“Oi na E Lalokau Henimu Badamu”!

1-2. Dahaka ese be durudamu baita abia daemu Iehova ese ita na e lalokau henidamu?

IEHOVA ena hesiai taudia bogaraḡidiai haida na e mamiamu idia na asi anidia. Reana ta ese idia na e kara auka henidiava dainai unu e hemami tomamu. Oi danu nega haida unu o hemami tomamu, a? Bema oibe, dahaka ese be durumumu bo abiadaemu, Iehova ese oi na e lalokau henimumu?

² Oi baine durumu dalana ta na Baibul sivaraidia ba duahi, unu sivarai amo Iehova ese taunimanima e lalodiamu dalana bo dibaiamu. Ia Natuna, Iesu, na taunimanima e matauraidiava bona e kara namo henidiava. Ia unu e kara tomava neganai e hahedinaraiava, ia bona Tamana ese taunimanima na e lalokau henidia badava. (Jon 5:19; Heb. 1:3) Ina atikol ai ita na ḡau rua baita herevalaimu: (1) Iesu ese taunimanima e durudia e laloparara Iehova matanai idia na mai anidia bada, bona (2) ita ese baita abia dae momokani Iehova ese ita na e laloda badamu.—Hag. 2:7.

IESU ESE E HAHEDINARAIA IEHOVA ESE IDIA NA E LALODIA BADAMU

3. Galilea taudia na Iesu enai heduru e tahuva neganai, ia ese idia be ede e durudia toma?

³ Iesu Galilea ai e harorova neganai, taunimanima momo na ia ena hereva bae kamonai totona dekenai elaova bona ia ese edia gorere amo e hanamodiava. Iesu ese idia na e itadia, “taudia e boera, bona e karoho, mamoe asi ireḡudia na heheto.” (Met. 9:36) Edia dubu igunalaina taudia ese idia na se lalodia bada, bona danu e gwauraidiava Dirava ese idia na ‘se lalonamo henidiamu.’ (Jon 7:​47-49, NWT) To, Iesu ese idia na e bogadia hisiva bona e matauraidiava dainai, e hadibadiava bona edia gorere e hanamova. (Met. 9:35) Danu, Iesu na momo baine durudia totona ia ese ena aposetolo taudia na haroro dalana e hadibadia bona e hamaorodia gorere taudia bae hanamodia.—Met. 10:​5-8.

4. Iesu ese heduru e tahuva taudia e durudia dalana amo dahaka ta dibamu?

⁴ Iesu na ma haida e bogadia hisiva bona e matauraidiava karana amo e hahedinaraia, ia bona Tamana na ma haida ese se lalodia badava taudia na e lalodia badava. Bema oi na Iehova o hesiai heniamu, to o mamiamu ta ese oi na se lalomu badamu, namona na Iesu ena amo heduru e tahu bena ia ese e durudia dalana ba laloa. Unu ese oi na be durumumu bo lalopararamu Iehova ese oi na e lalomu badamu.

5. Iesu ese e hedavari henia Galilea hahine ena noho dalana mani a herevalaia.

⁵ Iesu na taunimanima hutuma e durudiava, bona ta ta sibodia danu e durudiava. Heḡereḡere, Iesu na Galilea ai e harorova lalonai, laḡani 12 rara moru gorerena e davaria hahinena ta e hedavari henia. (Mak 5:25) Madi, ia na ena gorere dainai ta ese ia na se daua tohova, badina taravatu heḡereḡerena ia na miro. Una dainai nega iboudiai ia na sibona e nohova. Danu, ia na ma haida ida sinagoga ai Iehova na se tomadiho heniava, bona aria lalodiai na se vareaiva. (Lev. 15:​19, 25) Momokani, una hahine na dia ena gorere dainai mo e hisihisiva to e hemamiva ia na asi anina.—Mak 5:26.

6. Hahine be dahaka e kara unu amo ena gorere amo baine namo?

⁶ Hahine ta na ena gorere dainai e hisihisiva, bona e urava Iesu ese baine hanamoa. To maoromaoro Iesu na se noia ia baine hanamoa. Dahaka dainai ia na unu e kara toma? Reana ia na ena gorere dainai e hemarai eiava reana ia na e gari badina e laloava ia na miro dainai Iesu ese hutuma padadia ai be luluamu. Una dainai ia na Iesu ena dabua ai mo e dahu kau badina e dibava una kara ese ia na be hanamoamu. (Mak 5:​27, 28) Oibe, ia na ena abidadama dainai namo e davari. Iesu na e hemami ta ese ia na e dogoatao dainai e henanadai bena hahine na e karaia ḡauna dainai e hereva hedinarai. Iesu be dahaka e kara?

