Novam

Si to enn paran, ed to zanfan pou prepar bann repons ki adapte ar so laz. Parfwa dan renion, nou examinn bann size kouma bann problem dan maryaz ouswa limoralite. Dan sa bann kalite size-la, kitfwa pou ena zis enn-de paragraf kot enn zanfan kapav reponn. To kapav osi ed to zanfan pou konpran kifer li pa pou gagn repons sak fwa ki li lev so lame. Kan to explik li sa, li pa pou dekouraze kan li pa gagn repons. (1 Tim. 6:18) Nou tou nou kapav prepar bann repons ki pou donn laglwar Zeova ek ki pou ankouraz nou bann frer ek ser. (Prov. 25:11) Mem si parfwa nou kapav partaz nou lexperyans personel, fode pa nou koz tro boukou lor noumem. (Prov. 27:2; 2 Kor. 10:18) Olie sa, nou pou fer zefor pou atir latansion lor Zeova, lor so Parol, ek lor so bann serviter.—Rev. 4:11. w23.04 24-25 ¶17-18

Lamour bien inportan pou ki nou res lor nou gard. (Mat. 22:37-39) Lamour pou Bondie ed nou pou andire dan predikasion, mem si nou kapav gagn bann persekision akoz sa. (2 Tim. 1:7, 8) Akoz nou kontan nou prosin, nou kontign prese mem si sa vedir ki nou bizin pres par let ouswa par telefonn. Nou touletan gard lespwar ki bann dimounn dan nou teritwar kapav sanze. Ki kone, kitfwa enn zour zot pou koumans servi Zeova! (Eze. 18:27, 28) Nou kontan nou bann frer ek ser osi. Nou montre ki nou kontan zot kan nou ‘ankouraz sakenn nou kamarad ek fortifie sakenn nou kamarad.’ (1 Tes. 5:11) Parey kouma bann solda ki pe lager kot-a-kot, nou ankouraz sakenn nou kamarad. Zame nou pa pou bles nou bann frer ek ser par expre, ek zame nou pa pou rann zot lemal pou lemal. (1 Tes. 5:13, 15) Nou montre lamour osi kan nou respekte bann frer ki ena bann responsabilite dan lasanble.—1 Tes. 5:12. w23.06 10 ¶6; 11 ¶10-11

Enn fason ki nou kapav fer nou lafwa vinn pli for se kan nou reflesi lor laranson. Laranson se enn garanti ki Zeova pou tini so bann promes. Kan nou pran letan pou reflesi kifer Zeova inn donn laranson, ek lor seki sa inplike, nou pou ena plis lafwa dan promes Zeova konsernan lemond nouvo. Kifer nou dir sa? Anou gete seki laranson inplike. Zeova inn donn nou so Garson premie-ne ki Li bien kontan, so kamarad pli pros. Zeova inn avoy Zezi lor later ek li’nn ne kouma enn imin parfe. Kan li ti lor later, Zezi inn bizin andir tou kalite difikilte. Li’nn bien soufer ek li’nn gagn enn vilin lamor. Sa finn kout Zeova bien ser! Zeova zame pa ti pou les so Garson soufer ek mor, zis pou nou gagn enn pli bon lavi pou enn ti moman! (Zan 3:16; 1 Pier 1:18, 19) Zeova inn donn nou so Garson, alor Li pou fer sir ki nou kapav viv pou touletan dan lemond nouvo. w23.04 27 ¶8-9

Eski Zeova anvi resisit bann mor? Biensir! Li’nn fer plizir ekrivin Labib, ekrir lor rezireksion ki pou ena dan lavenir. (Iza. 26:19; Rev. 20:11-13) Ek kan Zeova fer enn promes, touletan Li tini li. (Zozwe 23:14) An realite, Zeova ena enn gran dezir pou resisit bann mor. Anou reflesi lor seki Zob ti dir. Li ti sir ki si li mor, Zeova ti pou bien anvi retrouv li. (Zob 14:14, 15) Zeova ena mem santiman pou tou so bann serviter ki’nn mor. Li bien anvi resisit zot, ek retrouv zot an bonn sante ek ere. Me ki nou kapav dir lor bann milyar dimounn ki’nn mor ek ki pa’nn gagn lokazion pou aprann laverite lor Zeova? Nou Papa bien anvi resisit zot osi. (Zist. 24:15) Li anvi ki zot gagn lokazion pou vinn so kamarad ek ki zot viv pou touletan lor later.—Zan 3:16. w23.04 9 ¶5-6

