Mauri Bona Hesiai Ḡaukara Hebou Pepana Ena Referens
JANUARY 3-9
DIRAVA ENA HEREVA ENA NAMO | HAHEMAORO TAUDIA 15-16
“Tao Tore Karana Na Kara Dika Rohorohona!”
w12 4/15 rau 8 par. 4
Tao Tore Karana—Nega Dokona Toana Ta!
4 Mani mataḡaniḡani hahinena Delila, Hahemaoro Tauna Samson ese e urava baine adavaia hahinena, aita laloa. Samson na lalona e hadaia, Dirava ena taunimanima daidiai Filistia taudia baine tuari henidia. Reana Filistia tau badadia na mai dibadia Delila ese Samson na se lalokau henia momokaniva dainai, moni bada herea e henia Samson ena goada badina baine dibaia unu amo bae hamasea. Mataḡaniḡani ala-ala hahinena Delila ese una moni na e abia dae, to nega toi Samson ena goada badina e ura baine diba neganai, se kwalimu. Una dainai Samson “lalona e ania, bona e nanadaia loulou.” Dokonai, una kara dainai Samson na e hesiku bona “darana e doko.” Bena ia ese e hamaoroa, nega ta huina na do asie utua, bema be utuamu ena goada na be oremu. Una e diba neganai, Samson na ia mamuna ai mahutana ai, huina e naua, una murinai inaina imadiai e atoa. (Hah. 16:4, 5, 15-21) Iena kara na dika herea! Delila na ena mataḡaniḡani dainai, ia e lalokau heniava tauna taona e tore.
w05 1/15 rau 27 par. 5
Baibul Bukana Hahemaoro Taudia Ena Hereva Badadia
14:16, 17; 16:16. Tai momo bona hahegugu karana ese hetura karana baine hadikaia diba.—Hereva Lada-isidia 19:13; 21:19.
w12 4/15 rau 11-12 par. 15-16
Tao Tore Karana—Nega Dokona Toana Ta!
15 Edena dalai headava taudia na adavadia bae badinadia diba? Dirava ena Hereva na e gwaumu: “Eregabemu ai o adavaia hahinena [o tauna] na ba moalelaia” bona “adavamu, o ura heniamu hahinena, [o tauna] ida ba moale hebou.” (Her. 5:18; Koh. 9:9) Raruosi e iahu e laomu lalonai, edia hebadina heheni karana tauanina dalanai bona hemami dalanai bae hanamoa totona, idia raruosi na bae “noho hebou.” Anina na ta ta bae kamonai heheni, nega bae ato bae hebamo heheni, bona bae hetura heheni namonamo. Namona idia ese edia headava bae naria karana bona edia hetura karana Iehova ida bae laloa bada. Unu bae kara toma totona, namona na raruosi Baibul bae stadilaia hebou, hanaihanai hesiai ḡaukara bae kara hebou, bona Iehova ena hahenamo totona bae ḡuriḡuri hebou.
IEHOVA BA BADINAIA NOHO
16 Kongrigeisin ai haida na kara dika badadia e kara bona e ‘sisiba henidia auka, unu amo edia abidadama e namo lou.’ (Tito 1:13, NWT) Haida be edia kara dainai asie helalokerehai dainai murimuri ai e atodia. To matahakani ese “e hamanadadia taudia” na lauma dalana ai e goada lou. (Heb. 12:11) Bema varavarada ta o turada namona ta na murimuri ai bae atoa be ede bamona? Reana una kara ese Dirava ibadinana karana na be tohoamu. Iehova na ita e itadamu, iena haheḡani, murimuri ai e atoa tauna ta basita bamoa, baita badinaiamu eiava lasi.—Korinto Ginigunana 5:11-13 ba duahia.
Dirava Ena Hereva Ba Tahua Namonamo
w05 3/15 rau 27 par. 6
Samson Na Iehova Ena Goada amo E Kwalimu!
