Mauri Bona Hesiai Ḡaukara Hebou Pepana Ena Refrens
SEPTEMBER 5-11
DIRAVA ENA HEREVA ENA NAMO | 1 HANUA PAVAPAVADIA 9-10
“Iehova Baita Imodaia Ena Aonega Dainai”
w99 7/1 rau 30 par. 6
Ena Vadivadi amo Namo E Davari
Kwini na Solomon ida e hedavari neganai, “henanadai aukadia” amo Solomon e tohoa. (1 Hanua Pavapavadia 10:1) Iniseniai e ḡaukaralaia Heberu herevana e hahanaia anina na “sivarai heḡereḡeredia” (o riddle). To una anina na dia kwini ese Solomon na henanadai asi anidia e henia. Salamo 49:4 ai, una Heberu hereva tamona e ḡaukaralaia kara dika, mase, bona mauri davana ai taunimanima ese e henimu henanadaidia bae hahedinarai totona. Una dainai, reana Sieba edia kwini na Solomon ida mai anina bada herevadia e herevalaiva, Solomon ena aonega ena bada baine tohoa totona. Baibul na e gwa “ena lalo-hadai iboudiai na [Solomon] e hamaorolaia.” Bena Solomon ese “ena henanadai iboudiai e haerelai henia; pavapava enai ḡau ta na dia hehuni, iboudiai ia ese e hahedinarai henia.”—1 Hanua Pavapavadia 10:2b, 3.
w99 11/1 rau 20 par. 6
Hariharibada Karana E Bada Neganai
Kwini na e kamonai bona e ita ḡaudia daidiai e hoa dikadika, bona mai manauna ida e gwa: “Emu hesiai taudia bini, dina iboudiai oi vairamu ai gigini bona emu aonega herevadia e kamonaimu danu daka moale!” (1 Hanua Pavapavadia 10:4-8) Ia na se gwa Solomon ena hesiai taudia na taḡa gabunai e nohova dainai e moaleva—ena be momokani idia na taḡa gabunai e nohova. To, Solomon ena hesiai taudia na hahenamo e abi badina hanaihanai Dirava ese Solomon e henia aonega herevadia e kamonaiva. Sieba edia kwini na haheitalai namona hari ina negai Iehova ena taunimanima ediai—idia na Ihavaradia Diravana bona Natuna Iesu Keriso edia aonega ai e tabekaumu!
w99 7/1 rau 30-31
Ena Vadivadi amo Namo E Davari
Sieba edia kwini na Solomon ena aonega bona ena basileia ena taḡa e hoalai dainai “lalona e boio.” (1 Hanua Pavapavadia 10:4, 5) Haida na e laloamu una hereva anina na kwini na ena “hahodi e ore.” Diba bada tauna ta na e gwa ia na e maserea! Herevana dahaka, to kwini na e ita bona e kamonai ḡaudia daidiai e hoa dikadika. Ia na e gwa Solomon ena hesiai taudia na e moale badina king ena aonega herevadia e kamonaiva, bona ia ese Iehova e hanamoa badina Solomon e abia hidi king ai ela. Bena ia ese king na dava bada harihari ḡaudia e henia, gold sibona davana mo, hari ina negai na, 40,000,000 dola heḡereḡerena. Solomon ese danu harihari ḡaudia e heni, ia ese Sieba edia kwini “ena ura ḡaudia iboudiai e henia.”—1 Hanua Pavapavadia 10:6-13.
Dirava Ena Hereva Ba Tahua Namonamo
w08 11/1 rau 22 par. 4-6
Oi mai Dibamu, A?
King Solomon ena gold edia bada be ede bamona?
Baibul na e gwa Turo edia king Hirama ese gold talent 120 e siaidia Solomon dekena, Sieba edia kwini ese gold talent unuhetomadia e henia danu, bona Solomon ena hesiai taudia na bouti amo ela Ofiri bena gold talent 420 e abidia Solomon dekena e laohai. Baibul na e gwa: “Laḡani tamona lalonai Solomon dekena e mailaia gold-na ena metau na talent sinahu-tauratoi tauratoi-ahui tauratoi” o talent 666. (1 Hanua Pavapavadia 9:14, 28; 10:10, 14) Una hereva baita abia dae diba, a? Guna negadiai, king edia gold ena bada be ede bamona?
Diba bada taudia haida ese nadi mai toretorena ta e davaria, una toretore na e gwa Egypt edia Pharaoh Thutmose Namba 3, laḡani 3,500 gunadiai e lohia tauna, ese gold edia metau 13.5 heḡereḡerena e laohai Amun-Ra dubuna Karnak ai. Laḡani 2,800 gunadiai, Asuria edia King Tiglath-pileser Namba 3, ese gold talent 120 na Turo amo e abi, bona Sargon Namba 2 ese gold talent unuhetomadia na Babulono diravadia e henidia. Macedonia edia King Philip Namba 2 (359-336 B.C.E.) na laḡani ta ta ai Thrace ena Pangaeum mainina amo gold 28 tons sisivana e abiava.
Philip natuna merona Alexander Badana (336-323 B.C.E.) ese Persia taonina Susa e abia neganai, ia ese una hanua amo gold 1,180 tons sisivana e abi, bona Persia hanuana idoinai amo gold 7,000 tons sisivana e abi. Unu iboudiai na Baibul ena hereva ida baita haheḡereḡereamu neganai, baita abia daemu Baibul ese King Solomon ena gold e herevalaia na hereva momokanina.