Kouma to kapav ranforsi to lesperans? Si to ena lesperans pou viv pou touletan lor later, lir kouma Labib dekrir Paradi ek reflesi lor la. (Iza. 25:8; 32:16-18) Reflesi osi kouma lavi pou ete dan lemond nouvo, ek mazinn twa dan Paradi. Si nou lesperans bien kler dan nou lespri, nou bann problem pou “tanporer ek leze.” (2 Kor. 4:17) Wi, gras-a nou lesperans, Zeova donn nou lafors. Li’nn fini donn twa tou seki to bizin pou ki to gagn lafors. Alor, si to bizin led pou asim enn responsabilite, pou andir enn difikilte, ouswa pou gard to lazwa, priye Zeova ar tou to leker ek rod repons to lapriyer gras-a to letid personel. Aksepte bann lankourazman to bann frer ek ser. Ek kontign gard to lesperans bien kler dan to lespri. Si to fer sa bann kitsoz-la, Zeova pou “fortifie [twa] avek tou pwisans gras-a so lafors ki ranpli ar laglwar pou ki [to] kapav andir tou kitsoz avek pasians ek lazwa.”—Kol. 1:11. w23.10 17 ¶19-20

Nou ena boukou rezon pou remersie Zeova. Nou kapav remersie Li pou tou bann bon kitsoz ki nou ena. Apre tou, se Li ki donn nou tou sa bann bon kitsoz-la. (Zak 1:17) Par exanp, nou kapav remersie Li pou nou zoli planet later ek pou tou bann kitsoz extraordiner ki Li’nn kree. Nou kapav osi remersie Li pou lavi ki Li’nn donn nou, pou nou fami, pou nou bann kamarad, ek pou nou zoli lesperans. Ek nou anvi remersie Zeova osi parski nou kapav ena enn bon lamitie avek Li. Nou bizin pran letan ek fer zefor pou reflesi lor bann kitsoz ki motiv nou pou ena rekonesans pou Zeova. Kifer? Parski nou pe viv dan enn lemond ki bien ingra. Olie ki bann dimounn montre zot rekonesans pou seki zot ena, zot plis interese ar seki zot kapav gagne. Si nou osi nou ena sa fason panse-la, nou pou ena tandans pou priye Zeova zis pou demann Li bann kitsoz ki nou bizin. Pou ki sa pa arive, nou bizin kontign montre nou rekonesans pou tou seki Zeova fer pou nou.—Lik 6:45. w23.05 4 ¶8-9

Nou Papa Zeova bien kontan nou. Akoz sa, Li pa kontan trouv nou soufer. (Iza. 63:9) Me mem si nou gagn bann difikilte, ki nou kapav konpar ar bann “larivier” ek bann “dife,” Li pa pou tir tou nou bann difikilte. (Iza. 43:2) Selman, Li promet nou ki Li pou ed nou pou “travers” zot. Ninport ki difikilte nou gagne, Li pou ed nou pou res pros ar Li ek pou kontign servi Li. Li pou osi donn nou so lespri sin pou ki nou andir nou bann difikilte. (Lik 11:13; Fil. 4:13) Alor, nou kapav sir ki Zeova pou touletan donn nou seki nou bizin pou ki nou reisi andire ek nou res fidel anver Li. Zeova anvi ki nou fer Li konfians. (Ebre 11:6) Parfwa, akoz nou ena telman boukou problem, nou kapav panse ki Zeova pa kapav ed nou. Me Labib dir nou ki, avek lafors ki Bondie donn nou, nou kapav mem “grinp enn miray.” (Ps. 18:29) Alor, olie ki nou ena bann dout, nou bizin kontign priye avek lafwa ek nou bizin sir ki Zeova pou reponn nou bann lapriyer.—Zak 1:6, 7. w23.11 22 ¶8-9

