Reste dan l’amour Bondié!
“Mo bann frere ki mo bien content, . . . reste dan l’amour Bondié, . . . pou [zot] gagne la vie eternel.”—JUDE 20, 21.
1, 2. Couma nou kapav reste dan l’amour Bondié?
JÉHOVAH tellement content bann dimoune ki Li finn donne so sel Garson ki Li finn crée direct, pou ki tou seki ena la foi en li kapav gagne la vie pou touletan. (Jean 3:16) Oui, li vrai-mem extraordinaire pou gagne sa l’amour-la! Si ou enn serviteur Jéhovah, surement ou envie contigne gagne sa l’amour-la pou touletan.
2 Disciple Jude ti explik nou couma nou kapav reste dan l’amour Bondié. Li ti ecrire: “Kan zot contigne fortifié zot-mem dan zot bann croyance ki bien saint, ek kan zot prié avek l’esprit saint, reste dan l’amour Bondié, alors ki zot pé attann misericorde nou Seigneur Jésus Christ pou gagne la vie eternel.” (Jude 20, 21) Kan nou etudié Parole Bondié ek kan nou preche la bonne nouvelle, sa aide nou pou fortifié nou-mem lor nou “bann croyance ki bien saint,” setadir lor bann l’enseignement chrétien. Pou nou reste dan l’amour Bondié, nou bizin prié “avek l’esprit saint,” setadir laisse li influence nou. Nou bizin aussi ena la foi dan sacrifice Jésus Christ pou nou gagne la vie eternel.—1 Jean 4:10.
3. Kifer certain nepli Témoins de Jéhovah?
3 Certain ki ti deja ena la foi, pa finn reste dan l’amour Bondié. Parski zot finn choisir pou faire peché, zot nepli Témoins de Jéhovah. Ki ou kapav faire pou ki sa pa arrive ou? Si ou medite lor sa bann point ki pou examiné-la, sa kapav aide ou pou pa faire peché ek pou reste dan l’amour Bondié.
Montré ou l’amour pou Bondié
4. Kifer eski li bien important ki nou obeir Bondié?
4 Ou montré ou l’amour pou Bondié kan ou obeir Li. (Matthieu 22:37) L’apotre Jean ti ecrire: “Ala seki vedir l’amour pou Bondié: suive so bann commandement; ek pourtant so bann commandement pa lourd.” (1 Jean 5:3) Si ou prend l’habitude pou obeir Bondié, sa kapav donne ou la force pou resisté kont bann tentation ek sa pou faire ou gagne la joie. Enn ecrivain Psaume ti dire: “Heureux sa kikenn ki pa finn marche dan conseil bann mauvais dimoune-la, . . . mais so plaisir li dan la loi Jéhovah.”—Psaume 1:1, 2.
5. Ki ou l’amour pou Jéhovah pou empeche ou faire?
5 Ou l’amour pou Jéhovah pou empeche ou faire enn peché grave ki pou jette deshonneur lor so nom. Agour ti demann Bondié dan enn la-priere: “Pa faire moi vinn ni misere ni riche. Laisse moi mange portion mangé ki’nn decidé pou donne moi, pangar mo trop satisfait ar seki mo gagné ek vrai-mem mo renié toi ek mo dire: ‘Jéhovah, kisannla sa?,’ ek pangar mo tombe dan la misere ek ki vrai-mem mo al kokin ek mo sali nom mo Bondié.” (Proverbes 30:1, 8, 9) Ou bizin bien decidé pou pa ‘sali nom Bondié,’ setadir faire dimoune koz en mal lor sa nom-la. Au contraire, faire tou pou agir dan enn fason droite pou ki sa glorifié Bondié.—Psaume 86:12.
