Parole Jéhovah vivant

“VISION Obadia.” (Obadia 1) C’est par sa bann parole-la ki livre Obadia commencé. A part so nom, prophete Obadia pa donne okenn renseignement lor li dan livre ki li’nn ecrire en 607 a.n.l. Dan enn livre ki’nn ecrire plus ki 200 an avant sa, prophete Yona pa cachiette nanyin kan li raconte seki ti arrive li personnellement en rapport avek travail missionnaire ki Jéhovah ti confié li. Mika prophetisé pendant 60 an, entre lepok kot Obadia ek Yona ti prophetisé, setadir 777-717 a.n.l. Sel renseignement ki Mika donné lor li, c’est ki li sorti dan “[village] Morésheth,” ek ki Jéhovah ti commence koz ar li “dan lepok Yotham, Ahaz, Hizqiya, bann lé-roi Juda.” (Mika 1:1) Bann l’exemple ki li servi pou faire ressorti bann point dan so message, montré ki Mika bien konn la vie dan la campagne.

ÉDOM “POU BIZIN DETRUIRE POU TOULETAN”

(Obadia 1-21)

Concernant Édom, Obadia dire: “A cause violence ki to’nn faire envers to frere Jacob, to pou couvert ar la honte, ek to pou bizin detruire pou touletan.” Violence ki bann Édomite ti commette avek bann descendant Jacob, bann Israélite, ti encore frais dan l’esprit Obadia. En 607 a.n.l., kan bann Babylonien ti detruire Jérusalem, bann Édomite ti “reste enn coté,” zot pa ti faire nanyin pou bann Israélite ek zot ti marié-piké avek bann “etranger” ki ti pé attaké.—Obadia 10, 11.

Parkont, c’est enn retablissement ki’nn reservé pou lakaz Jacob. Obadia dire dan so prophetie: “C’est lor Mont Sion ki bann ki’nn reussi sapé pou été, ek li pou bizin vinn enn kitsoz ki saint.”—Obadia 17.

Reponse pou bann question biblik:

5-8—Obadia compare destruction Édom ar seki arrivé kan bann voleur vinn kokin a-soir ek kan bann dimoune vinn recolté raisin. Ki sa vedir? Si bann voleur ti vinn Édom, zot ti pou prend zis seki zot ti envie. Si bann dimoune ti vinn faire recolte, zot ti pou laisse enn partie recolte dan karo pou bann pauvre vinn ramassé. Mais kan Édom pou tombé, ‘sa bann mem zom ki ti’nn faire enn l’alliance avek li-la,’ so bann associé, setadir bann Babylonien, pou rod tou bann tresor ki li ena ek zot pou kokin tou.—Jérémie 49:9, 10.

10—Couma eski Édom ti “detruire pou touletan”? Pareil couma ti annoncé, Édom, enn nation ki ti ena so gouvernement ek so peuple ek ki ti situé dan enn l’endroit precis lor la terre, ti disparette net. Nabonide, le roi Babylone, ti prend Édom vers 550 a.n.l.. Dan bann l’année 300 a.n.l. bann Nabatéen ti pé reste dan territoire Édom, ek bann Édomite ti bizin al reste dan sud Juda, enn l’endroit dan Négueb ki plitar ti appel Idumée. Apré ki bann Romain ti detruire Jérusalem en 70 n.l., bann Édomite ti nepli existé.

Bann leson pou nou:

3, 4. Parski bann Édomite ti reste dan enn l’endroit kot ena bann montagne haute ki dangereux ek bann ravin ki bien fond, li ti difficile pou bann l’ennemi vinn laguerre ar zot. Alors kitfois zot ti ena enn trop grand confiance ek zot ti croire ki zot ti en securité ek ki nanyin pa ti pou arrive zot. Mais li impossible pou evite bann jugement Jéhovah.

8, 9, 15. La sagesse ki bann dimoune ena ek zot puissance pa offert okenn protection pendant “jour Jéhovah.”—Jérémie 49:7, 22.

12-14. Seki ti arrive bann Édomite, li enn l’exemple ki servi couma enn l’avertissement pou bann ki content kan bann serviteur Bondié gagne bann difficulté. Kan bann dimoune maltraite so peuple, sa li enn kitsoz ki grave devant lizié Jéhovah.