Sa bann zoli parol-la dekrir bien vre lamour, pa vre! Dan sa bann parol-la, ena enn verite bien inportan pou bann koup: Zot kapav ena enn lamour bien for pou zot kamarad. Pou ki bann konzwin kontign kontan zot kamarad toutlong zot lavi, zot bizin kontign fer bann zefor. Anou pran enn lexanp. Pou ki enn dife kontign brile, enn kikenn bizin kontign met dibwa ladan. Si personn pa pran dife-la kont, li pou tengn. Dan mem fason, lamour ki ena ant enn mari ek so fam pou kontign res for, si zot kontign fer zefor pou ena enn bon relasion ar zot kamarad. Parfwa, lamour ki ena ant enn koup kapav diminie, sirtou kan zot ena bann problem finans, bann problem lasante, ouswa kan zot gagn difikilte pou elve zot zanfan. Alor pou ki “laflam Ya” pa tengn, enn mari ek so fam bizin fer zefor pou ena enn bon lamitie ar Zeova. w23.05 20 ¶1-3

Ki nou bizin fer pou nou ena plis kouraz? Nou bann paran kapav ankouraz nou pou devlop sa kalite-la. Selman, mem si zot zot ena kouraz, sa pa vedir ki nou osi nou pou ena kouraz. Nou kapav konpar kouraz ar enn travay ki nou pe aprann fer. Pou nou aprann fer bien travay-la, nou kapav get bien dimounn ki pe montre nou kouma pou fer travay-la, ek fer parey kouma li. Dan mem fason, nou pou aprann kouma pou ena plis kouraz, kan nou get bien kouma lezot inn ena sa kalite-la ek ki nou swiv zot lexanp. Parey kouma Daniel, nou bizin konn bien Parol Bondie, nou bizin ena enn bon lamitie ar Zeova, ek nou bizin priye Li souvan. Nou bizin ena konfians an Zeova, ek nou bizin sir ki Li pou soutenir nou. Lerla, kan nou gagn bann leprev nou pou ena kouraz. Kan nou ena kouraz, lezot ena respe pou nou. Nou kouraz kapav osi motiv bann dimounn ki sinser pou aprann konn Zeova. Wi, nou ena boukou rezon pou ena kouraz. w23.08 2 ¶2; 4 ¶8-9

Mo Grek ki’nn servi pou “verifie” dekrir fason ki bann dimounn ti teste bann metal ki ena valer, kouma lor ek larzan, pou fer sir ki zot vremem ena valer. Alor, nou bizin teste, ouswa verifie, seki nou tande ouswa seki nou lir, pou fer sir ki sa bann linformasion-la zot laverite. Li bien inportan ki nou fer sa amezir ki gran soufrans pe koste. Olie ki nou krwar seki lezot dir, nou bizin konpar seki nou lir ek seki nou tande ar seki Labib ek lorganizasion Zeova dir. Kan nou fer sa, nou pa pou les nou inflianse par bann foste ki bann demon pe fane. (Prov. 14:15; 1 Tim. 4:1) Nou kone ki pep Zeova pou reisi travers gran soufrans. Me ki nou kapav dir lor nou personelman? Nou pa kone ki kapav arive demin. (Zak 4:14) Selman, mem si nou reisi travers gran soufrans, ouswa mem si nou mor avan, nou kone ki si nou res fidel ar Zeova, Li pou rekonpans nou ek Li pou donn nou lavi eternel. Alor, anou kontign res konsantre lor nou zoli lesperans, ek anou kontign prepar nou pou “zour Zeova”! w23.06 13 ¶15-16

Nou pa kone kouma sertin profesi Labib pou realize. (Dan. 12:8, 9) Selman, mem si nou pa konpran san poursan kouma enn profesi pou realize, sa pa vedir ki li pa pou realize. Dan moman ki Li swazir, nou kapav sir ki Zeova pou ed nou pou konpran sertin profesi, parey kouma Li’nn fer dan lepase. Apre ki bann-la pou dir “lape ek sekirite,” bann gouvernman sa lemond-la pou atak fos relizion ek zot pou detrir li. (1 Tes. 5:3; Rev. 17:16, 17) Apre sa, zot pou atak bann serviter Zeova. (Eze. 38:18, 19) Lerla, lager Armagedon pou koumanse. (Rev. 16:14, 16) Nou kapav sir ki tousala pou arive biento. Me ziska ki sa arive, anou kontign montre ki nou kontan nou Papa Zeova, kan nou kontign fer zefor pou konpran bann profesi ek kan nou ed lezot osi pou fer parey. w23.08 13 ¶19-20

