Bann dimoune pé vive dan l’unité—Couma?

COUMA ou pou expliké ki été “l’unité”? Pou beaucoup dimoune, l’unité vedir zis ki pena desaccord. Par exemple, si deux ou-soit plusieurs nation signe enn l’alliance ek tombe d’accord pou respecté bann condition pou ki ena la paix, certain kapav dire ki zot dan l’unité. Mais eski li vrai? Pa necessairement.

Anou prend enn l’exemple: Toute longue l’histoire, bann pays finn signe ek finn casse bann millier l’alliance pou la paix. Kifer? Souvent parski bann dirigeant sa lé-monde-la pli concerné ar zot prop pouvoir ki ar la paix ou-soit l’unité. Ena certain pays aussi ki peur seki pou kapav arrivé si zot pa reussi augmente zot capacité militaire pareil couma lezot pays.

Alors c’est pa zis parski deux pays pa pé laguerre, ki zot pé vive dan l’unité. Eski nou kapav vrai-mem dire ki deux zom pé vive en paix alors ki sakenn pé vise so camarade avek enn pistolet, mais personne pankor tire coute balle? Li pou bet pou pensé ki sa c’est vrai la-paix! Pourtant beaucoup pays dan sa situation-la zordi. Pli allé, bann nation tellement mefié zot camarade ki sa finn faire zot peur ki enn jour pou arrivé kot pou mette bann zarme ki zot inn faire en marche. Ki zot inn faire pou empeche enn catastrophe coumsa?

La crainte bann zarme nucleaire—Enn menace pou l’unité

Beaucoup mette zot confiance dan enn l’alliance ki ti approuvé en 1968 ek ki appel le Traité sur la non-prolifération des armes nucléaires (TNP). Sa l’alliance-la defann bann pays ki pena zarme nucleaire pou developpe sa bann zarme-la, ek li limite production sa bann zarme-la dan bann pays kot deja ena li. L’objectif sa l’alliance ki ti approuvé par plus ki 180 nation-la, c’est pou reussi diminué net production bann zarme nucleaire.

Mem si TNP parette ena bann bon l’objectif, certain dimoune pensé ki li zis enn moyen pou empeche certain pays forme partie dan “club nucleaire.” Sa pou aussi empeche sa bann nation ki pena zarme-la pou developpe bann zarme. Alors zot peur ki certain pays ki’nn signe sa l’alliance-la kapav ré-vinn lor zot decision. Avredir, certain pays considere ki c’est enn l’injustice pou empeche zot developpe bann zarme ki dapré zot kapav aide zot pou protege zot-mem.

Pou complik sa situation-la—kitfois mem pou augmente bann risk—tou nation libre pou developpe l’energie nucleaire, setadir produire courant electrik avek bann machine nucleaire. A cause sa certain peur ki bann pays ki supposé pé servi l’energie nucleaire pou bann bon raison, kapav pé developpe bann zarme nucleaire en secret.

Mem bann nation ki deja ena bann zarme nucleaire kapav pa prend TNP compte. Bann expert dire ki li bet pou croire ki bann pays ki deja ena zot stock zarme nucleaire pou detruire ou-soit diminué zot stock. Enn reference lor Internet dire: “Pou reussi faire sa, . . . bizin ena enn l’amitié ek enn confiance tellement solide entre bann pays ki pa d’accord asterla entre zot [ki li difficile pou croire ki] sa kapav arrivé enn jour.”

Bann zeffort ki bann humain finn faire pou ena l’unité​​—⁠mem ki quantité zot sincere⁠​—⁠li dan vide. Sa pa etonne bann etudiant la Bible, parski Parole Bondié dire: “Enn dimoune ki pé marché pa finn crée pou dirige so pas.” (Jérémie 10:⁠23) La Bible dire franc: “Ena enn chemin ki droite devant enn dimoune, mais apré, dan so boute ena chemin la mort.” (Proverbes 16:⁠25) Bann zeffort ki bann gouvernement faire pou ki ena l’unité, zot limité. Mais malgré sa, nou cas pa desesperé.