17-20. Sa prophetie retablissement ki concerne bann descendant Jacob-la ti commence realisé kan enn reste Juif ti sorti Babylone pou retourne Jérusalem en 537 a.n.l. Parole Jéhovah li touletan realisé. Nou kapav ena cent pour cent confiance dan so bann promesse.

“NINIVE POU DETRUIRE”

(Yona 1:1–4:11)

Au lieu ki Yona obeir l’ordre ki Bondié inn donne li pou “al Ninive, sa grand la-ville-la, ek proclame [jugement Jéhovah] kont li,” li sauvé, li al dan lot direction. Jéhovah envoye “enn grand di-vent lor la mer” ek Li servi “enn gros poisson” pou faire Yona al dan direction ki bizin ek enn deuxieme fois Li confié li mission pou al dan capital l’Assyrie.—Yona 1:2, 4, 17; 3:1, 2.

Yona rente dan Ninive ek li commence annonce enn message bien clair: “Dan zis quarante jour encore, Ninive pou detruire.” (Yona 3:4) Yona pa attann ki so predication pou produire sa qualité resultat-la, ek a cause sa li “bouilli ar colere.” Jéhovah servi “enn pié lagenaria” pou donne li enn leson misericorde.—Yona 4:1, 6.

Reponse pou bann question biblik:

3:3—“Ti bizin marche trois jour,” pou traverse Ninive. Eski Ninive ti vrai-mem grand coumsa? Oui. Li parette ki dan bann lé-temps biblik, bann habitation ki ti ena depuis Khorsabad dan le nord ziska Nimroud dan le sud, ti compte dan la ville Ninive. Tou sa bann habitation-la ti trouve dan enn rond ki ti faire 100 kilometre tou autour.

3:4—Eski Yona ti bizin aprann langage assyrien pou li kapav preche avek bann habitant Ninive? Li possible ki Yona ti deja konn langage assyrien, ou-soit ki Jéhovah ti faire enn mirak ek ti faire li koz sa langage-la. Li possible aussi ki li ti annonce so message en hébreu ek ki enn kikenn ti interprete sa. Si li ti annonce so message en hébreu, sa ti bizin surement faire bann dimoune pli interessé encore pou koné ki li ti pé dire.

Bann leson pou nou:

1:1-3. Kan nou mette lezot activité dan nou program par expré, pou ki nou faire moins dan predication ek dan l’activité pou faire bann disciple, sa li montré ki nou ena enn mauvais l’attitude. Dan enn certaine fason, enn kikenn ki agir coumsa pé sauve enn mission ki Bondié inn confié li.

1:1, 2; 3:10. Jéhovah pa montré so misericorde envers enn sel nation, ou-soit enn sel race, ou-soit envers enn sel groupe special. “Jéhovah bon ar tou dimoune, ek so misericorde, li lor tou seki Li faire.”—Psaume 145:9.

1:17; 2:10. Yona ti passe trois jour ek trois nuit dan ventre enn gros poisson. Sa, li enn prophetie ki ti annonce la mort ek resurrection Jésus.—Matthieu 12:39, 40; 16:21.

1:17; 2:10; 4:6. Jéhovah ti sap Yona kan la mer ti mauvais. Li ti aussi “faire enn pié lagenaria poussé ek vinn pli haute ki Yona, pou ki sa vinn enn l’ombrage lor so la-tête, pou sap li dan so malheur.” Zordi bann adorateur Jéhovah kapav mette zot confiance dan Bondié ek dan so l’amour fidele, pou protege ek sap zot.—Psaume 13:5; 40:11.

2:1, 2, 9, 10. Jéhovah tann la priere so bann serviteur ek Li prend compte kan zot suppliye Li.—Psaume 120:1; 130:1, 2.

3:8, 10. Vrai Bondié ‘ti regretté,’ setadir Li ti change so decision concernant malheur ki Li ti dire Li ti pou amené, ek Li “pa ti faire sa arrivé.” Kifer? Parski bann habitant Ninive “ti’nn quitte zot mauvais chemin.” Zordi aussi pareil. Enn dimoune ki’nn faire peché kapav evite jugement condamnation Bondié si li montré ki li repenti vrai-mem.

