Matamata Taumui E​—Bapatiso Murinai Lo Kristen Tauna ai Baola

1. Matamata taudia be dahaka ḡau haida de haḡuḡuru?

LAḠANI iboudiai, Kristen taudia matamatadia tausen momo na e bapatisomu. Oi danu do bapatiso, a? Bema oibe, tadikaka taihu iboudiai bona Iehova na una dainai e moalemu! (Her. 27:11) Mani nega sisina lalonai o haḡuḡuru ḡaudia namodia a lalo. Heḡereḡere, reana laḡani haida lalodiai Baibul na o stadilaia goadagoada. Emu stadi karana dainai o abia dae Baibul na Dirava ena Hereva. Danu, una buka helaḡana E Havaraia Tauna o dibaia bona danu o lalokau henia. Emu lalokau e goada ela dainai, hari oi na da o bapatiso bona iena gwauhamata hesiai tauna ta. Una na abi hidi hereadaena!

2. Ina atikol ai dahaka baita herevalaimu?

² Ta dibamu do so bapatiso neganai, emu abidadama na dala idauidau ai e tohoa. To, bo bada bo laomu neganai, hekwakwanai matamatadia ma haida bo davarimu. Satana na be hekwarahimu emu lalokau Iehova enai be hamaraḡiamu bona be koumumu Ia basio hesiai henia. (Efe. 4:14) Namona na ba hekwarahi oiemu ai una na basine vara. Dahaka ese oi baine durumu diba Iehova ba badinaia noho bona emu gwauhamata ba haḡuḡurua? Namona na dounu ba “ḡaukara goada” lo Kristen tauna ai baola. (Heb. 6:1, NWT) To una be ede ba karaia diba toma?

DAHAKA BA KARA DIBA, LO KRISTEN TAUNA AI BAOLA?

3. Kristen taudia iboudiai e bapatisomu murinai, lo taudia ai baela totona dahaka bae kara na namo?

³ Bapatiso murinai, ita iboudai na Paulo ese Efeso Kristen taudia e henidia sisibana baita badinaia na namo. E hagoadadia, “lo” Kristen taudia ai baela. (Efe. 4:13) Eiava baita gwau dibamu, anina na dounu bae ḡaukara goada. Paulo ese lauma dalanai baita tubu karana na tauanina dalanai natu e tubumu dalana ida e haheḡereḡerea karana na ta lalopararalaiamu. Beibi matamatana ta e varamu neganai, tamana sinana ese e moalelaia badamu bona e heaḡilaiamu. To, ia na dia karukaruna ai mo be nohomu. Gabeai be tubumu neganai, ‘mero ena kara na vada be negeamu.’ (1 Kor. 13:11) Kristen taudia danu unu bamona. Bapatiso murinai, namona na dounu baita tubu baitala. Unu baita kara toma totona, bae duruda ḡaudia haida aita herevalai.

4. Lauma dalanai ba goada totona, ededia kara rua ese bae durumu diba? A gwauraia hedinarai. (Filipi 1:9, NWT)

⁴ Emu lalokau Iehova enai ba habadaia. Oi ese Iehova na da o lalokau henia bada. To, emu lalokau ienai na baine bada diba. Edena dalai? Aposetolo Paulo ese Filipi 1:9 ai dala ta e herevalaia. ([NWT] Ba Duahia.) Paulo na e ḡuriḡuri Filipi taudia edia lalokau “baine vara badabada” na namo. Una dainai, eda lalokau Iehova enai na baine bada diba. Una na “diba maoromaoro bona laloparara” baita abimu neganai baita karaia dibamu. Iehova baita dibaia namonamomu neganai, eda lalokau ienai be badamu bona iena kara bona ḡau e karamu daladia baita lalodia badamu. Ia ihamoalena urana na be goadamu, bona ia ihabaduna ḡauna ta basita karaiamu. Baita ḡaukara goadamu iena ura baita dibaiamu bona iena ura heḡereḡerena baita karamu.