La source vrai l’unité

Dan la Bible, Bondié faire nou promesse ki pou ena l’unité partout lor la terre, mais pa grace a bann zeffort humain. Nou Createur ki ti envie ki bann humain vive dan la paix partout lor la terre, pou faire seki bann dimoune pa kapav faire. Kitfois certain pensé ki li difficile pou croire tousala. Pourtant depuis commencement-mem, Bondié ti ena projet pou faire bann dimoune vive dan la paix ek dan l’harmonie.a Beaucoup verset la Bible montré nou ki li encore toujours dan projet Bondié ki bann dimoune vive dan l’unité. Anou guette zis certain l’exemple:

• “Vini, vinn guette seki Jéhovah inn faire, couma Li’nn faire bann evenement etonnant arrivé lor la terre. Li faire bann la-guerre arreté ziska dan boute la terre. L’arc-la, Li casse li, lance-la aussi Li casse li boute-boute; Li brule bann char la guerre dan difé.”​—PSAUME 46:​8, 9.

• “Personne pa pou faire okenn di-tort ni okenn ravage dan tou mo montagne ki saint, parski la terre vrai-mem pou rempli avek connaissance Jéhovah, pareil couma de l’eau couvert la mer.”​—⁠ISAÏE 11:⁠9.

• “Oui, Li pou faire la mort disparette pou touletan, ek vrai-mem Souverain Seigneur Jéhovah pou souye larme lor tou bann figure. Ek lor la terre entier Li pou tire la honte ki so peuple finn koné, parski Jéhovah Li-mem finn dire sa.”​—ISAÏE 25:⁠8.

• “Mais nou pé attann, couma Li’nn promette, enn nouveau lé-ciel ek enn nouveau la-terre, kot pou ena la justice.”​—2 PIERRE 3:⁠13.

• “[Bondié] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.”​—⁠RÉVÉLATION 21:⁠4.

Nou kapav ena confiance dan sa bann promesse-la. Kifer? Parski en tant ki nou Createur, Jéhovah ena pouvoir ek capacité pou faire bann dimoune vive dan l’unité. (Luc 18:⁠27) Li ena aussi desir pou faire sa. Avredir, la Bible dire dapré “seki faire Li plaisir, [Bondié] . . . pou rassemblé tou kitsoz encore dan Christ, bann kitsoz ki dan le ciel ek bann kitsoz ki lor la terre.”​—⁠Éphésiens 1:​8-​10.

Promesse Bondié concernant “enn nouveau la-terre, kot pou ena la justice,” li pa enn rêve ki nou prend pou enn realité. (2 Pierre 3:​13) Concernant seki Li’nn promette, Jéhovah dire: “Li pa pou retourne vers moi sans resultat, mais vrai-mem li pou faire seki’nn faire moi plaisir, ek li pou reussi accompli seki mo’nn envoye li faire.”​—⁠Isaïe 55:⁠11.

Uni grace a Parole Bondié

Pareil couma nou ti trouvé dan premier lartik, la religion inn souvent divise bann dimoune au lieu ki li faire zot uni. Li important ki nou considere sa sujet-la, parski si nou croire ki ena enn Createur, eski li pa raisonnable pou attann ki ena la paix ek l’unité parmi so bann adorateur? Bien sur!

La religion ki divise dimoune, pa reflete ditou Jéhovah ni so Parole dan enn bon fason. Seki pé arrivé plutot condamne tou religion ki pé soutenir bann projet humain pou l’unité au lieu ki zot soutenir projet Bondié. Jésus ti appel bann chef religieux dan so lepok “bann hypocrite” ek li ti dire zot: “Isaïe ti ena raison pou prophetise lor zot ek dire: ‘Sa peuple-la honore moi ar zot la-levre, mais zot leker bien loin ar moi. C’est pou nanyin ki zot contigne adore moi, parski zot enseigne bann commandement dimoune couma bann doctrine.’ ”​—⁠Matthieu 15:​7-9.

Parkont, vrai l’adoration faire bann dimoune vive dan l’unité. Prophete Isaïe ti annoncé: “Pou bizin arrivé ki dan periode final, montagne lakaz Jéhovah pou etabli pli haute ki tou bann montagne, ek vrai-mem Li pou vinn pli haute ki tou bann colline; ek tou bann nation pou bizin monte vers li. Vrai-mem Li pou rann jugement parmi bann peuple ek Li pou remette bann kitsoz en ordre concernant beaucoup nation. Ek zot pou bizin forge zot bann l’epée ek faire sa vinn bann zouti pou travail la terre, ek zot pou faire zot bann lance vinn bann cisaille. Enn nation pa pou leve l’epée kont enn lot nation, ek zot nepli pou aprann laguerre.”​—⁠Isaïe 2:⁠2, 4.

