Emu Buruka Neganai Ba Moale Dalana

1-2. Iehova ese e buruka abidadama taudia be ede e lalodia tomamu? (Salamo 92:​12-14; rau 1 ai laulau danu ba itaia.)

TANOBADA heḡeḡemadai ai, haida na e buruka matamamu neganai, edia buruka toana na e huniamu. Heḡereḡere, mani ina haheitalai a laloa: Oi huimu kurokurona o itaia matama neganai, emu hemami be ede bamona? Reana oi na o uramu ba kokia, badina so uramu haida ese bae itaia. Gabeai o laloparara, ena be bo kokiamu, to momo herea be varamu. Ina haheitalai ese e hahedinaraiamu, ta na se uramu baine buruka.

² To, Iehova ese ena hesiai taudia burukadia be ede e lalodia tomamu? (Prov. 16:31) Ia ese idia na au mai hairaidia ida e haheḡereḡeredia. (Salamo 92:​12-14 ba duahidia.) Dahaka dainai unu e haheḡereḡeredia toma? Laḡani momo e maurimu audia na mai hairaidia, badina raudia bona flaoadia na momo herea. Heḡereḡere, au unu bamona ta na Japan ai e tubu bona laḡani momo e noho. Bona au unu bamodia haida na laḡani tausen mai kahana vada e noho bona idia na mai hairaidia. Una heḡereḡerena, Iehova matanai Ia e hesiai heniamu burukadia na mai hairaidia. Bona Ia ese edia kara namodia na e lalodia badamu. Oibe, idia na laḡani momo lalodiai Ia isiaina e lao heni bona nega namodia bona nega dikadia ai Ia e badinaia.

3. Edena dala ai Iehova ese burukadia e ḡaukaralaidia ena ura e haḡuḡurua? Mani haheitalai ta a gwauraia.

³ Ena be ta burukamu, to Iehova ese ita na dounu e laloda badamu.a Momokani, Iehova na burukadia e ḡaukaralaidiava ena ura bae haḡuḡurua totona. Heḡereḡere, Sara na e buruka herea bena Iehova ese e hamaoroa mero ta baine havaraia, bena una mero ena amo bese badana ta baine hedinarai, bona Mesia danu una bese amo bainema. (Gen. 17:​15-19) Mose danu e buruka neganai, Iehova ese e siaia Israel besena Aigupito amo baine hakaua lasi. (Eso. 7:​6, 7) Aposetolo Jon danu e buruka herea bena Iehova ese e ḡaukaralaia Baibul bukadia 5 e toredia.

4. Proveb 15:15 ena hereva heḡereḡerena, dahaka ese burukadia be durudiamu e davarimu hekwakwanaidia be haheaukalaimu? (Laulau danu ba itaia.)

⁴ Ta burukamu neganai tauanida ai metau momo ta davarimu, una ese eda mauri na e ha-aukaiamu. Taihu ta na mai kirina ida e gwa, “Ta e burukamu na dia gadara ḡauna.” To Iehova ese be durudamu dounu baita moalemub ena be buruka hekwakwanaidia ta davarimu. (Proveb 15:15 ba duahia.) Ina atikol ai, burukadia be dahaka bae kara unu amo dounu bae moale. Bona haida ese kongrigeisin ai e nohomu burukadia bae durudia daladia danu baita herevalaimu. Ginigunana na, dahaka dainai ta e burukamu neganai ena moale na e oremu?

DAHAKA DAINAI TA E BURUKAMU NEGANAI ENA MOALE NA E OREMU?

5. Dahaka badi haida daidiai burukadia na e lalometaumu?

⁵ Dahaka dainai burukadia na e lalometaumu? Idia na e lalometaumu badina reana guna e karava ḡaudia na hari vada basie kara dibamu. Bona idia na edia eregabe negadia e lalo loumu, e uramu bema matamata lou bona asi edia gorere. (Had. 7:10) Heḡereḡere, taihu ta ladana Ruby na e gwa: “Egu dabua baina kara na auka badina tauanigu na e hisihisimu bona egu marere danu metau, dia guna bamona. Soksi baina kara danu auka herea. Imagu na asi goadadia bona arthritis gorerena dainai, ḡau maraḡidia danu basina kara dibamu.” Tadikakana Harold na guna Betele ai e ḡaukarava. Ia na e gwa: “Nega haida na badumu badina guna na karava ḡaudia na hari basina kara dibamu. Eregabegu neganai lau na mai goadagu. Baseball gadara na moalelaiava. Gadara negadiai haida na be gwaumu, ‘Bolo na Harold a henia ia ese baine tahoa. Badina ia na se misimu.’ To hari, lau ese bolo na vada basina tahoa dibamu.”

