Bann Vision lor Royaume Bondié Vinn enn Realité

“Zot faire bien kan zot prend compte [parole prophetik], pareil couma enn la-lampe ki pé brillé dan enn place kot faire noir.”—2 PIERRE 1:19.

1. Cite deux l’attitude different ki éna dan le monde?

ZORDI dan le monde, éna problem enn derriere lot. Ki li bann catastrophe dan l’environnement ou-soit terrorisme, dimoune nepli kapav control bann problem l’humanité. Mem bann grand religion pa finn kapav faire nanyin. En realité, souvent zot empire la situation kan zot incite bann dimoune pou vinn pli fanatik, pou éna la haine ek pou montré-zot nationalist, ek tousala finn crée division. Oui, couma ti predir, ‘enn grand noirté’ finn couver “bann nation.” (Isaïe 60:2) Mais, en mem temps, plusieurs million dimoune éna confiance dan l’avenir. Kifer? Parski zot prend compte parole prophetik Bondié ki “pareil couma enn la-lampe ki pé brillé dan enn place kot faire noir.” Zot laisse-zot guidé par “parole” setadir par message Bondié, ki trouve asterla dan la Bible.—2 Pierre 1:19.

2. Dapré prophetie Daniel lor “lepok la fin,” kisannla seulement ki gagne sagesse pou comprend bann kitsoz spirituel?

² Concernant “lepok la fin,” prophete Daniel ti ecrire: “Beaucoup pou al par-ci par-là, ek pou éna enn grand quantité vrai connaissance. Beaucoup pou purifié zot-mem, pou faire zot-mem vinn prop, ek zot pou raffiné. Bann mauvais dimoune pou vrai-mem faire mauvais, ek okenn mauvais dimoune pa pou comprend; mais bann ki trouve pli loin ki zis l’apparence, pou comprend.” (Daniel 12:4, 10) C’est zis bann ki “al par-ci par là,” setadir bann ki serieux dan zot l’etude lor Parole Bondié, ki soumette-zot ar tou so bann principe ek ki faire zeffort pou faire so volonté, ki pou gagne sagesse pou comprend bann kitsoz spirituel.—Matthieu 13:11-15; 1 Jean 5:20.

3. Pendant bann l’année 1870, ki verité important bann premier etudiant la Bible ti’nn comprend?

³ Depuis commencement bann l’année 1870, avant ki “lepok la fin” ti commencé, Jéhovah ti commence donne plus l’eclaircissement lor “bann saints secrets lor royaume ki dan le ciel.” (2 Timothée 3:1-5; Matthieu 13:11) Sa lepok-la, enn group etudiant la Bible ti’nn comprend ki Christ pou retourné dan enn fason invisible, alors ki la plupart ti croire le contraire. Apré ki li’nn vinn le roi dan le ciel, Jésus ti pou retourné dan le sens ki li ti pou prend compte séki ti pé passé lor la terre en tant ki lé-roi. So bann disciple ti pou gagne enn signe kot ti pou éna plusieurs l’evenement, ki ti pou faire zot koné ki so presence invisible finn commencé.—Matthieu 24:3-14.

Kan enn Vision Vinn enn Realité

4. Couma Jéhovah finn fortifié la foi so bann serviteur dan nou lepok?

⁴ La transfiguration ti enn vision extraordinaire lor la gloire Christ dan so Royaume. (Matthieu 17:1-9) Sa vision-la ti fortifié la foi Pierre, Jacques ek Jean dan enn lepok kot beaucoup dimoune ti’nn arrete suive Jésus parski li pa’nn faire séki zot ti pé atann. Pareillement, alors ki nou pé vive lepok la fin, Jéhovah finn fortifié la foi so bann serviteur zordi. Couma? Li finn aide zot pou comprend pli bien couma sa vision extraordinaire-la ek bann lezot prophetie ki éna enn rapport avek sa, finn realisé. Anou guetté asterla, couma certain parmi sa bann prophetie-la, finn vinn enn realité.

5. Kisannla ki represente sa zetoile grand-matin-la, ek kan ek couma li finn ‘levé’?

⁵ L’apotre Pierre ti pé faire reference ar la transfiguration, kan li ti ecrire: “Donk, nou éna la parol prophetik ki finn vinn pli sur, ek zot faire bien kan zot prend li compte, pareil couma enn la-lampe ki pé brillé dan enn place kot faire noir, ziska ki li-jour commence parette, ek zetoile grand-matin levé dan zot leker.” (2 Pierre 1:19) Sa zetoile grand-matin-la, ou-soit ‘zetoile brillant ki levé boner-la’ represente Jésus Christ ki finn gagne la gloire. (Révélation 22:16) Li ti levé en 1914, kan Royaume Bondié finn etabli dan le ciel. Sa l’evenement-la finn commence aussi enn nouveau period lor la terre. (Révélation 11:15) Dan la transfiguration, Moïse ek Éliya ti apparette à coté Jésus ek zot ti pé koz ar li. Ki zot representé?

