Oi Mai Dibamu, A?

Etiopia eunuko tauna be edena kariota amo e laova lalonai Filipo e kau?

INA hereva “kariota” na New World Translation ai Grik gado herevana ta amo e abia bona anina na kariota idauidau. (Apos. 8:​28, 29, 38) Reana Etiopia tauna ese e ḡaukaralaia kariotana na bada, dia tuari o reisi ai e ḡaukaralaiava kariotana. Dahaka dainai? Mani badi haida aita herevalai.

Etiopia tauna na dagi bada tauna ta bona gabu daudau e laolao. Ia na “Etiopia pavapavana hahinena ena kohu ireḡuna tauna.” (Apos. 8:27) Etiopia gunana ena teritori lalonai na ina nega Sudan bona Egypt ena saot kahana. Etiopia tauna ena laolao ibounai lalonai, reana ia na dia kariota tamona e ḡaukaralaia, badina ena laolao na daudau bona ena kohu danu momo. Kristen ginigunadia edia nega ai, taunimanima e udadiava kariotadia haida wilidia na foa. Buka ta (Acts—An Exegetical Commentary) na e gwa: “Kariota unu bamodia ai kohu momo ba uda diba, laolao na ba moalelaia diba, bona gabu daudau ba heaua diba.”

Etiopia tauna na e duahiduahiva lalonai Filipo e kau. Baibul na e gwaumu: “Filipo e heau lao, e kamonai, [Eunuko tauna na] Isaia peroveta tauna ena buka e duahiava.” (Apos. 8:30) Laolao ai e ḡaukaralaiva kariotadia e karadia na basie heau haraḡaharaḡa. Una dainai Eunuko tauna na mai ena nega baine duahiduahi, bona Filipo danu e raka ela bona eunuko tauna enai e kau.

Etiopia tauna ese “Filipo e noia, baine gui, dekenai baine helai.” (Apos. 8:31) Reisi kariotadia ai e guiva taudia na e giniva. To laolao kariotadia na mai helai ḡaudia dainai, Eunuko tauna bona Filipo na e helai.

Aposetolo Edia Kara karoa 8 bona histori sivaraidia daidiai, vanegai eda pablikeisen laulaudia ai e hahedinaraia Etiopia eunuko tauna na kariota badana ta ai e gui, dia tuari o reisi kariotana ta ai.