Organize pou Servi “Bondie Lape”

1, 2. Ki sanzman ti ena an rapor avek Latour Degard an Zanvie 1895, ek kouma bann frer ti reazir?

KAN John Bohnet, enn Etidian Labib bien zele, ti gagn so Latour Degard Zanvie 1895, seki li ti trouve ti fer li extra kontan. Sa peryodik-la ti ena enn nouvo kouvertir​—ti ena zimaz enn far lor enn latour anfas enn lamer demonte, ek sa far-la ti pe avoy so lekleraz dan enn lesiel nwar. Konsernan sa nouvo kouvertir-la, ti ena enn lanons dan sa peryodik-la ki ti apel “Enn Nouvo Prezantasion.”

² Frer Bohnet ti bien inpresione par sa kouvertir-la ek li ti avoy enn let Frer Russell. Li ti ekrir: “Mo bien kontan pou trouve ki Latour Degard inn vinn bien zoli.” Enn lot Etidian Labib bien fidel, John Brown, ti ekrir konsernan sa kouvertir-la: “Li bien atiran. Sa latour-la vremem pe tini lor enn fondasion solid, pandan ki bann vag ek bann tanpet pe tap lor li.” Sa nouvo kouvertir-la, se premie sanzman ki nou bann frer ti trouve sa lane-la, me se pa dernie sanzman ki ti ena. An Novam, ti ena enn lot gran sanzman. Ankor enn fwa, sa sanzman-la ti inplik enn lamer demonte.

3, 4. Lor ki problem Latour Degard 15 Novam 1895 ti koze, ek ki gran sanzman ti anonse?

³ Dan Latour Degard 15 Novam 1895, ti ena enn long lartik ki ti koz lor enn problem. Parey kouma enn lamer demonte, sa problem-la ti pe trouble lape dan lorganizasion bann Etidian Labib. Pli ale bann frer ti pe diskite pou kone kisannla ti bizin diriz kongregasion. Pou ed bann frer konpran seki zot ti bizin fer pou koriz sa rivalite ki ti pe diviz zot la, sa lartik-la ti konpar lorganizasion ar enn bato. Apre sa, li ti dir bien fran ki bann frer responsab pa ti’nn prepar sa bato-la pou fer fas ar bann tanpet. Ki ti bizin fer?

⁴ Sa lartik-la ti fer remarke ki enn bon kapitenn fer sir ki lor so bato ena bann lekipman sovtaz ek ki bann manb lekipaz pre pou ferm bann lakal bato kan ena enn tanpet. Li parey osi avek bann frer responsab dan lorganizasion, zot ti bizin fer sir ki tou bann kongregasion bien prepare pou fer fas ar bann kondision difisil ki parey kouma bann tanpet. Pou fer sa, sa lartik-la ti anonse ki ti pou ena enn gran sanzman. Li ti dir ki san tarde, “sak konpagni bizin swazir bann ansien” pou “‘vey’ lor troupo [Bondie].”​—Actes 20:28.

5. (a) Kifer sa premie dispozision ki konsern bann ansien-la ti enn progre inportan? (b) Ki bann kestion nou pou examine?

⁵ Sa premie dispozision ki konsern bann ansien-la ti enn progre inportan pou ki kongregasion bien organize ek stab. Sa ti ed bann frer pou fer fas ar bann leprev ki ti arive avek Premie Lager Mondial. Dan bann lane apre, bann lezot ameliorasion dan fason ki organiz bann kongregasion, ti ed bann serviter Jéhovah pou zot kapav servi Li pli bien. Ki profesi Labib ti anons sa ameliorasion-la? Ki bann sanzman ou finn trouve dan lorganizasion? Ki bann bienfe ou finn gagne gras-a sa bann sanzman-la?

“Mo Pou Fer Lape Vinn Zot Bann Sirveyan”

6, 7. (a) Ki Isaïe 60:17 vedir? (b) Kan Isaïe mansionn “bann sirveyan” ek ‘bann ki donn travay forse,’ ki sa montre?