SEPTEMBER 12-18
DIRAVA ENA HEREVA ENA NAMO | 1 HANUA PAVAPAVADIA 11-12
“Ba Adavaia Tauna Bavabia Hidi Namonamo”
Daika be “Iehova Ena Kaha” Ai?
7 King Solomon ena sivarai amo ḡau momo baita dibamu. Solomon na maraḡina negana amo, Iehova ena hahekau daladia e badinava. Dirava ese aonega bada e henia bona ḡaukara badana e henia Ierusalem ai dubu helaḡa mai hairaina ta baine haginia. To Solomon ese ena hetura karana Iehova ida e haboioa. (1 Han. 3:12; 11:1, 2) Dirava ena Taravatu na eto Heberu pavapavana ta ese “adavana danu basine hahohodia. Idia ese lalona bae ania na garina.” (Deu. 17:17) Solomon na se kamonai, gabeai ia ese hahine 700 bona hesiai hahinedia 300 e adavadia. (1 Han. 11:3) E adavadia hahinedia momo na dia Israel hahinedia, bona dirava koikoidia e tomadiho henidiava. Una dainai, Solomon ese Dirava ena taravatu, idau hahinedia iadavadia karana ai, na se badinaia.—Deu. 7:3, 4.
Edena Dala ai Kudoumu Ba Gimaia Diba?
6 Satana na e uramu ena kara baita tohotohoa—ia na Iehova ena taravatu se badinamu bona e hekokorokumu. Satana ese ita na basine dorida dibamu iena lalohadai bona kara baita tohotoho. Una dainai dala haida ai ena ura e haḡuḡuruamu. Heḡereḡere, ita na ia ese vada e hakaudia kerere taudia padadiai ta nohomu. (1 Ioa. 5:19) Ena ura na idia baita bamodia hanaihanai, ena be mai dibada hebamo dikana ese eda lalohadai bona kara baine ‘hahekwakwanaidia’ o hadikaia diba. (1 Kor. 15:33) King Solomon enai una na e vara momokani. Ia ese dirava koikoidia e tomadiho heniva hahinedia momo e adavadia bona idia ese taina ruana ‘lalona e ania’ ela bona Iehova e rakatania.—1 Han. 11:3.
Daika be “Iehova Ena Kaha” Ai?
9 To Iehova ese kara kereredia na e itamu. Baibul na eto: “Bena Iehova ese Solomon e badu henia, badina be ia lalona ese Iehova, . . . nega rua e hahedinarai henia bona e haḡania dirava idaudia basine badinadia Diravana, na e rakatania. Ia ese Iehova ena haheḡani se badinaia.” Una dainai, Dirava ese se lalonamo henia bona se durua. Solomon garana ese Israel basileiana na se lohiaia bona gabeai e vara uruna ese hisihisi momo e davari.—1 Han. 11:9-13.
Dirava Ena Hereva Ba Tahua Namonamo
Dirava Ena Lalonamo Bema Abia Diba
Rehoboam ese ena tuari taudia e haboudia ia e gwau-edeede henia taudia bae tuari henidia totona. To Iehova ese peroveta tauna Semaia ena amo e koudia, eto: “Basiola, varavaramui Israel taudia basio tuari henidia; ta ta emu ruma emu ruma ba lou lao, badina be ina na lauegu amo e vara.”—1 Han. 12:21-24.
Idia be basie tuari, a? Mani a laloa, Rehoboam na una hereva dainai e lalohekwarahi! Taunimanima ese ia be ede be laloa tomamu, badina e hagaridia, eto “doadoa” amo baine hahisidia to hari ḡau ta basine karaia dibamu? (2 Sisiga 13:7 ba itaia.) To, king bona ena tuari taudia ese “Iehova ena hereva e hakala henia, edia ruma e lou heni, Iehova ena hereva heḡereḡerena.”
Una sivarai amo dahaka ta dibamu? Dirava baita kamonai henia na aonega karana, ena be haida ese bae kirikirilaida. Dirava baita kamonai heniamu neganai, be lalonamo henidamu bona be hanamodamu.—Deu. 28:2.
Rehoboam enai be dahaka e vara? Ia ese Dirava e kamonai henia bona bese matamatana ituari henina totona e karaia palanina na e haidaua, danu ia ese e lohiadiava hanuadia, Iuda bona Beniamina, ai hanua haida e haginidia. Bona hanua haida na “e ha-aukadia herea.” (2 Sis. 11:5-12) Mai anina bada ḡauna na, gabeai ia na Iehova ena taravatu e badinaia. Ieroboam ena lohia henunai Israel ena iduhu 10 basileiana ese kaivakuku e tomadiho henidiava, una dainai momo na Ierusalem ela “Rehoboam” bae durua bona tomadiho momokanina bae badinaia totona. (2 Sis. 11:16, 17) Oibe, Rehoboam na Dirava e kamonai henia dainai, ena basileia na e goada.