Samson na lalona e hadaia Filistia taudia baine tuari henidia. Gasa ai ariara hahine ta ena ruma ai e noho badina badana na, Dirava ena inai taudia baina tuari henidia. Samson na inaina edia hanua ai mahuta gabudia e tahuva, bona ariara hahinena ta ena ruma ai mahuta gabudia e davari. Samson na dia matabodaḡa lalohadaina dainai una gabu ela. Badina malokihi ai una hahine ena ruma e rakatania, bena hanua ikoukouna mai audia ida bona mai ikahidia ida e raḡadia, paḡana ai e huadia ela bona Heberon e vaira henia ororona dorina, una gabu ena daudau na 60 kilomita [37 miles] heḡereḡerena. Dirava ese una kara na e abia dae bona goada e henia.—Hahemaoro Taudia 16:1-3.
JANUARY 10-16
DIRAVA ENA HEREVA ENA NAMO | HAHEMAORO TAUDIA 17-19
“Dirava Ena Taravatu Iutuna Karana ese Hekwakwanai E Havaramu”
it-2 rau 390-391
Mika
1. Efraim tauna ta. Taravatu Ten amo, ia ese taravatu ihataurahanina na e hamakohia (Eso 20:15), sinana amo silver moni 1,100 e henao. Una kara e gwauraia hedinarai bona moni na sinana e henia lou neganai, sinana na e gwa: “Ina silver na hahelaḡaiamu Iehova ena, natugu bagunai: e koroamu laulauna ta bona e haveveamu laulauna ta bae kara; taunabunai na henimu loumu.” Mika sinana ese silver 200 e abi bena silver iḡaukaralaina tauna e henia, bena una tau ese kahana e koroa “laulau ta e karaia, ma kahana e havevea laulau ta e karaia,” gabeai una na Mika ena rumai e atoa. Mika, na “mai ena dubu” dirava idauidau totodia, ia ese dabua helaḡana ta bona kaivakuku e kara, bona natuna maruanena ta siahu e henia hahelaḡa tauna ai bainela. Ena be una e karaia na Iehova baine hanamoa totona, to una na dia kara maorona, badina kaivakuku basio tomadiho henia taravatuna na e utua (Eso 20:4-6), bona ia ese Iehova ena dubu helaḡa bona ena hahelaḡa taudia na se matauraidia. (Hah 17:1-6; De 12:1-14) Gabeai, Mika ese Ionatana, Mose natuna merona Geresome ena bese tauna, na ena ruma ai e abia dae, bena Mika ese una Levi tauna na ena hahelaḡa tauna ai e halaoa. (Hah 18:4, 30) Mika na e laloava ia e karaia karana na maoro dainai, e gwa: “Harihari lau na dibagu Iehova ese baine hanamogu.” (Hah 17:7-13) To Ionatana na dia Aaron besena, una dainai ia na dia heḡereḡere hahelaḡa ḡaukarana baine karaia, una ese Mika ena kerere na e habadaia.—Nu 3:10.
it-2 rau 391 par. 2
Mika
Gabeai, Mika bona tatau haida ese Dan besena e ḡavadia. E lasidia tao neganai, idia ese Mika e nanadaia dahaka dainai o ḡavamaimu, Mika na e gwa: “Egu dirava laulaudia, na kara ḡaudia, o abi, o laohai, bona egu hahelaḡa tauna o hakaua lao. Egu ai e miamu ḡauna be dahaka?” Una dainai, Dan taudia ese e hamaoroa bema dounu be ḡavadiamu bona be lolomu, be tuari henidiamu. Mika na e itaia Dan taudia edia goada ese ena orea taudia edia goada na hereaia dainai, ena ruma e lou lao. (Hah 18:22-26) Una murinai, Dan taudia ese Laisi hanuana e tuari henia bona e doua, bena unuseni ai Dan hanuana e hadaia. Ionatana bona natuna memerodia na Dan iduhuna ena hahelaḡa taudia ai ela, “idia ese hari e koroa laulauna, Mika ese e karaia ḡauna, e haginia, Dirava ena dubu [dubu helaḡa] na Silo ai e miava negadia iboudiai” lalodiai.—Hah 18:27-31.