⁶ Parey kouma nou ti trouve dan Sapit 9, Isaïe ti anonse ki Jéhovah ti pou beni so pep kan Li ti pou fer li konn enn gran lakrwasman. (Is. 60:22) Selman, Jéhovah ti promet ki Li ti pou fer plis ki sa. Dan mem profesi, Li ti dir: “Dan plas kwiv, mo pou amenn lor, ek dan plas feray mo pou amenn larzan, dan plas dibwa, mo pou amenn kwiv ek dan plas bann ros, mo pou amenn feray; ek mo pou fer lape vinn zot bann sirveyan ek lazistis pou vinn kouma bann ki donn zot travay forse.” (Is. 60:17) Ki sa profesi vedir? Kouma sa konsern nou zordi?

⁷ Profesi Isaïe montre ki ti pou ranplas enn materyo par enn lot. Me remarke ki ti ena bann sanzman, pa ti pou ranplas enn move materyo par enn seki bon, me ti pou ranplas enn bon materyo par enn ki pli bon. Ranplas kwiv ar lor, se enn ameliorasion, parey osi pou bann lezot materyo ki mansione. Alor, avek sa lexanp-la, Jéhovah ti anonse ki kondision so pep ti pou ameliore tigit par tigit. Ki kalite ameliorasion sa profesi-la anonse? Kan sa profesi-la mansionn “bann sirveyan” ek ‘bann ki donn travay forse,’ Jéhovah ti montre ki, tigit par tigit, ti pou ena bann ameliorasion dan fason ki bann ansien ti pou pran swin so pep ek dan fason ki so bann serviter ti pou organize.

8. (a) Kisannla ki fer bann ameliorasion ki mansione dan profesi Isaïe? (b) Ki bann bienfe nou gagne ar bann ameliorasion? (Get osi lankadre “Li Ti Aksepte Disiplinn Avek Imilite.”)

⁸ Kisannla ki fer sa bann ameliorasion-la? Jéhovah dir: “Mo pou amenn lor, . . . Mo pou amenn larzan, . . . ek Mo pou fer lape.” Wi, se Jéhovah Limem, pa bann dimounn, ki finn fer bann ameliorasion dan fason ki organiz bann kongregasion. Ek depi ki Jésus inn vinn Lerwa, Jéhovah inn servi So garson pou fer sa bann ameliorasion-la. Ki bienfe nou gagne ar sa bann sanzman-la? Mem verse dir ki sa bann ameliorasion-la prodir “lape” ek “lazistis.” Amezir ki nou aksepte direksion Bondie ek nou fer bann sanzman, ena lape ant nou ek lamour pou lazistis pous nou pou servi Jéhovah, ki Paul ti dekrir kouma enn “Bondie lape.”​—Phil. 4:9.

9. Lor ki kitsoz lord ek linite ki ena dan bann kongregasion baze, ek kifer?

⁹ Konsernan Jéhovah, Paul ti ekrir: “Bondie, Li pa enn Bondie dezord, me enn Bondie lape.” (1 Cor. 14:33) Remarke ki Paul pa ti fer kontrast ant dezord ek lord, me ant dezord ek lape. Kifer? Reflesi lor la: Pa parski ena lord ki sa touletan prodir lape. Par exanp, enn group solda kapav mars an ord, me zot al fer lager, pa lape. Alor, antan ki Kretien, nou anvi rapel sa pwin inportan-la: Ninport ki lorganizasion ki pa baze lor lape, pa pou tini debout lontan. Parkont, lape ki Bondie done favoriz lord, enn lord ki dire pou touletan. Alor, nou bien rekonesan ki nou lorganizasion dirize ek pirifie par enn “Bondie ki donn lape”! (Rom. 15:33) Lord ek linite ki ena dan bann kongregasion atraver lemond, baze lor lape ki Bondie done.​—Ps. 29:11.

10. (a) Ki bann ameliorasion finn ena dan lorganizasion dan bann premie lane? (Get lankadre “Kouma Fason ki Diriz Kongregasion Ti Ameliore?”) (b) Ki bann kestion nou pou examine asterla?

