Iehova ese E Hamomokaniamu Paradaiso Na Baine Vara

1. Isaia ese Israel taudia e hamaorodia herevana be dahaka?

PEROVETA tauna Isaia ese Iehova na e gwauraia “hereva momokani Diravana.” Ina hereva, “hereva momokani” anina ma ta na “amen.” (Isa. 65:16) “Amen” anina na “oibe,” o “momokani.” Baibul ai ina hereva “amen” e ḡaukaralaia neganai, e hamomokaniamu Iehova bona Iesu ese e gwauraimu herevadia na momokani. Isaia ese Israel taudia e hamaorodia herevana na ina: Iehova e gwauraimu herevadia iboudiai na be vara momokanimu. Iehova na hanaihanai ena gwauhamata na e haḡuḡurudiamu.

2. Dahaka dainai Iehova ena gwauhamata vaira nega totona baita abidadama henidia bona ededia henanadai baita herevalaimu?

² Iehova ena gwauhamata vaira nega totona baita abidadama henidia diba, a? Isaia ena nega amo laḡani 800 bamona muridiai, Paul ese e hahedinaraia Dirava ena gwauhamata iboudiai na baita abidadama henidia diba. Badina ia na e gwa: “Dirava ese basine koida diba.” (Heb. 6:18) Mani ina a laloa, ororo amo e dihomu ranuna amo tadi na basita abia dibamu. Una heḡereḡerena Iehova na hereva momokani Diravana dainai, ia na basine koikoi diba. Una dainai Iehova ena gwauhamata iboudiai, vaira nega gwauhamatadia danu baita abidadama henidia diba. Ina atikol ai, ita ese ini henanadai baita herevalaimu: Vaira nega ai Iehova be ita daidai dahaka e gwauhamatalai? Bona edena dala ai Iehova ese e hahedinaraiamu iena gwauhamata na be momokanimu?

IEHOVA BE DAHAKA E GWAUHAMATALAI?

3. (a) Dirava ena hesiai taudia be edena gwauhamata e laloa badamu? (Apokalupo 21:​3, 4) (b) Haida ese una gwauhamata be ede e laloa tomamu?

³ Ita ese baita herevalaiamu gwauhamatana na Dirava ena hesiai taudia ese e laloa badamu ḡauna. (Apokalupo 21:​3, 4 ba duahidia.) Iehova na e gwauhamatamu nega ta, “mase bona dara-doko bona taitai bona hisihisi bae ore.” Ita momo ese una Baibul sirina amo taunimanima ta hagoadadiamu, bona ta hadibadiamu Paradaiso ai mauri be ede be hetomu. Haida ediai una gwauhamata ta herevalaiamu neganai, dahaka e gwaumu? Reana be gwaumu, “Una na namo herea, to na laloamu reana basine varamu.”

4. (a) Iehova na Paradaiso e gwauhamatalaia neganai, e diba iseda nega ai dahaka baine vara? (b) Iehova na dia e gwauhamata mo to dahaka danu e kara?

⁴ Iehova ese ena lauma amo Ioane e rohea Paradaiso gwauhamatana e torea neganai, Ia na dibana ita ese una gwauhamata na baita harorolaiamu. To danu, Iehova na e gwa taunimanima momo ediai na be aukamu ia e gwauhamatalai “ḡau matamatadia” bae abi dae. (Isa. 42:9; 60:2; 2 Kor. 4:​3, 4) Una dainai idia be ede baita durudia toma, unu amo bae abia dae Apokalupo 21:​3, 4 ai e gwaurai hahenamodia na be vara momokanimu? Bona eda abidadama Iehova ena gwauhamata ai be ede baita hagoadaia toma? Iehova na dia e gwauhamata mo, to una gwauhamata baita abia dae badidia danu e gwauraidia. Unu be dahaka?

IEHOVA ENA GWAUHAMATA NA BE MOMOKANIMU

5. Ededia siri ese Dirava ena gwauhamata baita abidadama heni badidia e gwauraimu bona dahaka e gwaumu?

⁵ Iehova ena gwauhamata baita abidadama heni badidia na ini e gwauraidia toma: “Terono ai e helaimu Diravana eto, A itaia, lau na ḡau iboudiai na hamatamatamu. Ma eto, “A torea; badina be ini hereva na mamaoro-mamaoro bona momomo-kakani. Ma e hamaorogu, eto, [Unu na vada e ḡuḡuru, NWT]; lau na gini-gunana bona gini-gabena, matamana bona dokona.”—Apok. 21:​5, 6a.