SEPTEMBER 19-25
DIRAVA ENA HEREVA ENA NAMO | 1 HANUA PAVAPAVADIA 13-14
“Dahaka Dainai Dekedai Miadia Ḡaudia Baita Moalelai Bona Baita Manau?”
w08 8/15 rau 8 par. 4
Mai Lalomu Idoinai ida Dirava Ba Badinaia
4 Bena Ieroboam ese Dirava ena tau e hamaoroa, eto: “Egu ruma aitala, laḡamu bavania, bena davamu baina henimu.” (1 Han. 13:7) Una peroveta tauna be da dahaka baine kara? Ia na king ihahemaoro henina herevana e gwauraia murinai, king ena heabidae karana baine abia dae be namo, a? (Sal. 119:113) Eiava king ena noinoi baine dadaraia, ena be ita-itana na king na e helalo-kerehai, a? Ieroboam na taḡa tauna dainai, turana na dava bada harihari ḡaudia baine henidia diba. Bema Dirava ena peroveta tauna na lalonai kohu bema ura heni dikadika, king ena harihari ḡaudia ese bema dibaḡania diba. To, Iehova ese peroveta tauna na vada e haḡania, eto: “Aniani basio ania bona ranu basio inua, bona oma dalana amo ma basio lou.” Una dainai, peroveta tauna na mai ena lalo goada ida e haere, eto: “Ena be emu ruma kahana boma henigu, to oi ida basina raka vareai hebou. Aniani basina ania eiava ranu basina inua ina gabu ai.” Bona una peroveta tauna na Betele e rakatania to dala idauna ta amo ela. (1 Han. 13:8-10) Una peroveta tauna ena abi hidi amo dahaka ta dibamu Dirava ibadinana karana ai?—Roma 15:4.
w08 8/15 rau 11 par. 15
Mai Lalomu Idoinai ida Dirava Ba Badinaia
15 Iuda peroveta tauna ena kerere amo dahaka ḡau ma haida ta dibamu? Hereva Lada-isidia 3:5 na e gwa: “Iehova bavabidadama henia mai lalomu idoinai; sibomu emu lalo-parara basio abidadama henia.” Iuda peroveta tauna na Iehova enai se tabekau dia guna heḡereḡerena, to sibona ena diba ai e tabekau. Ena kerere dainai ena mauri e haboioa bona ladana namona e hadikaia Dirava vairanai. Enai e vara ḡauna ese e hahedinaraiamu, hanaihanai Iehova baita badinaia bona mai manauda ida ia baita hesiai henia na mai anina bada!
w08 8/15 rau 9 par. 10
Mai Lalomu Idoinai ida Dirava Ba Badinaia
10 Iuda peroveta tauna ese peroveta tauna iahuna ena koikoi karana bema lalopararalaia na namo. Reana sibona bema henanadai diba, ‘Dahaka dainai Iehova ese aneru ta e siaia, hahediba hereva matamatadia na idau tauna ta e henia lau egu baine gwaurai totona?’ Peroveta tauna na Iehova bema noia diba unu hereva anidia bema hadibalaia, to Baibul na se gwa ia na unu e kara toma. Ia na una peroveta tauna iahuna ida “e lou ela, ena ruma ai e aniani, bona ranu e inua.” Iehova na se moale. Una peroveta tauna na Iuda e lou laova lalonai, lion ta ese e alaia. Unu amo ena peroveta ḡaukarana e hadikaia!—1 Han. 13:19-25.
Dirava Ena Hereva Ba Tahua Namonamo
w10 7/1 rau 29 par. 5
Kara Namodia E Lalo Badamu
Mai anina bada ḡauna na ina, 1 Hanua Pavapavadia 14:13 ena hereva ese Iehova ena kara namo bona ita edai e itamu ḡaudia e hadibada. Baita laloatao, Iehova na Abia enai ḡau namona ta e itaia. Toana na Iehova ese Abia kudouna e tahua ela bona enai kara namona e davaria. Diba bada tauna ta ese Abia na ena ruma bese ida e haheḡereḡerea neganai, e gwa Abia na pel ta na heto “nadinadi maraḡidia bogaraḡidiai.” Iehova ese Abia ena kara namodia e lalo bada bona e hanamoa, bona ruma bese dikana lalonai ia sibona mo e bogaia hisi.
SEPTEMBER 26–OCTOBER 2
DIRAVA ENA HEREVA ENA NAMO | 1 HANUA PAVAPAVADIA 15-16
“Asa Ena Lalo Goada Karana Ba Tohotohoa Diba, A?”
w12 8/15 rau 8 par. 4
“Emui Ḡaukara Anina Bae Halou Henimui”
Laḡani 20 lalodiai, Israel na basileia rua ai e haheparara murinai, Iuda taudia momo na tomadiho koikoi karadia ese e hakaudia kerereva. Laḡani 977 B.C.E. ai Asa na king ai ela neganai, ena ruma ai e ḡaukarava taudia danu Kanaan edia dirava haida, natu ihavarana siahuna e heniva dirava hahinedia, e tomadiho henidiava. To Baibul ese Asa ena lohia dalana e herevalaia neganai, e gwa: “Asa ese kara namodia bona maoromaorodia e karava, Iehova, ena Dirava, vairanai.” Asa “ese dirava idaudia edia ihaboulaina patadia bona atai gabudia helaḡadia e abidia oho, bona au-tubua e hagaridia, bona kaivakuku e utudia.” (2 Sis. 14:2, 3) Danu, Asa ese “gabu helaḡadia ai lebulebu karadia e karava taudia” na Iuda basileiana amo e atodia lasi, badina tomadiho gabudiai tatau na tatau ida matabodaḡa karadia e karava. Asa na dia unu mo e kara. Ia ese taunimanima e haḡanidia danu “Iehova, senedia edia Dirava, bae tahua” bona ena “taravatu bona haheḡani bae badinadia.”—1 Han. 15:12, 13; 2 Sis. 14:4.