5-6. Edena dalai eda lalokau Iehova enai na baine bada diba? A gwauraia hedinarai.

⁵ Eda lalokau Iehova enai baita habadaia diba, bema Natuna baita dibaia namonamo, badina ia ese Tamana ena kara na e hahedinaraidia ḡoevaḡoeva. (Heb. 1:3) Iesu baita dibaia namonamo dalana na, Evanelia bukadia haniosi baita stadilaidia. Bema dina iboudiai Baibul iduahina karana na do so hamatamaia, unu Evanelia bukadia amo ba hamatamaia diba, ani? Iesu sivaraina o duahimu neganai, mani ena kara ba lalodia namonamo. Taunimanima na asie gariva ia dekena baela bona maraḡidia na e rosidia mai ena lalokau ida. (Mar. 10:13-16) Ena hahediba na ia ida e nohova negadiai, asie gariva bona lalodiai e miava ḡaudia na e gwaurai hedinaraiva. (Mat. 16:22) Unu amo Iesu ese Tamana gubai e nohomu na e tohotohova. Iehova danu baita hereva henia diba. Una na ḡuriḡuri karana amo baita karaia diba. Ta ḡuriḡurimu neganai, lalodai e miamu ḡaudia iboudiai baita hamaorolaia diba. Ta diba momokanimu ia ese ita na basine hahemaoro henidamu. Ia ese ita na e lalokau henidamu; bona e laloda badamu.​—1 Pet. 5:7.

⁶ Iesu ese taunimanima na e bogadia hisiva. Aposetolo Mataio na e gwa: “Aru taudia e itadia e bogadia hisi, badina be taudia e boera, bona e karoho, mamoe asi ireḡudia na heheto.” (Mat. 9:36) Bona Iehova ena hemami be ede bamona? Iesu na e gwa: “Unuhetomana, Tamamui guba ai e nohomu na se uramu ini memero-memero ta baine mase.” (Mat. 18:14) Una ese kudouda na e hamoalea badamu! Iesu baita dibaia namonamomu neganai, eda lalokau Iehova enai na be badamu.

7. Edena dalai lo Kristen taudia ba bamodia karana ese baine durumu diba?

⁷ Danu, emu lalokau na be bada be laomu bona lo Kristen tauna ai bo lao dibamu, bema emu kongrigeisin ai lo Kristen taudia bo bamodiamu bona bo dibadiamu. Idia na e moale badamu. Asie lalohisihisimu Iehova e hesiai heniamu dainai. Ba nanadaidia Iehova ena hesiai ḡaukara lalona e davari ekspiriensdia haida bae gwaurai. Bema mai anina bada abi hidina ta o uramu ba karaia, edia amo heduru herevadia ba noi diba. Ba helalotao, “hahealo taudia bema hoho, taunimanima edia noho baine namo.”​—Her. 11:14.

8. Dahaka ba kara diba bema Baibul ena hahediba herevana ta na o daradaralaiamu?

⁸ O daradaralaimu ḡaudia ba hanaidia. Paragraf 2 ai tame herevalaia heḡereḡerena, Satana na be hekwarahimu lauma dalanai emu tubu karana baine hadikaia. Una baine karaia diba dalana ta na, Baibul ena hahediba herevadia haida ai daradara baine havaraia diba. Heḡereḡere, gabeai skuli ai evolution hahedibana, Dirava ladana e hadikaiamu lalohadaina na bo kamonaimu. Maraḡimu neganai reana una na so laloa bada, to hari oi na da bada dainai skuli ai una na be herevalaia momomu. Emu hahediba ese evolution be herevalaiamu dalana ese reana una lalohadai na be hamomokaniamu dainai bo abia daemu. To, reana idia ese ḡau iboudiai Ihavaradia Tauna ena noho ihamomokanina ḡaudia na do asie tahu. Hereva Lada-isidia 18:17 ai e torea hahekau herevana na ba laloatao: “E hereva gunamu tauna ena hereva mamina na momokani, ela bona ta ma bainema, anina baine tahu henia.” Dia skuli ai e hadibamumu herevadia iboudiai bavabi dae to namona na hereva momokanidia, Dirava ena Hereva Baibul ai ba tahudia namonamo. Eda pablikeisin idauidau ai ba hetahu. Guna evolution lalohadaina e abia-daeva tadikaka taihu ba hereva henidia. Ba nanadaidia dahaka ese e durudia bae abia dae ḡau iboudiai Ihavaradia Tauna na e nohomu bona ia ese ita na e lalokau henidamu. Herevahereva unu bamodia ese be durumumu e vara momokani ḡaudia ba lalodia bada totona.