7. Iesu ese lalometau bada hahine be ede e kara henia toma? (Mak 5:34)

⁷ Iesu ese una hahine na hebogahisi bona hemataurai dalana ai e kara henia. Ia na e itaia una hahine na e gariva bona e heudeheudeva. (Mak 5:33) Una dainai Iesu ese e bogaiahisi dikadika bona e hagoadaia. Danu e hamaoroa “natugu e.” Iesu na una hereva e ḡaukaralaia amo e hahedinaraia una hahine na e matauraia bona e laloa bada. (Mak 5:34 ba duahia.) Baibul ai Iesu ese ina hereva ‘natugu,’ na una hahine e hereva henia negana ai mo e ḡaukaralaia. Una negai Iesu na una hereva namona e ḡaukaralaia badina e itaia una hahine na e gari. Mani una hahine ese e abia hemamina a laloa. Iesu na ena hereva amo una hahine e hagoadaia basine hemarai ena be hutuma padadia ai iena dabua e dogoatao. Oibe, Iesu ese una hahine na dia ena gorere mo e hanamoa, to danu e durua baine laloparara Tamana lalokauna guba ai ese ia na e laloa badamu.

8. Brazil ai taihu ta be ededia hekwakwanai e davari?

⁸ Hari ina negai danu, Dirava ena hesiai taudia haida na gorere daidiai e lalometaumu bona e hemamimu idia na asi anidia. Maria,a ia na regula painia ta Brazil ai. Ia na e vara neganai, asi aena bona imana laurina na lasi. Ia na eto: “Lau na diseibol dainai nega iboudiai skul gabunai e hahisiguva, egu schoolmates ese egu hemami e hadikava ladadia e hatova. Bona nega haida egu femli ese lau na se lalogu badava dainai, na hemamiva lau na asi anigu.”

9. Dahaka ese Maria e durua unu amo e laloparara Iehova ese ia na e laloa badamu?

⁹ Maria be edena dala ai heduru e abi? Maria na Iehova ena Witnes ta ai ela neganai, tadikaka bona taihu ese ia na e hagoadaia bona e durua baine laloparara Iehova ese ia na e laloa badamu. Ia na eto: “Lau na tadikaka bona taihu momo herea ese e durugu. Lau na Iehova na tenkiu heniamu badina kongrigeisin lalona Ia ese ruma bese namona ta e henigu.” Momokani, unu tadikaka bona taihu edia heduru dainai Maria na e abia dae momokani Dirava ese ia na e laloa badamu.

10. Maria, hane Magdala be edena hekwakwanai ese e hahisiava? (Laulau danu ba itadia.)

¹⁰ Iesu ese hahine ma ta, Maria, hane Magdala e durua dalana mani a laloa. Ia na demoni iboudiai 7 ese e boloava! (Luk 8:2) Una dainai taunimanima ese ia na se ura heniava, badina reana e karava ḡaudia haida na mai garina. Ia na ena mauri ai e hisihisi bada herea bona e mamiava taunimanima ese ia na e dadaraiava bona se duruava. Una hahine e boloava demonidia na Iesu ese ia ena amo e luludia lasi bena ia na Iesu ena hahediba ta ai ela. Iesu be ma edena dala ai Maria, hane Magdala e durua baine laloparara Dirava ese ia na e laloa badamu?

11. Iesu be edena dala ai Maria, hane Magdala e durua baine laloparara Dirava ese ia na e laloa badamu? (Laulau danu ba ita.)

¹¹ Iesu ese Maria, hane Magdala e boiria ia baine bamoa bona ena aposetolo taudia ida hanua ta ta ai haroro ḡaukara bae karaia.b Una ese ia na e durua, Iesu ese ma haida e hereva henidia herevadia na e kamonaiva. Danu Iesu e toreisi lou dina ginigunana ai, ia enai e hedinarai. Bona una dina ai Iesu ese ia e hereva henia guna, ena aposetolo taudia iboudiai padadia ai. Danu Iesu ese ia na ḡaukara ta e henia hahediba taudia baine hadibadia Iesu na vada e toreisi lou. Iesu na unu dala idauidau amo una hahine e durua baine laloparara Iehova ese ia na e laloa badamu!—Jon 20:​11-18.