6. Apokalupo 21:​5, 6 ese eda abidadama Dirava ena gwauhamata ai be ede e hagoadaia tomamu?

⁶ Apokalupo 21:​5, 6 ena hereva ese eda abidadama Dirava ena gwauhamata ai be ede e hagoadaia tomamu? The Revelation Climax bukana ese unu siri na ini e herevalaidia toma, e gwa: “Una na heḡereḡere Iehova ese kamonai taudia daidiai gwauhamata pepana ta e sainia, nega vairai unu hahenamo bae abi totona.”b Una gwauhamata na Apokalupo 21:​3, 4 ai e herevalaia. Bona siri 5 bona 6 ai, Iehova ese vaitani gwauhamata pepana na e sainia, unu amo e hamomokania iena gwauhamata na be momokanimu. Mani unu siri herevadia aita haerodia, unu amo ia baita abidadama henia diba.

7. Apokalupo 21:5 matamana ai daika e hereva bona dahaka dainai una na mai anina bada?

⁷ Apokalupo karoa 21 siri 5 ena hematama herevana na ini e gwau toma: “Bena terono ai e helaimu Diravana eto.” (Apok. 21:5a) Una hereva na mai anina bada, badina Apokalupo bukana lalonai Iehova na nega toi unu e hereva toma. Una gwauhamata herevana na dia aneru, dia Iesu, to Iehova sibona ese e gwauraia. Una ese e hamomokaniamu, unu hereva muridiai e gwaurai herevadia na baita abidadama heni diba. Dahaka dainai? Badina Iehova na “koikoi asi dibana Diravana.” (Tito 1:2) Una dainai ta abia dae momokanimu Apokalupo 21:​5, 6 ai e gwauraia herevana na be vara momokanimu.

“A ITAIA, LAU NA ḠAU IBOUDIAI NA HAMATAMATAMU”

8. Edena dala ai Iehova na e hahedinaraia ena gwauhamata na bae momokani? (Isaia 46:10)

⁸ Mani Iehova ese e gwauraia herevana, “a itaia,” aita laloa. (Apok. 21:​5, 6) Apokalupo bukana ai Grik herevana e hahanaia “a itaia,” na nega momo e ḡaukaralaia. Refrens ta na e gwa una hereva “a itaia” e ḡaukaralaia amo duahiduahi tauna e hadibaia gabeai be duahimu herevadia na baine lalodia bada. Ina hereva “a itaia” e gwauraia murinai Dirava be ma dahaka e gwa? Ia na e gwa: “Lau na ḡau iboudiai na hamatamatamu.” Momokani Iehova na vaira negai baine haidau ḡaudia e herevalaimu, to ia na e diba momokanimu unu gwauhamata na be haḡuḡurudiamu dainai, e herevalaidia neganai, vaitani harihari e haḡuḡurumu.—Isaia 46:10 ba duahia.

9. (a) Ina hereva “ḡau iboudiai na hamatamatamu” anina be dahaka? (b) Hari e miamu “gubana” bona “tanobadana” be ede be hetomu?

⁹ Mani Apokalupo 21:5 ai e gwauraia herevana ma ta aita laloa, eto: “Ḡau iboudiai na hamatamatamu.” Una karoa ai Iehova ese baine kara ḡaudia rua e herevalai. Ginigunana na Iehova ese “tanobada” bona “guba” gunana baine haoredia. Bona iharuana be guba bona tanobada matamatana baine havaradia. Apokalupo 21:1 na e gwaumu: “Guba gunana bona tanobada gunana vada e puki.” Guba gunana anina na Satana bona ena demoni ese e biagudiamu gavamanidia. (Mat. 4:​8, 9; 1 Ioa. 5:19) Baibul ai ina hereva “tanobada” e ḡaukaralaia anina na taunimanima. (Gen. 11:1; Sal. 96:1) Una dainai “tanobada gunana” anina na, kara dika taudia. Iehova ese hari ina nega gavamanidia bona kara dika taudia na be haorediamu. Bona ia ese guba matamata bona tanobada matamata baine atodia, una na gavamani matamata bona kara maoromaoro taudia.

10. Iehova be dahaka be hamatamatamu?

¹⁰ Apokalupo karoa 21 siri 5 ai Iehova ese baine hamatamata ḡaudia e herevalai. Una siri ai Iehova na seto, “Lau na ḡau matamatadia na karamu.” To ia na eto: “Lau na ḡau iboudiai na hamatamatamu.” Edena dala ai Iehova ese ḡau iboudiai baine hamatamata? Iehova ese tanobada baine hanamoa, bona taunimanima na ḡoevadae taudia ai baine halaodia. Isaia ena peroveta herevana bamona, tanobada ibounai na gabu mai hairaina ai be laomu, Eden umana heḡereḡerena. Bona ita ta ta iboudai be hanamodamu. Ae-dika taudia, mata-kepulu taudia, taia-kudima taudia be hanamodiamu bona mase taudia danu be hatoredia isi loumu.—Isa. 25:8; 35:​1-7.