Kan lapot Pol ti koz lor lafwa, lesperans, ek lamour, li ti dir ki “pli gran parmi sa trwa [kalite-la], se lamour.” (1 Kor. 13:13) Kifer li ti dir sa? Dan lavenir, nou pou nepli bizin ena lafwa ouswa lesperans dan bann promes Bondie, parski zot pou fini realize. Selman, nou pou touletan bizin montre lamour pou Zeova ek pou bann dimounn. An realite, nou lamour pou zot pou bizin kontign grandi. Kan nou montre lamour pou nou bann frer ek ser, nou montre ki nou bann vre Kretien. Zezi ti dir so bann zapot: “Tou dimounn pou kone ki zot mo bann disip si zot ena lamour ant zot.” (Zan 13:35) Enn deziem rezon se parski kan nou ena lamour pou nou bann frer ek ser, nou ede pou ki ena linite. Pol ti dir ki lamour “li enn lien ki ini bann dimounn ansam dan enn fason parfe.” (Kol. 3:14). Lapot Zan ti dir bann Kretien: “Enn kikenn ki kontan Bondie bizin kontan so frer osi.” (1 Zan 4:21) Alor, kan nou kontan lezot, nou montre ki nou kontan Bondie. w23.11 8 ¶1, 3

Labib konpar lavi bann kretien ar enn lekours. Bann partisipan ki reisi terminn sa lekours-la, zot gagn lavi eternel. (2 Tim. 4:7, 8) Sa lekours-la pre pou fini, akoz sa nou bizin fer nou maximum pou kontign galoupe. Lapot Pol donn nou enn tips ki kapav ed nou pou terminn sa lekours-la. Li’nn dir nou ki nou bizin “debaras nou ar tou pwa ek . . . galoup avek landirans sa lekours ki devan nou la.” Eski Pol pe rod dir ki bann kretien pena okenn responsabilite pou sarye? Non. Li pe rod dir ki nou bizin debaras bann pwa ki pa inportan. Kifer? Parski sa bann pwa-la kapav ralanti nou ek akoz zot nou kapav fatige. Pou nou reisi terminn nou lekours, nou bizin kapav remark sa bann pwa-la ek debaras zot deswit. Selman, nou bizin fer bien atansion ki nou pa debaras bann responsabilite ki nou bizin sarye. Parski si nou fer sa, nou pa pou reisi res dan lekours pou gagn lavi.—2 Tim. 2:5. w23.08 26 ¶1-2

Enn kikenn ki rezonab, li respekte lopinion lezot. Par exanp, ena sertin ser ki kontan makiye, ek ena lezot ki pa kontan. Ena sertin Kretien ki kontan bwar enn ti labwason, ek ena lezot ki prefer pa bwar ditou. Tou bann Kretien anvi res an bonn sante, me sakenn swazir seki li anvi fer pou res an bonn sante. Si nou panse ki nou touletan ena rezon ek ki nou esey konvink lezot pou fer parey kouma nou, nou kapav fer zot dekouraze ek sa kapav kree divizion dan lasanble. (1 Kor. 8:9; 10:23, 24) Par exanp, olie ki Li’nn etabli bann lalwa lor kouma nou bizin abiye, Zeova inn donn nou bann prinsip. Nou labiyman bizin montre ki nou bann serviter Bondie. Kan nou swazir nou bann linz, nou bizin rezonab, nou bizin ena modesti, ek ena “bon zizman.” (1 Tim. 2:9, 10) Nou linz bizin pa atir latansion lor nou-mem. Bann prinsip Labib ed bann ansien osi pou zot pa etabli bann reg konsernan labiyman ek kwafir. w23.07 23-24 ¶13-14

Zeova montre nou kouma nou kapav ena enn zoli lavenir. Bann ki aksepte linvitasion sa “fam ki bet” la, zot kontan seki “dou,” setadir bann plezir imoral. Alafin, zot pou fini “dan Tom.” (Prov. 9:13, 17, 18) Sa bien diferan pou bann dimounn ki aksepte linvitasion “vre sazes”! (Prov. 9:1) Nou pe aprann pou kontan bann kitsoz ki Zeova kontan, ek pou deteste bann kitsoz ki Li deteste. (Ps. 97:10) Ek nou ere parski nou kapav osi ed lezot pou vinn aprann ar “vre sazes.” Nou koumadir bann serviter ki pe apel bann dimounn depi “bann plas ki ot dan lavil,” ek nou pe dir zot: “Zot ki pena lexperyans, rant isi.” Ansam avek nou, bann ki pe aksepte sa linvitasion-la pa pe zis gagn bann bienfe depi aster-la mem. Si nou kontign “mars lor semin lintelizans,” nou pou “gagn lavi” pou touletan.—Prov. 9:3, 4, 6. w23.06 24 ¶17-18