4:1-4. Okenn dimoune pa kapav faire Bondié fixé enn limite ar So misericorde. Nou bizin faire attention pou pa critik Jéhovah kan Li agir avek misericorde.

4:11. Avek patience Jéhovah pé faire en sorte ki message concernant so Royaume preché partout lor la terre parski Li chagrin bann “ki pa konn difference entre zot droite ek zot gauche,” pareil couma Li ti chagrin sa 120,000 habitant Ninive-la. Eski nou aussi nou pa bizin chagrin bann dimoune dan nou territoire ek participe avek zele dan travail predication ek faire bann disciple?—2 Pierre 3:9.

‘ZOT LA-TÊTE POU BIZIN VINN PLI CHAUVE’

(Mika 1:1–7:20)

Mika denonce bann peché Israël ek Juda, li annonce desolation zot la-ville principal, ek li promette enn retablissement. Samarie pou vinn “enn tas ruine ki ena dan karo.” A cause zot inn tourne vers bann zidole, Israël ek Juda merite vinn “chauve,” setadir zot merite la honte. Kan zot pou al en captivité, zot pou vinn pli chauve “pareil couma la tête l’aigle”—enn varieté vautour ki ena zis dé-trois ti plume lor so la-tête. Jéhovah promette: “Vrai-mem mo pou rassemblé toi net, Jacob.” (Mika 1:6, 16; 2:12) A cause bann chef ki pé faire corruption ek bann prophete ki pé desobeir la loi, Jérusalem aussi “pou vinn bann tas ruine.” Mais Jéhovah pou “rassemblé [so peuple].” “Sa kikenn ki pou bizin vinn chef en Israël-la” pou sorti dan “Bethléhem Éphratha.”—Mika 3:12; 4:12; 5:2.

Eski Jéhovah inn faire enn l’injustice envers Israël? Eski Li demann trop? Non. Tou seki Jéhovah demann so bann adorateur, c’est ki zot ‘pratik la justice, content la bonté, ek marche avek zot Bondié dan enn fason modeste.’ (Mika 6:8) Pourtant, bann dimoune ki ti vive dan lepok Mika ti’nn vinn tellement mauvais ki “sa kikenn ki pli bon parmi zot-la, li couma enn pié rempli ar pikan, ek sa kikenn ki pli droite-la, li pli pire ki enn barrage pikan,” ki faire di-mal n’importe kisannla ki vinn pré. Mais prophete Mika demandé: “Kisannla ki enn Bondié couma [Jéhovah]?” Bondié pou montré so misericorde encore enn fois envers so peuple ek Li pou “jette tou zot bann peché dan fond la mer.”—Mika 7:4, 18, 19.

Reponse pou bann question biblik:

2:12—Kan eski prophetie ki concerne ‘rassemblement le reste Israël’ ti realisé? Sa prophetie-la ti accompli enn premier fois en 537 a.n.l. kan enn reste Juif ti sorti en exil dan Babylone ek ti retourne dan zot pays. Dan lepok moderne, sa prophetie-la realisé lor “Israël Bondié.” (Galates 6:16) Depuis 1919, Jéhovah inn rassemblé bann chretien oint couma “enn troupeau dan l’enclos.” Parski ‘la grande foule’ “lezot brebis,” inn joinde avek zot, zot inn “rempli ar tapage a cause beaucoup dimoune,” surtout depuis 1935. (Révélation 7:9; Jean 10:16) Zot travail ensam, avek zele pou favorise vrai l’adoration.

4:1-4—“Dan periode final,” couma eski Jéhovah ‘rann jugement parmi beaucoup peuple, ek remette bann kitsoz en ordre concernant bann nation fort’? Kan Mika koz lor “beaucoup peuple” ek “bann nation fort,” li pa pé koz lor bann groupe national ou-soit politik. Li pé koz plutot lor bann dimoune ki’nn sorti dan tou nation ek ki’nn vinn bann adorateur Jéhovah. Jéhovah rann jugement ek remette bann kitsoz en ordre dan enn sens spirituel.