12. Lidia be dahaka dainai e mamiava ia na ta ese se lalokau heniava?

¹² Maria, hane Magdala heḡereḡerena, hari ina negai danu momo na e hemamimu idia na asi anidia. Spain ai taihu Lidia enai na unu e vara toma, ia do se vara ai ia sinana na e urava boga lalonai baine hamasea. Danu Lidia na e helalotaova, ena be ia na kekeni maraḡina to ia sinana ese ia na e dadaraiava bona e hereva dika heniava. Ia na eto: “Sinagu ese lau na se lalokau heniguva dainai na ura dikadikava ma haida ese bema lalokau henigu bona turagu ai bema lao. Launa na laloava ta ese basine lalokau henigumu badina sinagu ese e hamaoroguva lau na taunimanima dikagu.”

13. Dahaka ese Lidia e durua unu amo e laloparara Iehova ese ia na e laloa badamu?

¹³ Lidia na hereva momokani e dibaia murinai, ḡuriḡuri, Baibul duahiduahi karana bona tadikaka taihu edia hereva namodia bona kara ese ia na e durua unu amo e laloparara Iehova ese ia na e laloa badamu. Ia na eto: “Lau adavagu ese nega momo e hamaorogumu lau na e lalokau henigumu. Bona hanaihanai, egu kara namodia na egu ai e herevalaimu. Turagu namodia haida danu unu e kara tomamu.” Oi be emu kongrigeisin ai ta o laloamu ba durua diba, unu amo baine laloparara Iehova ese ia na e laloa badamu?

IEHOVA ESE ITA E LALODAMU DALANA

14. Ita be edena dala ai 1 Samuel 16:7 ese e durudamu, Iehova ese taunimanima e lalodiamu dalana baita lalopararalaia? (Maua ladana “Dahaka Dainai Iehova ese Ena Taunimanima E Lalodia Badamu?” danu ba itaia.)

¹⁴ Ba helalotao Iehova ese oi e lalomumu dalana na dia tanobada taudia ese oi e lalomumu dalana heḡereḡerena. (1 Samuel 16:7 ba duahia.) Ina tanobada ai taunimanima ese ta na e laloa badamu bema ia toana na namo, eiava mai ena moni, eiava mai ena diba, to Iehova na dia unu bamona. (Isa. 55:​8, 9) Una dainai, dia namo tanobada taudia edia lalohadai bavabia, to namona na Iehova ese oi e lalomumu dalana hari ba laloa bada. Baibul ai Elia, Naomi, bona Ana sivaraidia na mimia. Idia danu nega haida e hemami idia na asi anidia. Bema idia sivaraidia o duahimu neganai, Iehova ese idia e lalokau henidia badava dalana ba itaia namonamo. Readia oi danu emu mauri ai Iehova ena lalokau bona Ia ese oi e lalomu badava karadia na o ita bona o uramu ba toredia tao. Danu, eda pablikeisin ai heduru daladia ma haida ba tahu.c

15. Dahaka dainai Iehova ese Daniel na e ‘lalokau henia bada’? (Daniel 9:23)

¹⁵ Bavabia dae oi na Iehova o badinaia hanaihanaimu dainai Ia ese oi na e lalomu badamu. Peroveta tauna Daniel na laḡanina 90 mai kahana neganai, nega ta ia tauanina na e “manoka momokani” bona e lalomanoka. (Dan. 9:​20, 21) Iehova ese ia be ede e hagoadaia toma? Dirava ese aneru Gabriel e siaia Daniel baine hadibaia Iehova ese ia na e “lalokau henia badamu” bona ena ḡuriḡuri na e kamonai. (Daniel 9:23 ba duahia.) Dahaka dainai Dirava ese Daniel na e laloa badava? Badina Daniel na kara maoromaoro e ura henia badava, bona hanaihanai Dirava e badinaiava. (Esek. 14:14) Iehova ese una sivarai na ita ihagoadada totona Baibul ai e atoa. (Rom. 15:4) Iehova ese oiemu ḡuriḡuri danu e hakala henidiamu bona e lalomu badamu badina oi na o uramu kara maorona ba karaia bona mai haheaukamu ida Iehova ba hesiai henia.—Maik. 6:8; Heb. 6:10.