“INI HEREVA NA MAMAORO-MAMAORO BONA MOMOMO-KAKANI. . . . UNU NA VADA E ḠUḠURU.”

11. Iehova ese Ioane be edena haheḡani e henia bona dahaka dainai?

¹¹ Iehova be ma dahaka e gwa, unu amo e hamomokania ia na baita abidadama henia diba? Iehova ese Ioane e hamaoroa, eto: “A torea; badina be ini hereva na mamaoro-mamaoro bona momomo-kakani.” (Apok. 21:​5, 6) Iehova na dia una haheḡani mo e heni, to badina danu e gwauraia, eto: “Ini hereva na mamaoro-mamaoro bona momomo-kakani.” Anina na Dirava ena hereva na baita abidadama henidia diba. Ta moalemu badina Ioane ese una haheḡani, “a torea” na e badinaia. Una dainai Baibul ai Paradaiso gwauhamatana na ta duahiamu bona vaira nega hahenamodia ta lalodia dobumu.

12. Dahaka dainai Iehova na ina hereva “unu na vada e ḡuḡuru” e gwauraia na maoro?

¹² Dirava be ma dahaka hereva e gwaurai? Ia na e gwa: “Unu na vada e ḡuḡuru.” (Apok. 21:​6, NWT) Dahaka dainai Iehova na e gwa, unu gwauhamata herevadia na vada e ḡuḡuru? Badina ḡau ta ese ia basine koua diba, ena ura baine haḡuḡurua totona. Iehova na hereva ma ta e gwauraia, una ese ita e hadibadamu iena gwauhamata na be momokani vaitanimu. Ia be dahaka e gwa?

“LAU NA ALEFA BONA OMEGA”

13. Dahaka dainai Iehova na e gwa: “Lau na Alefa bona Omega”?

¹³ Ioane ena matahanai lalodiai Ioane na nega toi ina hereva e gwauraia: “Lau na Alefa bona Omega.” (Apok. 1:8; 21:​5, 6; 22:13) Grik gado ena alfabet ai alefa na leta ginigunana bona omega be leta ginigabena. Iehova na e gwa “Lau na Alefa bona Omega” neganai, ita e hadibadamu ia ese e hamatamaia ḡauna na baine haḡuḡurua.

14. (a) Edena nega ai Iehova na vaitani e gwa “alefa” eiava vaitani baine gwa “Omega”? (b) Genese 2:​1-3 ese ita be dahaka e hadibadamu?

¹⁴ Iehova ese Adam bona Eva ediai iena ura ginigunana taunimanima bona tanobada totodia na e gwauraia. Baibul na e gwaumu: “Dirava ese e hanamodia, eto, ‘Besemui ba havaradia, ba hutuma; tanobada ba hahonua bona ba biagua.’” (Gen. 1:28) Iehova na una hereva e gwauraia neganai, vaitani e gwa: “Alefa.” Gabeai Adam bona Heva natudia ḡoevadaedia ese tanobada be hahonuamu bona paradaiso ai be halaoamu. Una nega ai Iehova ena ura vada be ḡuḡurumu, bena Ia na vaitani be gwaumu, “Omega.” Iehova ese “guba bona tanobada mai anidia idoidiai” e karadia murinai, e gwauraia herevana ta ese e hahedinaraia iena ura na baine haḡuḡurua vaitani. Una na Genese 2:​1-3 ai baita duahiamu. (Ba duahidia.) Iehova ese dina namba 7 na e hahelaḡaia. Una anina be dahaka? Anina na dina namba 7 dokonai, Iehova ese ena ura taunimanima bona tanobada totodia na baine haḡuḡurua vaitani.

15. Dahaka dainai Satana na reana e laloa Iehova baine koua diba bena ena ura basine haḡuḡurua?

¹⁵ Adam bona Heva e gwau-edeede murinai idia na kara dika taudia ai ela bona kara dika bona mase na natudia ediai e heni hanai. (Roma 5:12) Unu amo toana na Satana ese Dirava ena ura, tanobada na ḡoevadae taudia ese bae hahonua, na e hadikaia. Bona una na vaitani Satana na Iehova e koua basine gwa “Omega.” Reana Satana na e laloa Iehova ese ena gwauhamata na basine haḡuḡurua dibamu. Reana ia na e laloava Dirava ese Adam bona Heva baine hamasedia bena ma ḡoevadae taudia rarua baine karadia, unu amo iena ura taunimanima totodia baine haḡuḡurua. To bema Dirava na unu bema kara toma, Diabolo ese ia na bema gwauraia koikoi tauna. Dahaka dainai? Badina Genese 1:28 ai e hahedinaraia, Iehova ese Adam and Heva e hamaorodia idia natudia ese tanobada bae hahonua.