Mai Kudoumu Idoinai ida Iehova Ba Hesiai Henia!
7 Namona na ita ta ta ese kudouda baita sekea, bema ita na Dirava ta badinaiamu eiava lasi. Sibomu ba henanadai, ‘Lau be Iehova na hamoaleamu, tomadiho momokani na duruamu, eiava Dirava ena taunimanima na durudiamu bae ḡoeva totona, a?’ Mani a laloa, Asa na mai lalo goadana ida tubuna hahinena, Maaka “ena pavapava dagina e abia oho”! Reana oi na mai dibamu ta na una hahine ena kara heḡereḡerena e karamu, bema unu bamona, Asa ena lalo goada karana ba tohotohoa diba. Heḡereḡere, bema emu ruma bese tauna ta, eiava turamu namona ta na e kara dika bona se helalo-kerehai dainai orea murimurinai bae atoa, oi be dahaka ba kara? Oi be lalomu bo hadaiamu ia basio bamoa totona, a? Kudoumu ese be dorimumu dahaka ba kara?
it-1 rau 184-185
Asa
Ena be nega haida Asa na aonega karana se hahedinaraia bona Dirava ena hereva na se badina, to ena kara namodia bona aposteit karana e dadaraia dainai, unu ese ena kerere na e hereadia, bona ia na e gwauraia Iuda iduhuna ai pavapava namona ta. (2Sis 15:17) Asa na laḡani 41 e lohia lalonai, Israel ai unu laḡani lalodiai pavapava eit e lohia: Ieroboam, Nadab, Baasa, Elaha, Simiri, Omri, Tibni (ia na Israel kahana taina mo e lohiaia badina Omri e daḡedaḡe henia), bona Ahaba. (1Ha 15:9, 25, 33; 16:8, 15, 16, 21, 23, 29) Asa e mase neganai natuna Iehosafat na king ai ela.—1Ha 15:24.
Dirava Ena Hereva Ba Tahua Namonamo
w98 9/15 rau 21-22
O Laloamu Dirava be Momokani E Nohomu, A?
Heḡereḡere, Ieriko hanuana baine hadaia lou tauna ahuna dikana e perovetalaia herevana ba duahia bona e ḡuḡuru dalana ba laloa. Iosua 6:26 na e gwa: “Una negana ai Iosua ese hereva aukana e henidia, eto, Ina hanua Ieriko baine hadaia lou tauna na Iehova ese baine uduguiraia. Ruma badidia baine hagini davana na natuna roboana baine mase, bona ikoukou baine hagini davana na natuna tau-muritai baine mase.” Laḡani 500 mai kahana muridiai, una peroveta herevana na e ḡuḡuru, badina 1 Hanua Pavapavadia 16:34 na e gwa: “[King Ahaba ena] nega ai Hiele, tau Betele, ese Ieriko e hadaia; ruma badidia e haginidia davana na natuna roboana Abiram, bona ikoukou e haginidia davana na natuna tau-muritai Segubu, Iehova ena hereva Iosua Nunu uduna amo e gwauraia heḡereḡerena.” Dirava momokanina sibona ese unu peroveta herevadia baine gwaurai bona baine haḡuḡuru diba.
OCTOBER 3-9
DIRAVA ENA HEREVA ENA NAMO | 1 HANUA PAVAPAVADIA 17-18
“Lalo Rua ai Ba Raka Ege Raka Ege Ela Bona Edena Nega?”
Bavabidadama—Abi Hidi Maorodia Ba Kara!
6 Idaunega Israel taudia na Gwauhamata Tanona ai e nohova neganai, idia na abi hidi ta bae karaia: Iehova bae tomadiho henia eiava idau diravadia bae tomadiho henidia. (Iosua 24:15 ba duahia.) Toana na una abi hidi bae karaia na dia auka. To, una abi hidi dainai bae mauri eiava bae mase diba. Hahemaoro Taudia edia negai, Israel taudia na abi hidi kereredia e kara loulouva. Idia ese Iehova e dadaraia bona dirava koikoidia e tomadiho henidia. (Hahe. 2:3, 11-23) Gabeai, Elia ena negai Dirava ena taunimanima ese e karaia abi hidina ta mani a laloa. Peroveta tauna Elia ese bae karaia abi hidina e hahedinaraia: Iehova isiaina bae lao heni eiava dirava koikoina Baal isiaina bae lao heni. (1 Han. 18:21) Taunimanima na e lalo ruava dainai Elia ese e gwau henidia. Reana bo laloamu una abi hidi bae karaia na dia auka badina Iehova ihesiai henina karana na aonega dalana bona mai ena hahenamo. Momokani, lalo maoromaoro tauna na basine uramu Baal isiaina baine lao heni. To, unu Israel taudia na ‘lalo rua ai e raka ege raka egeva.’ Elia ese e haḡanidia tomadiho dalana hereadaena bae abia hidi, una na Iehova itomadiho henina karana.
ia rau 88 par. 15
Tomadiho Ḡoevana E Badinaia
15 Una dainai, Baal ena hahelaḡa taudia na “e lolo badabada, bona vaia edia kara dare bona io amo sibodia e heivava, ela bona raradia e aru lohilohiva.” To haere ta lasi! “Asi gado ta; ta se haere, bona ta se kamonai.” (1 Han. 18:28, 29) Momokani, Baal na lasi. Satana na una dirava koikoina amo taunimanima e veridia Iehova bae dadaraia totona. To hereva momokanina na ina, bema Iehova na biaguda ai basita halaoamu, baita lalohisihisimu bona baita hemaraimu.—Salamo 25:3; 115:4-8 ba duahi.
ia rau 90 par. 18
Tomadiho Ḡoevana E Badinaia
18 Elia do se ḡuriḡuri neganai, hutuma na reana e laloava Iehova na ḡau ta basine karaiamu, Baal heḡereḡerena. To Elia e ḡuriḡuri murinai, una na dia idia bae lalo daradara negana. Baibul na e gwa: “Bena Iehova ena lahi e moru dobi, hari ḡole-oho boubouna ḡauna e haḡolea oho, bona au, bona nadi, bona ḡahu; bona dadaira ranuna danu e hakaukaua.” (1 Han. 18:38) Una na hoa ḡauna! Taunimanima be dahaka e kara?