16. Dahaka ese oi e durumu bena o abia dae Iehova na Tama lalokauna ta?

¹⁶ Oi ese Iehova na Tama lalokauna heḡereḡerena ba laloa. Ia ese emu kerere na se tahumu, to e uramu oi baine durumu. (Sal. 130:3; Met. 7:11; Luk 12:​6, 7) Momo na e hemamimu idia na asi anidia, to una ilalo-dobuna karana ese idia na e durudiamu. Heḡereḡere, Spain ai taihu ta ladana Michelle mani a laloa, ia na laḡani momo adavana ese ena hereva amo e hahisiava, una dainai e hemamiva ta ese ia na se lalokau heniava bona e laloava ia na asi anina. Ia na eto: “Na hemamimu ta ese lau na se lalogu badamu neganai, Iehova ese lau e rosigumu, e lalokau henigumu, bona e gimagumu dalana na laloamu.” (Sal. 28:9) South Africa ai taihu ta ladana Lauren na eto: “Lau na Iehova ese e boirigu dainai, una ese e durugumu ini laḡani iboudiai lalodiai Ia badibadinai baina noho, danu ia ese lau na e ḡaukaralaigu ma haida baina hadibadia. Una ese e hahedinaraiamu Iehova ese lau na e lalogu badamu.”—Hos. 11:4.

17. Dahaka ese e durumumu unu amo o abia dae momokanimu Iehova ese oi na e lalonamo henimumu? (Salamo 5:12) (Laulau danu ba itaia)

¹⁷ Bavabia dae momokani Iehova ese oi na e lalonamo henimumu. (Salamo 5:12 ba duahia; NWT) David ese Iehova ena lalonamo karana na “kesi badana ta” ida e haheḡereḡerea, una ese kara maoromaoro taudia e gimadiamu. Bema nega haida o hemamimu oi na asi animu, namona na Iehova ese oi e lalomu badamu bona e durumumu karana ba laloa. Unu na vaitani kesi ta na heto, oi be gimamumu lalohadai kereredia ese basie hamorumu. Oi be ede o diba tomamu Iehova ese oi na e lalonamo henimumu? Matamanai tame herevalaia heḡereḡerena, Iehova ese ita e lalodamu dalana na Baibul ai baita itaiamu. Danu, Iehova ese elda taudia, ita turada namodia, bona ma haida e ḡaukaralaidiamu ita e hahelalodataomu Ia ese ita na e lalonamo henidamu. Oi be dahaka ba kara bema haida ese oiemu ai hereva namodia e gwauraimu?

18. Dahaka dainai ta ese oi e hanamomumu herevadia na bavabi dae?

¹⁸ Oi ese o dibaia namonamo tauna bona e lalokau henimumu tauna ta ese emu kara namodia emu ai be herevalaimu neganai, lalohadai kererena basio abia na namo. Oi ese ba laloatao ḡauna na ina, idia na Iehova ese e ḡaukaralaidiamu oi bae durumu unu amo bavabia dae Iehova ese oi na e lalonamo henimumu. Matamanai tame herevalaia taihuna Michelle na eto: “Lau na taina ruana haida ese e hanamogumu herevadia na abidia dae. Ena be egu ai na auka ma haida ese egu kara namodia e herevalaimu herevadia baina abi dae, to dibagu Iehova na e uramu unu baina kara toma.” Elda ese Michelle na e durua namonamova unu amo baine laloparara Iehova ese ia na e lalonamo heniamu. Hari, ia na e painiamu bona Betele ai e hedurumu.

19. Dahaka dainai bavabia dae momokani Iehova ese oi na e lalomu badamu?

¹⁹ Iesu ese ita na e hadibadamu, Tamada guba ai ese ita na e laloda badamu. (Luk 12:24) Una dainai namona na baita abia dae momokani, Iehova ese ita na e laloda badamu. Una na basita laloaboio! Bona baita ḡaukara goada ma haida baita durudia bae laloparara Iehova matana ai idia na dava bada kohuna ta na heto.