Ki to resanti kan enn kamarad travay ouswa enn kamarad lekol poz twa bann kestion lor to bann krwayans? Eski sa stres twa? Avredir, kitfwa sa ariv boukou parmi nou. Selman, kan bann dimounn poz nou bann kestion, sa donn nou lokazion pou kone seki zot vremem panse, ek lerla li pli fasil pou nou pres ar zot. Me parfwa, enn dimounn kapav poz nou enn kestion parski li pa dakor ar nou, ouswa parski li anvi diskite. Fode pa sa etonn nou parski bien souvan bann dimounn tann bann fos linformasion lor nou bann krwayans. (Zist. 28:22) Anplis, nou pe viv dan “bann dernie zour,” enn lepok kot boukou dimounn “pa pou dakor ant zotmem” ek kot zot pou “san pitie.” (2 Tim. 3:1, 3) Kitfwa to pe demann tomem, ‘Kouma mo kapav res kalm ek reponn avek takt kan enn kikenn pe anvi diskit lor mo bann krwayans?’ Enn kitsoz ki kapav ed twa, se douser. Enn kikenn ki ena douser, li pa ankoler vit ek li kontrol limem kan lezot provok li, ouswa kan li pa sir seki li bizin reponn. w23.09 14 ¶1-2

Zeova servi so lorganizasion pou donn nou bann konsey ki protez nou. Par exanp, li konsey nou pou pa kontan kas ek pou pa fer bann kitsoz ki kapav gat nou lamitie avek Li. (Iza. 48:17, 18; 1 Tim. 6:9, 10) Pandan gran soufrans ek Regn Mil An Zezi Kris, Zeova pou kontign servi bann dimounn pou gid nou. Eski nou pou kontign swiv bann instriksion? Li pou pli fasil pou nou fer sa, si depi aster-la mem nou kontign swiv bann instriksion Zeova. Alor, anou kontign swiv bann instriksion Zeova, ki Li donn nou atraver bann zom ki Li’nn etabli lor nou pou pran nou swin. (Iza. 32:1, 2; Ebre 13:17) Anou kontign swiv nou Gid, Zeova, ek anou fer Li foul konfians. Li pou touletan protez nou kont bann kitsoz ki kapav gat nou lamitie avek Li, ek Li pou gid nou ver nou destinasion, setadir lavi eternel dan lemond nouvo. w24.02 25 ¶17-18

Lapot Pol ti ere dan so servis pou Zeova. Me parfwa, li ti gagn boukou difikilte. Pol souvan ti bizin vwayaz bann long distans, ek sa lepok-la sa ti bien difisil. Dan so bann vwayaz, parfwa li ti an “danze akoz bann larivier” ek an “danze akoz bann voler.” Parfwa, li ti osi gagn bate ar so bann lennmi. (2 Kor. 11:23-27) Anplis, bann frer ek ser pa ti touletan apresie bann zefor ki Pol ti fer pou ed zot. (2 Kor. 10:10; Fil. 4:15) Ki kitsoz ti ed Pol pou kontign servi Zeova? Pol ti aprann konn Zeova pli bien gras-a bann Lekritir ek gras-a bann sitiasion ki li’nn viv. Li ti sir ki Zeova ti kontan li. (Rom. 8:38, 39; Efe. 2:4, 5) Li ti osi aprann pou kontan Zeova. Pol ti montre ki li ti kontan Zeova kan li “finn servi bann ki sin ek ki [li’nn] kontign servi bann-la.”—Ebre 6:10. w23.07 9 ¶5-6

