Headava Na Dirava ese E Hamatamaia Dainai Baita Matauraia

1, 2. Heberu 13:4 ese e hagoadadamu dahaka baita kara?

IEHOVA imatauraina karana o laloa badamu, a? A dibamu bo gwaumu, oibe! Ia baita matauraia na ḡau badana, bona ia danu e gwauhamata baine matauraida. (1 Sam. 2:30; Her. 3:9; Apok. 4:11) Danu ia na e uramu taunimanima ma haida, heḡereḡere gavamani taudia baita matauraidia. (Roma 12:10; 13:7) To ita ta ta ese eda mauri ai baita matauraia ḡauna ma ta na mia. Una na headava.

² Aposetolo Paulo na eto: “Taunimanima iboudiai ese headava bae matauraia, mahuta gedana basie hadikaia.” (Heb. 13:4) Paulo e gwauraia herevana na dia baita laloa maraḡi ḡauna. Ia ese Kristen taudia e haḡanidia headava na dava bada ḡauna bamona bae laloa bona bae matauraia. Oi ese headava be unu o laloa tomamu, a?

3. Iesu ese headava ai dahaka mai anina bada sisibana e heni? (Rau 10 ai laulau ba itaia.)

³ Bema headava na o matauraiamu, oi na Iesu ena haheitalai namona o tohotohoamu. Iesu ese headava na e matauraiava. Farisea taudia ese headava ihadokona karana ai Iesu e nanadaia neganai, Iesu ese Dirava ena hereva headava ginigunana ai ma e gwauraia, eto: “Badina bunai tau ese tamana sinana baine rakatanidia, adavana baine badinaia, raruosi na anidia tamona ai baela.” Ma eto: “Dirava ese vada e hahekapudia taudia na taunimanima ese basie hapararadia.”​—Mareko 10:2-12 ba duahi; Gen. 2:24.

4. Iehova ese headava e karaia neganai e atoa taravatuna be dahaka?

⁴ Iesu na e abia dae headava na Dirava ese e hamatamaia bona baine mia hanaihanai ḡauna. Dirava ese Adam bona Heva na se hamaorodia edia headava bae hadokoa. To Eden imeana ai headava ginigunana e karaia neganai, e atoa taravatuna na tau tamona bona hahine tamona bae headava bona “raruosi” bae noho hanaihanai.

BASIE MIA DAUDAU ḠAUDIA ESE HEADAVA E HAIDAUAMU

5. Mase ese headava be ede e haidaua tomamu?

⁵ To ta dibamu, Adam ena kara dika dainai ḡau momo na e idau. Heḡereḡere mase ese headava e haidauamu. Aposetolo Paulo ese Kristen taudia ediai e hahedinaraia mase ese headava e hadokoamu, bona vabu o doḡae baine headava lou na dia kerere.​—Roma 7:1-3.

6. Edena dala ai Mose ena Taravatu ese Iehova ena lalohadai headava ai e hahedinaraia?

⁶ Dirava ese Israel taudia e henidia Taravatuna ai headava e herevalaia. Israel tauna na se koua hahine momo baine adavadia. Dirava ese Taravatu do se henidia neganai, una kara na de varava. To, Taravatu ese hahine bona natu e gimadiava haida ese basie hahisidia totona. Haheitalai na, bema Israel tauna ta na hesiai kekenina ta baine adavaia, bena gabeai hahine iharuana baine abia, namona na adavana ginigunana ana aniani bona dabua baine heni bona basine hadihoa. Dirava ena ura na tau ese hahine ginigunana baine gimaia bona baine naria. (Eso. 21:9, 10) Ena be ita na dia Mose ena Taravatu henunai, to una Taravatu amo Iehova ena lalohadai ta dibamu. Una ese e durudamu headava baita matauraia.

7, 8. (a) Deuteronomi 24:1 ena hereva heḡereḡerena, headava ihadokona karana ai Taravatu be dahaka e gwa? (b) Headava ihadokona karana ai Iehova ena lalohadai be dahaka?

