Hebogahisi Karana Tamona E Hahedinaraia
GUJARAT, India ena taoni maraḡina ta ai, John tamana na laḡani 1950 ai e bapatiso bena Iehova ena Witnes tauna ta ai ela. John, varabouna ima bona sinadia na Roman Katolik taudia dainai, tamadia ena tomadiho na asie abia daeva.
Dina ta, John na tamana ese e siaia envelope ta na kongrigeisen tadikakana ta baine henia. To, una daba ai, John na tini ta ikehona ai imana kwakikwakina e ivaia. To, e ura tamana baine kamonai henia dainai, ena bero na dabua ai e kwatua bena ela una envelope baine heni.
Tadikaka ena rumai e kau neganai, ia adavana—Iehova ena Witnes hahinena—ese envelope e abia. Ia ese John imana berona e itaia bona e ura baine durua. Ia ese muramura ta amo John berona e haḡoevaia bona e kumia. Bena ti siahuna ta e henia, bona mai manauna ida Baibul e herevalaia.
Una nega amo, John ese Witnes taudia e ura henidia matama, una dainai ia e abi daeva topik rua e henanadailai, ‘Iesu be Dirava eiava? bona Kristen taudia ese Maria bae ḡuriḡuri henia be maoro, a?’ Una taihu na mai Gujarati gado dibana dainai, Baibul amo John ena henanadai e haerelaidia bona buklet ladana, “This Good News of the Kingdom” e henia.
Gabeai, John na una buklet e duahia neganai, e mamia una na nega ginigunana Baibul ena hereva momokani e lalopararalaia. Ena haroro tauna dekena ela bena unu henanadai rua e henia. Haroro tauna na e badu dainai Baibul amo e hodoa, bona e lolo henia: “Oi na Satana! Mani a hahedinaraia edena siri be e gwa Iesu na dia Dirava. Bona edena siri ai e gwa Maria basio tomadiho henia. A hamaorogu!” John na haroro tauna ena kara dainai e hoa, bona e hamaoroa, “Lau na ma Katolik dubuna ta ai basina raka vareai.” Bona unu e kara toma!
John na Witnes taudia ida e stadi, tomadiho momokanina e badinaia, bona Iehova e hesiai henia. Gabeai, ena ruma bese taudia haida danu unu e kara toma. Hari, John imana idibana ai laḡani 60 gunanai e ivaia kiparana na dounu mia. Ia ese Kristen tauna ta ena hebogahisi karana tamona dainai tomadiho ḡoevana ibadinana karana e laloa bada.—2 Kor. 6:4, 6.