6, 7. Ki Moïse ek Éliya representé dan vision transfiguration, ek ki detail important éna dan la Bible lor bann ki zot representé?

⁶ Étant donné ki Moïse ek Éliya ti pé partage la gloire ki Christ éna, sa deux temoin fidel-la, bizin represente bann ki regne avek Jésus dan so Royaume. Nou comprend ki éna lezot ki regné ensam avek Jésus grace a enn vision ki prophete Daniel ti gagné kan li ti trouve le Messie lor so trone. Daniel ti trouve “l’Ancien des Jours,” setadir, Jéhovah, pé donne “enn kikenn ki pareil couma enn humain,” “enn royaume ki jamais pa pou fini.” Mais remarké séki Daniel ti trouvé zis apré. Li ecrire: “Le peuple ki bann saints du Suprême, finn gagne enn royaume ek enn gouvernement ek grandeur bann royaume dan tou l’univers.” (Daniel 7:13, 14, 27) Oui, plus ki cinq siecle avant transfiguration, Bondié ti fini dir ki ti pou éna bann “saint” ki ti pou partage grandeur ki Christ ti pou éna dan so royaume.

⁷ Kisannla sa bann saint ki mentionné dan vision Daniel-la? L’apotre Paul ti pé faire reference ar sa bann dimoune-la, kan li ti dir: “L’esprit li-mem pé donne temoignage avek nou l’esprit ki nou bann zenfant Bondié. Si nou bann zenfant, nou aussi bann heritier, oui bann heritier Bondié, mais bann coheritier Christ, pourvu ki nou souffer ensam avek li pou ki nou aussi kapav gagne la gloire avek li.” (Romains 8:16, 17) Bann saint-la, zot en realité bann disciple Jésus ki oint ar l’esprit-saint. Dan Révélation, Jésus dir: “Mo pou permette celui ki vainker, pou assize avek moi lor mo trone, pareil couma mo finn vainker ek mo finn assize avek mo Papa lor so trone.” En tout, pou éna 144, 000 vainker, ki pou ressuscité, ek ensam avek Jésus zot pou dirige la terre entier.—Révélation 3:21; 5:9, 10; 14:1, 3, 4; 1 Corinthiens 15:53.

8. Couma bann disciple oint ti faire enn travail pareil couma Moïse ek Éliya, et ki resultat zot inn gagné?

⁸ Mais kifer nou dir ki Moïse ek Éliya represente bann Chrétien oint? Parski pendant ki sa bann Chrétien-la encore lor la terre, zot faire enn travail pareil couma Moïse ek Éliya ti faire. Par exemple, zot servi Jéhovah couma so bann Témoins, mem si zot gagne persecution. (Isaïe 43:10; Actes 8:1-8; Révélation 11:2-12) Pareil couma Moïse ek Éliya, zot denonce fausse religion avek courage, ek en mem temps zot encourage bann dimoune sincere pou adore zis Bondié tousel. (Exode 32:19, 20; Deutéronome 4:22-24; 1 Rois 18:18-40) Eski zot travail finn rapporte bann fruit? Bien-sur! A part ki zot finn contribué pou rassemblé tou bann Chrétien oint, zot finn aide plusieurs million “lezot brebis” pou soumette-zot ar Jésus Christ.—Jean 10:16; Révélation 7:4.

Christ Complete So Victoire

9. Ki description Révélation 6:2 donné lor Jésus zordi?

⁹ Jésus nepli enn humain ki pé monte lor enn âne. Zordi li enn lé-Roi puissant. Livre Révélation dir ki li pé monte enn cheval, ki enn symbole la guerre dapré la Bible. (Proverbes 21:31) Révélation 6:2 dir: “Guetté! enn cheval blanc, et celui ki ti pé assize lor la, ti éna enn l’arc, ek li finn gagne enn couronne, ek li finn sorti couma enn vainker pou complete so victoire.” En plus, David ti ecrire dan enn psaume: “Baton to la-force, Jéhovah pou envoye sa depuis Sion, ek [li pou dir toi]: ‘Al regne parmi to bann l’ennemi.’ ”—Psaume 110:2.