⁷ Headava ihadokona karana ai Taravatu be dahaka e gwa? Ena be Dirava ena haheḡani na tau bona hahine ese edia headava bae laloa bada, to danu se koudia edia headava bae hadokoa. (Deuteronomi 24:1 ba duahia.) Israel tauna ta ese ena headava baine hadokoa diba bema baine davaria adavana na “kara mirona ta” e karaia. Taravatu ese “kara mirona” edehetomana na se gwauraia. To reana una na hemarai bada baine havaraia karana ta. (Deu. 23:14) Iesu ena negai Iuda taudia momo na badi idauidau daidiai edia headava e hadokova. (Mat. 19:3) Asita uramu edia kara baita tohotoho.

⁸ Peroveta tauna Malaki ese Dirava ena lalohadai headava ihadokona karana ai e herevalaia. Una negai, tatau haida na ‘eregabedia ai e adavadia hahinedia’ e rakatanidiava, bona kaivakuku e tomadiho henidiava kekenidia e adavadiava. Malaki ese Dirava ena lalohadai na ini e herevalaia toma: “Hahekoho na na inai heniamu.” (Mal. 2:14-16) Dirava ese headava ginigunana e hamatamaia negana amo ena lalohadai na se idau, eto: “Tau ese . . . adavana baine badinaia, raruosi na anidia tamona ai baela.” (Gen. 2:24) Iesu ese Tamana ena lalohadai e abia dae, badina eto, “Dirava ese vada e hahekapudia taudia na taunimanima ese basie hapararadia.”​—Mat. 19:6.

HEADAVA IHADOKONA BADINA TAMONA

9. Mareko 10:11, 12 ai Iesu ena hereva anina be dahaka?

⁹ Reana ta na be henanadaimu, ‘Kristen tauna ta be mai badina ta dainai ena headava baine hadokoa bena ma ta baine adavaia diba, a?’ Headava ihadokona karana ai Iesu na eto: “Adavana baine hadihoa bena hahine ta ma baine adavaia tauna hari heuda-hanai tauna; bona adavana baine dihotania bena tau ta baine adavaia hahinena danu heuda-hanai hahinena.” (Mar. 10:11, 12; Luka 16:18) Una ese e hahedinaraiamu, Iesu na headava e matauraiava bona e urava haida danu unu bae kara toma. Bema tau ta ese adavana, ia e badinaiamu hahinena, (o hahine ta ese adavana, ia e badinaiamu tauna) baine dihotania kava bena ma ta baine adavaia, una na heudahanai karana. Una na momokani badina ena be edia headava na e hadokoa kava, to Dirava matana ai idia raruosi na dounu “tamona.” Danu Iesu eto, tau ta ese adavana, dia heuda-hanai hahinena, baine hadihoa ia ese heuda-hanai hahinena ai baine halaoa. Edena dala ai? Iesu ena negai, tau ese e dihotania hahinena na reana be uramu baine headava lou moni dalanai heduru baine abi totona. Unu be kara tomamu neganai, una na heudahanai karana.

10. Kristen tauna ese ena headava baine hadokoa bona ma ta baine adavaia badina tamona be dahaka?

¹⁰ Iesu ese headava ihadokona badina na ini e gwauraia toma: “A lau ese na hamaoromuimu, adavana se heuda hanai [Grik, por·neiʹa] to baine hadihoa bona hahine ta ma baine adavaia tauna na heuda-hanai tauna.” (Mat. 19:9) Una hereva na ena Ororo Harorona ai ma e gwauraia lou. (Mat. 5:31, 32) Nega idaudia rua ai Iesu ese “heudahanai” karana e herevalaia. Heudahanai na matabodaḡa karana ta. Matabodaḡa karadia haida bini: ariara tauna o hahinena ida e mahuta heboumu, se headava taudia e mahuta heboumu, tatau rarua eiava hahine rarua e mahuta heboumu, bona animal ida mahuta hebou karana. Haheitalai ta na, bema headava tauna ta na una matabodaḡa karana ta baine karaia, hahine na abi hidi baine kara, edia headava baine hadokoa eiava lasi. Bema bae divos, Dirava matana ai edia headava na vada e doko.