Boukou dimounn dakor ki nou bizin bann gouvernman, ek kitfwa zot obeir sertin lalwa ki sa bann gouvernman-la mete. Selman, kitfwa zot pa obeir bann lalwa ki zot pa kontan, ouswa ki zot trouv inzis. Labib dir ki se Satan ki pe kontrol bann gouvernman, ki bann gouvernman fer bann dimounn soufer, ek ki biento Bondie pou detrir bann gouvernman. (Ps. 110:5, 6; Ekle. 8:9; Lik 4:5, 6) Selman, Labib dir osi ki bann “ki opoz [zot] ar lotorite, [zot] al kont dispozision Bondie.” Pou linstan, Zeova pe permet ki bann gouvernman dirize parski gras-a zot ena lord. Ek Li atann ki nou obeir bann gouvernman. Akoz sa, nou bizin “rann sakenn seki zot bizin gagne: seki demann tax, donn li tou sort kalite tax; seki demann respe, donn li respe; seki demann loner, donn li loner.” (Rom. 13:1-7) Si nou trouve ki enn lalwa li pa lozik, li inzis, ouswa li fer nou depans boukou kas, mazine ki nou bizin obeir Zeova. Ek Zeova demann nou pou obeir bann gouvernman, tanki zot pa al kont so bann lalwa.—Zist. 5:29. w23.10 8 ¶9-10

Kan Sanson ti ne, bann Filistin ti pe diriz Izrael ek zot ti bien dominer. (Ziz 13:1) Bann Izraelit ti bien soufer parski bann Filistin ti bien kriel. Lerla, Zeova ti swazir Sanson “pou sov Izrael dan lame bann Filistin.” (Ziz 13:5) Pou li asim sa responsabilite-la, Sanson ti bizin kont lor Zeova. Enn fwa, bann solda Filistin ti pe rod may Sanson ek zot ti al rod li dan Lei, ki kitfwa ti trouv dan Zida. Bann abitan Zida ti gagn per, ek zot ti desid pou livre Sanson ar so bann lennmi. So prop pep ti atas li ar de lakord nef ek zot ti livre li ar bann Filistin. (Ziz 15:9-13) Selman, “lespri Zeova ti fer Sanson vinn for,” ek Sanson ti kas lakord-la. Lerla, Sanson “ti trouv lezo lamaswar enn bourik mal ki ti fek mor.” Li ti ramas li, ek li ti touy 1,000 Filistin ar sa.—Ziz 15:14-16. w23.09 2 ¶3-4

Dan Labib, Zeova inn fer nou konn so “proze eternel” tigit par tigit. Proze Zeova pou realize parski Li kapav “fer tou kitsoz realiz so proze,” ek tou seki Zeova fer, li dire pou touletan. (Prov. 16:4) Me ki proze Zeova ena, ek ki bann sanzman Li’nn bizin fer pou realiz so proze? Zeova ti dir Adan ek Ev ki proze Li ena pou zot. Zot ti bizin “gagn zanfan, vinn boukou, ranpli later ek ena kontrol lor li, ek ena kontrol lor . . . tou kreatir vivan” ki lor later. (Zen. 1:28) Kan Adan ek Ev ti rebel kont Zeova, bann imin ti vinn inparfe. Selman, sa pa ti aret proze Zeova. Li’nn trouv enn lot mwayin pou realiz so proze. Li’nn etabli enn Rwayom dan lesiel ki pou realiz proze ki Li ti ena o-koumansman pou bann dimounn ek pou later.—Mat. 25:34. w23.10 19-20 ¶6-7

Zeova kapav ed nou pou persevere. Kitfwa sa pa touletan fasil, sirtou si sa fer lontan ki nou pe lit kont enn febles. Parfwa, nou kapav ena bann pli gran difikilte ki seki Pier ti gagne. Selman, Zeova kapav donn nou lafors ki nou bizin pou nou pa bes lebra. (Ps. 94:18, 19) Anou get enn lexanp. Avan ki li vinn dan laverite, enn frer ti omosexiel pandan plizir lane. Li’nn sanz so lavi net, ek azordi li pe swiv bann prinsip Labib. Selman, detanzantan, li bizin lit kont bann move dezir. Ki kitsoz ed nou frer pou pa bes lebra? Li dir: “Zeova donn nou lafors.” Li dir osi: “Avek led lespri sin Zeova . . . , mo’nn trouve ki mo kapav [kontign] mars lor sime laverite . . . Zeova pe servi mwa, ek mem si mo ena bann defo, Li kontign donn mwa lafors.” w23.09 23 ¶12

