Tanobada Matamatana Gwauhamatana ai Eda Abidadama be Ede Baita Hagoadaia Toma?

1-2. Tanobada matamatana ta nariamu lalonai, dahaka baita kara be namo?

ITA na ta moalemu badina Iehova na e gwauhamata ina nega oromana baine haorea bona tanobada matamatana baine havaraia. (2 Pet. 3:13) Ena be asi dibada edena nega ai una baine vara, to e varamu ḡaudia ese e hahedinaraimu una nega na kahirakahira.​—Mat. 24:32-34, 36; Apos. 1:7.

² Una nega ta nariamu lalonai, namona na una gwauhamata ai eda abidadama na baita hagoadaia, ena be laḡani momo hereva momokani lalonai vada ta noho. Dahaka dainai? Badina abidadama goadana na baine manoka diba. Momokani, aposetolo Paulo ese abidadama manokana na e gwauraia ‘e kahuda taomu kara dikana.’ (Heb. 12:1) Eda abidadama basine manoka totona, tanobada matamatana baine vara ihamomokanina ḡaudia baita lalodia loulou.​—Heb. 11:1.

3. Ina atikol ai dahaka baita herevalaimu?

³ Ina atikol ai, Iehova ese e gwauhamatalaia tanobada matamatana ai eda abidadama baita hagoadaia daladia toi baita herevalaimu. Unu na (1) mauri idavalaina boubouna baita laloa dobu, (2) Iehova ena siahu baita haeroa, bona (3) Iehova itomadiho henina ḡaukaradia baita kara. Danu, Iehova ese Habakuku e hamaoroa herevana ese eda abidadama e hagoadaiamu daladia baita herevalaimu. To, mani edai e varamu ḡaudia haida aita herevalai guna, unu ḡau daidiai tanobada matamata gwauhamatana ai eda abidadama baita hagoadaia na mai anina bada.

EDA ABIDADAMA BAITA HAGOADAIA NEGADIA

4. Ededia abi hidi daidiai eda abidadama baita hagoadaia na namo?

⁴ Dina ta ta ai, baita kara abi hididia daidiai eda abidadama baita hagoadaia na namo. Heḡereḡere, ta karamu abi hidi haida na hebamo, moale karadia, edukeisin, headava, natu bona moni ḡaukara. Reana siboda baita henanadai: ‘Egu abi hidi ese e hahedinaraiamu na abia daemu ina nega oromana na be oremu bona Dirava ena tanobada matamatana na kahirakahira be varamu, a? Eiava egu abi hidi na asi edia helaro taudia edia heḡereḡerena, a?’ (Mat. 6:19, 20; Luka 12:16-21) Bema ta abia daemu tanobada matamatana na kahirakahira be varamu, una ese be durudamu abi hidi namodia baita karamu.

5-6. Hekwakwanai negadiai dahaka dainai eda abidadama baita hagoadaia na namo? Haheitalai ta a gwauraia.

⁵ Hekwakwanai negadiai danu eda abidadama baita hagoadaia na namo. Reana daḡedaḡe, gorere badana, eiava ḡau ma haida ese laloda bae hamanoka diba. Reana matamanai baita lalomu unu na baita haheaukalai dibamu. To bema unu hekwakwanai na se oremu, namona na eda abidadama baita hagoadaia, unu amo baita haheauka bona mai moaleda ida Iehova baita hesiai henia hanaihanai.​—Roma 12:12; 1 Pet. 1:6, 7.

⁶ Hekwakwanai ta, ta davariamu neganai, reana baita lalomu Iehova ena tanobada matamatana na basine varamu. Una anina be iseda abidadama be manoka, a? Lasi. Mani ina haheitalai a laloa. Medu na wiki haida lalodiai e dihomu neganai, reana baita laloamu dina na basine taramu. To gabeai dina na be taramu. Una heḡereḡerena, ta lalomanokamu neganai, reana baita laloamu tanobada matamatana na basine varamu. To, bema eda abidadama na goada, baita dibamu Dirava ena gwauhamata na be ḡuḡurumu. (Sal. 94:3, 14, 15; Heb. 6:17-19) Una dainai, eda mauri lalonai nega iboudiai Iehova itomadiho henina karana baita atoa guna.