6. (a) Burukadia be ededia badi ma haida daidiai e lalometaumu? (b) Dahaka ese burukadia be durudiamu unu amo be dibamu ededia negai motuka tari bae hadokoa? (Ina magasin ai atikol ladana, “Motuka Itarina Karana Baina Rakatania be Namo, A?” ba itaia.)

⁶ Burukadia na be lalometaumu badina sibodia basie noho dibamu bona sibodia ese e karava ḡaudia na basie kara dibamu. Reana heduru totona, idia na henari tauna ta ese bae durudia, eiava idia na natudia ta ida bae noho. Eiava reana edia gorere na e badamu, edia roharoha karana e dikamu bona motuka basie tari dibamu dainai e lalohisihisimu. Ena be burukadia na edia goada hetoana dainai ḡau momo na basie kara dibamu, to bae helalotao Iehova bona ma haida ese idia na e lalodia badamu. Bona namona na bae abia dae, Iehova ese edia hemami na e lalopararalaimu. Oibe, ita ese Iehova bona tadikaka taihu ta lalokau henidiamu karana na e laloa badamu bona Ia enai una na mai anina bada.—1 Sa. 16:7.

7. Ina tanobada oromana dikana se ore haraḡamu dainai e lalohisihisimu taudia be dahaka ese be durudiamu?

⁷ Reana oi na o lalohisihisimu badina ina tanobada oromana dikana na se ore haraḡamu. Bema unu o hemami tomamu, dahaka ese be durumumu? Ina ba laloa, Iehova e haheaukamu na mai badina. (Isa. 30:18) Dahaka dainai Iehova na e haheaukamu? Badina Ia na e uramu taunimanima momo na Ia bae dibaia bona Ia turana ai baela. (2 Pi. 3:9) Una dainai bema o lalohisihisimu, namona na bae helalotao Iehova na e uramu dokona do se kau ai taunimanima momo na Ia bae dibaia bona bae mauri. Haida be reana oi varavaramu.

8. Burukadia e gorerediamu eiava e hisihisimu neganai, dahaka bae kara be namo?

⁸ Herevana buruka eiava matamata, eda hemami e dikamu neganai, ta gwauraimu herevadia eiava ta karamu ḡaudia na gabeai ta lalohisihisilaimu. (Had. 7:7; Jei. 3:2) Heḡereḡere, abidadama tauna Job e hisihisiva neganai, ena “hereva na kavakava.” (Job 6:​1-3) Burukadia na edia gorere eiava e abimu muramuradia daidiai be gwauraimu herevadia bona be karamu karadia ese ma haida na be hahisidia dibamu. Ena be ta burukamu eiava ta goreremu, to haida basita kara auka henidia eiava haida basita doridia ita bae duruda totona. Bona bema ta gwauraia herevana ese ta lalona e hahisia, namona na baita sori henia haraḡa.—Met. 5:​23, 24.

DOUNU BA MOALE DALANA

9. Dahaka dainai haida edia heduru bavabi dae na namo? (Laulau danu ba ita.)

⁹ Haida edia amo heduru bavabi dae. (Gal. 6:2) Matamanai, una na be aukamu. Taihu ta ladana Gretel na e gwa: “Nega haida, egu ai na e aukamu haida edia heduru baina abi dae badina na mamiamu, lau ese idia na hahekwarahidiamu. Taina ruana egu lalohadai na haidaua bona haida edia heduru na abi dae.” Ba laloatao, haida edia heduru bo abi daemu neganai, idia na mai moaledia ida oi be durumumu. (Apos. 20:35) Bona bo moalemu badina bo mamiamu haida ese oi na e lalokau henimumu bona e uramu bae narimu.

10. Dahaka dainai tenkiu karana baita hahedinaraia na mai anina bada? (Laulau danu ba ita.)

¹⁰ Tenkiu karana ba hahedinaraia. (Kol. 3:15; 1 Te. 5:18) Haida ese e kara namo henidamu neganai emu hemami be ede bamona? Oi na bo moalemu, ani? To madi, nega haida ita ese tenkiu karana na asita hahedinaraiamu. Una dainai namona na ita e durudamu taudia baita kiri henidia bona baita tenkiu henidia, unu amo be mamiamu ita ese idia na ta lalodia badamu. Betele ai burukadia e naridiamu taihuna ta, Leah, na e gwa: “Lau ese na nariamu taihu burukana ta ese hanaihanai e tenkiu henigumu. Ia ese pepa ai ena tenkiu herevadia e toremu. Ena be e toremu herevadia na dia momo, to nanamo heherea. Ia ese tenkiu pepadia e henigumu neganai na moalemu. Badina na dibamu, ia ese egu heduru na e lalo badamu.”