9. Melissa ena ekspiriens amo dahaka ome diba?

⁹ Taihu ladana, Melissa na Dirava e kara ḡaudiab topik-na e stadilaia karana ese e durua bada. Ia na e gwa: “Skuli ai, evolution na taunimanima ese bae abia dae dalanai e hahedibalaiamu. Matamanai, asina urava evolution ai na daradaralaiva ḡaudia baina hamaoromaorodia. Na laloava bema una topik ai hetahu karana ba karaiamu, reana ba davariamu evolution na maoro. To na laloa Iehova na e uramu Ia baita hesiai henia neganai, ta herevalaimu ḡaudia badidia baita dibadia na namo. Una dainai, una topik na hetahulaia. Lau ese ina buka, Is There a Creator Who Cares About You? bona ini buklet, Was Life Created? bona The Origin of Life​—Five Questions Worth Asking na duahidia. Unu na lau na urava baina diba ḡaudia. Matamanai unu nama kara toma na namo.”

10-11. Dahaka ese baine durumu diba emu kara ai ba ḡoeva totona? (1 Tesalonika 4:3, 4)

¹⁰ Kara kereredia ba dadarai. Matamata neganai, mahuta hebou urana na e goadamu, bona reana haida ese be dorimumu matabodaḡa karana ba karaia. Satana na e uramu lalomu ena ura ba badinaia. Dahaka ese baine durumu diba emu kara ai ba ḡoeva totona? (1 Tesalonika 4:3, 4 ba duahi.) Iehova o ḡuriḡuri heniamu neganai, emu hemami na ba gwaurai hedinarai. O mamimu ḡaudia na ba gwaurai bona ba noia baine hagoadamu. (Mat. 6:13) Ba helalotao Iehova na e uramu baine durumu, dia baine hahemaoro henimu. (Sal. 103:13, 14) Danu, Baibul ena hereva amo heduru bavabi diba. Matamanai tame herevalaia taihuna, Melissa na e hekwarahiva lalohadai mirodia baine dadarai. Ia na e gwa: “Dina iboudiai Baibul iduahina karana ese e durugu baina hekwarahi lalohadai mirodia baina dadarai. Una ese e durugu baina helalotao lau na Iehova ena bona na uramu egu mauri ai Ia baina hesiai henia.”​—Sal. 119:9.

¹¹ Oi sibomu ese emu hekwakwanai na basio hamaoromaorodia toho. Emu ai e varamu hekwakwanaidia na tamamu bona sinamu ida ba herevalai hebou. Momokani, hekwakwanai unu bamodia iherevalaidia karana na dia haraḡa, to unu ba kara toma na mai anina bada. Melissa na e gwa: “Goada totona na ḡuriḡuri bena egu hekwakwanai na tamagu ida a herevaherevalaia. Una murinai, egu hemami na e namo. Na diba Iehova na egu kara dainai e moale.”