Dirava Ena Hereva Ba Tahua Namonamo
w08 4/1 rau 19, maua
E Gima, Bona E Nari
Elia Ena Negai Medu be Ede Daudauna Se Diho?
Iehova ena peroveta tauna Elia ese King Ahaba e hamaoroa medu na kahirakahira be dihomu. Una na “laḡani ihatoina” ai e vara—una laḡani na Elia ese medu basine diho herevana e gwauraia matama negana amo e hematama. (1 Hanua Pavapavadia 18:1) Elia na Iehova ese medu baine hadihoa herevana e gwauraia murinai, Iehova ese medu e hadihoa. Haida na reana e laloava, laḡani ihatoina e lao heniava lalonai medu e diho, una dainai medu na laḡani rua mai kahana lalonai se diho. To, Iesu bona Iakobo ese na e gwa, “laḡani toi hua tauratoi medu se dihova.” (Luka 4:25; Iakobo 5:17) Unu hereva ruaosi be i’idau, a?
Lasi. Idaunegai Israel ai medu se diho negana na taina e daudau, reana hua 6 heḡereḡerena. Una dainai medu da se dihova neganai, Elia na Ahaba dekena ela bona doe herevana e gwauraia. Baita gwau dibamu, medu na reana hua 6 heḡereḡerena se diho. Una dainai, Elia na e gwa medu na “laḡani ihatoina ai” baine diho neganai, medu na da laḡani toi bona hua tauratoi heḡereḡerena se diho. “Laḡani toi hua tauratoi” muridiai, taunimanima iboudiai na Karamele Ororona ai baine vara ḡauna bae itaia totona e hebou.
Elia ese Ahaba e vadivadia negana ginigunana mani a laloa. Taunimanima na e abia daeva Baal na “ori ai e gui kau tauna,” medu baine mailaia diravana. Bema medu na nega daudau lalonai se diho, reana taunimanima na e lalova: ‘Baal be ede kahai? Edena negai medu baine mailaia?’ Una dainai Elia ena hereva, medu bona hunu basie diho ela bona ia baine hereva negana, ese Baal e tomadiho heniava taudia na e habadudia.—1 Hanua Pavapavadia 17:1.
OCTOBER 10-16
DIRAVA ENA HEREVA ENA NAMO | 1 HANUA PAVAPAVADIA 19-20
“Iehova Ba Noia Goada Baine Henimu”
Lalometau Negadiai Iehova Enai Ba Tabekau
5 1 Hanua Pavapavadia 19:1-4 ba duahi. Elia na e gari badina Kwin Iesebel na e urava ia baine alaia. Una dainai Bere-sieba e heau lao. E lalometau bada herea dainai, “e noinoi baine mase.” Dahaka dainai e ura baine mase? Elia na dia ḡoevadae, bona ia na “taunimanima mo, ita bamoda.” (Iak. 5:17) Reana e lalometau dainai ena goada na e ore. Elia na reana e laloava, tomadiho ḡoevana iduruna totona e karaiava ḡaukarana na asi anina, badina Israel taudia na se kamonaiva, bona ia mo sibona Iehova e hesiai heniava. (1 Ha. 18:3, 4, 13; 19:10, 14) Reana una abidadama peroveta tauna ena kara dainai baita daradaramu. To, Iehova ese ena hemami na e lalopararalaia.
ia rau 103 par. 13
Ena Dirava amo Tauhalo E Abi
13 Iehova na guba amo e roha diho e lalokau heniava peroveta tauna na tano ḡaḡaena ai au ta henunai hekure bona e noinoi baine mase neganai, Iena hemami be ede bamona? Ita na da mai dibada. Elia e mahuta murinai, Iehova ese aneru ta e siaia. Una aneru ese Elia e haoa bona e gwa: “A tore isi, avaniani.” Elia na unu e kara toma, badina aneru ese ana vada e atodia e heḡaeḡae—parao siahuna bona ranu. Elia be aneru e tenkiu henia, a? Baibul na e gwa, una peroveta tauna na e aniani, ranu e inua bena ma e hekure lou. Ia be e lalohisihisi bada dainai se hereva, a? Herevana dahaka, to aneru ese nega iharuana Elia ma e haoa, reana una na malokihi ai. Ia ese Elia ma e hamaoroa, eto: “A tore isi, bavaniani, hari be laolao na be bada hereamu oiemu ai na garina.”—1 Han. 19:5-7.