11. Edena dala ai ma haida ba durudia? (Laulau danu ba ita.)

¹¹ Ba hekwarahi ma haida ba durudia. Buruka taumui e, emui nega bona goada bo ḡaukaralaimu ma haida bo durudiamu neganai, emui ai e varamu hekwakwanaidia na basio lalodia momomu. Burukadia na mai anidia bada ḡaudia e hahedibalaimu bukadia na heto. To mani a laloa, bema taunimanima ese unu buka basie duahimu, idia ese ḡau ta na basie dibaiamu. Una heḡereḡerena, bema burukadia ese matamata taudia na mai anidia bada ḡaudia basie hadibadiamu, matamata taudia na ḡau ta basie dibamu. Una dainai, matamata taudia ba dibadia namonamo totona, mani ba nanadaidia, bona e herevamu neganai, ba hakala namonamo. Iehova ibadinana karana ena namo ba herevalaia bona ba hadibadia, bema idia danu unu be kara tomamu, edia mauri ai basie lalohisihisimu. Oibe, matamata taudia bo hagoadadiamu neganai, emu moale na be bada hereamu.—Sal. 71:18.

12. Isaia 46:4 heḡereḡerena, Iehova be e gwauhamata burukadia daidiai dahaka baine kara? (Laulau danu ba ita.)

¹² Iehova ba ḡuriḡuri henia goada baine henimu. Nega haida oi na bo hesikumu bona tauanimu na be manokamu. Una dainai oi na basio moalemu. To ba helalotao, Iehova na Siahu Idoinai Diravana. Baibul na e gwa ia na ‘se hesikumu.’ (Isa. 40:28) Una dainai Ia ese goada be henimumu. (Isa. 40:​29-31) Oibe, Ia na e gwauhamata oi na be durumumu. (Isaia 46:4 ba duahia.) Bona Iehova ena gwauhamata iboudiai na e hamomokanimu. (Jos. 23:14; Isa. 55:​10, 11) Una dainai, basio daradara, to Iehova ba ḡuriḡuri henia. Dibamu, Ia ese oi na e lalokau henimumu bona emu ḡuriḡuri na be haerelaiamu bona bo moalemu.

13. 2 Korinto 4:​16-18 heḡereḡerena, baita laloatao ḡauna be dahaka? (Laulau danu ba ita.)

¹³ Oi na kahirakahira bo matamata loumu bona basio goreremu. Bema ta dibamu eda mauri ai e varamu hisihisidia na kahirakahira be oremu, ita na baita haheaukamu. Bona Baibul ese e hahedinaraiamu buruka bona gorere na be oremu. (Job 33:25; Isa. 33:24) Una dainai ba moale! Badina dibamu kahirakahira, vaira nega ai oi na bo matamata loumu, basio goreremu bona toamu na be namo hereamu. (2 Korinto 4:​16-18 ba duahidia.) To haida ese oi be ede bae durumu toma?

HAIDA ESE BAE DURUMU DALADIA

14. Dahaka dainai burukadia baita vadivadidia bona baita rini henidia na mai anina bada?

¹⁴ Hanaihanai tadikaka bona taihu burukadia ba vadivadidia bona ba rini henidia. (Heb. 13:16) Burukadia na sibodia e nohomu neganai, idia na e lalohisihisimu. Carl na rumai mo e nohomu tadikakana ta. Ia na e gwa: “Lau na daba ela bona hanuaboi ruma lalonai mo na nohomu. Una dainai na hesikumu. Nega haida na mamiamu lau na maḡu lalonai e nohomu laion burukana ta na heto. Launa na lalometaumu bona na badumu.” Burukadia ta vadivadidiamu neganai, idia na be mamiamu ita ese idia na ta lalodia badamu bona ta lalokau henidiamu. Nega haida, namona na plen baita kara eda kongrigeisin ai e nohomu tadikaka bona taihu burukadia baita rini henidia eiava baita vadivadidia. To madi, ita na ḡaukara idauidau ta karamu dainai ta bisimu bona ta helaloboiomu. Una dainai dahaka ese ita baine duruda, unu amo mai anidia bada ḡaudia baita ato guna? (Flp. 1:10) Heduru ḡauna ta na emu kalenda ai nouti haida ba tore unu amo bo helalotaomu bena burukadia bo rini henidiamu bona teks meseij bo siaimu. Danu, sediual ta ba karaia unu amo idia ba vadivadidia.

