Ki Jésus ti enseigné lor l’enfer?

Jésus ti dire: “Si jamais ou lizié faire ou faire peché, rass li. Vaut mieux pou ou ki ou rente dan royaume Bondié avek enn sel lizié, ki jette ou dan l’enfer avek deux lizié: kot bann le ver ki devore zot jamais pa mort, ek kot difé jamais pa teigne.”—MARC 9:47, 48, Bible de Sacy.

Dan enn lot l’occasion, Jésus ti koz lor enn periode jugement, ek pendant sa periode-la li pou dire bann mauvais dimoune: “Al loin ar moi, zot bann maudit, [al] dan difé eternel ki finn preparé pou diable ek so bann ange.” Jésus ti aussi dire ki sa bannla pou ‘konn enn punition eternel.’—MATTHIEU 25:41, 46, Nouvelle Bible Segond.

KAN premier coute nou lire bann parole Jésus ki nou’nn trouvé la-haut, li kapav parette ki Jésus pé favorise l’enseignement lor l’enfer difé. Li clair ki Jésus pa ti pé envie al kont Parole Bondié, ki dire bien clair: “Bann dimoune mort pa konn nanyin ditou.”—Ecclésiaste 9:5, Ostervald.

Lor ki kitsoz Jésus ti pé kozé kan li ti dire ki pou jette enn dimoune “dan l’enfer”? “Difé eternel” lor ki Jésus ti kozé, eski li existé vrai-mem ou-soit eski li zis symbolik? Dan ki sens bann mauvais pou ‘konn enn punition eternel’? Anou examine sa bann question-la enn par enn.

Lor ki kitsoz Jésus ti pé kozé kan li ti dire ki pou jette enn dimoune “dan l’enfer”? Mot grec ki servi pou traduire “l’enfer” dan Marc 9:47 c’est géénna. Sa mot-la sorti dan mot hébreu Gé Hinnom, ki vedir “Vallée Hinnom.” Vallée Hinnom ti trouve zis en dehors ancien la ville Jérusalem. Dan lepok bann le roi Israël, bann dimoune ti pé offert bann zenfant en sacrifice dan sa vallée-la—enn pratik degoutant ki Bondié ti condamné. Bondié ti dire ki Li ti pou detruire tou bann dimoune ki ti faire sa pratik ki forme partie dan fausse l’adoration-la. Lerla ti pou appel vallée Hinnom “vallée kot touye bann dimoune,” ou-soit kot “lekor sa bann dimoune mort-la” ti pou reste coumsa-mem, sans ki enterre zot. (Jérémie 7:30-34, Ostervald) Par sa bann parole-la, Jéhovah ti predire ki vallée Hinnom ti pou vinn enn place kot ena enn quantité cadavre, pa enn place kot torture bann dimoune vivant.

Dan lepok Jésus, vallée Hinnom ti enn place publik kot bann habitant Jérusalem ti jette saleté. Zot ti jette cadavre certain mauvais criminel ladan ek ti ena enn difé ki ti reste touletan allumé pou brule saleté ek bann cadavre-la.

Kan Jésus ti koz lor bann le ver ki pa mort ek enn difé ki jamais pa teigne, li parette ki Jésus ti pé faire reference ar Isaïe 66:24. Concernant “lekor bann dimoune ki’nn peche kont [Bondié],” Isaïe dire ki “zot bann le ver pa pou mort, ni zot difé jamais pa pou teigne.” (Bible de Sacy) Jésus ek bann dimoune ki ti pé ecoute li, ti koné ki bann parole Isaïe ti pé koz lor maniere ki ti traite cadavre bann dimoune ki pa ti merite enterré.

Alors, Jésus ti servi vallée Hinnom, ou-soit la Géhenne, couma enn symbole ki approprié pou la mort kot pena okenn espoir pou resurrection. Jésus ti faire bien comprend sa kan li ti expliké ki Bondié “kapav detruire nâme ek lekor toulé-deux dan la géhenne.” (Matthieu 10:28, Darby) Géhenne represente la mort eternel, pa enn tourment eternel.