Bann leson pou nou:

1:6, 9; 3:12; 5:2. Pareil couma Mika ti predire, bann Assyrien ti detruire Samarie en 740 a.n.l., pendant ki Mika ti vivant. (2 Rois 17:5, 6) Bann Assyrien ti arrive mem ziska Jérusalem pendant regne Hizqiya. (2 Rois 18:13) Bann Babylonien ti brule la ville Jérusalem en 607 a.n.l. (2 Chroniques 36:19) Messie ti né dan “Bethléhem Éphratha,” pareil couma Mika ti prophetisé. (Matthieu 2:3-6) Parole prophetik Jéhovah, li touletan realisé.

2:1, 2. Li pou bien dangereux si nou pretann ki nou pé servi Jéhovah mais ki nou rod bann richesse en premier au lieu ki nou rod ‘le royaume ek so justice.’—Matthieu 6:33; 1 Timothée 6:9, 10.

3:1-3, 5. Jéhovah attann ki bann ki ena responsabilité parmi so peuple agir avek la justice.

3:4. Si nou envie ki Jéhovah reponn nou bann la-priere, fodé pa ki nou pratik peché ou-soit amenn enn double la-vie.

3:8. Jéhovah inn donne nou enn mission pou preche la bonne nouvelle ki implik aussi annonce so jugement condamnation. Nou pa pou kapav accompli sa mission-la si nou pa gagne la force grace a l’esprit saint Jéhovah.

5:5. Sa prophetie ki concerne Messie-la donne nou l’assurance ki kan bann l’ennemi attak So peuple, Jéhovah etabli “sept [chiffre ki represente seki complet] berger” ek “huit duc,” setadir enn bon quantité zom capable pou dirige So peuple.

5:7, 8. Zordi, pou beaucoup dimoune, bann chretien oint zot “couma la rosée ki sorti kot Jéhovah,” setadir zot enn benediction ki Bondié donné, parski Li servi zot pou annonce message lor Royaume. Bann “lezot brebis” aide bann dimoune pou gagne enn reconfort spirituel kan zot soutenir bann chretien oint dan travail predication. (Jean 10:16) Li vrai-mem enn privilege pou participe dan sa travail ki amenn enn vrai reconfort pou bann dimoune!

6:3, 4. Nou bizin imite Jéhovah ek montré-nou bon ek ena compassion mem envers bann ki ena enn personnalité difficile ou-soit envers bann ki faible lor plan spirituel.

7:7. Dan lepok la fin sa systeme-la, nou bizin faire face ar bann problem. Mais fodé pa nou perdi l’espoir. Au contraire, pareil couma Mika, nou bizin “contigne attann [nou] Bondié.”

7:18, 19. Pareil couma Jéhovah paré pou pardonne nou bann peché, nou bizin disposé pou pardonne bann ki commette bann peché kont nou.

Contigne “marche au nom Jéhovah”

Bann ki laguerre kont Bondié ek so peuple “pou bizin detruire pou touletan.” (Obadia 10) Mais nou kapav detourne colere Jéhovah si nou prend compte so l’avertissement ek nou ‘quitte nou mauvais chemin.’ (Yona 3:10) “Dan periode final,” setadir dan bann “dernier jour,” vrai l’adoration pé vinn pli haute ki tou bann fausse religion ek bann dimoune obeissant pé vinn vers vrai l’adoration en grand quantité. (Mika 4:1; 2 Timothée 3:1) Alors anou bien decidé pou “marche au nom Jéhovah nou Bondié pou touletan, oui pou toujours.”—Mika 4:5.

Nou aprann vrai-mem bann leson ki ena beaucoup valeur dan livre Obadia, Yona ek Mika! Mem si sa faire plus ki 2,500 an ki’nn ecrire sa bann livre-la, zot message “vivant ek . . . puissant,” mem dan nou lepok.—Hébreux 4:12.

[Zimage, page 9]

Obadia ti prophetisé: “[Édom] pou bizin detruire pou touletan”

[Zimage, page 11]

Ou kapav ‘contigne attann Jéhovah’ pareil couma Mika