16. Dahaka dainai Satana na reana e lalo, Iehova ese ena gwauhamata na basine haḡuḡuru dibamu?

¹⁶ Satana na reana e laloava Dirava be ma dahaka be karamu? Reana Satana na e lalo Iehova ese Adam bona Heva na basine koudiamu natudia bae havaradia, to unu natu na basie ḡoevadae dibamu. (Koh. 7:20; Roma 3:23) Bona bema Adam bona Heva natudia na basie ḡoevadae diba, Diabolo na baine gwa diba Iehova ese ena ura na se haḡuḡuruamu. Anina na tanobada na ḡoevadae taudia ese basie hahonua diba.

17. Iehova ese Satana Adam bona Heva edia gwau-edeede karana be ede e hamaoromaoroa toma? Bona dahaka e vara? (Laulau danu ba itaia.)

¹⁷ Iehova ese Satana, Adam bona Heva edia gwau-edeede karana e hamaoromaoroa dalana na Satana ese se laloa ḡauna. (Sal. 92:5) Iehova ese Adam bona Heva na se koudia natudia bae havara, unu amo e hamomokania ia na hereva momokani Diravana. Danu, Iehova ese e hahedinaraia ia e gwauraimu ḡaudia na e haḡuḡurumu bona ḡau ta ese ia na basine koua diba. Ia ese “garana” ta e gwauraia, Adam bona Heva besedia baine hamauridia, unu amo iena ura baine haḡuḡurua. (Gen. 3:15; 22:18) Iehova ese dala e karaia una garana amo mauri idavalaina boubouna baine heni neganai Satana na e hoa. Dahaka dainai? Badina una mauri idavalaina boubouna na lalokau dainai e karaia. (Mat. 20:28; Ioa. 3:16) Satana enai una lalokau karana na lasi, badina ia na sibona ena namo e laloa. Mauri idavalaina boubouna dainai dahaka be varamu? Keriso ena lohia laḡanidia 1000 dokonai Adam bona Heva natudia, Dirava bae kamonai henia taudia na ḡoevadae taudia ai baela bona tanobada paradaisona bae noholaia, matamanai Iehova ena ura heḡereḡerena. Una nega ai, Iehova na vaitani be gwaumu, “Omega.”

EDA ABIDADAMA IEHOVA ENA GWAUHAMATA AI BAITA HAGOADAIA DALANA

18. Ededia badi toi daidiai Dirava ena gwauhamata baita abidadama henia? (Ina maua: “Iehova Ena Gwauhamata Baita Abidadama Henia Badidia Toi” danu ba itaia.)

¹⁸ Ina atikol ai, ita ese badi toi tame herevalaidia, bona unu na Paradaiso gwauhamatana ena ḡuḡuru e daradaralaiamu taudia baita hadibalaidia. Badi ginigunana na, Iehova sibona ese una gwauhamata e gwauraia. Apokalupo bukana ai e gwa: “Terono ai e helaimu Diravana eto, ‘A itaia, lau na ḡau iboudiai na hamatamatamu.’” Iehova na aonega bona siahu Diravana, bona e ura dikadikamu ena gwauhamata na baine haḡuḡurua. Badi iharuana be, Iehova na ena gwauhamata be haḡuḡurua momokanimu dainai, ia enai una na vaitani vada e vara. Una dainai ina hereva e gwauraia na maoro: “Ini hereva na mamaoro-mamaoro bona momomo-kakani. . . . Unu na vada e ḡuḡuru.” Badi ihatoina na, ḡau ta ese Iehova basine koua diba e hamatamaia ḡauna baine haḡuḡurua totona. Una dainai ia na e gwa: “Lau na Alefa bona Omega.” Iehova ese be hamomokaniamu Satana na koikoi tauna bona Iena ura na basine koua diba.

19. Taunimanima ese Dirava ena Paradaiso gwauhamatana e daradaralaiamu neganai, dahaka baita kara?

¹⁹ Ba helalotao, haroro ai Dirava ese ena gwauhamata be hamomokaniamu badidia bo herevalaimu neganai, emu abidadama na be hagoadaiamu. Una dainai Apokalupo 21:4 ai Paradaiso ai be varamu ḡaudia bo duahiamu neganai, bema ta baine gwa, “Una na namo herea, to na laloamu basie varamu.” Oi be dahaka ba kara? Namona na siri 5 bona 6 ba duahidia bona ba herevalaidia. Bona ba hahedinaraia una na vaitani Iehova ese gwauhamata pepana e sainia.—Isa. 65:16.