“Difé eternel” lor ki Jésus ti kozé, eski li existé vrai-mem ou-soit li symbolik? Remarké ki ‘difé eternel’ ki Jésus ti mentionné dan Matthieu 25:41 ti preparé “pou diable ek so bann ange.” Eski ou pensé ki vrai difé kapav brule bann creature spirituel? Ou-soit eski Jésus ti pé servi expression “difé” dan enn fason symbolik? Pena doute ki “bann mouton” ek “bann cabri” ki Jésus ti mentionné dan mem discours zot represente deux categorie dimoune, pa bann zanimo. (Matthieu 25:32, 33) Sa difé eternel lor ki Jésus ti pé kozé-la, li brule bann mauvais net dan enn sens symbolik.

Dan ki sens bann mauvais pou ‘konn enn punition eternel’? Mem si beaucoup traduction servi mot ‘punition’ dan Matthieu 25:46, sens principal mot grec kolasin, c’est “veille croissance bann pié,” ou-soit action pou coupe bann branche ki pa bizin. Alors ki bann dimoune ki comparé ar bann mouton gagne la vie pou touletan, bann ki comparé ar bann cabri ek ki pa repenti, zot, zot gagne “punition eternel,” setadir zot perdi la vie pou touletan.

Ki ou pensé?

Jésus jamais pa’nn enseigné ki bann dimoune ena enn nâme immortel. Mais, souvent li ti enseigne lor resurrection bann mort. (Luc 14:13, 14; Jean 5:25-29; 11:25) Kifer Jésus ti pou dire ki bann dimoune mort pou ressuscité si li ti croire ki zot nâme pa’nn mort?

Jésus pa ti enseigné ki Bondié ti pou torture bann mauvais pou touletan dan enn fason cruel. Jésus ti dire plutot: “Bondié finn tellement content le monde ki Li finn donne so sel Garson, pou ki tou seki croire dan li pa mort, mais gagne la vie pou touletan.” (Jean 3:16, Bible Crampon-Tricot) Kifer Jésus ti pou laisse nou comprend ki bann ki pa croire en li pou mort? Si Jésus ti vrai-mem envie dire ki sa bann mauvais dimoune-la ti pou vive pou touletan ek konn bann torture dan enn l’enfer difé pou touletan, eski li pa ti pou dire sa?

L’enseignement ki l’enfer c’est enn place kot bann dimoune al tourmenté, li pa sorti dan la Bible. C’est plutot enn croyance païen ki bann dimoune inn maquillé pou faire li passe pou enn l’enseignement chretien. (Guette l’encadré “Enn ti resumé lor l’enfer,” page 6.) Non, Bondié pa tourmente bann dimoune pou touletan dan l’enfer. Kan ou aprann la verité lor l’enfer, ki l’influence sa kapav ena lor ou l’attitude envers Bondié?

[L’encadré lor page 6]

ENN TI RESUMÉ LOR L’ENFER

L’ENFER SORTI DAN BANN CROYANCE PAÏEN: Dan le passé, bann Égyptien ti croire dan enn l’enfer difé. Le livre de l’Amdouat, ki finn ecrire en 1375 a.n.l., koz lor bann ki “pou jetté direct dan bann trou kot ena difé; ek . . . ki pa pou kapav sapé depuis ladan, ek . . . ki pa pou kapav sauvé, al loin ar bann la flamme.” Philosophe grec Plutarque (vers 46-120 n.l.) finn ecrire concernant bann ki dan l’enfer: “[Zot] ti passe par bann tourment ki faire peur ek bann punition ki degradant ki zot pa kapav supporté ek zot ploré ek zot demann ki ena pitié pou zot.”