Dirava Ena Hereva Ba Tahua Namonamo
w15 12/15 rau 10 par. 6
Dirava Ena Hereva, E Hahanaia Ḡauna Na Mauri
6 Ḡau momo ese Dirava ladana Baibul ai na e hahedinaraia. Laḡani 2013 ai e halasia New World Translation Baibul-na ai, Dirava ladana na nega 7,216 e hedinarai, una namba na laḡani 1984 ai e halasia New World Translation Baibul-na na nega tauratoi e hanaia. Unu hedinarai gabudia ima na, 1 Samuel 2:25; 6:3; 10:26; 23:14, 16. Unuseniai Dirava ladana e atodia badina na Mase Davarana ai e davari lokuloku toretoredia—unu na laḡani 1,000 mai kahana gunanai Heberu Masorete taudia ese e tore herevadia—lalonai unu siri ai Dirava ladana na e hedinarai. Bona Dirava ladana e hedinarai gabuna ma ta na Hahemaoro Taudia 19:18, unukahai e atoa badina na manuskript gunadiai e tahudia lou dainai.
JANUARY 17-23
DIRAVA ENA HEREVA ENA NAMO | HAHEMAORO TAUDIA 20-21
“Hanaihanai Iehova Ena Heduru Ba Tahua”
w11 9/15 rau 32 par. 2
Hekwakwanai Negadiai, Fineha Bo Tohotohoa Dibamu, A?
Gibea tataudia, Beniamina iduhuna amo, ese Levi tauna ta adavana e hadikaia bona e hamasea dainai, Israel iduhudia ma haida e kamonai neganai, e ura Beniamina iduhuna bae tuari henia. (Hah. 20:1-11) Ena be tuari do asi ela neganai Iehova ena heduru e noia, to nega rua e darere, bona momo e mase. (Hah. 20:14-25) Anina be Iehova ese edia ḡuriḡuri be se kamonai, a? Iehova be e urava Gibea taudia edia kerere dainai idia be kara ta bae karaia, eiava lasi?
w11 9/15 rau 32 par. 4
Hekwakwanai Negadiai, Fineha Bo Tohotohoa Dibamu, A?
Dahaka ta dibamu? Ena be elda taudia na e ḡaukara goadagoadamu bona Dirava ena heduru e noiamu, to kongrigeisin ai hekwakwanai haida na dounu e varamu. Bema una na e varamu, elda taudia ese Iesu ena hereva bae laloatao na namo: “Ba noinoi [o ba ḡuriḡuri], do baine henimui: ba tahu, do ba davari; ba pidipidi, idura baine hekeho emui.” (Luka 11:9) Ena be Iehova ese ḡuriḡuri na se haerelaia haraḡamu neganai, namona na hegunalai taudia ese bae abia dae Iehova na ena nega korikori ai ḡuriḡuri be haerelaimu.
Dirava Ena Hereva Ba Tahua Namonamo
w14 5/1 rau 11 par. 4-6
Oi Mai Dibamu, A?
Idaunegai tuaridia ai vilipopo be ede e ḡaukaralaia tomava?
Vilipopo na David ese e ḡaukaralaia tau ḡau badabadana, Goliata e alalaia ala-ala ḡauna. David meronai mamoe e nariva neganai, ia ese una ala-ala ḡauna iḡaukaralaina dalana e diba.—1 Samuel 17:40-50.
Baibul negadiai, Aigupto bona Asuria laulaudia ai, vilipopo danu e hedinarai. Una ala-ala ḡauna na leather o dabua seana amo e karaia, bona una leather o dabua dorina kahana kahana na mai varodia. Vilipopo iḡaukaralaina tauna ese nadi manadamanadana o kuborukuboruna ta, ena bada na 5 sentimita ela 7.5 sentimita bona reana ena metau na 250 gram e udaiava. Bona daenai e daveava bena vilipopo varona e kahua negeva neganai, nadi na maoromaoro mai siahuna ida e laova e urava baine botaia ḡauna ai e tubuva.
Middle East ai, akioloji taudia ese tano e ḡei neganai, idaunegai e vara tuaridia ai e ḡaukaralai vilipopo nadidia momo e davari. Tuari mai dibadia taudia ese reana vilipopo amo e tahova nadidia edia spidi hora ta lalonai na 160 kilomita ela 240 kilomita heḡereḡerena. Diba bada taudia na asie lalotamonamu vilipopo amo nadi ba tahoa ena daudau bona diba amo peva ba kinoa ena daudau na heḡereḡere, to e abia daemu diba bona peva heḡereḡerena vilipopo ese ta na baine hamasea diba.—Hahemaoro Taudia 20:16.