ia rau 106 par. 21
Ena Dirava amo Tauhalo E Abi
21 Unu sivarai ta ta ese e hadibadamu, Iehova na dia lai, tano laga eiava lahi lalodiai. Elia na mai dibana Iehova na dia gori diravana ta heḡereḡere Baal na heto; Baal na e tomadiho heniava taudia ese e gwauraia “ori ai e gui kau tauna,” o medu baine mailaia diravana. Iehova na tano laga, lahi o unu bamona goada herea ḡaudia iboudiai Badidia, bona Iena siahu ese e kara ḡaudia iboudiai na e hereadia. Guba danu se heḡereḡere ena noho gabuna! (1 Han. 8:27) Unu iboudiai ese Elia be ede e durua toma? Ba laloatao ia na se gari. Iehova na ia ida, bona Iena siahu na bada herea dainai, Elia ese Ahaba bona Iesebel garidia baine gari na asi anina!—Salamo 118:6 ba duahia.
ia rau 106 par. 22
Ena Dirava amo Tauhalo E Abi
22 Lahi e ore murinai, gabu na asi reḡereḡena bona Elia na “ere maimu-maimuna ta” e kamonai. Una ere ese Elia e noia ena lalohadai baine herevalai lou, bona Elia na unu e kara toma, nega iharuana ena lalohekwarahi ḡaudia iboudiai e herevalai. Reana una ese Elia na e hagoadaia. To, Elia na una “ere maimu-maimuna” ese gabeai e gwauraia ḡauna ese e hagoadaia bada herea. Iehova ese Elia e hamaoroa ia na e laloa badava. Edena dala ai? Dirava ese idaunegai e palanilaia ḡauna e hadibaia, Ia ese Israel ai Baal itomadiho henina karana baine haorea. E hahedinaraia ḡoevaḡoeva, Elia ena ḡaukara na mai anina bada, badina Dirava ena ura na baine ḡuḡuru bona ḡau ta ese basine koua diba. Danu, Elia ese una ura baine karaia, badina Iehova ese haheḡani matamatadia e henia bona e siaia peroveta ḡaukarana ma baine karaia.—1 Han. 19:12-17.
Dirava Ena Hereva Ba Tahua Namonamo
w97 11/1 rau 31 par. 2
Siboda Eda Ura Idadaraina Bona Dirava Ibadinana Karana Ena Haheitalai Ta
Hari ina negai, Dirava ena hesiai taudia momo na sibodia edia ura idadaraina karana e hahedinaraiamu. Haida na edia “tano,” o edia ḡaukara e rakatanidia, unu amo tano idauna ai sivarai namona bae harorolaia eiava Betele ai bae ḡaukara. Ma haida na tano idaudia ela Society ena konstraksen ḡaukarana bae durua totona. Momo na taunimanima ese asie lalo badamu ḡaukaradia e abi dae. To, Iehova totona unu ḡaukara iboudiai e karamu na mai anidia bada. Iehova ese mai edia ura ida ia e hesiai heniamu taudia na e lalodia badamu, bona sibodia edia ura e dadaraimu dainai baine hanamodia.—Mareko 10:29, 30.
OCTOBER 17-23
DIRAVA ENA HEREVA ENA NAMO | 1 HANUA PAVAPAVADIA 21-22
“Iehova ese Ena Siahu E Ḡaukaralaiamu Dalana Ba Tohotohoa”
it-2 rau 21
Tuari Oreadia Edia Iehova
Ieriko badinai Iosua na aneru ta e itaia bona e nanadaia bema ia na Israel ida eiava inaidia edia kaha ai neganai, aneru na e haere, eto, “Lasi, lau na Iehova ena tuari oreana baina halohiaia totona nama.” (Ios 5:13-15) Peroveta tauna Mikaia na King Ahaba bona Iehosafat e hamaorodia, eto, “Iehova na ena terono ai helaina ai na itaia, bona guba oreana idoinai ia badinai gigini, haida idibana kahana ai bona haida laurina kahana ai.” E hahedinaraia ḡoevaḡoeva, unu na Iehova ena lauma natudia e herevalaidia. (1Han 22:19-21) Ina hereva “tuari oreadia edia Iehova” e ḡaukaralaia na maoro, badina aneru oreadia na dia kerubi, serapi, bona aneru ma haida mo (Isa 6:2, 3, NWT; Ge 3:24; Apok 5:11) to danu idia na orea ta ta ai e ḡaukara heboumu, una dainai Iesu Keriso na e gwa “aneru oreadia gwauta-rua, ma haida danu” nonoho baine noinoi diba ia bae durua totona. (Mt 26:53) Hesekia ese Iehova ena heduru e noia neganai, e gwa “Iehova Sabaota e, Israel Diravana, oi na kerubi daediai o helaimu,” maua helaḡana bona kerubi laulaudia maua latanai ese Iehova ena terono guba ai e laulaulaia. (Isa 37:16; 1Sa 4:4; 2Sa 6:2 ba haheḡereḡeredia.) Elisaia ena hesiai tauna na e gari to matahanai ta amo goada e abia, una matahana ai e itaia Elisaia ena noho gabuna ai “ororo na lahi hosidia bona kariotadia ai e honu,” unu na Iehova ena aneru.—2Han 6:15-17.
