Dirava Ena Basileia Bainema Neganai, Dahaka Baine Haoredia?

1, 2. (a) Edena dalai ina nega oromana dikana na bae hamasea raskol tauna dikana ida baita haheḡereḡeredia? (Rau 9 ai laulau ba itaia.) (b) Ina nega oromana dikana baine ore neganai, guba bona tanobada taudia edia hemami be ede bamona?

MANI a laloa, raskol tauna dikana ta na kota ese e hahemaoro henia ia na bae hamasea. Hari, ia na gadi taudia ese e laohaiamu bae hamasea gabuna. Ena be una raskol tauna na mauri bona se gorerea, to ia na vada be masemu.

² Ina tanobada oromana dikana na una bae hamasea raskol tauna dikana heḡereḡerena. Idaunegai Dirava ese vada e hahemaoro henia, kahirakahira be haoreamu. Baibul na e gwaumu: “Tanobada na baine lao bubuni.” (1 Ioa. 2:17) Ina nega oromana dikana na be ore momokanimu. To, ina tanobada oromana ihaorena karana bona raskol tauna dikana ihamasena karana na idau. Raskol tauna dikana ihamasena karana ai, reana haida na be gwaumu una hahemaoro karana na kerere, eiava be laloamu una hahemaoro karana bae haidaua na namo. To, ina tanobada oromana dikana ihahemaoro henina karana na ḡau iboudiai e havaradia Diravana ese vada e karaia. (Deu. 32:4) Tau ta o ḡau ta ese una na basine haidaua diba, bona una tanobada oromana dikana baine haorea karana na ta ese basine daradaralaia. Tanobada oromana dikana baine ore neganai, guba taudia bona tanobada taudia na bae abia dae momokani Dirava ena hahemaoro karana na maoromaoro. Bona iboudiai na bae moale hisidae!

3. Dirava ena Basileia bainema neganai, ededia ḡau hani be haorediamu?

³ To, ‘tanobada baine lao bubuni’ anina be dahaka ? Hari ina negai taunimanima ese e laloamu tanobada ai bae mia hanaihanai ḡaudia iboudiai bae ore vaitani. Una be sivarai dikana, a? Lasi! To una na “Basileia sivaraina namona” kahana badana ta. (Mat. 24:14) Una dainai, Basileia bainema neganai baine haoredia ḡaudia mani aita lalodia. Ita ese ḡau hani baita herevalaimu: Kara dika taudia, orea dikadia, kara kereredia, bona eda mauri dalana e hadikaiamu ḡaudia. Ini ḡau ta ta baita herevalaimu neganai, baita itaiamu (1) hari ina negai unu ḡau ese ita be ede e hahisida tomamu, (2) Iehova be dahaka be karamu, bona (3) edena dalai unu ḡau na ḡau namodia ese gabudia be abimu?

KARA DIKA TAUDIA

4. Hari ina negai kara dika taudia ese ita be ede e hahisida tomamu?

⁴ Hari ina negai kara dika taudia ese ita be ede e hahisida tomamu? Aposetolo Paulo na e peroveta ina dina gabedia ai “nega dikadia do bae vara,” bena ma eto: “Kara dika taudia bona koikoi taudia ese edia kara dika bona koikoi bae habada.” (2 Tim. 3:1-5, 13) Unu peroveta herevadia be e ḡuḡurumu, a? Ita momo na kara dika taudia ese e hahisidamu, heḡereḡere daḡedaḡe taudia, haida e inai henidiamu taudia, bona raskol taudia. Idia haida edia kara dikadia na dia hehuni ai e karamu; haida be taunimanima vairadiai e kara maoromaoromu, to hehuni ai edia kara na didika. Ena be unu kara dika taudia ese ita na se hahisidamu, to edia kara dainai ta hisihisimu. Edia kara dikadia sivaraidia ta kamonaimu neganai asita moalemu. Idia ese natu, burukadia, bona asi idurudia taudia e hahisidiamu daladia ta itamu neganai, ta garimu. E karamu karadia na vaitani animal bona demoni edia kara. (Iak. 3:15) To ita na ta moalemu, badina Iehova ena Hereva amo sivarai namodia ta kamonaimu, dia sivarai dikadia.

5. (a) Kara dika taudia ta ta na mai edia dala dahaka bae kara? (b) Asie uramu edia kara bae haidau taudia ediai dahaka be varamu?