6. Ki pou arrivé si ou faire enn peché alors ki ou bien koné ki ou pé faire?
6 Prié ou Papa ki dan le ciel regulierement ek demann Li so l’aide pou ki ou pa tombe dan tentation pou faire peché. (Matthieu 6:13; Romains 12:12) Contigne suive bann conseil Bondié pou ki nanyin pa bloque ou la-priere. (1 Pierre 3:7) Si ou faire enn peché ek ou bien koné ki ou pé faire, ou pou paye bann consequence bien grave, parski dan enn fason symbolik, Jéhovah bloque la priere bann dimoune rebelle avek enn gros nuage, pou ki zot la-priere pa arrive ziska Li. (Lamentations 3:42-44) Alors, montré par ou l’attitude ki ou humble ek prié Bondié pou ki ou pa faire nanyin dan ou la-vie ki pou empeche ou la-priere passé.—2 Corinthiens 13:7.
Manifesté l’amour pou Garson Bondié
7, 8. Couma, si nou mette en pratik bann conseil Jésus, sa kapav aide nou pou evite faire peché?
7 Montré ki ou content Jésus Christ kan ou obeir so bann commandement, parski sa pou aide ou pou evite faire peché. Jésus ti dire: “Si zot obeir mo bann commandement, zot pou reste dan mo l’amour, pareil couma mo finn obeir bann commandement mo Papa ek mo finn reste dan so l’amour.” (Jean 15:10) Si ou mette en pratik bann parole Jésus, couma sa kapav aide ou pou reste dan l’amour Bondié?
8 Si ou prend compte seki Jésus ti dire, sa kapav aide ou pou garde ou l’integrité lor plan moral. Dan la loi ki Bondié ti donne nation Israël, Li ti dire: “Fodé pa to commette l’adultere.” (Exode 20:14) Mais Jésus li, li ti donne enn principe ki ena derriere sa commandement-la kan li ti dire: “Enn dimoune ki contigne guette enn femme ziska ki sa faire li gagne enn desir pou li, finn fini commette l’adultere avek li dan so leker.” (Matthieu 5:27, 28) L’apotre Pierre ti dire ki certain chrétien dan premier siecle, zot ‘lizié ti rempli ar l’adultere’ ek zot ‘ti attire bann dimoune ki pa stable.’ (2 Pierre 2:14) Mais si ou content Bondié ek Jésus Christ, si ou obeir zot ek si ou bien decidé pou garde bann bon relation avek zot, ou pou kapav rejette l’immoralité sexuel ek pa faire couma sa bann chrétien-la.
Laisse l’esprit saint Jéhovah guide ou
9. Ki kapav arrivé si enn kikenn contigne faire peché?
9 Prié Bondié pou donne ou so l’esprit saint, ek laisse sa l’esprit-la guide ou dan ou la-vie. (Luc 11:13; Galates 5:19-25) Si ou contigne faire peché, Bondié kapav tire so l’esprit lor ou. Apré ki David ti faire peché avek Bath-Shéba, li ti suppliye Jéhovah par sa bann parole-la: “Pa rejette moi, ek pa tire to l’esprit saint lor moi.” (Psaume 51:11) Le roi Saül ti perdi l’esprit saint Bondié parski li ti faire peché ek li pa ti repenti. Li ti faire peché kan li ti offert enn sacrifice ek kan li pa ti detruire net troupeau bann Amaléqite ek li pa ti touye zot lé-roi. Alors, Jéhovah ti tire so l’esprit saint lor Saül.—1 Samuel 13:1-14; 15:1- 35; 16:14-23.
10. Kifer mem sa l’idée pou faire peché-la, ou bizin rejeté?
10 C’est sa l’idée pou faire peché-la-mem ki ou bizin rejeté. L’apotre Paul ti ecrire: “Si nou pratik peché par expré apré ki nou finn gagne enn connaissance exact lor la verité, nepli reste okenn sacrifice pou bann peché.” (Hébreux 10:26-31) Li pou vrai-mem enn malheur si ou’nn arrive ziska sa point-la!
Manifesté enn l’amour sincere pou lezot
11, 12. Couma l’amour ek respé pou empeche ou pou commette l’immoralité sexuel?