¹⁰ Lankadre “Kouma Fason ki Diriz Kongregasion Ti Ameliore” montre bann sanzman teokratik ki finn fer dan nou lorganizasion, dan bann premie lane. Isaïe ti dir ki pou ‘ranplas kwiv par lor,’ setadir ki pou ena bann sanzman. Me ki bann sanzman Jéhovah inn fer dan nou lepok atraver nou Lerwa? Kouma bann sanzman dan fason ki diriz kongregasion finn favoriz lape ek linite dan bann kongregasion atraver lemond? Kouma sa bann sanzman-la ed ou personelman pou servi “Bondie lape”?

Kouma Christ Diriz Kongregasion?

11. (a) Ki bann frer ti konpran pli bien kan zot ti examinn Labib? (b) Ki bann frer komite santral ti bien deside pou fer?

¹¹ Depi 1964 ziska 1971, komite santral ti siperviz enn gran letid ki baze lor Labib pou kone kouma kongregasion Kretien ti fonksione dan premie siek, ek osi lor boukou lezot size.a Sa letid-la ti montre ki dan domenn lorganizasion, bann kongregasion dan premie siek ti dirize par enn komite bann ansien olie ki zis par enn sel ansien ouswa enn sirveyan. (Lir Philippiens 1:1; 1 Timothée 4:14.) Kan komite santral ti bien konpran sa pwin-la, zot ti kone ki Jésus, zot Lerwa, ti pe gid zot dan fason pou organiz pep Bondie​—ek bann frer dan komite santral ti bien deside pou soumet zot ar direksion zot Lerwa. Deswit, zot ti fer bann sanzman pou swiv model ki ena dan Labib konsernan fason ki ti etabli bann ansien. Ki sertin sanzman zot finn fer dan koumansman bann lane 1970?

12. (a) Ki sanzman ti ena dan komite santral? (b) Kouma Komite Santral organize zordi? (Get lankadre “Bann Responsabilite ki Komite Santral Ena,” paz 130.)

¹² Premie sanzman ti konsern komite santral. Sa lepok-la, dan komite santral ti ena set frer ki ena lesperans pou al dan lesiel. Zot ti osi responsab pou diriz Watch Tower Bible and Tract Society of Pennsylvania. Selman, an 1971, olie ki ti ena zis set frer, ti ena 11 frer dan komite santral ek zot ti nepli diriz Sosiete Watch Tower. Tou bann manb komite santral ti konsidere ki zot tou egal ek sakenn so tour ti prezidan pandan enn an, dapre zot nom, dan lord alfabetik.

13. (a) Ki dispozision ti ena pandan 40 an? (b) Ki Komite Santral ti fer an 1972?

¹³ Ti ena enn lot sanzman ki ti konsern sak kongregasion. Ki sa sanzman-la? Depi 1932 ziska 1972, se zis enn sel frer ki ti responsab kongregasion. Ziska 1936, ti apel sa frer-la direkter servis. Apre, ti sanz so nom pou apel li serviter konpagni, apre sa, ti apel li serviter kongregasion, ek finalman, sirveyan kongregasion. Sa bann frer-la ti bien pran swin spiritialite troupo Bondie. An zeneral, sirveyan kongregasion ti pran bann desizion ki konsern kongregasion san ki li ti demann bann lezot ansien ki zot ti panse. Me, an 1972, Komite Santral ti prepar bann frer pou enn gran sanzman. Ki sa sanzman-la ti inplike?

14. (a) Ki nouvo dispozision bann frer ti pran le 1^e Oktob 1972? (b) Kouma kordinater komite bann ansien aplik konsey ki trouv dan Philippiens 2:3?