⁵ Iehova be dahaka be karamu? Hari, Iehova ese kara dika taudia na nega e henidiamu edia kara bae haidau totona. (Isa. 55:7) Idia ese edia hahemaoro ginigabena na do asie abia. Ina tanobada oromana dokona hari Dirava ese vada e hahemaoro henia. To Ina nega oromana dikana bae durua ela bona hisihisi badana negana bona edia kara basie haidau taudia ediai be dahaka be varamu? Iehova na e gwauhamata kara dika taudia na tanobada amo baine kokidia. (Salamo 37:10 ba duahia.) Reana kara dika taudia na be laloamu idia ediai una na basine varamu. Hari ina negai momo ese e karamu kara dikadia na e hunidiamu dainai, nega momo asie hahemaoro henidiamu. (Iobu 21:7, 9) To, Baibul na e gwaumu: “[Dirava] ese taunimanima ta ena dala e itaia taomu, ia aena daḡadia iboudiai e itadiamu. Asi gabu vaburana eiava diburana ta mia, kara dika taudia na bae komu.” (Iobu 34:21, 22) Iehova Dirava vairanai ta na basine hehuni diba. Koikoi taudia ese Ia na basie koia diba; bona ena be gabu diburana ai baita hehunimu, to Dirava ese ḡau iboudiai na e itadia ḡoevaḡoevamu. Aramagedono murinai, kara dika taudia e nohova gabudia baita tahumu, to basita davaridiamu. Idia na be ore vaitanimu!—Sal. 37:12-15.

6. Daidia ese kara dika taudia gabudia be abimu, bona dahaka dainai una na sivarai namona?

⁶ Daidia ese kara dika taudia gabudia be abimu? Iehova na e gwauhamata, eto: “Manau taudia ese tano bae abia; maino ena harihari-bada idia ese bae moalelaia.” Gabeai salamo na ma ini e gwau toma: “Kara maoromaoro taudia ese tano bae abia, bae noholaia hanaihanai.” (Sal. 37:11, 29) “Manau” bona “kara maoromaoro” taudia be daidia? Manau taudia na mai manaudia ida Iehova ena hahediba herevadia bona ena hahekau daladia e abi daemu taudia; kara maoromaoro taudia na Iehova Dirava matanai kara maoromaoro e ura heniamu taudia. Hari ina tanobada ai, kara dika taudia edia numera ese kara maoromaoro taudia edia na e hereaia. To tanobada matamatana ai, manau bona kara maoromaoro taudia sibodia mo be nohomu. Bona idia ese tanobada na paradaiso ai be halaoamu!

OREA DIKADIA

7. Hari ina negai orea dikadia ese ita be ede e hahisida tomamu?

⁷ Hari ina negai orea dikadia ese ita be ede e hahisida tomamu? Ina tanobada ai kara dika momo na orea idauidau ese e havaramu, dia taunimanima. Heḡereḡere, tomadiho oreadia ese Dirava na e sivarailaia koikoimu, eiava e gwaumu Baibul na basita abidadama henia, eiava e laloamu tanobada bona taunimanima edia vaira nega herevadia na koikoi, bona ma ḡau haida danu, unu amo idia ese taunimanima momo e hakaudia kereremu. Danu gavamani ese tuari bona inai heheni karadia e durudiamu, una dainai ogoḡami taudia na e hisihisimu. Bona idia ese koikoi dalanai moni e henimu (bribery), eiava haida mo e kara namo henidiamu. Danu, mataḡaniḡani bisnes oreadia ese tano bona hodahoda e hamirodiamu, davara bona tano ai e miamu ḡaudia e hadikadiamu, bona moni bada e uramu bae abi dainai taunimanima e koidiamu to momo na e ogoḡamimu. Una dainai baita gwau dibamu, orea dikadia ese ina tanobada ai hisihisi momo e havaramu.

8. Baibul ena hereva heḡereḡerena, orea goadadia ediai be dahaka be varamu?

⁸ Iehova be dahaka be karamu? Tanobada gavamanidia ese tomadiho orea koikoidia iboudiai—ariara hahinena ese e laulaulaia ḡauna, ladana Babulono Badana—baine tuari henidia neganai, hisihisi badana baine matama. (Apok. 17:1, 2, 16; 18:1-4) Unu tomadiho orea koikoidia na be haoredia vaitanimu. To, orea dikadia ma haida ediai be dahaka be varamu? Baibul ese unu orea momo edia goada na ororo bona motumotu ida e haheḡereḡeredia. (Apokalupo 6:14 ba duahia.) To Baibul na ma e peroveta, Dirava ese gavamani bona edia orea iboudiai na baine haheudeheudedia. Hisihisi badana dokona ai, tanobada gavamanidia bona Dirava ena Basileia asie uramu bae durua taudia iboudiai na be haoredia vaitanimu. (Ier. 25:31-33) Una murinai, orea dikana ta ma basine nohomu!