10. (a) Kan Jésus ti sorti pou al complete so victoire, couma sa ti commencé dan la gloire? (b) Couma premier victoire ki Christ ti gagné, finn éna enn l’effet lor le monde entier?

¹⁰ Premier victoire ki Jésus ti gagné, ti lor so bann l’ennemi ki pli puissant—Satan ek so bann demon. Li ti tir zot dan le ciel ek li finn jette zot lor la terre. Sa bann mauvais l’esprit-la koné ki zot péna beaucoup lé-temps, c’est pou sa ki zot tir zot grand colere lor l’humanité. Sa finn amenn enn grand malheur. Dapré livre Révélation, sa malheur-la representé par trois lezot cavalier. (Révélation 6:3-8; 12:7-12) Couma ti predir dan prophetie ki Jésus ti donné lor “signe [so] presence ek lepok la fin sa lé-monde-la,” kan sa trois cavalier-la finn sorti, sa finn amenn la guerre, la famine ek bann maladie mortel. (Matthieu 24:3, 7; Luc 21:7-11) Pareil couma bann douleur ki enn madame gagné kan li pou gagne ti-baba, péna okenn doute ki ‘sa bann douleur-la’ aussi pou contigne vinn pli fort ziska ki Christ ‘complete so victoire.’ Sa pou arrivé kan li pou detruire chaque parti visible dan l’organisation Satan.a—Matthieu 24:8.

11. Couma l’histoire congregation Chrétienne montré ki Christ pé regné?

¹¹ Nou trouve aussi l’autorité ki Jésus éna en tant ki lé-Roi, kan li’nn protege congregation Chrétienne pou ki so bann membre kapav rempli zot mission pou preche Royaume Bondié partout lor la terre. Malgré ki zot finn gagne bann grand persecution ar Babylone la Grande—setadir tou bann fausse religion dan le monde—ek zot finn konn aussi l’opposition bann gouvernement, la predication finn contigné. En plus, dan l’histoire l’humanité, jamais pa finn preche autant ki sa dan le monde. (Révélation 17:5, 6) Oui, sa li vrai-mem enn grand preuve ki Jésus pé regné zordi!—Psaume 110:3.

12. Kifer la majorité dimoune pa comprend ki Christ présent dan enn fason invisible?

¹² Mais li bien triste ki la majorité dimoune, parmi éna aussi bann million dimoune ki dir ki zot Chrétien, pa comprend ki bann l’evenement ki pé passé lor la terre, pé arrivé à cause bann kitsoz invisible ki pé arrivé dan le ciel. Zot mem bouffonne bann ki annonce Royaume Bondié. (2 Pierre 3:3, 4) Kifer? Parski Satan finn aveuglé zot l’esprit. (2 Corinthiens 4:3, 4) En realité, sa faire plusieurs siècle ki li finn commence aveuglé spirituellement bann ki dir ki zot Chrétien. Li finn mem pousse zot pou abandonne l’espoir ki zot ti éna en rapport avek Royaume Bondié.

Zot Finn Abandonne l’Espoir lor Royaume Bondié

13. Ki bann soi-disant Chrétien ki aveugle lor plan spirituel, ti commence faire?

¹³ Jésus ti predir ki bann apostat, ki couma bann mauvais l’herbe ki finn semé parmi du blé, pou glisse dan congregation Chrétienne ek pou essaye entraine beaucoup disciple. (Matthieu 13:24-30, 36-43; Actes 20:29-31; Jude 4) Avek le temps, sa bann soi-disant Chrétien-la finn commence accepté bann fête, coutume ek l’enseignement paien. Zot finn mem pretann ki kapav considere sa bann kitsoz-la couma bann pratik “Chrétien.” Par exemple, l’origine fête Noël sorti dan l’adoration bann bondié paien, Mithra ek Saturne. Mais ki finn pousse bann soi-disant Chrétien pou accepté celebré sa bann fête ki pa Chrétien-la? Enn Encyclopédie (The New Encyclopædia Britannica, 1974) dir: “Noël, fête naissance Jésus Christ, finn etabli parski [dimoune] finn arrete pensé ki retour Christ bien pré.”