11. Dahaka dainai Kristen tauna ta na basine uramu ena headava baine hadokoa ena be adavana na e heudahanai?

¹¹ Iesu na se gwa headava tauna ta ese matabodaḡa (por·neiʹa) karana ta baine karaia neganai, hahine na maoromaoro headava baine hadokoa. Heḡereḡere, reana hahine na be uramu adavana ida dounu baine noho ena be tau na e heudahanai. Reana dounu e lalokau heniamu, bona mai ena ura ida ena dika be gwauataomu bena raruosi be hekwarahimu edia headava bae hanamoa. To, bema hahine na ena headava baine hadokoa bona basine headava lou, hekwakwanai idauidau be varamu danu. Tauanina iduruna ḡaudia be ede be abi tomamu? Mahuta hebou urana be ede be haḡuḡurua tomamu? Reana sibona be nohomu dainai be lalometaumu, a? Edia headava e doko dainai natudia be ede bamona? Hereva momokani ai be durudia namonamomu, eiava? (1 Kor. 7:14) Una ese e hahedinaraiamu, ena headava e hadokoamu tauna o hahinena na hekwakwanai badadia be davarimu.

12, 13. (a) Hosea ena headava lalonai dahaka e vara? (b) Dahaka dainai Hosea ese Gomere e abia dae lou, bona headava taudia be dahaka e hadibadiamu?

¹² Peroveta tauna Hosea enai e vara ḡauna ese Dirava ena lalohadai headava ai e hadibadamu. Dirava ese Hosea e hamaoroa hahine ta (Gomere) baine adavaia, ia na gabeai “ariara hahinena” ai bainela bona “ariara memerodia [baine] havaradia.” Gomere ese Hosea “natuna maruanena ta” e havaraia. (Hos. 1:2, 3) Gabeai, Gomere na ma tau ta enai kekeni ta bona mero ta e havaradia. Ena be Gomere na e heudahanai loulouva, to Hosea ese na se rakatania. Gabeai, Gomere ese Hosea e rakatania bona hesiai hahinena ai ela. To, Hosea ese ma e hoia lou. (Hos. 3:1, 2) Iehova ese Hosea ena haheitalai e ḡaukaralaia, unu amo baine hahedinaraia ena be Israel taudia na e kara dika loulouva to Ia ese edia dika na e gwautaova. Una sivarai amo dahaka ta dibamu?

¹³ Bema Kristen tauna ta na matabodaḡa karana ta baine karaia, adavana​—asi ena kerere Kristen tauna​—na abi hidi ta baine karaia. Iesu na eto, asi ena kerere tauna na una badi dainai ena headava baine hadokoa bona ma ta baine adavaia diba. To danu, adavana ena dika baine gwauatao na dia kerere. Hosea ese Gomere ma e abia dae lou. Gomere ese Hosea e lou henia neganai, ia na ma idau tauna ta ida basine mahuta hebou. Hosea danu Gomere ida se “mahuta hebou.” (Hos. 3:3, NWT futnout) To gabeai, raruosi ma e mahuta hebou lou. Una na Dirava ese ena taunimanima e abidia dae lou bona idia ese edia hetura karana Ia ida e hanamoa lou karana e hahedinaraia. (Hos. 1:11; 3:3-5) Hari una sivarai ese headava taudia be ede e durudia tomamu? Bema asi ena kerere tauna na adavana ida e uramu dounu baine noho bona adavana ida baine mahuta hebou, una ese e hahedinaraiamu ia na adavana ena dika e gwauatao. (1 Kor. 7:3, 5) Anina na edia headava bae hadokoa na asi badina. Una murinai, tau bona hahine na bae ḡaukara hebou bona bae heduru heheni Dirava ena lalohadai bae badinaia totona.

HEKWAKWANAI NEGADIAI DANU HEADAVA BA MATAURAIA

14. Korinto Ginigunana 7:10, 11 ena hereva heḡereḡerena, headava lalonai dahaka baine vara diba?

¹⁴ Iesu bona Iehova ese headava e matauraiamu heḡereḡerena, namona na Kristen taudia iboudiai bae hekwarahi edia headava bae matauraia. To, haida ediai una na auka, badina ita na dia ḡoevadae tauda. (Roma 7:18-23) Una dainai, basita daradara badina aposetolo edia negai danu Kristen taudia haida edia headava lalonai hekwakwanai na e varava. Paulo eto, “hahine ese tau basine dihotania”; to haida ese una sisiba na se badinaia.​—⁠1 Korinto 7:10, 11 ba duahi.

15, 16. (a) Headava lalonai hekwakwanai e varamu neganai dahaka be mai anina bada, bona dahaka dainai? (b) Kristen tauna be dahaka baine kara bema adavana na dia Iehova e tomadiho heniamu?