9. Dahaka dainai ta dibamu tanobada matamatana ai ḡau iboudiai na be heau namonamomu?

⁹ Dahaka ese orea dikadia gabudia be abimu? Aramagedono murinai, tanobada ai orea ma ta be nohomu, eiava? Baibul na e gwaumu: “Ita na guba matamatana bona tanobada matamatana, ena gwauhamata heḡereḡerena, ta narimu; kara maoromaoro taudia ese bae noholaia.” (2 Pet. 3:13) Guba bona tanobada gunadia, unu na gavamani dikadia bona e biagudiamu oreadia, na bae ore vaitani. Dahaka ese gabudia be abimu? Ina hereva “guba matamatana bona tanobada matamatana” anina na gavamani matamatana ta bona una gavamani ese be lohiadiamu taudia e herevalaidiamu. Iesu Keriso ese be lohiaiamu Basileiana ese Iehova Dirava, ḡau iboudiai e kara namonamomu Diravana, ena kara be hahedinaraia ḡoevaḡoevamu. (1 Kor. 14:33, NWT) Unai dainai “tanobada matamatana” ai ḡau iboudiai na be heau namonamomu. Tatau namodia haida ese unu ḡaukara be naridiamu. (Sal. 45:16) Idia na Keriso bona ia ida bae lohia 144,000 taudia ese be gunalaidiamu. Mani a laloa, orea dikadia iboudiai na be oremu bona gabudia ai orea namona tamona sibona be nohomu, bona ta ese basine hadikaia dibamu!

KARA KEREREDIA

10. Emu gabu ai ededia kara kereredia na e vara momomu, bona edena dalai una ese oi bona emu ruma bese e hahisimuimu?

¹⁰ Hari ina negai kara kereredia ese ita be ede e hahisida tomamu? Ita na kara dika amo e honu tanobadana lalonai ta nohomu. Matabodaḡa, koikoi, bona daḡedaḡe karadia na bada herea. Unu kara dikadia daidiai tama sina na e hekwarahimu natudia bae gimadia. Televisen, muvi bona miusiki e karamu taudia ese kara dikadia na ḡau namodia ai e halaodiamu to Iehova ena taravatu maoro bona kerere ai, na ḡau asi anina ai e halaoamu. (Isa. 5:20) Kristen taudia korikoridia na e hekwarahimu unu kara bae dadarai. Idia na Dirava ibadinana karana bae gimaia totona, e ḡaukara goadamu Iehova ena taravatu asie matauraiamu karadia bae dadaraidia.

11. Iehova ese Sodoma bona Gomora e hahemaoro henidia karana amo dahaka ta dibamu?

¹¹ Iehova be dahaka be karamu? Dirava ese Sodoma bona Gomora edia kara dikadia dainai e karaia karana mani a laloa. (2 Petro 2:6-8 ba duahia.) Kara maoromaoro tauna Lot bona ena ruma bese na e hisihisiva badina kara dika taudia bogaraḡidiai e nohova. Iehova ese unu hanua e hadikadia ore neganai, unuseniai e karava kara kereredia iboudiai e haoredia vaitani. To danu, una e karaia badina ta na, hari ina negai “ia garina basie gari taudia matadia ihakanidia.” Iehova ese una nega ai kara kereredia iboudiai e haoredia vaitani, una heḡereḡerena, Ia ese ina nega oromana dikana baine haorea neganai, kara kereredia iboudiai baine haoredia.

12. Ina nega oromana dikana be oremu neganai, oi be dahaka ḡaukara namodia haida o uramu ba kara?

¹² Dahaka ese kara kereredia gabudia be abimu? Tanobada Paradaisona ai ḡaukara namodia momo baita moalelaimu. Mani a laloa, ita na mai moaleda ida tanobada na paradaiso ai baita halaoamu, eiava ita siboda bona eda lalokau taudia daidiai ruma baita haginimu. Danu, toreisi lou taudia baita hedavari henidiamu bona Iehova ena dala bona taunimanima e kara henidia sivaraidia baita hadibalaidiamu. (Isa. 65:21, 22; Kara 24:15) Una negai ḡaukara namodia momo baita karamu dainai baita moalemu bona Iehova baita hanamoamu!