14. Couma bann l’enseignement Origène ek Augustine finn mal represente bann verité lor Royaume Bondié?

¹⁴ Anou considere aussi comment sa bann soi-disant Chrétien-la finn deforme mot “royaume.” Livre The Kingdom of God in 20th-Century Interpretation dir: “Origène [enn kikenn ki ti etudié la religion dan troisième siècle] finn change signification ki bann Chrétien ti habitué donné pou mot royaume, ek li’nn faire sa prend enn lot signification: regne Bondié ki dan leker [bann dimoune].” Lor ki Origène finn base so l’enseignement? Pa lor la Bible, mais lor “bann raisonnement ek maniere pensé le monde, ki différent avek pensé Jésus ek bann premier Chrétien.” Dan so livre De Civitate Dei (La Cité de Dieu) Augustine l’eveque d’Hippone (354-430 N.L.) finn dir ki c’est l’eglise li-mem ki Royaume Bondié. Sa fason pensé ki pa en accord avek la Bible-la, finn donne bann l’eglise la Chrétienté bann pretext ki soi-disant Biblik, pou accepté pouvoir dan la politik. Zot finn occupe sa pouvoir-la pendant plusieurs siecle, souvent dan enn fason cruel.—Révélation 17:5, 18.

15. Couma Galates 6:7 finn realisé en rapport avek beaucoup l’eglise la Chrétienté?

¹⁵ Mais zordi, bann l’eglise pé recolté séki zot inn semé. (Galates 6:7) Li parette ki beaucoup pé perdi zot pouvoir ek aussi zot bann membre. Nou bien remark sa tendance-la en Europe. Journal Christianity Today, dir: “Zordi, bann grand cathedral en Europe, zot nepli bann place kot dimoune al adore Bondié, mais zot inn vinn bann musée, kot éna zis tourist.” Nou trouve mem tendance dan lezot parti le monde. Ki sa pé annoncé pou la fausse religion? Eski li pou zis disparette, parski dimoune nepli pé soutenir li? Ek ki l’effet sa pou éna lor vrai l’adoration?

Prepare Ou pou Grand Jour Bondié

16. Kifer l’opposition ki pé augmenté enver Babylone la Grande, éna enn signification?

¹⁶ Kan nou trouve la fumée ek la cendre pé commence sorti dan enn volcan ki pa ti actif pendant enn temps, nou koné ki pa pou tardé pou éna enn eruption. Li pareil aussi kan nou trouve l’opposition ki pé augmenté enver la religion zordi dan beaucoup pays: Sa montré ki fausse religion pré pou disparette. Bientot, Jéhovah pou pousse bann dirigeant politik pou joinde zot zeffort ensam pou denonce sa prostitué spirituel ki la Bible appel Babylone la Grande, ek pou detruire li net. (Révélation 17:15-17; 18:21) Eski bann vrai Chrétien pou bizin peur sa l’evenement-la, ek bann lezot kitsoz ki pou arrivé en rapport avek “la grande tribulation” ki pou vinn apré? (Matthieu 24:21) Non, pa ditou! Au contraire, zot pou éna bann raison pou content kan Bondié pou detruire bann mauvais dimoune. (Révélation 18:20; 19:1, 2) Anou prend l’exemple séki ti arrivé avek la ville Jérusalem dan premier siecle ek avek bann Chrétien ki ti reste là-bas.

17. Kifer bann serviteur fidel Jéhovah pa pou peur kan la fin sa lé-monde-la pou arrivé?

¹⁷ Kan l’armé Romain ti entoure Jérusalem en 66 N.L., bann Chrétien ki ti contigne veillé lor plan spirituel, pa ti ni choqué, ni peur. Parski zot ti serieux dan zot l’etude Parole Bondié, zot ti koné ki “destruction [Jérusalem] finn kosté.” (Luc 21:20) Zot ti koné aussi ki Bondié ti pou ouver enn chemin pou zot kapav sauvé. Kan sa ti arrivé, bann Chrétien finn sauvé. (Daniel 9:26; Matthieu 24:15-19; Luc 21:21) Zordi aussi pareil, bann ki konn Bondié ek ki obeir so Garson, pa pou peur kan la fin sa lé-monde-la pou arrivé. (2 Thessaloniciens 1:6-9) En realité, kan la grande tribulation pou commencé, c’est avek enn grand la-joie ki zot pou ‘redresse zot ek zot pou lève zot la-tête, parski zot koné ki zot delivrance pé kosté.’—Luc 21:28.

