“Mo avek zot”

“Beaucoup pou rod par-ci par-la, ek vrai connaissance pou en abondance.”​—DAN. 12:4.

COUMA OU POU REPONN?

Dan nou lepok, couma bann dimoune inn gagne “vrai connaissance”?

Couma bann ki finn accepté la verité finn vinn “beaucoup”?

Cite bann moyen ki’nn faire connaissance exact vinn “en abondance.”

1, 2. (a) Couma nou koné ki Jésus li avek so bann disciple zordi, ek ki li pou avek zot dan l’avenir? (b) Dapré Daniel 12:4, ki pou arrivé kan certain pou etudié en profondeur bann l’Ecriture?

MAZINÉ ki ou dan Paradis. Toulé gramatin kan ou levé, ou senti ki ou finn bien reposé, ek ou bien envie commence ou la journée. Ou pena okenn douleur. Tou bann maladie ki ou ti ena avant finn disparette. Tou ou bann sens fonctionne dan enn fason parfait, ou kapav bien trouvé, tendé, senti, touché, ek gouté. