Zenn—Eski U Pe Progrese lor Plan Spirityel?

KAN Hideo mazinn lepok so bann premye lane dan kolez li dir: “Mem si mo ti pe asiste bann reynion, mo pa ti ena enn gran dezir pu servi Zeova. Suvan mo ti mazinn mwa kuma enn kikenn byin popiler parmi mo bann kamarad lekol, ek ki mo pe marse, latet lao avek enn ti kopinn. Mo pa ti ena okenn lobzektif presi ek mo pa ti ena okenn dezir pu progrese lor plan spirityel.” Parey kuma Hideo, buku zenn les zot ale ek zot pena okenn dezir pu fixe bann lobzektif ki vo lapenn ek reysi fer zot. Zot pena okenn dezir pu fer kit progre.

Si u zenn, sirman u byin fite kan u partisip dan enn spor uswa enn pastan ki u byin kontan. Me, an seki konsern bann laktivite spirityel, eski u ena sa mem santiman la? Eski li posib ki u resanti parey pu bann lobzektif spirityel? Get seki enn ekrivin Psom finn dir: “Nu kapav fer rapel Zeova konfyans, li fer dimunn ki pena lexperyans vinn saz. . . . Komannman Zeova li prop, li fer lizye briye.” (Psom 19:7, 8) Parol Bondye kapav fer enn “dimunn ki pena lexperyans vinn saz” ek ‘fer so lizye briye.’ Wi, u kapav truv enn gran plezir grasa bann kitsoz spirityel. Me ki u bizin fer pu u resanti sa? Kot sa u bizin kumanse?

Motive pu Servi Bondye

Dabor, u bizin byin motive. Anu pran legzanp Yosiya, enn zenn lerwa dan Zida. Kan finn dekuver Lalwa Zeova dan tanp, Yosiya ti fer lir sa ek li ti tuse par seki li ti tande. Rezilta: “Yosiya ti anlev tu bann move kitsoz dan tu bann peyi ki ti pu bann garson Izrael.” (2 Kronik 34:14-21, 33) Lektir Parol Bondye ti pus Yosiya pu fer ankor plis pu ankuraz vre ladorasyon.

U’si u kapav devlop enn dezir pu servi Zeova. Kuma? Se kan u lir Labib ek u medit lor seki u finn lir. Se seki finn motiv Hideo. Li’nn kumans frekant enn pyonye, enn Temwin Zeova ki servi aplintan. Sa pyonye la ti ase aze. Li ti enn kikenn ki ti fer buku zefor pu etidye Labib ek pu met li an pratik dan so lavi. Hideo ti byin ankuraze par legzanp sa pyonye la. Li u’si li finn kumans fer parey kuma li, ek li’nn devlop enn gran dezir pu servi Bondye ek servi lezot dimunn. So progre spirityel finn donn so lavi enn sans.

Kan bann zenn lir Labib tulezur sa kapav pus zot pu azir. Takahiro explike: “Sak fwa ki mo al dormi ek mo realize ki mo pankor lir mo Labib, mo leve ek mo fer mo lektir. Grasa sa mo santi ki Zeova diriz mwa. Lektir Labib tulezur finn byin ed mwa pu progrese lor plan spirityel. Mo byin deside pu fer plis dan servis Zeova. Akoz sa, mo finn kumans fer pyonye oxilyer zis apre ki mo’nn fini lekol. Ek mo byin kontan sa servis la.”

Apar lektir Labib, ki kitsoz ki kapav pus u pu donn Zeova loner ankor plis? Tomohiro ti aprann laverite par so mama. Li dir: “Se selman kan mo ti ena 19 an, apre ki mo’nn etidye afon liv La vie a-t-elle un but? ki mo’nn santi mwa byin tuse par lamur Zeova ek par sakrifis ki Zezi finn fer pu nu. Rekonesans pu lamur ki Bondye ena pu nu ki finn pus mwa pu fer ankor plis dan servis Zeova.” (2 Korintyin 5:14, 15) Parey kuma Tomohiro, enn kantite zenn finn gayn lankurazman pu fer bann progre lor plan spirityel grasa enn bon letid Labib personel.

Me, ki u kapav fer si, malgre u’nn fer tusala me u pa resanti enn dezir sinser pu servi Zeova? Ver kisannla u kapav turne pu gayn led? Lapot Pol ti ekrir: “Parski Bondye . . . pe azir andan zotmem pu ki an mem tan zot ena dezir ek ki zot azir.” (Filipyin 2:13) Si u priye Zeova ek u demann Li so led, Li pu donn u so lespri sin. Grasa sa u pu gayn lafors pa selman ‘pu azir’ me ‘pu ena dezir.’ Savedir ki lespri sin Bondye pu ogmant u dezir pu fer tu seki u kapav dan servis Zeova, ek li pu ed u pu progrese lor plan spirityel. Wi, met u konfyans dan lafors Zeova ek fer u leker vinn for!

Fixe U Bann Prop Lobzektif

Enn fwa ki u’nn byin deside pu servi Zeova ankor plis, u bizin fixe bann lobzektif personel pu u kapav progrese. Mana, enn zenn tifi Kretyin ti dir: “Fixe bann lobzektif spirityel, finn byin ed mwa. Olye ki mo rekile mo finn kapav avanse avek kuraz. Avek mo bann lobzektif dan mo lespri, mo finn priye Zeova avek tu mo lafors pu ki Li gid mwa. Ek mo finn kapav progrese san ki mo les mwa distrer.”

U bizin fixe bann lobzektif ki rezonab. Par egzanp, enn lobzektif rezonab se lir enn sapit Labib tulezur. U kapav kumans usi enn proze resers. Anu gete kuma u kapav fer sa avek bann piblikasyon ki u ena an Franse. U kapav etidye bann kalite ki Zeova ena. U pu truv tu sa bann kalite la dan l’Index des publications de la Sociéte Watchtower, anba tit “Jéhovah” ek sutit “Qualités.” Ena plis ki 40 sutit ki u kapav egzamine. Pena dut ki sa resers la pu fer u vinn pros ar Zeova ek pus u pu fer plis pu Li. Ena bann lezot lobzektif rezonab ki u kapav fixe. Par egzanp reponn omwin enn fwa dan sak reynion kot demann lasistans pu partisipe. U kapav usi fer inpe plis konesans enn manb dan kongregasyon sak fwa ki u al reynion, ek pa les enn zur pase san ki u priye Zeova ek koz avek lezot lor Li.

Si u pankor donn u non pu Lekol Minister Teokratik, sa li enn bon lobzektif ki u kapav fixe. Eski u finn deza kumans prese? Si u pankor, sirman u pu anvi travay pu vinn enn proklamater ki pankor batize. Li normal ki prosin etap se ki u bizin reflesi lor u relasyon avek Zeova ek angaz u lavi ar Li. Buku zenn fer zefor pu respekte zot langazman ar Zeova kan zot kumans servis aplintan.

Mem si li bon ki u ena bann lobzektif dan u lavi, u bizin fer atansyon pu pa devlop enn lespri konpetisyon. U pu ena plis lazwa dan seki u fer si u pa konpar u avek lezot.—Galat 5:26; 6:4.

Kitfwa u santi ki u pena lexperyans ek ki li difisil pu u fixe bann lobzektif rezonab. Si u ena sa santiman la, swiv sa konsey Labib la: “Ekut byin, ek tann parol bann dimunn ki saz.” (Proverb 22:17) Demann u bann paran ek bann lezot Kretyin ki ena lexperyans pu ed u. Byinsir, bann paran ek bann lezot frer ek ser, bizin montre zot rezonab, ek ankuraz sa bann zenn la dan sa domenn la. Si bann zenn santi zot oblize pu reysi lobzektif ki lezot finn fixe pu zot, zot pu perdi zot lazwa. Li kapav mem arive ki fixe bann lobzektif perdi so valer. Se seki ti ariv enn tifi. Li dir: “Mo bann paran ti fixe bann lobzektif enn deryer lot pu mwa. Zot ti fixe bann lobzektif kuma par egzanp: Donn mo non dan Lekol Minister Teokratik, partisip dan predikasyon, batize, ek apre vinn pyonye. Mo ti fer buku zefor pu mo reysi fer sa enn par enn. Kan mo ti reysi enn, mo bann paran pa ti felisit mwa. Okontrer zot ti fixe enn lot lobzektif ki mo ti pu bizin rinte pu reysi. Rezilta: Mo ti santi mwa oblize pu reysi bann lobzektif. Mo ti fatige ek mo ti ena linpresyon ki mo pa ti pe fer nanyin.” Ki pa ti bon? Tu sa bann lobzektif la ti bon, me sa pa ti so bann lobzektif. Pu reysi, u bizin santi u puse pu fixe enn lobzektif par umem!

Mazinn Zezi Kris. Kan li ti vinn lor later, li ti kone seki so Papa, Zeova, ti atann ki li fer. Fer volonte Zeova, pa ti zis enn lobzektif pu Zezi, li ti enn misyon ki li ti bizin akonpli. Kuma eski Zezi ti konsider sa misyon la? Li ti dir: “Mo manze, se fer volonte sa kikenn ki’nn avoy mwa la ek fini so travay.” (Zan 4:34) Zezi ti byin kontan pu fer volonte Zeova ek realiz seki so Papa ti atann ki li fer. Volonte so Papa ti kuma manze pu Zezi. Li ti truv enn gran plezir ek satisfaksyon pu akonpli travay ki so Papa ti donn li pu fer. (Ebre 10:5-10) U’si u kapav truv plezir kan u byin motive pu fer seki u bann paran ankuraz u pu fer.

Kontiyn Fer Seki Bon

Enn fwa ki u ena enn lobzektif, travay pu reysi li. Galat 6:9 dir: “Fode pa nu aret fer seki bon parski kan finn ariv so ler, nu pu rekolte si nu pa les fatig pran nu.” Pa kont zis lor u prop lafors uswa u kapasite. Se sir ki u pu gayn bann difikilte ek defwa u kapav mem santi ki u pa’nn reysi. Me Labib donn nu sa lasirans la: “Dan tu bann kitsoz ki to fer, pran Li [Bondye] kont, ek Li, Li pu fer to bann semin vinn drwat.” (Proverb 3:6) Zeova pu sutenir u amezir u fer zefor pu reysi u bann lobzektif spirityel.

Wi, u pu kapav fer ansort ‘ki tu dimunn truv byin u progre.’ (1 Timote 4:15) Kuma? Se kan u devlop dezir pu servi Zeova ek kan u fer zefor pu reysi bann lobzektif spirityel ki u’nn fixe. Lerla u pu ena enn lavi ki ena enn sans dan servis Bondye.

[Zimaz lor paz 31]

Lir Labib tulezur ek medit lor seki u finn lir pu pus u pu servi Zeova

[Zimaz lor paz 32]

Zezi ti fer tu seki so Papa ti atann ki li fer