15. Matamatadia bona burukadia be dahaka bae kara hebou diba?

¹⁵ Reana oi na matamatana dainai, bo lalohekwarahimu burukadia ida be dahaka ba kara hebou eiava ba herevalai. To una na basio laloa momo, mai anina bada ḡauna na tura namona ai baola. (Prov. 17:17) Kongrigeisin heboudia do se hematama eiava hebou muridiai, tadikaka eiava taihu burukana ida ba herevahereva. Reana ba noia ia ese e ura heniamu sirina ta baine gwauraia eiava ba noia ia maraḡina ai mai kirina sivaraina ta baine herevalaia. Danu ba invaitia JW Broadcasting^® vidiona ta ba ita hebou. Burukadia na dala namodia ma haida ai ba durudia diba. Heḡereḡere, edia mobael eiava tablet ai stadi pablikeisin matamatadia ba daonloud. Taihu burukana ta ladana Carol na e gwa: “Oi ese o moalelaimu ḡaudia na burukadia ida ba moalelai hebou diba. Ena be lau na buruka, to dounu na uramu egu mauri baina moalelaia. Lau ese na ura henimu ḡaudia haida na shopping, tura ida baina aniani hebou, bona gabu mai hairaidia bainala.” Taihu matamatana ta, Maira, laḡanina na 33. Ia na e gwa: “Lau turagu namona ta laḡanina na 90. Ena be emai mauri laḡanidia na dia heḡereḡere, to lau ese una na asina laloamu. Ai na a moale heboumu bona muvi a ita heboumu. Bona hekwakwanai negadiai, ai na a hahegoada hehenimu.”

16. Burukadia ta bamodiamu hospele ta laohaidiamu ena namo be dahaka?

¹⁶ Burukadia hospele e laomu neganai ba bamodia. Namona na emu motuka ai burukadia ba laohaidia hospele bona idia ese dokta e itadiamu neganai, mani ba bamodia unu amo ba diba dokta bona nurse ese heduru maorodia e henidiamu. (Isa. 1:17) Reana ba durudia dalana ta na dokta ese e gwauraimu ḡaudia na ba toredia. Taihu burukana ta ladana Ruth na e gwa: “Sibogu hospele na laomu negadiai, na gwauraimu herevadia na dokta ese asie kamonaimu. Nega haida, dokta ese e hamaorogumu: ‘Oi na o lalohadai momomu dainai o tomu oi na mai emu gorere.’ To, ta ese e bamogumu neganai, dokta ese e durugu namonamomu. Oibe, lau ese egu tadikaka bona taihu na tenkiu henidiamu, badina idia na nega e atomu lau e bamogumu.”

17. Ededia dala haida ai burukadia ida haroro ḡaukara ba moalelaia?

¹⁷ Burukadia ida ba haroro hebou. Burukadia haida na dia heḡereḡere ruma ta ruma ta ḡaukarana bae karaia. To reana ba invaitidia troli harorona ai. Madi edia helai ḡaudia bavato heḡaeḡae, unu amo idia na troli badinai bae helai. Eiava, ba invaitidia emu Baibul stadi ta ba karaia hebou. Eiava, nega haida emu Baibul stadi ida edia ruma baola bona unuseni ai ba stadi. Elda taudia ese haroro heboudia e heḡaeḡaelaimu neganai, hebou gabuna na burukadia edia ruma ai bae karaia diba, una ese be durudiamu haroro grup be bamoamu. Oibe, bema ita ese burukadia baita lalokau henidiamu bona baita matauraidiamu, Iehova na be moalemu.—Prov. 3:27; Rom. 12:10.

18. Atikol gabena ai dahaka baita herevalaiamu?

¹⁸ Ina atikol ai tame diba Iehova ese burukadia na e lalokau henidiamu bona e lalodia badamu. Bona tadikaka bona taihu danu unu e kara toamu! Burukadia e, ena be hekwakwanai momo o davarimu, to Iehova ese umui na be durumuimu dounu bo moalemu. (Sal. 37:25) Bona o lalometaulaimu ḡaudia iboudiai na kahirakahira be oremu bona umui na bo moale hanaihanaimu! To, tadikaka bona taihu ma haida edia hekwakwanai na idauidau. Idia na dia burukadia mo e naridiamu, to natu eiava tura ta ena gorere dainai e nariamu. Una henari tauna be edena dala ai dounu baine moale? Atikol gabena ai una baita herevalaiamu.