JANUARY 24-30
DIRAVA ENA HEREVA ENA NAMO | RUTA 1-2
“Mia Hanaihanai Lalokauna Ba Hahedinaraia”
w16.02 rau 14 par. 5
Iehova Turana Namodia Ba Tohotohodia
5 Ruta na bema gwau diba ia ena bese na Moab ai—sinana bona varavarana ese ia, vabu eregabena, na bae abia dae bona bae naria diba. Moab na iena hanua. Una hanua taudia edia gado bona edia kara na mai dibana, bona una hanua taudia na ia varavarana. Naomi ese Betelehem ai unu ḡau na Ruta na basine henia diba. Una dainai, Ruta na e hamaoroa Moab ai baine noho. Naomi na mai dibana ravana ena noho gabuna ta eiava adavana ta basine henia diba. Ruta be dahaka be karamu? Mani ia bona Oropa, “ena bese taudia bona ena dirava” e lou henidia hahinena, edia idau aita laloa. (Ruta 1:9-15) Ruta e ura ena bese taudia edia dirava koikoidia baine lou henidia, a? Lasi, ia na se ura.
w16.02 rau 14 par. 6
Iehova Turana Namodia Ba Tohotohodia
6 Reana Ruta na adavana eiava Naomi edia amo Iehova Dirava e dibaia. Iehova na dia Moab diravadia heḡereḡeredia. Ruta na mai dibana, ena lalokau bona tomadiho karana Iehova baine henia na maoro. To, una mo e dibaia karana na dia heḡereḡere. Ruta na abi hidi ta baine karaia. Ia ese Iehova be ena Dirava ai be halaoamu, a? Ruta ese abi hidi maorona e karaia. Naomi e hamaoroa: “Oiemu bese na lauegu bese ai bainela, bona oiemu Dirava na lauegu Dirava ai bainela.” (Ruta 1:16) Ruta ena lalokau Naomi enai ese kudouda na e hamoaleamu, to iena lalokau Iehova enai na mai anina bada. Gabeai, tano biaguna, Boa, ese Ruta e hanamoa badina Iehova hanina henuna, na ena roho mauri gabuna ai e halaoa. (Ruta 2:12 ba duahia.) Una ese reana ita na manumanu maraḡina ta na sinana o tamana hanina goadana henunai e nohomu karana baita laloamu. (Sal. 36:7; 91:1-4) Ruta enai Iehova na una tama o sina heḡereḡerena. Iehova ese Ruta na ena abidadama dainai e hanamoa, bona ena abi hidi dainai gabeai na se lalohisihisi.
Dirava Ena Hereva Ba Tahua Namonamo
w05 3/1 rau 27 par. 1
Ruta Bukana Ena Hereva Badadia
1:13, 21—Iehova ese Naomi e hahisia bona ena mauri e ha-aukaia, a? Lasi, bona Naomi na se gwa Dirava na e kara kerere. To, ienai e vara ḡaudia dainai, e laloava Iehova ese ia na e rakatania. Una dainai e lalohisihisi bada herea. Danu unu negadiai, natu na e lalodiava Dirava ena hahenamo, a gabani karana be e laloava Dirava ena hahedika. Naomi na asi tubuna, bona natuna raruosi na da e mase, una dainai ia na e laloava Iehova ese e hahemaraia na da momokani.
JANUARY 31–FEBRUARY 6
DIRAVA ENA HEREVA ENA NAMO | RUTA 3-4
“Lada Namona Baita Dogoatao”
w12 10/1 rau 22 par. 5
“Kara-Namo Hahinena”
Boa e hereva neganai, mai manauna ida e hereva dainai Ruta na e hagoadaia. Ia na e gwa: “Natugu e, Iehova ese baine hanamomu; ina emu kara namona gini-gabena ese emu kara namona gini-gunana vada e hereaia: badina be oi na uhau, mai edia ogoḡami eiava mai edia taḡa, so sihari henidia.” (Ruta 3:10) “Kara namona gini-gunana” na Ruta ese mia hanaihanai lalokauna e hahedinaraia, Naomi e bamoa Israel e lou lao bona e naria e herevalaia. “Kara namona gini-gabena” be Ruta ese una negai e karaia karana e herevalaia. Boa na mai dibana, Ruta heḡereḡerena eregabe hahinena ese, uru hebouna taudia bogaraḡidia amo adavana ta bema tahua diba, herevana ia na taḡa o ogoḡami. To, Ruta na e urava dia Naomi enai mo kara namo baine hahedinaraia, to Naomi adavana, de mase tauna enai danu, unu amo ladana na ena gabu ai baine hesiriu. Boa kudouna e hamarerea badina na hedinarai ḡoevaḡoeva, badina Ruta na sibona ena namo se laloa.