11 L’amour ki ou ena pou lezot pou empeche ou pou commette l’immoralité sexuel. (Matthieu 22:39) Sa l’amour-la pou pousse ou pou protege ou leker pou ki ou pa tenté pou kokin l’affection ki enn dimoune marié bizin donne so conjoint. Si ou kokin sa l’affection-la, sa kapav faire ou commette l’adultere. (Proverbes 4: 23; Jérémie 4:14; 17:9, 10) Faire pareil couma Job, ki ti enn dimoune droite. Li pa ti permette li-mem pou prend compte enn lot femme a part so prop femme.—Job 31:1.
12 Enn lot kitsoz ki pou aide ou evité faire enn peché grave, c’est kan ou respecté mariage ki enn kitsoz sacré. Dapré projet Bondié, enn mariage honorable ek bann relation sexuel c’est bann moyen pou donne la vie. (Genèse 1:26-28) Pa blié ki bann organe sexuel ena enn lien avek la vie, enn kitsoz ki sacré. Bann dimoune ki commette fornication ek l’adultere, zot desobeir Bondié, zot abaisse bann relation sexuel, zot pa respecté mariage ki sacré ek zot faire peché kont zot prop lekor. (1 Corinthiens 6:18) Mais, l’amour pou Bondié ek pou ou prochain, ek ou l’obeissance pou Bondié, pou empeche ou pou ena enn conduite ki pou kapav faire ou exclu dan congregation.
13. Couma enn dimoune immoral “detruire bann kitsoz ki ena valeur”?
13 Pou nou pa faire nou famille souffert, nou bizin rejette bann mauvais pensée ki kapav pousse nou pou faire peché. Proverbes 29:3 dire: “Enn dimoune ki frequente bann prostitué detruire bann kitsoz ki ena valeur.” Enn dimoune ki commette l’adultere ek ki pa repenti, li detruire so relation avek Bondié ek casse sa l’attachement ki li ena avek so famille-la. So femme ena tou droit pou demann divorce. (Matthieu 19:9) Ki li enn mari ou-soit enn femme ki commette l’adultere, enn divorce kapav faire enn conjoint innocent, bann zenfant ek bann lezot dimoune, bien souffert. Eski ou pa d’accord ki parski nou konn bann consequence bien grave ki enn conduite immoral kapav ena, sa bizin empeche nou tombe dan sa tentation-la?
14. En rapport avek peché, ki leson nou kapav tiré dan Proverbes 6:30-35?
14 Si nou maziné ki pena nanyin ki kapav repare degat ki l’adultere faire, nou pa pou commette sa action bien egoïste-la. Dapré Proverbes 6:30-35, li kapav arrivé ki bann dimoune ena pitié pou enn voleur ki’nn kokin parski li faim, mais zot meprise enn dimoune ki’nn commette l’adultere parski li ena bann mauvais mobile. Li “pé detruire so prop la-vie.” Dapré la Loi mosaïk, ti bizin touye sa dimoune-la. (Lévitique 20:10) Enn dimoune ki commette l’adultere faire so famille bien souffert zis parski li envie satisfaire so desir sexuel. Ek si li pa repenti, li pa pou reste dan l’amour Bondié, ek li pou exclu dan congregation.
Garde enn conscience pur
15. Couma enn conscience été kan ‘coumadir li finn marké avek enn ferraille bien chaud’?
15 Si nou envie reste dan l’amour Bondié, nou pa kapav laisse nou conscience vinn insensible ek pa reagir kan nou faire peché. Li clair ki nou pa pou accepté sa moralité bien bas ki ena dan le monde-la. Alors, nou bizin faire bien attention ar nou bann frequentation, ar bann livre ki nou lire, ek ar nou bann divertissement. Paul ti donne nou sa l’avertissement-la: “Dan lepok ki pou vini, certain pou abandonne la foi; zot pou ecoute bann parole inspiré ki embete dimoune ek l’enseignement bann demon ki sorti kot bann dimoune hypocrite ki koz menti ek ki ena enn conscience ki finn coumadir marké avek enn ferraille bien chaud.” (1 Timothée 4:1, 2) Enn conscience ki “finn coumadir marké avek enn ferraille bien chaud” ressemblé enn cicatrice lor enn la-chair ki’nn brulé ek ki pa ressenti nanyin. Si nou conscience coumsa, li pou nepli averti nou kont bann apostat ek kont bann situation ki kapav faire nou abandonne nou la-foi.