7. Edena lalohadai baita dadaraia na namo?

⁷ Danu, haroro ḡaukara baita karaia totona, eda abidadama baita hagoadaia na namo. Ta haroro henidiamu taudia momo na e laloamu, Dirava ena tanobada matamata baine vara “sivaraina namona” na koikoi. (Mat. 24:14; Esek. 33:32) To, ita na asita uramu edia lalohadai kererena baita badinaia. Una dainai, eda abidadama baita hagoadaia na namo. Mani unu baita kara toma daladia toi aita herevalai.

MAURI IDAVALAINA BOUBOUNA BAITA LALOA DOBU

8-9. Mauri idavalaina boubouna baita laloa dobu karana ese eda abidadama be ede be hagoadaia tomamu?

⁸ Eda abidadama baita hagoadaia dalana ta na, mauri idavalaina boubouna baita laloa dobu. Una mauri idavalaina boubouna dainai, ta dibamu Dirava ena gwauhamata na be ḡuḡurumu. Dirava ese una mauri idavalaina boubouna e heni badina bona anina baita lalohadailaimu neganai, eda abidadama baita hagoadaiamu bona baita abia daemu Dirava ese e gwauhamatalaia tanobada matamatana na be varamu. Dahaka dainai unu ta gwau tomamu?

⁹ Dirava ese mauri idavalaina boubouna be ede e heni toma? Iehova ese Natuna vara-edeana na guba amo e siaia tanobada ai e vara. Iesu na tanobada ai hahetoho idauidau e haheaukalaidia. Bena hisihisi bada e davari bona e mase. Momokani, Iehova ese dava bada ḡauna amo ita e hoida. Eda lalokau Diravana ese Natuna na basinema siaia baine hisihisi eiava baine mase, ita ese nega kwadoḡi lalonai mauri namona baita moalelaia totona. (Ioa. 3:16; 1 Pet. 1:18, 19) To, Iehova ese Natuna lalokauna e heni dainai, ita ese tanobada matamatana ai mauri hanaihanai baita abia diba.

IEHOVA ENA SIAHU BAITA HAEROA

10. Efeso 3:20 ena hereva heḡereḡerena, Iehova be dahaka baine kara diba?

¹⁰ Eda abidadama baita hagoadaia dalana iharuana na, Iehova ena siahu baita haeroa. Ia na mai ena siahu ena gwauhamata iboudiai baine haḡuḡurudia. Vaia, hari ina negai momo na e laloamu tanobada matamatana ai taunimanima na basie mauri hanaihanai diba. To Iehova na Siahu Idoinai Diravana dainai, e gwauhamatalaimu ḡaudia na hanaihanai e haḡuḡurumu; unu na taunimanima ese basie haḡuḡuru diba. (Iobu 42:2; Mar. 10:27) Una dainai, ia e karamu gwauhamatadia na basita daradaralai.​—Efeso 3:20 ba duahia.

11. Iehova ese e karaia gwauhamata idau hereana ta mani a herevalaia. (Maua ladana “E Ḡuḡuru Gwauhamatadia Haida” ba itaia.)

