Mase Taudia be mai Edia Helaro, Eiava?

1. Mase taudia ediai be varamu sivaraina namona be dahaka?

Nega ta, Iesu do tanobada ai e nohova neganai, ia turana Lasaro e mase. Lasaro na Betania ai e nohova​—Betania bona Ierusalema padadia na dia daudau. Iesu na Betania ai e kau neganai, e kamonai Lasaro tauanina na dina 4 gara ai vada e mia. Iesu gara ela neganai, Lasaro taihuna raruosi, Mareta bona Maria, ese e bamoa. Nega sisina murinai, taunimanima hutuma e kau. Ina buklet ena laulau ai o itaiamu heḡereḡerena, Iesu ese Lasaro na mase amo e hatorea isi lou neganai, Mareta bona Maria na e moale dikadika, ani?​—Ioane 11:21-24, 38-44 duahidia.

Mareta na mase taudia ediai be varamu sivaraina namona na idaunegai mai dibana. Oibe, ia na mai dibana, nega ta be maimi, Iehova ese mase taudia baine hatoredia isi, bena tanobada ai bae noho lou.​—Iobu 14:14, 15 duahidia.

2. Mase taudia ediai be dahaka e varamu?

Dirava ese taunimanima na tano ḡahuna amo e karadia. (Genese 2:7; 3:19) Taunimanima na asi laumadia. Bona ta e masemu neganai, ia tauanina kahana iboudiai danu e masemu. Anina na, ia kwarana harana e masemu, bona ena lalohadai e oremu. Una dainai, Lasaro ese ena mase negana lalonai, ienai e vara ḡauna ta se herevalaia, badina mase taudia na ḡau ta asi dibadia.​—Salamo 146:4; Kohelete 9:5, 6, 10 duahidia.

Taunimanima e masemu murinai, Dirava ese lahi lalonai e hahisidiamu, a? Baibel ese e hahedinaraiamu, mase taudia na ḡau ta asi dibadia; una anina na, hel mai lahina (hellfire) lalohadaina na hahediba koikoina. Una lalohadai kererena dainai, taunimanima ese Dirava ladana e hadikaia kavamu. Lahi lalonai taunimanima e hisihisimu lalohadaina na Dirava ese e inai heniamu.​—Ieremia 7:31 duahia.

3. Mase taudia ese ita bae hereva henida diba, a?

Mase taudia na asie herevamu bona asie kamonaimu. (Salamo 115:17) To, kara havara anerudia haida na koikoi karadia e karamu, mase taudia toadia ai e hahelaomu, bena mauri taudia e hereva henidiamu. (2 Petro 2:4) To, Iehova ese mase taudia baita hereva henidia toho karana na e taravatua.​—Deuteronomi 18:10, 11 duahidia.

4. Daidia be mase amo bae toreisi lou?

Gara ai mamase taudia milioni momo, na mase amo bae toreisi lou, tanobada bae noholaia. Danu, Dirava asie dibaia taudia haida, bona kara dikadia e karava lalonai e mase taudia haida danu, bae toreisi lou.​—Salamo 37:9; Kara 24:15 duahidia.

Mase amo bae toreisi lou taudia ese Dirava ena sivarai momokanina bae stadilaia, bona Iesu ibadinana o iabidadama henina karadia bae kara. (Apokalupo 20:11-13) Unu toreisi lou taudia ese kara namodia bae kara neganai, idia na tanobada ai mauri hanaihanai bae moalelaia diba.​—Ioane 5:28, 29 duahidia.

5. Toreisi lou helarona ese Iehova be ede herevalaia tomamu?

Mase taudia mai edia helaro badina binai: Dirava ese Natuna e siaia, ita daidai e mase. Una helaro dainai ta dibamu, Iehova na lalokau bona hariharibada Diravana. Mase taudia bae toreisi lou neganai, oi be o uramu daika ba hedavari henia?​—Ioane 3:16; Roma 6:23 duahidia.