3 Aprann la verité lor Jésus
“Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.”—Jean 3:16.
KIFER LI DIFFICILE? Certain dire ki Jésus jamais finn existé. Lezot reconette ki li finn existé, mais zot dire ki li ti zis enn simple dimoune ki finn mort depuis bien longtemps.
COUMA OU KAPAV SURMONTE SA DIFFICULTÉ-LA? Imite l’exemple disciple Nathanaël.a So camarade Philippe ti dire li ki li pensé li ti’nn trouve le Messie—“Jésus, garson Joseph, ki ti sorti dan Nazareth.” Mais, c’est pa parski Philippe inn dire li sa ki li finn croire li. Guetté ki li ti reponn: “Eski enn kitsoz ki bon kapav sorti dan Nazareth?” Mais, malgré so bann doute, kan Philippe ti dire li “vinn guetté,” li ti accepté pou al guetté par li-mem. (Jean 1:43-51) Ou aussi ou pou tire beaucoup profit kan ou examine par ou-mem bann preuve concernant Jésus. Ki ou kapav faire?
Rod bann preuve historik ki montré ki Jésus finn existé. Josèphe ek Tacite ti deux grand historien bien respecté, ki ti vive dan premier siecle mais zot pa ti chretien. Zot decrire Jésus Christ couma enn kikenn ki finn vrai-mem existé. Pou decrire couma l’empereur romain Néron ti blame bann chretien pou difé ki ti ena dan Rome en l’an 64 nou lepok, Tacite ti ecrire: “Néron ti mette sa tort-la lor enn groupe dimoune ki ti appel bann chretien, ki bann Romain ti detesté a cause bann kitsoz ki zot ti pé faire ek li ti faire zot passe par bann souffrance bien dure. Sa mot chretien-la sorti dan mot Christ, enn kikenn ki ti passe par martyre pli cruel pendant regne Tibère, dan la main enn nou bann gouverneur, Pontius Pilatus.”
Concernant bann commentaire ki bann historien ki’nn vive dan premier ek deuxieme siecle inn faire lor Jésus ek bann premier chretien, l’Encyclopædia Britannica, edition 2002, dire: “Sa bann recit independant-la prouvé ki dan bann le temps ancien mem bann ki ti opposé ar vrai religion chretien jamais pa finn douté ki Jésus vrai-mem inn existé. C’est zis vers la fin 18eme siecle, pendant 19eme siecle ek dan commencement 20eme siecle, ki pou premier fois, sans beaucoup preuve, plusieurs ecrivain inn contesté sa.” En 2002, enn lartik dan The Wall Street Journal ti dire: “La plupart bann savant, sauf certain ki pa croire dan Bondié, finn fini accepté ki Jésus ki ti sorti Nazareth, finn vrai-mem existé.”
Guette preuve ki Jésus finn ressuscité. Kan bann l’ennemi ti arrete Jésus, so bann proche compagnon ti abandonne li, ek so camarade Pierre avek la peur ti dire ki li pa konn Jésus. (Matthieu 26:55, 56, 69-75) Apré ki ti arrete li, bann disciple Jésus ti al partout-partout. (Matthieu 26:31) Mais, enn sel coup zot inn revinn bien actif. Pierre ek Jean avek courage ti affronte sa bann mem dimoune ki ti complote la mort Jésus-la. Bann disciple Jésus ti tellement motivé ki zot ti faire tou dimoune dan l’empire romain konn so l’enseignement. Zot ti prefere faire face ar la mort ki faire compromis avek zot croyance.
Pou ki raison ti ena enn grand changement coumsa dan zot l’attitude? L’apotre Paul ti expliké ki Jésus ti ressuscité ek ki li “ti apparette ar Céphas [Pierre], apré ar toulé-douze.” Paul ti ajouté: “Apré sa li ti apparette ar plus ki cinq cent frere en mem temps.” Kan Paul ti ecrire sa bann parole-la, la plupart sa bann temoin-la ti encore vivant. (1 Corinthiens 15:3-7) Temoignage zis enn ou-soit deux temoin ti kapav pousse bann ki ena doute pou dementi sa l’evenement-la. (Luc 24:1-11) Mais temoignage plus ki cinq cent temoin donne bann preuve solide ki Jésus finn vrai-mem ressuscité.
KI BENEDICTION OU POU GAGNÉ? Bann ki ena la foi dan Jésus ek obeir li kapav gagne pardon zot peché ek kapav garde enn bon conscience. (Marc 2:5-12; 1 Timothée 1:19; 1 Pierre 3:16-22) Si zot mort, Jésus promette ki li pou ressuscite zot “dan dernier jour.”—Jean 6:40.
Pou gagne plus renseignement, guette chapitre 4, “Kisannla Jésus Christ?,” ek chapitre 5, “La ranson—Pli grand cadeau ki Bondié finn donné,” dan livre Ki la Bible enseigné vrai-mem?b
[Note]
a Li possible ki Matthieu, Marc, ek Luc ki’nn ecrire bann l’Evangile ti appel Nathanaël, Barthélemy.
b Publié par bann Témoins de Jéhovah.
[Zimage page 7]
Pareil couma Nathanaël, ou aussi rod bann preuve lor Jésus