¹¹ Idaunegai Iehova ese ena taunimanima ediai e gwauhamatalai ḡaudia haida mani aita lalodia. Ia ese Abraham bona Sara na iahudia negana ai e hamaorodia natudia ta bae havaraia. (Gen. 17:15-17) Danu, Abraham e hamaoroa ena bese na Kanaan tanona baine henidia. Laḡani momo lalodiai, Abraham ena bese Israel na Aigupto ai iḡui hesiai ḡaukara e karava dainai, reana bema lalo una gwauhamata na basine ḡuḡurumu. To una na e ḡuḡuru. Gabeai, Iehova ese Elisabeta e hamaoroa natuna ta baine havaraia ena be ia na vada e iahu. Danu, ia ese Maria, rami-hebou hane-ulatona, e hamaoroa, ia Natuna baine havaraia. Ina ese Eden imeana ai Iehova ese laḡani tausen momo gunadiai e gwauraia gwauhamatana e haḡuḡurua!​—Gen. 3:15.

12. Iosua 23:14 bona Isaia 55:10, 11 ese Iehova ena siahu be ede e herevalai toma?

¹² Iehova ena gwauhamata bona e haḡuḡuru daladia baita lalomu neganai, baita lalopararamu iena siahu na bada herea. Una ese eda abidadama tanobada matamatana gwauhamatana ai na e hagoadaiamu. (Iosua 23:14; Isaia 55:10, 11 ba duahidia.) Bona e haheḡaeḡaedamu ma haida baita durudia bae abia dae tanobada matamatana gwauhamatana na be vara momokanimu. Iehova ese guba matamatana bona tanobada matamatana e herevalaidia neganai, eto: “Ini hereva na mamaoro-mamaoro bona momomo-kakani.”​—Apok. 21:1, 5.

IEHOVA ITOMADIHO HENINA KARADIA BAITA KARA

13. Kongrigeisin heboudia ese eda abidadama be ede e hagoadaia tomamu? Ba herevalaia.

¹³ Eda abidadama baita hagoadaia dalana ihatoina na, Iehova itomadiho henina karadia baita kara. Heḡereḡere, mani kongrigeisin heboudia ese e durudamu dalana aita laloa. Anna, laḡani momo ful-taim hesiai ḡaukara idauidau e kara taihuna, na e gwaumu: “Kongrigeisin heboudia ese egu abidadama e hagoadaiamu. Ena be tok e henimu tadikakana ena hahediba dalana na dia namo momokani eiava e herevalaimu ḡaudia na dia mamatamata, to nega momo na kamonaimu ḡaudia ese e durugumu Baibul ena hereva momokanina na lalopararalaia namonamomu bona una ese egu abidadama e hagoadaiamu.”b Danu, hebou ai tadikaka taihu edia haere ese eda abidadama na e hagoadaiamu.​—Roma 1:11, 12; 10:17.

14. Haroro ḡaukara ese eda abidadama be ede e hagoadaia tomamu?

¹⁴ Haroro ḡaukara baita karaiamu neganai, una ese eda abidadama danu be hagoadaiamu. (Heb. 10:23) Barbara, laḡani 70 mai kahana Iehova e hesiai henia taihuna, na e gwaumu: “Hanaihanai haroro ḡaukara ese egu abidadama na e hagoadaiamu. Ma haida ediai Iehova ena gwauhamata namodia na herevalaimu negadiai, egu abidadama danu e goada e laomu.”

15. Siboda eda stadi karana ese eda abidadama be ede e hagoadaia tomamu? (Laulau danu ba itaia.)

¹⁵ Eda abidadama e hagoadaiamu ḡauna ma ta na, siboda eda stadi karana. Susan na baine stadilai ḡaudia e plenilaimu karana ese e duruamu. Ia na e gwaumu: “Sunday ai, lau ese pura vaira ena stadi Gima Kohorona na heḡaeḡaelaiamu. Monday bona Tuesday ai, midweek hebou ḡaudia na heḡaeḡaelaimu. Bona dina ma haida ai be sibogu egu stadi projek ta na karaiamu.” Susan na hanaihanai ena sediual e badinaiamu dainai, una ese ena abidadama na e hagoadaiamu. Laḡani momo hedkota ai e ḡaukara taihuna, Irene na Baibul ena peroveta herevadia istadilaidia karana ese ena abidadama e hagoadaiamu. Ia na e gwaumu: “Na hoamu badina Iehova ena peroveta herevadia kahadia maraḡidia danu e ḡuḡurumu.”c

