Li important pou nou comprend bann signe!

“Dan commencement mo ti croire ki nou garson Andreas, ti pé gagne enn simple malade la tête. Mais li ti perdi l’appetit ek li ti gagne enn gros la-fievre. So malade la tête ti vinn pli fort, ek mo ti commence tracassé. Couma mo missié inn retourne lakaz, nou finn amenn Andreas kot docteur. Li ti check bann symptom Andreas ek li ti envoye li droite l’hopital. Problem-la ti pli grave ki enn malade la tête. Andreas ti gagne méningite. Li ti suive bann traitement ek li pa ti tardé pou retrouve so la-santé.”—Gertrud, Allemagne.

SUREMENT beaucoup parent konn bien l’experience ki Gertrud inn vive. Zot remark bann signe ki montré ki zot zenfant kitfois malade. Mem si pa tou maladie ki grave, bann parent pa kapav neglige bann signe ki montré ki zot zenfant malade. Sa kapav faire enn difference si nou reconette bann signe ek nou faire seki necessaire. Li enn kitsoz ki bien important.

Sa li vrai aussi dan lezot domaine a part la santé. Nou trouve sa dan seki ti arrivé en décembre 2004 kan ti ena tsunami dan bann region ki autour l’océan Indien. Dan bann l’endroit couma l’Australie ek Hawaii, bann l’organisation ki travail pou bann gouvernement, ti detecté sa grand tremblement de terre ki ti arrivé dan nord Sumatra-la, ek zot ti trouvé ki sa ti kapav faire bann grand degat. Mais dan bann l’endroit kot ti ena sa danger-la, pa ti ena okenn moyen pou averti bann dimoune ek pou aide zot faire seki bizin pou sap zot la-vie. Resultat: plus ki 220,000 dimoune ti perdi la vie.

Bann signe ki encore pli important

Kan Jésus Christ ti lor la terre, li ti donne bann dimoune ki ti pé ecoute li enn leson lor reconette bann signe ek faire seki necessaire. Li ti pé cause lor enn evenement ki ena enn bien grand l’importance. La Bible dire: “Bann Pharisien ek bann Sadducéen ti vinn vers li ek, pou tente li, zot ti demann li pou montré zot enn signe ki sorti dan le ciel. Pou reponn Jésus ti dire zot: ‘Kan inn arrive a-soir, zot habitué dire, “Le temps pou bon demain, parski le ciel couleur difé”; ek kan inn arrive gramatin, “Zordi, pou faire frais, pou ena la pluie, parski le ciel couleur difé mais li sombre.” Zot koné couma pou explik l’apparence le ciel, mais zot pa kapav explik bann signe le temps ki zot pé vive’ ”—Matthieu 16:1-3.

Jésus ti koz lor bann signe “le temps ki zot pé vive” pou montré ki bann Juif ki ti pé ecoute li, ti bizin reconette ki zot ti pé vive enn lepok important. System juif ti pré pou passe par enn catastrophe ki ti pou affecté zot tou. Dé-trois jour avant so la-mort, Jésus ti koz ar so bann disciple lor enn lot signe—signe so presence, setadir signe ki pou montré ki li là. Seki li ti dire lerla, li bien important pou nou tou zordi.