16. Kifer li bien important ki nou ena enn conscience pur?
16 Pou nou gagne la vie sauve, fodé ki nou ena enn conscience pur. (1 Pierre 3:21) Grace a nou la-foi dan di-sang ki Jésus inn versé, nou conscience finn vinn pur ek nou nepli coupable bann mauvais action ki nou finn faire. Sa permette nou pou “offert Bondié ki vivant, enn service sacré.” (Hébreux 9:13, 14) Si nou faire enn peché par expré, nou conscience pou vinn impur ek nou pou nepli digne pou servi Bondié. (Tite 1:15) Mais avek l’aide Jéhovah, nou kapav ena enn conscience pur.
Lezot moyen ki pou aide nou pou evite faire peché
17. Ki bienfait nou gagné kan ‘touletan nou suive Jéhovah avek tou nou leker’?
17 ‘Suive Jéhovah touletan avek tou ou leker’ pareil couma Caleb, enn Israélite ti faire. (Deutéronome 1:34-36) Faire seki Bondié demann ou, ek jamais pa rod ena enn part lor “la table bann demon.” (1 Corinthiens 10:21) Rejette l’apostasie. Apprecié nourriture spirituel ki trouve zis lor la table Jéhovah. Coumsa ou pa pou laisse bann fausse enseignant ek bann mauvais l’esprit embete ou. (Éphésiens 6:12; Jude 3, 4) Passe le temps pou faire bann kitsoz spirituel, couma par exemple etudié la Bible, assisté bann reunion ek sorti predication. Ou kapav sur ki ou pou heureux si touletan ou suive Jéhovah avek tou ou leker ek si ou ena beaucoup kitsoz pou faire dan travail nou Seigneur.—1 Corinthiens 15:58.
18. Couma la crainte pou Jéhovah kapav influence ou conduite?
18 Ou bizin bien decidé pou “offert Bondié enn service sacré avek la crainte ek enn grand respé.” (Hébreux 12:28) Si ou ena la crainte ek enn grand respé pou Jéhovah, sa pou pousse ou pou rejette enn conduite rebelle. Sa la-crainte-la pou aide ou pou ena enn conduite ki en accord avek conseil ki Pierre ti donné. Li ti dire so bann frere oint: “Si zot prié nou Papa ki juge chaque dimoune dapré seki li faire, sans faire preference, alors ena enn conduite ki montré zot la-crainte pou Bondié pendant ki zot pé reste couma bann etranger lor la terre.”—1 Pierre 1:17.
19. Kifer fodé ki ou contigne mette en pratik seki ou aprann dan Parole Bondié?
19 Contigne mette en pratik seki ou aprann dan Parole Bondié. Sa pou aide ou pou evite bann peché grave ek coumsa ou pou montré ki ou parmi bann dimoune ki “a force inn pratiké, pé developpe zot capacité pou faire difference entre seki bon ek seki mauvais.” (Hébreux 5:14) Au lieu ki ou kozé ek agir dan enn fason sans reflechi, montré ki ou enn dimoune sage, ki “ré-acheté le temps ki bizin.” “Contigne comprend ki vedir volonté Jéhovah,” ek pa arrete faire so volonté.—Éphésiens 5:15-17; 2 Pierre 3:17.
20. Kifer fodé pa ki nou envié seki lezot ena?
20 Jamais pa envié seki lezot ena. Enn parmi les Dix Commandement dire: “Fodé pa ki to envié lakaz to prochain. Fodé pa ki to envié femme to prochain, ni so esclave male, ni so esclave femelle, ni so taureau, ni so bourrik, ni nanyin ki pou to prochain.” (Exode 20:17) Sa la-loi-la ti protege lakaz enn dimoune, so femme, so bann serviteur, so bann zanimo ek lezot kitsoz encore. En plus, couma Jésus ti dire, kan nou envié seki lezot ena, sa rann nou impur.—Marc 7:20-23.