Zenn frer, to pa pou vinn enn Kretien ki ena matirite enn kout koumsa! To pou bizin rod bann bon lexanp pou to imite, devlop to kapasite pou reflesi, vinn enn kikenn lor ki lezot kapav konte, devlop bann kapasite ki itil, ek prepar twa pou bann responsabilite ki to kapav gagne dan lavenir. Kan to mazinn tousala, kitfwa sa kapav paret inposib pou fer. Selman, to kapav fer li. Pa bliye ki Zeova anvi ed twa. (Iza. 41:10, 13) To bann frer ek ser osi pou ed twa. Kan to pou vinn enn Kretien ki ena matirite, to pou ena enn zoli lavi ek to pou ere. Zenn frer, nou bien kontan twa! Nou swete ki Zeova kontign beni twa, pandan ki to fer bann zefor pou vinn enn Kretien ki ena matirite! w23.12 29 ¶19-20

Fer koumadir to dan enn ti program avek de-trwa frer ek ser. To pe pas enn bon moman, ek to fer enn selfie ar zot. Kitfwa to pou tir ankor de foto, tansion premie-la pa bon. Me ki to pou fer si lor enn sa bann foto-la, enn frer pa pe riye? Sirman to pou efas li, ek to pou gard sa de lezot foto-la, kot tou dimounn pe riye. Bien souvan, kan nou pas letan avek nou bann frer ek ser, nou gard bann bon souvenir. Me fer koumadir ki, dan enn sa bann lokazion-la, enn frer ouswa enn ser inn bles nou. Ki nou bizin fer ar sa souvenir-la? Nou bizin efas li, parey kouma nou ti pou efas sa foto-la. (Efe. 4:32) Nou ena telman boukou bon souvenir ar sa dimounn-la, ki nou pa anvi kontign pans lor sa erer ki li’nn fer la. Okontrer, se bann bon souvenir ki nou ena avek li ki nou anvi kontign mazine. w23.11 12-13 ¶16-17

Bann mo Grek ki servi dan sa verse-la vedir ki enn ser bizin abiy dan enn fason ki apropriye pou lokazion ek li bizin reflesi osi lor lefe ki so linz ek so kwafir kapav ena lor lezot. Antouka, nou bien fier kan nou bann ser swiv sa konsey-la ek ki zot abiy zot avek modesti! Disernman se enn lot kalite ki tou bann ser bizin devlope pou ki zot gagn matirite. Ki ete disernman? Se bon zizman, setadir kapasite pou kone si enn kitsoz li bon ouswa li pa bon ek pou swazir pou fer seki bon. Anou get lexanp Abigail. So misie ti pran enn move desizion ki ti pou amenn maler lor tou bann dimounn ki ti res dan so lakaz. Me Abigail ti ena disernman, ek li ti konpran seki li ti bizin fer pou ki bann dimounn ki res kot li, gagn lavi sov. (1 Sam. 25:14-23, 32-35) Disernman kapav ed nou osi pou kone kan nou bizin koze ek kan nou bizin res trankil. Ek li ed nou pou interes nou ar lezot, san ki nou mel nou dan zot bann zafer.—1 Tes. 4:11. w23.12 20 ¶8-9

Lapot Pol ti ekrir sa bann parol-la pou bann frer ek ser dan lavil Rom. Sa bann frer ek ser la ti aprann konn Zeova ek Zezi, zot ti montre ki zot ti ena lafwa, ek zot ti vinn bann Kretien. Akoz sa, Bondie “finn deklar [zot] kouma bann dimounn drwat akoz [zot] lafwa,” ek Li ti donn zot so lespri sin. (Rom. 5:1) Sa bann frer ek ser la ti gagn enn zoli lesperans! Plitar, Pol ti ekrir bann Kretien dan Efez konsernan lesperans ki Bondie ti donn zot. Sa lesperans-la ti enn leritaz pou “bann ki sin.” (Efe. 1:18) Pol ti osi dir bann Kolosien kotsa zot ti pou gagn sa rekonpans-la. Li ti dir zot ki sa lesperans-la “finn rezerve pou zot dan lesiel.” (Kol. 1:4, 5) Alor, lesperans ki sa bann Kretien-la ti gagne, se ki zot ti pou resisite pou viv pou touletan dan lesiel, ek zot ti pou regne ansam ar Zezi.—1 Tes. 4:13-17; Rev. 20:6. w23.12 9 ¶4-5

