Ki arrivé vrai-mem kan enn dimoune mort?

“Tou bann nâme zot immortel, mem nâme bann mauvais dimoune . . . Zot punition c’est konn vengeance eternel enn difé ki pa kapav teigne, ek jamais fini, ek [dan sa situation-la] li impossible pou zot pou arrete zot souffrance.”—Clément d’Alexandrie, enn ecrivain deuxieme ek troisieme siecle dan nou lepok.

PAREIL couma Clément, bann ki favorise l’enseignement ki l’enfer c’est enn place kot bann dimoune tourmenté, zot pensé ki nâme li immortel. Eski la Bible soutenir sa l’enseignement-la? Guetté ki reponse Parole Bondié donne nou pou sa bann question ki suive-la.

Eski premier zom, Adam, ti ena enn nâme immortel? Enn traduction la Bible protestant dire lor creation Adam: “Bondié l’Eternel ti forme zom avek la poussiere la terre, ek ti soufflé enn respiration la vie dan so néné, ek zom ti vinn enn nâme vivant.” (Genèse 2:7, Ostervald) Remarké ki sa texte-la pa dire ki Adam ti gagne enn nâme.

Ki’nn arrive Adam finalement apré ki li finn faire peché? Bondié pa ti condamne li pou tourmenté dan enn l’enfer difé pou touletan. Concernant punition ki Bondié ti donne li, enn la bible catholique dire: “To pou bizin transpiré pou to gagne di-pain, ziska ki to retourne dan la terre, parski c’est ladan ki to’nn sorti; parski to’nn faire ar la poussiere ek to pou revinn la poussiere.” (C’est nou ki’nn souligné; Genèse 3:19, Bible Crampon-Tricot) Seki Bondié ti dire pa faire croire ki enn partie Adam ti survive kan li ti mort. Kan Adam ti mort, so nâme ti mort.

Eski bann dimoune ena enn nâme immortel? Bondié ti dire prophete Ézékiel: “Nâme ki faire peché, c’est li-mem ki pou mort.” (Ézékiel 18:4, Segond) L’apotre Paul ti ecrire: “C’est par enn sel zom ki peché finn rente dan le monde, ek peché finn amenn la mort, ek . . . coumsa la mort finn touche tou dimoune, parski zot tou inn faire peché.” (Romains 5:12, Bible Crampon-Tricot) Si tou dimoune faire peché, li logik pou dire ki tou nâme mort.

Eski enn nâme ki mort, li konn seki pé passé ou-soit li ressenti kitsoz? Parole Bondié dire: “Bann ki vivant koné ki zot pou mort, mais bann dimoune mort pa konn nanyin ditou.” (Ecclésiaste 9:5, Ostervald) La Bible donne nou enn l’idée ki arrive enn dimoune kan li mort. Li dire: “Li retourne dan so la poussiere, sa jour-la mem so bann pensée mort.” (Psaume 146:4, Bible Liénart) Si “bann dimoune mort pa konn nanyin ditou” ek zot “bann pensée mort,” couma eski li possible ki zot souffert dan l’enfer?

Jésus Christ pa ti compare la mort ar enn l’etat kot enn dimoune li conscient. Li ti plutot compare sa ar sommeil.a (Jean 11:11-14) Pourtant, certain kapav contesté ek dire ki Jésus ti enseigné ki l’enfer li enn difé ek ki pou jette bann ki faire peché ladan. Alors, anou examine seki Jésus vrai-mem ti dire lor l’enfer.

[Note]