Zot Inn Gagne la Vie Sauve Parski Zot Ti Prend Compte Bann Warning
JÉSUS CHRIST ti prédire la fin système Juif ek so centre l’adoration, c’est-à-dire le temple à Jérusalem. Li pa ti donne enn date kan sa ti pou arrivé. Mais li ti décrire bann événements ki ti pou amenn ziska sa destruction-la. Li ti conseil so bann disciples pou contigne veillé ek pou quitte sa zone dangereux kot zot ti été-la.
Jésus ti prédire: “Kan zot trouve Jérusalem entouré par bann l’armée tout autour, zot pou koné ki so destruction finn approché.” Li ti dire aussi: “Kan zot trouve sa kitsoz dégoutant ki cause beaucoup douleur-la, . . . dans l’endroit sacré, . . . eh bien tou bann ki dans Judée bizin sauvé, al dans montagne.” Jésus ti conseille so bann disciples pa retourné pou rode sauve zot dibien. Pou gagne la vie sauve, zot ti bizin sauvé sans tardé.—Luc 21:20, 21; Matthieu 24:15, 16.
Pou mette fin à enn révolte ki’nn duré pendant assez longtemps, Cestius Gallus ti monte kont Jérusalem avec so l’armée, en l’an 66 N.L. Li ti mem rentre dans la ville, ek so l’armée ti entoure le temple. Jérusalem ti vrémem dans enn situation critique. Bann ki ti contigne veillé ti kapav trouvé ki enn grand malheur ti pré pou arrivé. Mais eski ti éna kit possibilité pou sauvé? Eh bien enn kitsoz étonnant ti arrivé; Cestius Gallus ek so l’armée ti quitte Jérusalem, zot ti allé. Bann rebelles Juif ti poursuive zot. Asterlà, ti’nn arive l’heure pou quitte Jérusalem ek toute la Judée!
Mais l’année après, bann Romains ti retourné, dirigé par Vespasien ek so garçon Titus. Partout ti éna la guerre dans pays-la. Au commencement l’an 70 N.L., bann Romains ti encerclé Jérusalem avec enn barrage ki ti construire avec bann poteaux pointe. Ti impossible pou sauvé! (Luc 19:43, 44) Dans la ville, bann ti groupe habitants ti pé massacré zot entre zotmem. Ek lézot, bann Romains finn soit touye zot, soit amène zot en captivité. Jérusalem ek so temple ti détruire complètement. Selon Joseph, enn historien Juif dans premier siècle, plus ki enn million Juifs ti souffert ek ti trouve la mort. Et depuis sa, jamais encore pa finn reconstruire sa temple-la.
Si bann Chrétiens ti encore dans Jérusalem en l’an 70 N.L., zot ti pou soit perdi la vie, soit al en esclavage. Mais, bann ancien historiens raconté ki bann Chrétiens ti prend compte l’avertissement Bondié. Zot ti quitte Jérusalem ek toute la Judée, et zot ti al dans montagnes, dans l’est la Rivière Jourdain. Certains parmi zot ti al reste Pella, enn région dans province Pérée. Zot ti abandonne Juda, et jamais zot pa ti retourne là-bas. Oui, parski zot finn prend bien compte l’avertissement Jésus, zot ti gagne la vie sauve.
Eski Ou Pé Écoute Bann Vrai Warning Ki Nou Pé Gagné?
À force gagne bann fausse alertes, beaucoup dimoune éna tendance pou néglige bann avertissements. Mais kan nou écoute bann avertissements, sa kapav sauve nou la-vie.
En 1975, bann Chinois ti gagne warning ki ti pou éna enn tremblement de terre. Bann responsables ti prend bann mesures ki bizin, ek dimoune ti écoute bann avertissements. Résultat: Plusieurs milliers dimoune ti gagne la vie sauve.
En Avril 1991, bann villageois ki ti reste lor flanc Montagne Pinatubo en Philippines, ti informe bann l’autorités ki montagne-la ti pé crache difé ek la cendre. Après ki zot finn suive la situation de-près pendant deux mois, l’Institut philippin de volcanologie et de sismologie finn averti bann dimoune ki éna enn gros danger. Sans perdi le temps, environ 35,000 dimoune finn bizin quitte sa zone dangereux-la. Le 15 Juin, bonèr gramatin, finn éna enn explosion bien violent. Sa finn projette plus ki 8 milliards tonnes la-cendre ek lézot particules dans l’air, ek lor bann villages à côté. Parski zot finn prend compte l’avertissement, plusieur milliers dimoune finn sapé.
La Bible pé donne nou bann avertissements en rapport avec la fin sa lé-monde-la. Zordi, nou pé vive dans bann dernier jours. À mesure ki la fin pé approché, eski ou pé contigne veillé? Eski ou pé prend bann mesures nécessaire pou sorti dans zone dangereux? Conscient ki pa reste beaucoup lé-temps, eski ou pé averti lézot pou faire pareil?
[Zimage, page 20]
Kan Montagne Pinatubo ti crache la cendre, beaucoup ti gagne la vie sauve parski zot ti écoute l’avertissement
[Zimage, page 21]
Bann Chrétiens ki ti écoute l’avertissement Jésus, ti sapé kan Jérusalem ti détruire en l’an 70 N.L.