18. Comment l’attak ki Gog pou faire kont bann serviteur Jéhovah, pou fini?

¹⁸ Apré destruction Babylone la Grande, Gog de Magog, setadir Satan, pou lance enn l’attak final contre bann serviteur Jéhovah, ki vive en paix. Bann l’armé Gog pou vini, pareil “couma bann nuage pou couver pays-la,” ek zot pou pensé ki zot pou gagne enn victoire facile. Mais zot pou gagne enn grand choque! (Ézékiel 38:14-16, 18-23) L’apotre Jean écrire: “Mo finn trouve le ciel ouver, ek guetté! enn cheval blanc. Sa kikenn ki pé assize lor sa cheval-la appel Fidel et Vrai . . . Enn longue l’épée fité sorti dan so la-bouche, pou li kapav detruire bann nation avek sa.” Sa ‘lé-Roi des Rois,’ ki personne pa kapav batté-la, pou sauve bann adorateur fidel ki servi Jéhovah, ek li pou detruire tou zot l’ennemi. (Révélation 19:11-21) Oui, sa pou vrai-mem pli grand moment dan realisation vision lor la transfiguration!

19. Ki l’effet victoire ki Christ pou gagné, pou éna lor so bann fidel disciple, ek ki zeffort zot bizin faire asterla-mem?

¹⁹ ‘Sa jour-la, dimoune ‘pou guette Jésus avek l’admiration a cause séki li’nn faire en rapport avek bann ki finn éna la foi.’ (2 Thessaloniciens 1:10) Eski ou envi faire parti parmi bann dimoune ki pou montré enn grand respé pou Garson Bondié kan li gagne la victoire? Si oui, contigne fortifié ou la-foi ek ‘montré ki ou’nn paré, parski c’est dan enn l’heure ki ou pa atann, ki Fils de l’homme pou vini.’—Matthieu 24:43, 44.

Garde Ou Bon Jugement

20. (a) Couma nou kapav montré ki nou content ki Jéhovah finn donne nou “l’esclave fidel et avisé”? (b) Ki bann question nou bizin pose nou-mem?

²⁰ Souvent “l’esclave fidel et avisé” encourage peuple Bondié pou reste spirituellement lor zot garde ek aussi pou garde zot bon jugement. (Matthieu 24:45, 46; 1 Thessaloniciens 5:6) Eski ou reconnaissant pou sa bann rappel ki vinn dan bon moment-la? Eski ou prend zot compte kan ou fixé bann priorité dan ou la-vie? Kifer ou pa demann ou-mem: ‘Eski mo comprend ki séki pé passé lor la terre zordi éna enn signification spirituel? Eski mo comprend ki Garson Bondié pé gouverné dan le ciel? Eski mo trouvé ki li pré pou vinn juge Babylone la Grande ek lé-reste system Satan?

21. Kifer certain finn affaibli lor plan spirituel, ek ki zot bizin faire sans tardé?

²¹ Certain membre l’organisation Jéhovah finn affaibli lor plan spirituel. Eski c’est parski zot finn perdi patience ou-soit l’endurance, couma certain parmi bann premier disciple Jésus? Eski c’est bann tracas la vie, materialisme ou-soit persecution ki finn affecté zot? (Matthieu 13:3-8, 18-23; Luc 21:34-36) Kitfois éna dimoune ki finn trouve difficile pou comprend certain kitsoz ki “l’esclave fidel et avisé” finn ecrire. Si sa finn arrive ou, nou encourage ou sincerement pou retrouve ou zèle pou etudié Parole Bondié, ek pou supplie Jéhovah pou ki ou kapav re-gagne enn relation solide ek proche avek Li.—2 Pierre 3:11-15.

22. Kan ou finn examine la transfiguration ek bann lezot prophetie en rapport avek sa vision-la, ki l’effet sa finn éna lor ou?

²² Bann disciple Jésus finn gagne la transfiguration dan enn moment kot zot ti bizin l’encouragement. Zordi nou éna enn pli grand kitsoz pou encourage nou—realisation sa vision extraordinaire-la ek aussi bann lezot prophetie en rapport avek sa. A mesure ki nou trouvé couma zot pé realisé, ek séki sa vedir pou l’avenir, anou aussi, pareil couma l’apotre Jean, dir avek tou nou leker: “Amen! Vini Seigneur Jésus.”—Révélation 22:20.

[Note]

Eski Ou Rappel?

• Dan bann l’année 1870, ki enn ti-group etudiant la Bible ti comprend en rapport avek retour Christ?

• Couma vision lor la transfiguration finn realisé?

• Kan Jésus inn sorti pou al complete so victoire, ki l’effet sa finn éna lor le monde ek lor congregation Chrétienne?

• Ki nou bizin faire pou vinn parmi bann dimoune ki pou survive kan Jésus pou complete so victoire?

[Zimage, page 9]

Enn vision vinn enn realité

[Zimage, page 10]

Eski ou koné séki finn arrivé kan Christ ti sorti pou al complete so victoire?