4 Elimine ou bann doute

“Toi ki ena enn tigit la foi, kifer to’nn ena bann doute?”—Matthieu 14:31.

KIFER LI DIFFICILE? Mem bann disciple Jésus parfois ti ena bann doute. (Matthieu 14:30; Luc 24:36-39; Jean 20:24, 25) Avredir, dapré la Bible kan nou mank la foi, c’est enn “peché ki kapav blok nou facilement.” (Hébreux 12:1) L’apotre Paul ti ecrire: “Pa tou dimoune ki ena la foi.” (2 Thessaloniciens 3:2) C’est pa ki certain pena capacité pou manifesté la foi. Au contraire, c’est parski beaucoup pa faire zeffort pou cultive sa qualité-la. Bondié pou beni bann ki faire zeffort.

COUMA OU KAPAV SURMONTE SA DIFFICULTÉ-LA? Rod bann raison ki amenn ou pou ena bann doute. Par exemple, disciple Thomas ti ena doute ki Jésus ti ressuscité, mem si lezot disciple ti dire ki zot ti’nn trouve li. Thomas ti oulé gagne bann preuve. Ki finn arrivé? Jésus finn faire li gagne preuve ki li ti bizin pou ki li kapav ena enn la foi solide.—Jean 20:24-29.

A travers la Bible, Jéhovah donne nou bann reponse ki nou bizin pou ki nou nepli ena bann doute. Par exemple, beaucoup dimoune perdi la foi dan Bondié, parski zot accuse Li, soit directement ou-soit indirectement pou bann la guerre, violence, ek la misere ki affecté bann dimoune. Ki la Bible dire nou lor la?

Bondié pa servi bann gouvernement humain pou dirige la terre. Jésus ti appel Satan, sa creature invisible-la, “chef le monde.” (Jean 14:30) Satan ti offert Jésus pouvoir lor tou bann royaume ki ena lor la terre si li ti adore li zis enn coup, ek li ti dire: “Mo pou donne toi tou sa pouvoir-la ek la gloire sa bann royaume-la, parski inn donne moi sa, ek mo donne sa kisannla mo envie.” Jésus pa ti dire ki Satan pena sa qualité pouvoir-la. Au contraire, li ti dire: “Inn ecrire: ‘C’est Jéhovah to Bondié ki to bizin adoré, ek zis ar Li tousel ki to bizin offert enn service sacré.’ ” (Luc 4:5-8) C’est Satan ek bann gouvernement humain ki responsable souffrance bann dimoune, pa Bondié.—Révélation 12:9, 12.

Dan enn tigit letan, Jéhovah pou tire tou kitsoz ki faire nou souffert. Li’nn fini etabli enn Royaume, ou-soit enn gouvernement, kot so Garson, Christ Jésus li le roi, pou dirige l’humanité. (Matthieu 6:9, 10; 1 Corinthiens 15:20-28) En accord avek seki la Bible ti annoncé, dan nou lepok la bonne nouvelle lor sa Royaume-la pé preché partout lor la terre. (Matthieu 24:14) Bientot sa Royaume-la pou retire tou bann ki oppose-zot ar li ek pou tire tou seki faire bann dimoune souffert.—Daniel 2:44; Matthieu 25:31-33, 46; Révélation 21:3, 4.

KI BENEDICTION OU POU GAGNÉ? Bann ki ena doute zot couma bann vague ki pé ballotté ek ki laisse “tou sorte qualité l’enseignement sarié [zot] . . . par bann trik ki bann dimoune servi.” (Éphésiens 4:14; 2 Pierre 2:1) Mais dan enn lot coté, bann ki gagne reponse sa bann question-la zot, zot kapav “tini ferme dan la foi.”—1 Corinthiens 16:13.

Bann Témoins de Jéhovah, ki finn publié sa magazine-la, pou content aide ou trouve reponse bann question ki kitfois pé faire ou gagne bann doute. Zot invite ou pou prend contact avek zot ek examine par ou-mem zot l’enseignement. Kan ou faire sa ou la foi en Bondié pou vinn pli solide.

Pou gagne plus renseignement, guette chapitre 8, “Ki été Royaume Bondié?,” ek chapitre 11, “Kifer Bondié laisse dimoune souffert?,” dan livre Ki la Bible enseigné vrai-mem?a

[Note]

[Zimage page 9]

Bann ki gagne bann bon reponse pou zot bann question gagne enn base solide pou zot la foi