w12 10/1 rau 23 par. 1
“Kara-Namo Hahinena”
Ruta na e moale dikadika Boa ena hereva e laloa neganai, ia na e gwa—taunimanima iboudiai bogaraḡidiai ia na “kara-namo hahinena”! Ruta na e ura dikadika Iehova baine dibaia bona baine hesiai henia dainai, lada namona e abia. Danu, Naomi bona ena bese taudia edia mauri e lalopararalaia bona kara namo e hahedinaraia, mai ena ura ida mauri idauna bona noho dalana matamatana e abia dae. Bema Ruta ena abidadama baita tohotohoamu, haida baita kara namo henidiamu, bona edia noho dalana bona mauri dalana baita matauraidiamu. Unu baita kara tomamu neganai, ita danu taunimanima namodia ai baita laomu.
w12 10/1 rau 24 par. 3
“Kara-Namo Hahinena”
Boa ese Ruta e adavaia. Bena “Iehova ese hahine e hanamoa; bena hahine na e rogorogo, mero ta e abia.” Betelehem hahinedia ese Naomi e hanamoa, bona Ruta e imodaia badina be Naomi enai Ruta na natu mamaruanedia hitu e hereadia. Gabeai, Ruta natuna na King David dihina ai ela. (Ruta 4:11-22) Bona David dihina amo Iesu Keriso e vara.—Mataio 1:1.
Dirava Ena Hereva Ba Tahua Namonamo
w05 3/1 rau 29 par. 3
Ruta Bukana Ena Hereva Badadia
4:6—Dahaka dainai tano ihoi louna tauna ese tano be hoiamu neganai, sibona dihina ai be ‘dabumu’? Ḡau ginigunana na, bema ta na ogoḡami dainai ena tano e hoihoilaia, ihoina tauna ese laḡani baine duahi ela bona Iubile laḡanina, unu laḡani heḡereḡeredia ai davana baine heni. (Levitiko 25:25-27) Unu be kara tomamu neganai, ena kohu davadia na be maraḡimu. Danu, bema Ruta na natuna merona ta be havaraiamu, una mero ese e hoia tanona be biaguamu, to dia Boa varavarana.
FEBRUARY 7-13
DIRAVA ENA HEREVA ENA NAMO | 1 SAMUEL 1-2
“Iehova Ba Ḡuriḡuri Henia Bona Lalomu Herevadia Na Ia Ba Hamaorolaia”
ia 55 par. 12
Kudounai E Mia Ḡaudia Na Dirava E Hamaorolaia
12 Hana na ḡuriḡuri karanai haheitalai namona e hahedinaraia, Dirava ena hesiai taudia ediai. Iehova na ena taunimanima e noidiamu edia lalohekwarahi ḡaudia na ia enai bae gwaurai hedinarai, natu ta na tamana o sinana lalokauna e abidadama heniamu dainai kudounai e miamu ḡaudia e gwaurai hedinaraimu heḡereḡerena. (Salamo 62:8; 1 Tesalonika 5:17 ba duahi.) Aposetolo Petro na Dirava ena lauma helaḡa amo e rohea dainai, ini hahegoada herevadia e tore: “Emui lalohaḡuhi na ia enai ba tahoa kau, badina be ia ese e lalomuimu.”—1 Pet. 5:7.
w07 3/15 rau 16 par. 4
Hana ese Lalomaino E Abia Dalana
Ita be dahaka ta dibamu? Iehova enai eda lalohaḡui ḡaudia ta ḡuriḡurilaimu neganai, eda hemami, bona kudoudai e miamu ḡaudia na ia baita hamaorolaia. Bema ḡau iboudiai ta karamu to hekwakwanai na dounu asita hamaoromaoroa dibamu, ia imanai baita rakatania na namo. Ma dala ta na lasi.—Hereva Lada-isidia 3:5, 6.