BANN SECTE DAN RELIGION JUIF ZOT CONTAMINÉ: Dan rapport ki li ti faire, historien Josèphe (vers 37-100 n.l.) koz lor bann Essénien, bann membre enn secte dan religion juif, ki ti croire ki “bann nâme zot immortel ek ki zot vive pou touletan.” Li ti ajouté: “Sa ti pareil couma croyance bann Grec . . . Zot pensé ki nâme bann mauvais enfermé dan enn place kot faire noir ek faire peur, enn place ki rempli ar bann tourment ki jamais pa fini.”

DOCTRINE L’ENFER RENTE DAN SOI-DISANT “CHRISTIANISME”: Dan deuxieme siecle n.l., livre apocryphe L’Apocalypse de Pierre ti dire concernant bann mauvais: “Puni zot dan enn difé ki pa kapav teigne.” Sa mem livre-la ti dire aussi: “Ezrael, ange la colere, amenn bann zom ek bann femme avek la moitié lekor ki pé brulé ek jette zot dan enn place kot faire noir, l’enfer bann zom; ek enn ange la colere fouette zot.” Pendant sa mem periode-la, Théophile, enn ecrivain Antioche ti cite bann parole ki sybille, setadir enn prophetesse grec, ti annoncé concernant bann punition bann mauvais dimoune. Théophile ti ecrire: “Enn difé pou vinn lor zot, ek so bann la flamme pou brule zot toulé-jour.” Sa li forme partie dan seki Théophile dire “vrai, bon, ek profitable pou tou dimoune.”

FINN SERVI L’ENFER COUMA ENN PRETEXTE POU VIOLENCE DAN MOYEN-AGE: La reine l’Angleterre, Marie 1^re (1553-1558), ki bann dimoune ti appel aussi “ Marie la sanglante, ” parski li ti brule apepré 300 protestant lor poteau, ti dire: “Parski plitar nâme bann rebelle pou reste brulé pou touletan dan l’enfer, pena nanyin pli bon ki mo imite vengeance Bondié kan mo brule zot vivant lor la terre mem.”

ENN NOUVEAU DEFINITION: Dan bann dernier l’année, certain l’organisation religieux finn revise zot l’enseignement lor l’enfer. Par exemple, Commission de la doctrine de l’Église d’Angleterre ti dire en 1995: “L’enfer c’est pa bann tourment eternel, mais c’est choix [enn dimoune] so choix final ki pa kapav changé ek ki tellement opposé ar Bondié dan enn fason total ek complet ki sel solution ki ena c’est ki dimoune-la pa existé ditou.”

[L’encadré lor page 7]

KI ÉTÉ “LAC DIFÉ”?

Révélation 20:10 dire ki le Diable pou jetté dan “lac difé” ek li pou ‘tourmenté la-nuit li-jour, pou touletan.’ (Bible en français courant, 1987) Si le Diable ti pou tourmenté pou touletan, Bondié ti pou bizin garde li vivant. Mais la Bible dire ki Jésus pou “detruire li.” (Hébreux 2:14, Bible en français courant) Lac difé symbolik represente “deuxieme la mort.” (Révélation 21:8) C’est pa la mort ki mentionné au commencement dan la Bible, setadir la mort a cause peché Adam. Sa li pou disparette kan bann mort pou ressuscité. (1 Corinthiens 15:21, 22) La Bible pa dire ki “lac difé” pou delivré tou seki ladan, alors “deuxieme la mort” vedir enn lot qualité la mort, la mort pou touletan.

Dan ki sens bann ki dan “lac difé” tourmenté pou touletan? Parfois, “tourmenté” kapav vedir “empeche” enn kikenn. Enn fois kan Jésus ti defié bann demon, bannla ti criyé: “Eski to finn vinn ici pou tourmente nou avant ler? ” (Matthieu 8:29; Luc 8:30, 31, Ostervald) Alors, tou bann ki dan “lac difé” pou “tourmenté,” parski pou emprisonne zot pou touletan, ou-soit zot pou konn “deuxieme la mort.”