¹⁴ Olie ki enn sel frer ti sirveyan dan sak kongregasion, lezot frer, ki ti ranpli bann kondision ki ena dan Labib, ti pou osi nome dan enn fason teokratik pou form enn komite bann ansien. Ansam, zot ti pou diriz kongregasion. Sa nouvo dispozision-la ti koumanse le 1^e Oktob 1972. Zordi, kordinater komite bann ansien pa panse ki li pli siperyer ki bann lezot ansien, me li konsider limem “kouma enn kikenn ki pli tipti.” (Luc 9:48) Sa bann frer ki ena limilite la zot vremem enn benediksion pou bann kongregasion dan lemond antie!​—Phil. 2:3.

15. (a) Ki bann bienfe inn gagne gras-a dispozision ki’nn pran pou ena enn komite bann ansien dan bann kongregasion? (b) Ki montre ki nou Lerwa inn azir avek sazes?

¹⁵ Sa ti enn gran ameliorasion kan ti pran dispozision pou partaz bann responsabilite parmi bann ki form parti dan komite bann ansien. Anou examinn trwa bienfe. Premie ek pli gran bienfe: Sa dispozision-la ed tou bann ansien pou konsian ki se Jésus ki Sef kongregasion, ninport ki kantite responsabilite zot ena. (Éph. 5:23) Proverbes 11:14 montre nou enn deziem bienfe: “Kan ena boukou konseye, ena sikse.” Kan bann ansien koz ant zot lor seki ena enn lefe lor spiritialite kongregasion ek pran kont sigzesion sakenn zot kamarad, sa ed zot pou pran bann desizion ki an-akor avek bann prinsip Labib. (Prov. 27:17) Jéhovah beni bann desizion koumsa, ek lerla ena sikse. Trwaziem bienfe: Kan finn ena pli boukou frer kalifie pou servi kouma ansien, lorganizasion finn kapav etabli plis ansien pou pran swin ek okip bann kongregasion. (Is. 60:3-5) Reflesi lor-la: kantite kongregasion ki ena dan lemond inn ogmante, an 1971 ti ena plis ki 27,000 alor ki an 2013, ena plis ki 113,000! Li kler ki avek sazes, nou Lerwa finn donn so bann disip kantite ansien ki bizin dan bon moman.​—Mika 5:5.

“Vinn Bann Lexanp pou Troupo”

16. (a) Ki responsabilite bann ansien ena? (b) Kouma bann Etidian Labib ti konsider konsey ki Jésus ti donn zot pou ‘pran swin bann brebi’?

¹⁶ O-koumansman laktivite bann Etidian Labib, bann ansien ti fini konpran ki zot ti ena responsabilite pou ed zot bann frer ek ser pou kontign servi Bondie. (Lir Galates 6:10.) An 1908, enn lartik dan Latour Degard ti examinn konsey ki Jésus ti done: “Pran swin mo bann ti brebi.” (Jean 21:15-17) Sa lartik-la ti dir bann ansien: “Li bien inportan ki travay ki nou Met inn donn nou an rapor avek troupo [Bondie], okip enn plas prinsipal dan nou leker, ki nou konsider sa kouma enn gran privilez pou nouri ek pou pran swin bann disip nou Segner.” An 1925, Latour Degard ankor enn fwa ti montre bann ansien ki zot responsabilite antan ki berze bien inportan. Sa lartik-la ti dir: “[Bann manb] legliz, zot pou Bondie, . . . ek devan li, zot tou responsab pou privilez ki zot ena pou servi zot bann frer.”

17. Kouma bann ansien finn gagn led pou zot vinn bann pli bon berze?

¹⁷ Kouma lorganizasion Jéhovah finn ed bann ansien pou amelior zot kapasite pou pran swin kongregasion, koumadir inn fer ‘feray vinn larzan’? Se kan bann ansien inn gagn enn formasion. An 1959, ti ena premie l’École du ministère du Royaume pou bann ansien. Dan enn parmi bann kour, zot ti examinn enn size ki ti apel: “Donn enn Latansion Personel.” Ti ankouraz sa bann frer responsab-la pou “fer enn program pou vizit bann proklamater kot zot.” Sa kour-la ti montre plizir fason kouma bann ansien kapav fer sa bann vizit-la vinn ankourazan. An 1966, ti koumans enn nouvo l’École du ministère du Royaume. Dan sa lekol-la ti examinn enn size ki ti apel: “Linportans Bann Vizit Pastoral.” Ki pwin prinsipal ti examine dan sa size-la? Bann frer responsab “ti bizin pran swin troupo Bondie avek amour, ek anmemtan, zot ti bizin pran kont zot prop fami ek partisip dan minister.” Dan bann lane ki’nn fek pase, finn organiz plis lekol pou bann ansien. Ki rezilta sa formasion ki bann ansien inn kontign gagne la inn prodir? Zordi, dan bann kongregasion ena plizir milie frer kalifie ki servi antan ki berze spiritiel.