Dirava Ena Hereva Ba Tahua Namonamo
w05 3/15 rau 21 par. 5
Baibul Bukana Samuel Ginigunana Ena Hereva Badadia
2:10—Ena be Israel ai king na lasi, to dahaka dainai Hana ese Iehova e noia ena king “ena siahu baine habadaia”? Mose ena Taravatu lalonai e hahedinaraia Israel taudia na king ta ese baine lohiadia. (Deuteronomi 17:14-18) Iakob do se mase ai e peroveta, e gwa: “Lohia auna [king dagina e laulaulaia ḡauna] na Iuda ena amo basie abia oho.” (Genese 49:10) To Sara—Israel taudia besedia sinadia—na Iehova ese ini e herevalaia toma: “Hanua pavapavadia ia ese baine havaradia.” (Genese 17:16) Momokani, Hana na vaira negai baine lohia king ta dainai e ḡuriḡuri.
FEBRUARY 14-20
DIRAVA ENA HEREVA ENA NAMO | 1 SAMUEL 3-5
“Iehova ese Ma Haida Edia Namo Na E Lalomu”
Siahu Idoinai Diravana to E Laloda Badamu
3 Samuel na maraḡinai dubu helaḡa ai “Iehova isiaina e lao heniva.” (1 Sam. 3:1) Hanuaboi ta Samuel e mahuta murinai, ḡau idauna ta e vara. (1 Samuel 3:2-10 ba duahi.) Ia ese gado ta e kamonaia ia ladana e hatoava. Samuel na e laloa una na Hahelaḡa Tauna Badana Eli gadona, una dainai e heau ela dekena bona e gwa: “Lau o ina, o boirigu.” A Eli na eto ia na se boi. Nega ihatoinai una ḡau e vara neganai, Eli e laloparara una na Dirava ese Samuel e boi heniava. Una dainai Samuel e hadibaia ede baine haere toma, bona Samuel na unu e kara toma. Dahaka dainai Iehova na matamanai, ena aneru amo, Samuel enai sibona se hegwaurai hedinarai? Baibul ese una na se gwauraia, to e vara ḡauna ese e hahedinaraia Dirava ese Samuel na e laloa bada. Edena dala ai?
Siahu Idoinai Diravana to E Laloda Badamu
4 Samuel Ginigunana 3:11-18 ba duahi. Iehova ena Taravatu ese natu e haḡanidia, burukadia, edia bese lohiana danu, bae matauraidia. (Eso. 22:28; Lev. 19:32) O laloamu, Samuel be daba ai, Eli dekena ela bona asi garina ida Dirava ena hahemaoro hereva aukana e hamaorolaia, a? Lasi! Momokani, Baibul na e gwa, Samuel na “e gari e kamonai herevadia Eli baine hamaorolaia.” To, Dirava ese Eli enai e hahedinaraia Ia na Samuel e boi heniava. Una dainai Eli ese Samuel e hamaoroa baine hereva. Eli na eto: “E hamaoromu ḡauna egu ai [basio] hunia.” Una dainai, Samuel na mai hematauraina ida “hereva iboudiai e hamaorolaia.”
Dirava Ena Hereva Ba Tahua Namonamo
w05 3/15 rau 21 par. 6
Baibul Bukana Samuel Ginigunana Ena Hereva Badadia
3:3—Ede ta diba tomamu Samuel na Helaḡa Herea gabuna ai na se mahuta? Samuel na dia hahelaḡa Levi tauna bona ena ruma bese na Kohat iduhuna amo. (1 Sisiḡa 6:33-38) Una dainai, ia na helaḡa herea gabunai ‘basine vareai, ḡau helaḡadia basine haḡeredia.’ (Numera 4:17-20) To, Samuel na tomadiho kalagana ariarana ai mo baine vareai diba. Reana ia na unuseni ai e mahutava. Eli danu, kalaga ariarana ena gabu ta ai e mahutava. Ina hereva “Dirava ena maua helaḡana e miava gabuna,” na tomadiho kalagana gabuna e herevalaiamu.