12. Edena dalai abi hidi maorodia ba kara diba?

¹² Baibul ena hahekau herevadia ese baine gimamu. Bo bada bo laomu neganai, tamamu sinamu ese na basie koumumu sibomu emu abi hidi ba kara totona. To emu diba mauri ena heau dalana ai na do dia bada. Edena dalai emu abi hidi ese emu hetura karana Iehova ida basine hadikaia? (Her. 22:3) Taihu ladana Kari, na abi hidi maorodia baine kara totona e durua ḡauna na e herevalaia. E laloparara lo Kristen tauna na dia ḡau iboudiai baine kara totona, taravatu tamona ese baine biagua. Ia na e gwa: “Namona na lau ese Baibul ena hahekau herevadia baina lalopararalai dia taravatu mo.” Baibul o duahiamu neganai, sibomu ba henanadai: ‘Na duahiamu ḡauna ese Iehova ena lalohadai be ede e hahedinaraia tomamu? Una ese egu kara baina biagua diba Baibul ena hahekau herevadia e hahedinarai, eiava? Bema oibe, edena dalai baina badinadia karana ese baine durugu?’ (Sal. 19:7; Isa. 48:17, 18) Bema Baibul bo duahiamu bona ena hahekau herevadia bo lalodia dobumu, abi hidi bo karamu neganai Iehova na be moaleamu. Lauma dalanai bo goada bo laomu neganai, bo itaiamu ḡau iboudiai ba kara totona dia taravatu tamona ba badinaia, badina ḡau iboudiai lalodiai Iehova ena lalohadai na o lalopararalaidiamu.

13. Tura namodia ese oi be, be durumumu dahaka bo karamu? (Hereva Lada-isidia 13:20)

¹³ Iehova e lalokau heniamu taudia ba hetura henidia. Matamanai tame herevalaia heḡereḡerena, turamu bo abidia hidimu karana ese emu tubu lauma dalanai be durumamu eiava lasi. (Hereva Lada-isidia 13:20 ba duahia.) Taihu ta ladana Sara na ena moale lauma ḡaudia ikaradia ai na e haboioa. To ḡau ta e vara dainai, ena lalohadai na e haidaua. Sara na e gwa: “Tura namodia na nega korikori ai na davaridia. Taihu matamatana ta na lau ida wiki iboudiai Gima Kohorona a stadilaiava. Turagu ma ta ese e durugu hebou ai baina haere matama totona. Turagu edia heduru dainai, sibogu egu stadi bona ḡuriḡuri karana na lalodia bada. Egu hetura karana Iehova ida na hagoadaia matama, bona ma na moale lou.”

14. Julien be edena dalai tura namodia e davari?

¹⁴ Edena dalai oi bae durumu diba tura namodia ba davari diba? Tadikaka ta ladana Julien, hari ia na da elda ta, na e gwa: “Lau matamatagu ai, haroro ḡaukara ai tura namodia na davari. Idia na haroro goadagoada taudia, e durugu na itaia hesiai ḡaukara na baina moalelaia diba. Ful-taim hesiai ḡaukarana na egu tahua ḡauna ai na halaoa matama. Danu, na laloparara tura namodia na momo to asina bamodiava, badina lau na egu uru taudia mo na bamodiava. Gabeai, Betele ai tura namodia ma haida na davaridia. Edia haheitalai ese e durugu moale karadia baina abi hidi namonamo, bona una ese egu hetura karana Iehova ida na e hagoadaia.”

15. Paulo ese hebamo karana ai edena sisiba Timoteo e henia? (2 Timoteo 2:20-22)

¹⁵ To bema o dibamu emu kongrigeisin ai ta na dia hebamo namona, oi be dahaka ba kara na namo? Paulo na e diba kongrigeisin ai haida na dia Kristen taudia edia lalohadai heḡereḡerena e karava dainai, Timoteo na e hamaoroa idia na basine bamodia. (2 Timoteo 2:20-22 ba duahi.) Eda hetura karana Iehova ida na mai anina bada. Tamada gubai e nohomu ida ta karaia hetura karana namona na ta ese basine hadikaia na namo, badina ita na ta hekwarahi Ia ida una hetura karana ta hamatamaia.​—Sal. 26:4.