EDA MAURI DALANA E HADIKAIAMU ḠAUDIA

13. Satana, Adam, bona Heva edia gwau-edeede karana dainai, hari tanobada ai be dahaka e varamu?

¹³ Hari ina negai mauri dalana e hadikaiamu ḡaudia ese ita be ede e hahisida tomamu? Kara dika taudia, orea dikadia, bona kara kereredia ese eda mauri dalana na e hadikaiamu. Tuari, ogoḡami, heinai heheni karadia, gorere bona mase ese ita iboudai eda mauri dalana na e hadikaiamu, ani? Unu iboudiai e varamu badina Satana, Adam, bona Heva ese Iehova e gwau-edeede henia. Hari, ita iboudai na idia edia gwau-edeede karana ese e havara hisihisidia amo basita heau mauri diba.

14. Eda mauri e hadikaiamu ḡaudia dainai Iehova be dahaka be karamu? Haheitalai ta mani a gwauraia.

¹⁴ Iehova be dahaka be karamu? Mani tuari a lalodia. Iehova na e gwauhamata tuari baine hadokodia vaitani. (Salamo 46:8, 9 ba duahia.) Ia ese gorere be haoreamu. (Isa. 33:24) Mase be haoreamu vaitanimu! (Isa. 25:8) Bona ogoḡami danu be haoreamu. (Sal. 72:12-16) Ia ese hari ina negai eda mauri e hadikaiamu ḡaudia iboudiai danu baine haoredia. Danu Ia ese ina tanobada ena “hodahoda” dikana, una na Satana bona ena demoni ese e havaraiamu lalohadai dikana, na baine haorea.—Efe. 2:2, NWT.

15. Aramagedono murinai dahaka ḡau haida na be ore vaitanimu?

¹⁵ Tanobada ai tuari, gorere bona mase be oremu negana mani a laloa. Una nega ai ami, neivi, bona tuari peleinidia na lasi! Tuari kohudia bona soldia edia gara gabudia na lasi. Danu hospital, dokta, nesi, health insurance, mogi, funeral home bona gara gabudia na basie nohomu! Bona taravatu utu karadia na be oremu dainai, sekiriti edia kampani, alarm system, bona pulisi taudia na lasi, reana loka bona ki danu lasi! Mani a laloa, lalohekwarahi e havaramu ḡaudia iboudiai na be ore vaitanimu.

16, 17. (a) Aramagedono amo bae roho mauri taudia edia hemami be ede bamona? Haheitalai mani a gwauraia. (b) Ede ta diba tomamu ina tanobada oromana dikana baine ore neganai baita roho mauri diba?

¹⁶ Hekwakwanai iboudiai be oremu neganai, mauri be ede be hetomu? Reana mauri na be namo hereamu. Ita na ina tanobada dikana lalonai vada tame noho daudau dainai, basita laloamu ita na e varamu ḡaudia ese e hahisidamu. Ini aita haheitalaia toma, airport badinai e nohomu taudia ese reḡe na basie laloamu, bona momoru nege gabuna badinai e nohomu taudia ese momoru bonadia na basie lalomu. To, Dirava ese ḡau dikadia iboudiai be kokimu neganai, mauri na be namo hereamu!

¹⁷ Hari ta mamimu hisihisidia be oremu neganai dahaka be varamu? Salamo 37:11 ese una e haerelaia, eto: “Maino ena harihari-bada idia ese bae moalelaia.” Una hereva dainai o moalemu, ani? Iehova na e uramu oi na ba moale. Una dainai, ina metau negana lalonai, namona na ba ḡaukara goada Iehova Dirava bona ena orea ba badinadia! Emu helaro ba dogoatao auka, ba laloa dobu, daramu bona kudoumu ai bavabia dae momokani, bona ma haida ediai ba herevalaia! (1 Tim. 4:15, 16; 1 Pet. 3:15) Unu amo Dirava ese ina tanobada oromana dikana baine haorea neganai, ba roho mauri diba. Bena, mai moalemu ida ba mauri ela bona hanaihanai!