FEBRUARY 21-27
DIRAVA ENA HEREVA ENA NAMO | 1 SAMUEL 6-8
“Emu King be Daika?”
it-2 rau 163 par. 1
Dirava Ena Basileia
Israel Taudia Na E Ura Ta Baine Pavapava. Israel taudia na Aigupto ai e lasi bena kahirakahira laḡani 400 muridiai bona Dirava na Abraham ida gwauhamata e karaia bena laḡani 800 mai kahana e ore murinai, Israel taudia na e ura ta ese baine lohiadia, badina be bese ma haida na mai ilohiadia tauna. Edia noinoi karana ese e hahedinaraia idia ese Iehova ena lohia dalana na e dadaraia. (1 Sa 8:4-8) Oibe, idia na e ura Dirava na basileia ta baine haginia, Abraham bona Iakob e gwauhamata henidia heḡereḡerena. Reana, idia na Iakob do se mase ai natuna Iuda e perovetalaia herevana e laloa (Ge 49:8-10), Israel taudia Aigupto e rakatania neganai Iehova ese e hamaorodia herevana e laloa (Es 19:3-6), Taravatu gwauhamatana (Deu 17:14, 15), bona Dirava ese peroveta tauna Balaam amo e gwauraia peroveta herevana kahana ta e laloa (Nu 24:2-7, 17). Bona Samuel sinana, abidadama hahinena Hana, ese ena ḡuriḡuri lalonai una na e hahedinaraia. (1 Sam 2:7-10) Iehova ese ena “hehuni herevana,” Basileia, na kahana taina mo e hahedinaraia, to baine lohia negana korikorina bona una gavamani baine lohia gabuna, tanobadai eiava gubai, na se gwauraia. Una dainai Israel taudia na asi edia maoro king ta totona bae noinoi.
w11 1/1 rau 27 par. 1
E Haheauka Ena be Lalona E Hahisia
Samuel ese e vara ḡauna na ḡuriḡuri amo Iehova e hamaorolaia neganai, mani Iehova ena haere aita laloa: “Ene taunimanima edia hereva iboudiai bavabi dae; badina be oi asie dadaraimumu, a lau hari e dadaraigumu; asie uramu bae abigu, edia pavapava.” Ena be unu hereva ese Samuel na e hagoadaia, to taunimanima edia gwau-edeede karadia ese Siahu Idoinai Diravana lalona e hahisia. Iehova ese ena peroveta tauna e hamaoroa Israel taudia baine hamaorodia taunimanima ta ese be lohiadiamu neganai, ediai bae vara dika na edia abi hidi ahuna. Samuel ese unu hereva e gwaurai neganai, idia na e gwa: “Lasi! Ai na a uramu pavapava ta ese baine halohiamai.” Samuel na hanaihanai ena Dirava e badinaiava dainai Iehova ese e abia hidi king e horoa.—1 Samuel 8:7-19.
w10 1/15 rau 30 par. 9
Iehova Baine Lohia Na Maoro!
9 Histri ese e hahedinaraia, Iehova ese e gwauraimu ḡaudia na e momokani. Bema e lohiadiava king na Iehova se badinaiava, Israel taudia na hekwakwanai momo e davariva. Israel edia negai e vara ḡauna ta dibamu, idaunega amo ema bona hari taunimanima edia gavamani, Iehova asie dibaia taudia, na dia heḡereḡere mauri namona bae havaraia. Oibe, politikol taudia haida na Dirava e noiamu baine durudia maino bona noho namo bae havaraia totona, to Dirava ese ena lohia dalana e dadaraiamu taudia na basine hanamodiamu.—Sa. 2:10-12.
Dirava Ena Hereva Ba Tahua Namonamo
w02 4/1 rau 12 par. 13
Dahaka Dainai Bapatiso Bavabi?