EDENA DALAI O URAMU BA KARA ḠAUDIA ESE BAE DURUMU LAUMA DALANAI BA GOADA TOTONA?

16. Dahaka ḡau ba tahu na namo?

¹⁶ Bae durumu diba ḡaudia ba tahu. O uramu ba kara ḡaudia ese emu abidadama bae hagoadaia bona bae durumu lo tauna ai baola na namo. (Efe. 3:16) Heḡereḡere, lalomu ba hadaia sibomu emu stadi bona Baibul iduahina karana ba karaia hanaihanai. (Sal. 1:2, 3) Eiava reana ḡuriḡuri hanaihanai karana ba hanamoa bona kudoumu amo ba ḡuriḡuri. Bona reana moale karadia iabi hididia ai sibomu ba hebiagu bona emu nega ba ḡaukaralaia namonamo. (Efe. 5:15, 16) Bema Iehova na be itaiamu oi na o ḡaukara goadamu lo Kristen tauna ai baola, Ia na be moalemu.

17. Bema haida bo durudiamu, dahaka hemami namona bo abiamu?

¹⁷ Haida bo durudiamu neganai lauma dalanai bo goada bo laomu. Iesu na e gwa: “Ḡau ihenina be namo bada, ḡau iabina be namo maraḡi.” (Apos. 20:35) Bema emu nega bona goada bo ḡaukaralaiamu haida bo durudiamu, bo moale badamu. Heḡereḡere, emu kongrigeisin ai iahudia bona gorere taudia idurudia karana na emu tahua ḡauna ai ba halaoa. Edia ura ḡaudia ihoidia totona ba durudia eiava fon o tablet iḡaukaralaina daladia ba hadibadia. Bema oi na tadikaka, ba hekwarahi hesiai tauna ta ai baola, unu amo tadikaka taihu ba durudia diba. (Fili. 2:4) Danu, emu lalokau ba hahedinaraia dalana ma ta na, Basileia sivarai namona ba harorolaia. (Mat. 9:36, 37) Bema oiemu ai na heḡereḡere, ful-taim hesiai ḡaukarana ta na emu tahua ḡauna ai ba halaoa.

18. Edena dalai ful-taim hesiai ḡaukarana ese baine durumu diba lauma dalanai ba tubu totona?

¹⁸ Ful-taim hesiai ḡaukarana ese dala be kehoa dibamu lauma dalanai ba tubu. Bema bo painiamu, una ese dala be kehoa dibamu Basileia Evanelia Skulina baola. Bona Betele ai eiava konstraksen ai bo ḡaukara dibamu. Matamata painia taihuna ta ladana Kaitlyn, na e gwa: “Na bapatiso murinai hesiai ḡaukara ai mai edia diba tadikaka taihu na bamodia karana ese e durugu lauma dalanai baina tubu. Edia haheitalai ese e hagoadagu egu diba Baibul ai e habadaia bona egu hahediba dalana e hanamoa.”

19. Lauma dalanai bo goada bo laomu neganai, dahaka hahenamo bo davarimu?

¹⁹ Lauma dalanai bo tubu bo laomu neganai, hahenamo momo bo davarimu. Bona emu matamata negana na asi anidia ḡaudia ai basio haorea kavamu. (1 Ioa. 2:17) Danu, abi hidi kereredia ikaradia amo e varamu lalohisihisina na basio mamiamu. Bo karamu ḡaudia ai bo kwalimumu bona moale korikorina bo davariamu. (Her. 16:3) Emu haheitalai namona ese tadikaka taihu iahudia bona matamata taudia be durudiamu. (1 Tim. 4:12) Bona ḡau bada hereana be, Iehova ihamolena karana amo be varamu moalena bo mamiamu, bona Ia ida emu hetura karana na be goadamu.​—Her. 23:15, 16.