¹⁵ Paulo ese headava e pararava badina na se herevalaia. Ta dibamu tau o hahine ta na ena matabodaḡa karana dainai, adavana baine ura neganai ena headava baine hadokoa, to hekwakwanai na dia una. Paulo na eto, adavana e dihotania hahinena na “vadona ai bema noho, eiava adavana enai ma bema daro dae lou.” Badina Dirava matanai idia raruosi na dounu tamona. Paulo ena sisiba na eto herevana dahaka hekwakwanai bae vara, bona bema una na dia matabodaḡa karana ta, namona na raruosi bae maino lou. Danu kongrigeisen elda amo Baibul ena heduru herevadia bae tahu. Dia namo elda taudia na tau o hahine ena kaha ai mo bae tao, to Baibul ena sisiba amo raruosi bae durudia.

¹⁶ Nega haida na auka bema Kristen tauna ta adavana na dia Iehova e tomadiho heniamu tauna o hahinena. To hekwakwanai negadia ai, headava ihapararana karana be hekwakwanai ihamaoromaorona dalana, a? Tame herevalai ḡaudia amo ta dibamu, Baibul na e gwaumu headava ihadokona badina tamona na heudahanai karana, to headava taudia bae parara badidia na se herevalai. Paulo eto: “Hahine ta . . . bema mai adavana, dia ekalesia tauna, bona una tau bema ura ia ida do bema noho; basinema dihotania.” (1 Kor. 7:12, 13) Iseda negai danu una sisiba na mai anina bada.

17, 18. Dahaka dainai Kristen taudia haida na adavadia se rakatanidiamu ena be hekwakwanai e varamu?

¹⁷ Momokani, nega haida “dia ekalesia tauna” na kara haida amo be hahedinaraiamu adavana na se ura heniamu. Reana hahine be dadabaiamu, bona hahine na be mamimu ia na e haberoamu eiava kahirakahira be hamaseamu. Eiava se uramu adavana bona natuna baine haerodia, eiava adavana ena hesiai ḡaukaradia be koumu. Kristen taudia haida ediai una e varamu neganai, lalodia e hadaimu adavadia ida bae parara na namo, herevana tau na dahaka baine gwaurai. A Kristen taudia haida na dounu adavadia ida e nohomu; e haheaukamu bona e hekwarahimu edia hekwakwanai bae hamaoromaoro. Dahaka dainai?

¹⁸ Ena be e noho pararamu, to idia na dounu headava. Bema bae parara, tau bona hahine na hekwakwanai ma haida bae davari, matamanai ta herevalai heḡereḡerena. Aposetolo Paulo ese tau bona hahine bae noho hebou badina ma ta e gwauraia. Eto: “Ekalesia hahinena ese adavana murimuri tauna na e hahelaḡaiamu; bona ekalesia tauna ese adavana murimuri hahinena na e hahelaḡaiamu. Bema lasi, natumui basiema helaḡa; ḡau tamona, idia na harihari hehelaḡa.” (1 Kor. 7:14) Kristen taudia momo na mai haheaukadia ida adavadia, dia Witnes taudia, doini e badinadiamu, ena be hekwakwanai badadia e varamu. Unu e kara tomamu dainai e moalemu badina adavadia na gabeai Witnes taudia ai e laomu.​—⁠1 Korinto 7:16 ba duahia; 1 Pet. 3:1, 2.

19. Dahaka dainai Kristen kongrigeisen lalonai edia headava e moalelaimu taudia na momo?

¹⁹ Iesu ese headava ihadokona badina e herevalaia, bona aposetolo Paulo ese headava ihapararana karana ai sisiba namodia e heni. Idia na e ura Dirava ena hesiai taudia ese headava bae matauraia. Hari tanobada heḡeḡemadai, Kristen kongrigeisen lalonai edia headava e moalelaimu taudia na momo herea. Emu kongrigeisen ai unu headava taudia momo bo davaridiamu. Tadikaka ese adavadia e lalokau henidiamu bona taihu ese danu adavadia na e lalokau henidiamu, unu amo e hahedinaraiamu headava na e matauraiamu. Ta moalemu badina momo ese Dirava ena hereva e badinaiamu, eto: “Badina binai tau ese tamana sinana baine rakatanidia, adavana mo enai baine tao, bena raruosi vada tau-anina tamona na heto.”​—⁠Efe. 5:31, 33.