13 Eda mauri baita haidaua guna na namo, gabeai bapatiso baita abi bona Iehova ena Witnes ai baitala. Mai kudouna idoinai e uramu Keriso Iesu baine ḡavaia tauna ese sibona ena mauri e henimu. Unu e kara tomamu taudia ese edia mauri gunana e dadaraiamu bona lalodia e hadaimu Dirava vairanai kara maorona bae karaia. Baibul ai, Heberu bona Grik gado ai ina hereva, mauri ba haidau, anina na ba lou eiava ba hegiro. Unu ba kara toma anina na dala kererena amo ba raka siri bona Dirava ba lou henia. (1 Han 8:33, 34) Mauri ba haidaua totona, “helalo kerehai, . . . karadia danu bae kara.” (Apos 26:20) Ita ese tomadiho koikoi baita rakatania, Dirava ena haheḡani baita badina, bona Iehova sibona mo baita tomadiho henia. (Deuteronomi 30:2, 8-10; 1 Samuel 7:3) Danu, eda lalohadai, ta uramu baita haḡuḡuru ḡaudia, bona eda kara baita haidau. (Esekiel 18:31) Dirava ese se moalelaimu mauri dalana amo ta hegiromu neganai, ita na mauri dala matamatana ta badinaiamu.—Aposetolo Edia Kara 3:19; Efeso 4:20-24; Kolose 3:5-14.
FEBRUARY 28–MARCH 6
DIRAVA ENA HEREVA ENA NAMO | 1 SAMUEL 9-11
“Matamanai Saulo Na E Manau”
Emu Dirava ida Ba Raka Mai Manaumu Ida
11 King Saulo enai e vara ḡauna mani aita laloa lou. Eregabenai e lohia matama neganai, ia na e manau. Mai dibana dahaka be baine kara diba bona dahaka be basine kara diba, danu se ura maduna momo baine hua. (1 Sam. 9:21; 10:20-22) To gabeai, Saulo na e hekokoroku. Ia king ai ela neganai, una kara na e hahedinaraia. Nega ta, ia na e badu badina peroveta tauna Samuel na se kau haraḡa. Iehova enai na se tabekau, to Saulo ese boubou ḡaudia e bouboulai ena bese daidiai, ena be ia na asi ena maoro unu baine kara toma. Una dainai, Iehova ese ia na se lalonamo henia bona gabeai king amo e kokia. (1 Sam. 13:8-14) Ina haheitalai amo tame diba ḡaudia baita badinamu na aonega karana, bona hekokoroku karana baita dadaraiamu.
w14 3/15 rau 9 par. 8
Siboda Eda Ura Baita Dadaraia Karana Baita Hahedinaraia Dalana
8 King Saulo ena sivarai amo ta dibamu, siboda eda namo ilalona karana ese siboda eda ura idadaraina karana baine hadikaia diba. Saulo e lohia matama neganai, ia na e manau bona haida na e lalodia bada. (1 Sam. 9:21) Ia na se ura ena lohia dalana asie uralaiava Israel taudia baine panisidia, ena be mai ena maoro unu baine kara toma, Dirava ese e henia king dagina igimana totona. (1 Sam. 10:27) King Saulo ese Dirava ena lauma helaḡa ena hahekau dalana na e abi dae badina ia ese Israel taudia e gunalaidia bona Amono taudia na tuari ai e hadareredia. Bena, Saulo na mai manauna ida Iehova e imodaia.—1 Sam. 11:6, 11-13.
w95 12/15 rau 10 par. 1
Amono Taudia Na Hebogahisi Karana Asie Abia Dae, to E Kara Auka
Amono taudia ese Iehova ena hebogahisi karana na asie abia dae, to e kara auka. Una dainai Iehova na se moale. “Saulo na [Nahasa ena] hereva e kamonai negana ai, Dirava ena lauma ese e rohea badabada, bona e badu dikadika.” Dirava ena lauma ena hahekau henunai, Saulo ese tuari tataudia 330,000 e haboudia bona Amono taudia e hamasedia, bona Amono taudia na “rarua amo asie heau hekubou.”—1 Samuel 11:6, 11.
Dirava Ena Hereva Ba Tahua Namonamo
w05 3/15 rau 22 par. 8
Baibul Bukana Samuel Ginigunana Ena Hereva Badadia
9:9—Ina hereva “peroveta ta gwauraiamu tauna na gunaguna mata-hanai tauna e gwauraiava,” anina be dahaka? Reana anina na Samuel bona Israel pavapavadia edia nega ai, peroveta taudia na mai anidia bada ḡaukaradia e karava, una dainai “mata-hanai tauna” na e gwauraiava peroveta tauna. Bona Samuel na e gwauraia peroveta tauna ginigunana.—Aposetolo Edia Kara 3:24.