“Tatau Iboudiai Kwaradia Na Keriso”
9 Manau. Iehova na aonega herea Tauna; to, ia na ena hesiai taudia edia lalohadai danu e kamonaimu. (Gen. 18:23, 24, 32) Ena heitatao henunai e nohomu taudia na e hagoadadiamu edia lalohadai bae gwaurai. (1 Han. 22:19-22) Iehova na ḡoevadae, to ita na se doridamu baita ḡoevadae. To Ia ese dia ḡoevadae taudia na e durudiamu ia ihesiai henina ai bae kwalimu. (Sal. 113:6, 7) Baibul ese Iehova na e gwauraiamu ‘ikahada’ tauna. (Sal. 27:9; Heb. 13:6) King David na e gwa, Iehova ena heduru bona manau dainai ia e henia ḡaukara badana na e haḡuḡurua.—2 Sam. 22:36.
it-2 rau 245
Koikoi
Iehova Dirava ese hahediba hereva koikoidia e abi daemu taudia “lalodia baine haduhu,” unu amo “hereva koikoi bae abia dae” to dia Iesu Keriso sivaraina namona. (2Tes 2:9-12) Laḡani handred gunadiai, Israel edia King Ahaba ena siravai ese una e haheitalaia. Peroveta taudia koikoidia ese Ahaba e hamaoroa Ramoto-gilead ituari henina ai baine kwalimu, to Iehova ena peroveta tauna Mikaia na e gwa Ahaba na dika baine davari. Mikaia na matahanai amo e diba, Iehova ese lauma ta e ḡaukaralaia unu amo Ahaba ena peroveta taudia ese Ahaba bae “koia.” Anina na, ina lauma tauna na ena siahu baine ḡaukaralaia unu amo peroveta taudia na dia hereva momokani bae gwaurai, to edia ura herevadia bona Ahaba e ura baine kamonai herevadia bae gwaurai. Ena be Ahaba na e hadibaia, to ia ese unu peroveta taudia edia koikoi herevadia e abi dae bona una dainai ena mauri e haboioa.—1Han 22:1-38; 2Sis 18.
Dirava Ena Hereva Ba Tahua Namonamo
Helalo-Kerehai Momokani Anina be Dahaka?
4 Dokonai, Iehova ena haheauka karana Ahaba enai na e ore. Ia ese Elia e siaia Ahaba bona Iesebel ediai baine vara ḡauna e hamaorolaidia. Edia ruma bese ibounai na bae mase. Elia ena hereva ese Ahaba kudouna e gwadaia! Una hekokoroku tauna na sibona e “hahemanau.”—1 Han. 21:19-29.
5 Ena be una negai Ahaba na sibona e hahemanau, to gabeai ena kara ese e hahedinaraia ia na se helalo-kerehai momokani. Ena basileia amo Baal tomadihona na se kokia. Bona Iehova itomadiho henina karana na se habadaia. Ahaba na dala ma haida ai danu e hahedinaraia ia na se helalo-kerehai.
6 Gabeai, Ahaba ese Iuda pavapava namona Iehosafat e boiria, ia baine bamoa Suria taudia bae tuari henidia neganai, Iehosafat ese e hamaoroa Iehova ena peroveta tauna bae nanadaia guna. Matamanai, Ahaba na se ura una lalohadai baine abia dae, e gwa: “Tau ta do noho, iena amo Iehova ena hereva baitama tahua. . . . A lau ese na inai heniamu, badina be ia na nega ta ḡau namodia egu ai se perovetalai, a ḡau dikadia mo.” Ena be unu e gwau toma, to idia ese peroveta tauna Mikaia e hereva henia. Momokani, una peroveta tauna ese Ahaba enai baine vara ḡau dikadia e perovetalai! Gwau-edeede tauna Ahaba na Iehova ese ena dika baine gwauatao dalana se tahua, to una peroveta tauna na dibura ai e atoa. (1 Han. 22:7-9, 23, 27) Ena be Ahaba ese Iehova ena peroveta tauna e hadiburaia, to ienai e perovetalai herevadia na e ḡuḡuru. Gabeai e vara tuarina lalonai, Ahaba na e alaia.—1 Han. 22:34-38.
OCTOBER 24-30
DIRAVA ENA HEREVA ENA NAMO | 2 HANUA PAVAPAVADIA 1-2
“Haida Ihadibadia Karanai Haheitalai Namona Ba Hahedinaraia”
w15 4/15 rau 13 par. 15
Elda Taudia ese Haida Bae Treininidia Ḡaukara Bae Karaia Namonamo
15 Danu, Elia gabuna e abia tauna, Elisaia, ena sivarai ese e hahedinaraiamu, hari ina negai edena dala ai tadikaka ese mai edia ekspiriens eldadia bae matauraidia diba. Elia bona Elisaia na Ieriko ai peroveta oreana ta e vadivadia murinai, raruosi na Ioridane Sinavaina ela. Unuseniai, “Elia ese ena hahedoki badana e abia, e lokua, bena ranu e botalaia; bena ranu na e parara.” Tano kaukauna ai e raka hanai murinai, “idia na dounu e rakava bona e hereva-herevava.” Momokani, Elisaia na se lalo ia na da ḡau iboudiai mai dibana. To, ia ese Elia ena hereva iboudiai na e lalodiatao ela bona Elia na ia e rakatania. Bena Elia na koehirihiri amo e dae guba. Gabeai, Elisaia na Ioridane e lou lao bona Elia ena hahedoki badana amo ranu e botaia, eto: “Iehova, Elia ena Dirava, be edeseni ai?” Bona ranu na ma e parara.—2 Han. 2:8-14.
w15 4/15 rau 13 par. 16
Elda Taudia ese Haida Bae Treininidia Ḡaukara Bae Karaia Namonamo
16 Mani a laloa, Elisaia ese e karaia hoa karana ginigunana na Elia ese e karaia hoa karana ginigabena heḡereḡerena, ani? Dahaka dainai una baita laloa bada? Elisaia na se lalo hari ia na da ḡau momo e karamu dainai, ena ura heḡereḡerenai ḡau haida baine haidau diba. To, ia na Elia ese hesiai ḡaukara e karaia dalana e badinaia dainai, e hahedinaraia ia e hadibaia tauna na e matauraia bada, bona una ese peroveta taudia ma haida na e hagoadadia. (2 Han. 2:15) To, gabeai, Elisaia na laḡani 60 peroveta ḡaukarana e karaia lalonai, Iehova ese e durua hoa karadia momo e kara, Elia ena e hereaia. Una sivarai amo dahaka o dibamu?