18. (a) Ki gran responsabilite bann ansien inn gagne? (b) Kifer Jéhovah ek Jésus ena enn gran lafeksion pou bann ansien ki travay dir?

¹⁸ Se Jéhovah, atraver nou Lerwa Jésus, ki finn etabli tou bann ansien pou ranpli enn gran responsabilite. Ki responsabilite? Zot bizin gid bann brebi Bondie atraver lepok pli difisil ki existe dan listwar. (Éph. 4:11, 12; 2 Tim. 3:1) Jéhovah ek Jésus ena enn gran lafeksion pou bann ansien ki travay dir, parski sa bann frer-la obeir sa konsey Biblik la: “Pran bien swin troupo Bondie ki’nn konfie zot, . . . volonterman . . . , [avek] enn gran dezir . . . , vinn bann lexanp pou troupo.” (1 Pierre 5:2, 3) Anou examinn de parmi plizir fason kouma bann ansien donn enn bon lexanp troupo Bondie ek favoriz lape ek lazwa dan kongregasion.

Kouma Bann Ansien Pran Swin Troupo Bondie Zordi?

19. Ki nou panse lor bann ansien ki akonpagn nou dan predikasion?

¹⁹ Premierman, bann ansien travay avek bann manb dan kongregasion. Dan so Levanzil, Luc ti ekrir lor Jésus: “Li ti al dan enn lavil apre lot ek dan enn vilaz apre lot, li ti prese ek li ti anons bonn nouvel lor Rwayom Bondie. Ek toule Douz ti avek li.” (Luc 8:1) Parey kouma Jésus ti pres ansam avek so bann zapot, alor bann ansien ki donn lexanp, travay ansam avek zot bann frer ek ser dan predikasion. Zot konsian ki kan zot fer sa, zot favoriz enn bon latitid dan kongregasion. Ki bann manb kongregasion panse lor sa bann ansien-la? Jeannine, enn ser ki ena plis ki 80 an, dir: “Kan mo travay ansam avek enn ansien dan predikasion, sa donn mwa enn bon lokazion pou koz avek li ek pou aprann konn li pli bien.” Steven, enn frer ki ena plis ki 30 an, dir: “Kan enn ansien travay avek mwa dan predikasion, mo santi ki li anvi ed mwa. Mo bien kontan gagn sa led-la.”

20, 21. Kouma bann ansien kapav imit sa berze dan parabol Jésus la? Donn enn lexanp. (Get osi lankadre “Bann Vizit Efikas Sak Semenn.”)

²⁰ Deziemman, lorganizasion Jéhovah finn form bann ansien pou interes zot ar bann dimounn ki finn abandonn laverite. (Héb. 12:12) Kifer bann ansien bizin ed bann ki’nn afebli lor plan spiritiel, ek kouma zot kapav fer sa? Nou gagn enn repons dan parabol Jésus lor enn berze ek enn mouton ki’nn perdi. (Lir Luc 15:4-7.) Kan berze dan sa parabol-la remarke ki enn mouton manke, li al rod sa mouton-la koumadir li ena zis li tousel. Zordi, kouma bann ansien imit lexanp sa berze-la? Parey kouma sa mouton ki’nn perdi la ena valer pou so berze, alor bann ki finn kit pep Bondie, ankor ena valer pou bann ansien. Bann ansien konsider enn dimounn ki feb lor plan spiritiel kouma enn mouton ki’nn perdi; zot pa panse ki zot pe perdi letan pou al rod sa dimounn-la ek pou li. Anplis, parey kouma sa berze-la ‘al rod so mouton ki’nn perdi ziska ki li trouv li,’ bann ansien pran linisiativ pou al rod ek pou ed bann ki feb lor plan spiritiel.

