Anou pose Jésus enn question

Beaucoup dimoune ki croire dan Bondié pensé ki la religion bizin implik-li dan politik. Zot pensé ki la religion kapav joué enn role bien important pou reglé bann probleme l’humanité. Selman, ena lezot croyant ki pensé ki fodé pa melange religion ek politik ensam. Ki ou pensé personnellement lor role ki la religion joué dan politik? Eski sa deux la force puissant-la bizin travail ensam?

FINN decrire Jésus Christ couma “dimoune ki finn ena plus influence dan l’histoire la religion, dan le monde.” Alors, maziné ki nou ti kapav demann li sa question-la: ‘Eski la religion bizin implik-li dan politik?’ Ki li ti pou dire? Kan li ti lor la terre, li ti reponn sa question-la par so bann parole ek so bann action. Par exemple, dan so Sermon lor montagne ki beaucoup dimoune koné, Jésus ti donne bann principe ki aide so bann disciple pou koné ki role zot bizin joué dan la societé. Anou guette certain point dan sa Sermon-la.

Sa ena enn l’effet lor la vie lezot dimoune

Jésus ti decrire l’attitude ki so bann disciple bizin ena envers le monde. Li ti dire: “Zot couma di-sel la terre; mais si di-sel perdi so gout salé, couma pou kapav ré-faire li vinn salé? Pa kapav servi li dan nanyin mais li zis bon pou jette li dehors pou bann dimoune marche lor la. Zot la lumiere le monde. . . . Faire ki zot la lumiere brillé devant bann dimoune, pou ki bannla kapav trouve zot bon travail ek donne la gloire zot Papa ki dan le ciel.” (Matthieu 5:13-16) Kifer Jésus ti compare so bann disciple ar di-sel ek ar la lumiere?

Bann parole Jésus montré ki so bann disciple pareil couma di-sel, pa zis pou enn ti groupe dimoune, mais pou l’humanité en entier. Zot pareil couma la lumiere, pa zis pou enn tigit dimoune, mais pou tou bann ki pé rod konn Bondié avek sincerité. Sa bann l’exemple ki Jésus ti servi-la montré dan enn fason clair ki li pa ti oulé ki so bann disciple evite tou contact ar la societé. Kifer?

Anou reflechi lor sa point-la: di-sel pa kapav preserve enn mangé si pa melange li avek mangé-la. Enn la lampe pa kapav eclaire enn la chambre si pa mette li dan la chambre-la. Alors, li clair ki Jésus pa ti demann so bann disciple pou al reste dan enn l’endroit isolé ek pou etabli bann groupe croyant. Jésus pa ti demann zot aussi pou vive separé ar bann dimoune dan le monde ek pou evite tou contact avek bann ki pena mem religion ki zot. Au contraire, pareil couma di-sel bizin melangé avek mangé ek bizin mette enn la lampe dan enn la chambre pou ki la chambre-la eclairé, alors bann chretien bizin ena contact avek bann dimoune dan la societé pou ki zot ena enn l’effet lor la vie lezot.

“Pa faire partie dan le monde”

Selman, bann instruction ki Jésus ti donne so bann disciple pou ena contact avek bann dimoune dan la societé, pousse nou pou demann enn question important concernant l’attitude ki enn chretien bizin ena envers la politik. Kifer nou pose sa question-la? Pa trop longtemps avant so la mort, Jésus ti demann Bondié dan enn la priere: “Mo pa pé demann toi pou tire zot dan le monde, mais pou veille lor zot a cause sa kikenn ki mauvais-la. Zot pa faire partie dan le monde, pareil couma moi mo pa faire partie dan le monde.” (Jean 17:15, 16) Alors, couma li possible ki bann chretien pa faire partie dan le monde ek en mem temps implik-zot dan la societé? Pou nou gagne reponse sa question-la, anou examine deux lezot question:

• Couma Jésus ti considere politik?

• Ki bann chretien bizin faire zordi?