Oi Mai Dibamu, A?

Iuda taudia be dahaka e kara dainai Iesu ese gwauhamata igwauraina karana na e gwauraia dika?

MOSE ena Taravatu ese dala e kehoa Iuda taudia na gwauhamata bae kara diba. To Iesu ena negai, Iuda taudia na dina ta ta ai ḡau ta e karaiava o hereva ta e urava bae gwauraia neganai, e gwauhamatava danu. Unu e kara tomava badina e urava taunimanima ese edia hereva iboudiai bae abi dae. To, Iesu ese nega rua una kara na e gwauraia dika. Ia na eto: “Emu hereva ba gwaurai: oibe, oibe, bona lasi, lasi.”​—⁠Mat. 5:33-37; 23:16-22.

Buka ta, Theological Dictionary of the New Testament ena hereva heḡereḡerena, “Iuda taudia na e urava edia hereva iboudiai lalodiai bae gwauhamata,” badina Talmud bukana ese e hahedinaraia ededia gwauhamata bae badina bona ededia be basie badina.

Dia Iesu sibona mo una kara e gwauraia dika. Heḡereḡere, Iuda edia histori itorena tauna Flavius Josephus ese Iuda edia orea maraḡina ta na ini e herevalaidia toma: “Idia na asie urava gwauhamata bae kara, badina e laloava una kara ese koikoi karana na e hereaia, bona e gwa bema ta na baine gwauhamata badina e uramu ma haida ese ena hereva bae abia dae, ia na koikoi tauna.” Iuda taudia edia buka ta ladana, Wisdom of Sirach, na ini e gwau toma: “E gwauhamata kavamu tauna ese taravatu e utuamu.” Una dainai Iesu ese gwauhamata asie laloa badamu karana na e gwauraia dika. Bema hanaihanai hereva momokani baita gwauraimu, basita gwauhamata kavamu, haida ese eda hereva bae abia dae totona