Dirava Ena Hereva Ba Tahua Namonamo
w05 8/1 rau 9 par. 1
Baibul Bukana 2 Hanua Pavapavadia Ena Hereva Badadia
2:11—Elia be “koehirihiri amo e dae” edena “guba”? Ina na dia guba korikorina eiava Dirava bona ena aneru edia noho gabuna e herevalaia. (Deuteronomi 4:19; Salamo 11:4; Mataio 6:9; 18:10) Elia na e dae “guba,” una na lai e toamu bona manu e rohomu gabuna e herevalaia. (Salamo 78:26; Mataio 6:26) Lahi kariotana na tanobada e haḡeḡea hodahodana lalonai e heau, bona Elia e laohaia tanobada kahana ma ta ai, bona unuseni ai e nohova. Badina laḡani haida muridiai, Elia ese Iuda edia king Iehoram totona revareva ta e torea.—2 Sisiga 21:1, 12-15.
OCTOBER 31–NOVEMBER 6
DIRAVA ENA HEREVA ENA NAMO | 2 HANUA PAVAPAVADIA 3-4
“Natumu Avabia Isi”
“Dibagu . . . Ia Na Do Baine Tore Isi Lou”
7 Baibul ese e herevalaia toreisi lou iharuana na, Elia gabuna e abia peroveta tauna Elisaia ese e karaia. Suneme ai, Israel hahinena ta ese Elisaia e abia dae. Dirava ese una peroveta tauna ena amo una hahine bona adavana burukana e hanamodia bona natudia merona ta e vara. Laḡani haida muridiai, natudia na e mase. Mani sinana ena lalohisihisi a laloa. Ia na adavana ena amo gwaumaoro e abi murinai, kilomita 30 heḡereḡerena e laolao bona Karamela Ororona ai Elisaia e davaria. Peroveta tauna ese ena hesiai tauna Gehasi e siaia guna Suneme bainela. To Gehasi ese mase merona na se hamauria lou. Se daudau, mero sinana na Elisaia dekena ela.—2 Han. 4:8-31.
“Dibagu . . . Ia Na Do Baine Tore Isi Lou”
8 Suneme ai, Elisaia na mase tauanina e hekure daiutuna ai e raka vareai, bena e ḡuriḡuri. Hoa dalanai, mase merona na e mauri lou bona sinana ida e hedavari neganai, sinana na e moale dikadika! (2 Hanua Pavapavadia 4:32-37 ba duahi.) Reana ia ese e gabani hahinena Hana ena ḡuriḡuri herevana e laloa lou. Hana ese Samuel na dubu helaḡa e laohaia neganai, e ḡuriḡuri: “Iehova ese . . . mase taudia edia gabu ai e hakaudia dihomu bona e hakaudia daemu.” (1 Sam. 2:6) Dirava ese Suneme ai mero e hatorea isi lou neganai, e hamomokania Ia na mai ena siahu mase taudia baine hatoredia isi lou.
Dirava Ena Hereva Ba Tahua Namonamo
it-2 rau 697 par. 2
Peroveta Tauna
“Peroveta taudia natudia.” Buka ta ladana Gesenius’ Hebrew Grammar na e gwa (Oxford, 1952, p. 418), Heberu herevana ben (natuna) eiava benehʹ (natudia) anina na “grup eiava orea ta (o iduhu ta) ena memba taudia.” (Heḡereḡere Ne 3:8 ai, “muramura mai bonadia ibulodia taudia ta” anina na “muramura mai bonadia ibulodia tauna natuna ta.”) Una dainai, ina hereva “peroveta taudia natudia” anina na peroveta ḡaukarana bae karaia taudia e hadibadiava skulina ta eiava e ḡaukara hebouva peroveta oreana taudia e herevalaidia. Unu bamona peroveta oreana taudia na Betele, Ieriko, bona Gilgal ai e nohova. (2Ha 2:3, 5; 4:38; 1Sa 10:5, 10 ba haheḡereḡerea.) Samuel ese grup unu bamona ta na Rama ai e gunalaiava (1Sa 19:19, 20), bona Elisaia danu iena nega ai maduna unu bamona ta e huaiava. (2Ha 4:38; 6:1-3; 1Ha 18:13 ba haheḡereḡerea.) Baibul na e gwa unu tatau na sibodia edia noho rumadia e haginiva bona e abitorehai tuludia amo unu ruma e karava, una ese e hahedinaraiamu idia na dia kohu momo maurina e maurilaiava. Ena be nega momo gabu tamonai e nohova bona e aniani hebouva, to reana idia ta ta na asainmen e henidiava gabu haida ai peroveta ḡaukaradia bae kara totona.—1Ha 20:35-42; 2Ha 4:1, 2, 39; 6:1-7; 9:1, 2.