Zordi dan plus ki 230 pays, bann Témoins de Jéhovah pé suive sa bann conseil ki Jéhovah donné concernant couma pou vive dan l’unité. Lor ki kitsoz zot l’unité basé? L’apotre Paul ti ecrire: “Couvert-zot avek l’amour, parski li enn kitsoz parfait ki soude nou tou ensam.” (Colossiens 3:⁠14) Mot grec ki Paul ti servi pou “kitsoz ki soude nou” kapav faire reference ar bann ligament ki nou ena dan nou lekor. Sa bann ligament-la zot aussi solide ki la corde, ek zot utile pou deux raison bien important. Zot garde nou bann organe dan zot place ek zot attache nou bann lezo ensam.

Pareil aussi avek l’amour. Li pa zis empeche bann dimoune touye zot camarade. Kan nou imite l’amour ki Jésus ti ena, nou kapav vive en paix avek bann dimoune ki sorti dan different l’environnement. Par exemple, sa qualité l’amour-la permette bann dimoune pou vive en accord avek enn parmi bann grand principe ki Jésus finn enseigné. Couma nou lire dan Matthieu 7:⁠12, Jésus ti dire: “Tou kitsoz ki zot envie bann dimoune faire pou zot, zot aussi, zot bizin faire pareil pou bannla.” Sa principe-la finn aide beaucoup dimoune pou nepli ena bann prejugé.

“L’amour entre zot”

Bann Témoins de Jéhovah bien determiné pou montré ki zot bann disciple Jésus, kan zot mette en pratik seki Jésus ti dire: “Par sa tou dimoune pou koné ki zot mo bann disciple, si zot ena l’amour entre zot.” (Jean 13:⁠35) Zot finn montré sa l’amour-la dan enn fason extraordinaire kan finn ena bann trouble racial ek politik. Par exemple, en 1994 kan bann Hutu ek bann Tutsi ti pé touye zot camarade dan Rwanda, bann Témoins de Jéhovah ti montré l’amour pou zot camarade. Bann Témoin hutu ti riské zot prop la-vie pou protege zot bann frere tutsi!

Bien sur, li pa realiste pou attann ki bann nation ki ena dan le monde pou developpe l’amour pou zot prochain ziska enn point kot sa kapav amenn l’unité dan le monde. Dapré la Bible, c’est Bondié ki pou faire sa dan l’heure ki Li’nn fixé. Mais depuis asterla-mem, bann dimoune kapav developpe l’amour ek lerla reussi vive dan l’unité.

L’année passé, bann Témoins de Jéhovah ti passe plus ki enn milliard l’heure-temps pou al kot bann dimoune ek pou koz avek zot lor la Bible ek lor so valeur dan la vie moderne. Enn connaissance exact lor Parole Bondié finn permette bann million dimoune pou vive dan l’unité. Parmi sa bann dimoune-la, certain ti ena la haine entre zot avant, couma, zis pou cite certain l’exemple, bann Arabe ek bann Juif, bann Arménien ek bann Turc, bann Allemand ek bann Russe.

Eski ou ti pou content konn plus couma grace a Parole Bondié, la Bible, bann dimoune pé vive dan l’unité? Si oui, contacté bann Témoins Jéhovah dan ou l’endroit, ou-soit ecrire lor l’adresse ki ena lor page 2.

[Note]

[L’encadré page 4]

Bann pays finn signe ek finn casse par millier bann l’alliance pou la paix

[Zimage, page 5]

Parole Bondié montré nou kisannla la Source vrai l’unité

[L’encadré page 7]

Kan bann dimoune inn mette en pratik bann principe la Bible, sa inn realise seki bann gouvernement pa kapav realisé

[Zimage, page 7]

Bann Témoins de Jéhovah hutu ek tutsi pé travail ensam pou construire enn l’endroit kot zot pou adore Bondié