neganai, dahaka ese baine duruda eda badu baita biagua totona? Ita baine duruda dalana ta na ta duahimu, ta kamonaimu eiava ta itamu ḡaudia baita abi hidi namonamo. Intanet ai e halasimu sivaraidia haida na taunimanima lalodia e hahisimu dainai, idia na gavamani e maumauraidiamu. Nega momo nius ai e halasimu sivaraidia na dia momokani. Unu sivarai ilalodia loulou karana ese ita be durudamu, a? Bema nega momo sivarai unu bamodia baita kamonaimu bona baita duahimu, una ese lalohekwarahi eiava lalohisihisi be havaramu. (Prov. 24:10) Danu, ita ese Dirava ena Gavamani na vada basita atoa gunamu bona una Gavamani ese hekwakwanai iboudiai be haorediamu karana na baita laloa boiomu.

13. Edena dala ai Baibul iduahina karana ese baine duruda ma haida edia kara baita haheaukalai?

¹³ Dina ta ta ai Baibul baita duahimu bona baita laloa dobumu, una ese be durudamu ma haida edia kara auka karadia baita haheaukalaimu. Taihu ta ladana Alia na e lalohisihisi badina e itaia iena gabu ai taunimanima ese ma haida na se kara namo henidiava. Ia na e badu badina unu e kara tomava taudia na se panisidiava. Ia na eto: “Na helai bona sibogu na henanadai, ‘Lau be na abia dae momokanimu Iehova ese ini hekwakwanai na be hamaoromaorodiamu, a?’ Bena Job 34:​22-29 na duahia. Una murinai na laloparara Iehova matanai ta na dia hehuni. Ia sibona mo mai dibana taunimanima be ede baine hahemaoro henidia toma bona edia hekwakwanai be ede baine hamaoromaorodia toma.” To Dirava ena Gavamani ese unu hekwakwanai baine hamaoromaorodia negana ta nariamu lalonai, ita be dahaka baita kara?

HARI ITA BE DAHAKA BAITA KARA?

14. Hari ita baita karaia ḡauna be dahaka? (Kolose 3:​10, 11)

¹⁴ Ita ese haida edia kara na basita biagu dibamu, to siboda eda kara hari baita biagua dibamu. Paragraf matamadia ai tame herevalai heḡereḡerena, namona Iesu baita tohotohoa lalokau karana baita hahedinaraia. Una dainai, baita hekwarahi taunimanima iboudiai baita kara namo henidia, ena be haida ese se kara namo henidamu. (Met. 7:12; Rom. 12:17) Oibe, Iehova na be moalemu bema taunimanima iboudiai baita kara namo henidiamu.—Kolose 3:​10, 11 ba duahidia.

15. Hereva momokani ese ma haida be ede e durudia tomamu?

¹⁵ Taunimanima baita durudia dalana hereadaena na idia ediai Baibul ena hereva momokanidia baita harorolaia. Dahaka dainai unu ta gwau tomamu? Badina Iehova be dibaiamu karana ese ta na be durua dibamu ena mauri baine haidaua, taunimanima baine kara namo henidia bona lalokau karana baine hahedinaraia. (Isa. 11:​6, 7, 9) Mani tau ladana Jemal ena sivarai aita laloa, ia ese hereva momokani do se dibaia neganai, ia na ena tano ai grup ta ai e vareai, badina e urava gavamani bae tuari henia bona senisi bae kara. Ia na eto: “Oi ese taunimanima na basio doridia edia kara bae haidau. Lau na dia taunimanima ese e dorigu dainai egu kara na haidau, to Baibul ena hereva momokani ese egu mauri e haidau.” Jemal na e diba ḡaudia ese e durua dainai, gavamani ituari henina karana e hadokoa. Momokani bema ita ese Baibul ena hereva momokanidia na taunimanima baita hadibalaidiamu, una ese idia na be durudiamu ma haida ihahisidia karana be hadokoamu.

16. Dahaka dainai o uramu taunimanima ediai Dirava ena Gavamani ese baine harava ḡaudia ba herevalai?

¹⁶ Iesu heḡereḡerena, ita na mai eda ura ida taunimanima ta hamaorodiamu Dirava ena Gavamani sibona ese hekwakwanai iboudiai na be haoredia vaitanimu. Haida ese e kara auka henidiamu taudia na hereva unu bamodia ese e hagoadadiamu. (Jer. 29:11) Matamanai tame herevalaia taihuna Stacy na eto: “Hereva momokani na dibaia karana ese e durugu, haida edia kara auka karadia baina haheaukalai. Oibe, Iehova na Baibul amo lau e hagoadagumu.” Ina atikol ai Baibul ese hisihisi e herevalaimu daladia bo lalopararalaimu neganai, una ese oi na be durumumu. Bona bema skul ai eiava ḡaukara gabudia ai, oi na mai aonegamu ida ma haida bo durudiamu, ita ta hisihisimu badidia bona Iehova ese unu hisihisi be haoremu daladia be lalopararalaimu.b

17. Edena dala ai Iehova ese ita e durudamu, haida ese e kara auka henidamu neganai?

¹⁷ Satana na ina “tanobada lohiana” dainai, ita na doini baita hisihisimu. To Iehova na e gwauhamata Satana bona kara dika na baine haoredia bona ita na mai moaleda ida una nega ta nariamu. (Jon 12:31) Baibul ai Iehova ese dia taunimanima edia kara auka karadia mo e hahedinarai, to danu e hahedinaraia unu kara daidiai e hisihisimu taudia na e lalodia badamu. (Sal. 34:​17-19) Iesu ena haheitalai amo ta dibamu ma haida ese se kara namo henidamu neganai, ita be dahaka baita kara. Bona kahirakahira Dirava ena Gavamani ese hisihisi be haoremu bona taunimanima na basie hisihisi loumu. (2 Pi. 3:13) Ita ese Dirava ena Gavamani sivaraina namona na doini baita harorolaia bona mai moaleda ida ‘hahemaoro ḡoevaḡoeva bona kara maoromaoro’ amo be honumu tanobadana baita naria.—Isa. 9:7.