Mo ki’nn servi pou tradir “protez,” se enn lexpresion ki dekrir bann solda ki pe protez enn lavil pou ki personn pa atak li. Bann dimounn ki res dan sa lavil-la, zot kapav dormi trankil ek zot santi zot an sekirite, parski zot kone ki ena bann solda ki pe protez zot lavil. Dan mem fason, kan lape Bondie protez nou leker ek nou lespri, nou santi nou kalm parski nou kone ki nou an sekirite. (Ps. 4:8) Parey kouma Ann, mem si nou sitiasion pa sanze deswit, nou kapav santi nou anpe. (1 Sam. 1:16-18) Ek kan nou santi nou anpe, li pli fasil pou nou pran bann bon desizion. Alor ki nou kapav fer? Kan to boulverse, priye Zeova ziska ki to santi so lape. (Lik 11:9; 1 Tes. 5:17) Si to pe gagn enn leprev, kontign priye Zeova ar tou to leker ek Li pou donn twa so lape, ki pou protez to leker ek to lespri.—Rom. 12:12. w24.01 21 ¶5-6

Pou sanktifie nom so Papa, Zezi ti andir tou kalite tortir, insilt, ek foste ki bann dimounn ti dir lor li. Li ti kone ki li ti touletan obeir so Papa, alor li pa ti ena nanye pou onte. (Ebre 12:2) Li ti kone osi ki Satan ti pou atak li dan sa moman bien difisil la. (Lik 22:2-4; 23:33, 34) Satan ti fer tou seki li kapav pou ki Zezi pa res fidel ar Zeova. Selman, Satan pa’nn reisi! Gras-a so fidelite, Zezi inn montre ki Satan enn manter, ek ki bann serviter Zeova kapav res fidel anver Li, mem si zot pe pas par bann leprev. Kouma to kapav fer Zezi kontan? To fer sa kan to kontign loue nom Zeova, ek kan to ed lezot pou kone ki kalite Bondie Li ete. Kan to fer sa, to pe swiv lexanp Zezi. (1 Pier 2:21) Lerla, parey kouma Zezi, to pe fer Zeova plezir ek to pe montre ki Satan li enn manter. w24.02 11 ¶11-13

Sa sink dernie lane-la, plis ki enn milyon dimounn inn pran batem ek inn vinn bann Temwin Zeova. Kan to donn to lavi Zeova, to pran desizion pou vinn enn disip Zezi ek pou fer volonte Zeova vinn kitsoz pli inportan dan to lavi. Ki to bizin fer kan to donn to lavi Zeova? Zezi ti dir: “Si enn kikenn anvi swiv mwa, li bizin aret viv pou limem.” (Mat. 16:24) Kan enn kikenn donn so lavi Zeova, li bizin rezet bann kitsoz ki pa an-akor ar volonte Zeova. (2 Kor. 5:14, 15) Parmi sa bann kitsoz-la, ena “bann aksion lekor inparfe,” kouma limoralite sexiel. (Gal. 5:19-21; 1 Kor. 6:18) Kan nou obeir bann lalwa Zeova, eski sa rann nou lavi difisil? Non. Nou kontan Zeova, akoz sa nou sir ki so bann lalwa bon pou nou.—Ps. 119:97; Iza. 48:17, 18. w24.03 2 ¶1; 3 ¶4

Kan nou ena faver Zeova, Li donn nou so lespri sin. (Mat. 12:18) To kapav demann tomem, ‘Dan mo lavi toulezour, eski mo reisi montre ki mo ena bann kalite ki form parti frwi lespri sin Bondie? Par exanp, eski mo ena plis pasians azordi, ki kan mo ti fek konn laverite?’ Avredir, plis nou reisi devlop bann kalite ki form parti frwi lespri sin Bondie, plis sa montre nou ki nou ena faver Zeova! Kan nou ena faver Zeova, nou gagn bann bienfe ki ena enn lien ar laranson. (1 Tim. 2:5, 6) Selman, li kapav arive ki sertin panse ki zot pena faver Zeova, mem si zot inn pran batem ek ki zot ena lafwa dan laranson. Si to dan sa sitiasion-la, to bizin rapel ki to pa kapav touletan fer konfians to bann santiman. Parkont, to kapav touletan fer Zeova konfians. Zeova konsider bann dimounn ki ena lafwa dan laranson kouma bann dimounn ki drwat, ek Li promet ki Li pou beni zot.—Ps. 5:12; Rom. 3:26. w24.03 30 ¶15; 31 ¶17