²¹ Ki berze dan sa parabol-la fer kan li trouv so mouton? Avek douser, li pran li, li “met li lor so zepol,” ek li amenn li dan troupo. Bann ansien osi fer parey, par bann parol sinser, zot montre ki zot interese ar sa dimounn ki feb la, zot ankouraz li lor plan spiritiel ek ed li pou retourn dan kongregasion. Se seki ti arive avek Victor, enn frer ki res an Afrique ki ti aret vinn renion. Li rakonte: “Pandan wit an ki mo ti inaktif, bann ansien ti kontign esey ed mwa.” Ki kitsoz sirtou ti tous li? Li dir: “Enn zour, John enn ansien avek ki mo ti fer Lekol Pionie, ti pran letan pou vizit mwa ek ti montre mwa bann foto ki nou ti pran ansam pandan sa lekol-la. Telman sa ti fer mwa rapel bann bon souvenir ki mo ti koumans anvi regagn mem lazwa ki mo ti ena kan mo ti pe servi Jéhovah.” Pa tro lontan apre ki John ti vizit li, Victor ti retourn dan kongregasion. Zordi, li’nn rekoumans servi kouma pionie. Wi, bann ansien ki pran nou kont ed nou boukou pou trouv lazwa.​—2 Cor. 1:24.b

Ameliorasion dan Fason ki Diriz Pep Bondie Favoriz Linite

22. Kouma lazistis ek lape favoriz linite dan kongregasion? (Get osi lankadre “Nou Ti Bien Inpresione.”)

²² Parey kouma nou ti trouve avan, Jéhovah ti anonse ki lazistis ek lape pou ogmante parmi so bann serviter. (Is. 60:17) Toulede kalite favoriz linite dan bann kongregasion. Kouma? An rapor avek lazistis, “Bondie Li enn sel Jéhovah.” (Deut. 6:4) So bann prinsip lazistis pa sanze, zot res parey dan ninport ki kongregasion ek ninport ki pei. Wi, so bann prinsip lor seki bon ek move pa sanze, zot parey pou “tou kongregasion bann sin.” (1 Cor. 14:33) Alor, enn kongregasion pou prospere selman kan li aplik bann prinsip Bondie. Konsernan lape, nou Lerwa anvi ki nou vinn bann dimounn “pasifik,” pa zis ki nou profit lape dan kongregasion. (Mat. 5:9) Alor, nou “fer bann kitsoz ki favoriz lape.” Nou pran linisiativ pou regle bann problem ki parfwa kapav arive ant nou. (Rom. 14:19) Dan sa fason-la, nou favoriz lape ek linite dan kongregasion.​—Is. 60:18.

23. Antan ki bann serviter Jéhovah, ki nou pe profite zordi?

²³ An Novam 1895, kan Latour Degard ti anons premie dispozision konsernan bann ansien, bann frer responsab ti dir seki zot ti swete. Ki ti zot ti anvi? Zot ti anvi ek zot ti priye ki sa nouvo dispozision-la ed pep Bondie pou “ena bien vit linite dan lafwa.” Kan nou get seki’nn arive dan bann lane ki’nn pase, nou bien rekonesan ki bann ameliorasion ki Jéhovah finn fer tigit par tigit atraver Jésus dan fason ki diriz bann kongregasion, finn favoriz nou linite pou ador Li. (Ps. 99:4) Ki rezilta sa finn prodir? Zordi, tou bann serviter Jéhovah dan lemond ena lazwa pou ena “mem fason panse,” pou ena “mem konportman,” ek pou servi “Bondie lape” “kot a kot.”​—2 Cor. 12:18; lir Tsephania 3:9.