21, 22. Ki precaution enn chrétien bizin prend pou pa faire peché?
21 Prend bann precaution pou ki ou bann desir pa faire ou faire peché. Disciple Jacques ti ecrire: “Sakenn passe par enn tentation kan li laisse so prop desir entraine li ek attire li. Apré, kan sa desir-la inn developpé, sa faire li faire peché; lerla kan li’nn faire peché, sa amenn la mort.” (Jacques 1:14, 15) Par exemple, enn chrétien ki ti ena problem lalkol dan le passé kitfois pou decidé pou pena ditou lalkol kot li. Pou evite tombe dan tentation avek enn dimoune enn lot sexe, kitfois enn chrétien pou decidé pou change so place dan so travail, ou-soit mem pou change so travail.—Proverbes 6:23-28.
22 Evité pou faire mem premier pas ki pou amenn ou faire enn peché. Si ou faire ou l’interessant pou attire enn kikenn enn lot sexe, ou-soit si ou nourri bann pensée immoral, sa kapav faire ou commette fornication ou-soit l’adultere. Li kapav arrivé ki tellement enn dimoune koz bann ti-menti, ki sa pousse li pou koz bann gros menti ek lerla sa amenn li pou pratik peché. A force enn dimoune kokin bann ti kitsoz, sa kapav faire so conscience vinn tellement insensible ki li vinn enn grand voleur. Enn dimoune ki commence tolere bann l’idée apostat tigit-tigit, kapav finalement tombe net dan l’apostasie.—Proverbes 11:9; Révélation 21:8.
Ki ou pou faire si ou’nn faire peché?
23, 24. Ki reconfort nou gagné dan 2 Chroniques 6: 29, 30 ek Proverbes 28:13?
23 Tou dimoune imparfait. (Ecclésiaste 7:20) Mais si ou finn faire enn peché grave, ou pou gagne enn reconfort dan la priere ki le roi Salomon ti faire pendant l’inauguration temple Jéhovah. Li ti dire: “N’importe ki la-priere, n’importe ki faveur ki enn dimoune ou-soit ki tou lé-peuple Israël demandé, parski sakenn konn so malheur ek so douleur; kan vrai-mem li leve so la-main vers sa lakaz-la, alors toi ki dan le ciel, l’endroit kot to resté, s’il te plait, ecoute sa la-priere-la, ek to bizin pardonné ek rann sakenn dapré tou seki li faire parski to konn so leker (parski to tousel ki konn bien leker bann dimoune).”—2 Chroniques 6:29, 30.
24 Oui, Jéhovah konn nou leker ek Li disposé pou pardonné. Proverbes 28:13 dire: “Kikenn ki cachiette so bann peché pa pou reussi, mais si li confesse ek arrete faire sa bann peché-la, li pou gagne misericorde.” Si enn kikenn repenti, confesse so peché ek arrete faire sa, li pou kapav gagne misericorde Bondié. Mais, si ou faible lor plan spirituel, ki ou kapav faire encore pou reste dan l’amour Bondié?
Ki ou pou reponn?
• Couma nou kapav reste dan l’amour Bondié?
• Couma l’amour pou Bondié ek pou Jésus aide nou pou pa faire peché?
• Kifer enn l’amour sincere pou nou prochain pou empeche nou commette l’immoralité sexuel?
• Cite bann moyen ki pou aide nou evite ena enn mauvais conduite.
[Zimage, page 8]
Jude montré nou couma nou kapav reste dan l’amour Bondié
[Zimage, page 9]
Enn divorce kapav faire enn conjoint innocent ek bann zenfant bien souffert
[Zimage, page 10]
Pareil couma Caleb, eski ou bien decidé pou ‘suive Jéhovah touletan avek tou ou leker’
[Zimage, page 11]
Prié Jéhovah regulierement pou Li aide ou pa tombe dan tentation