“MOMOKANI, IA NA BAINEMA”

16. Dahaka dainai Iehova ese Habakuku e hamaoroa herevana na ita edai danu mai anina bada? (Heberu 10:36, 37)

¹⁶ Iehova ena hesiai taudia haida na laḡani momo lalodiai ina nega oromana baine ore negana e nariamu. Taunimanima haida na e laloamu Dirava na ena gwauhamata ihaḡuḡuruna ai e halahemu. To Iehova ese ena hesiai taudia edia hemami na e lalopararalaiamu. Ia ese peroveta tauna Habakuku e hamaoroa, eto: “Mata-hanai na doini ena nega e nariamu, dokona e heau heniamu, basine koikoi. Ena be boma toma ia na metaira-metaira, to do ba naria; momokani, ia na bainema, basine halahe.” (Hab. 2:3) To, Dirava ese una hereva be Habakuku ena namo dainai mo e gwauraia, a? Eiava ita daidai danu e gwauraia? Dirava ese aposetolo Paulo e hadibaia, unu hereva na tanobada matamatana e nariamu Kristen taudia ediai baine gwauraia. (Heberu 10:36, 37 ba duahidia.) Oibe, ena be ta laloamu Dirava ese baine hamaurida gwauhamatana na se vara haraḡamu, to momokani “ia na bainema, basine halahe.”

17. Taihu ta ese Iehova ena haheḡani Habakuku enai be ede e badinaia toma?

¹⁷ Iehova ena hesiai taudia momo ese Iena haheḡani, “do ba naria,” na laḡani momo lalodiai e badinaia. Heḡereḡere, Louise na laḡani 1939 ai Iehova e hesiai henia matama. Ia na eto: “Una nega ai, na tomava Aramagedono na high school do asina haorea negana ai be kaumu. To una na se vara. Laḡani momo lalodiai, Baibul ai Noa, Abraham, Iosef bona ma haida sivaraidia na duahi​—idia na Iehova ena gwauhamata baine ḡuḡuru negana e nariava, bona una ese lau na e durugu bada. A diba Dirava ena gwauhamata na be ḡuḡurumu, una ese e durumai baia abia dae tanobada matamatana na kahirakahira.” Laḡani daudau Iehova e hesiai henia taudia momo na unu e lalo tomamu.

18. Edena dala ai Dirava e havara ḡaudia ihaerodia karana ese eda abidadama be hagoadaiamu?

¹⁸ Momokani, tanobada matamatana na do asita itaiamu. To, ta itamu ḡaudia haida, heḡereḡere hisiu, au, animal, bona taunimanima mani a lalodia. Ena be guna unu ḡau na lasi, to Iehova ese e karadia dainai e nohomu bona ta itadiamu. (Gen. 1:1, 26, 27) Danu, eda Dirava na e gwauhamata ia ese tanobada matamatana baine havaraia. Bona una gwauhamata na be haḡuḡuruamu. Tanobada matamatana ai, taunimanima na be mauri hanaihanaimu bona basie goreremu. Momokani, tanobada matamatana na Dirava ese e abia hidi negana ai be varamu.​—Isa. 65:17; Apok. 21:3, 4.

19. Emu abidadama be ede ba hagoadaia toma?

¹⁹ Una nega o nariamu lalonai, dala idauidau ai emu abidadama ba hagoadaia. Hanaihanai mauri idavalaina boubouna ba laloa bada. Iehova ena siahu ba haeroa. Bona Iehova itomadiho henina karadia ba kara. Unu bo kara tomamu neganai, oi na “edia abidadama bona edia haheauka daidiai ahudia vada e abi taudia” heḡereḡeredia, ahumu bo abiamu.​—Heb. 6:11, 12; Roma 5:5.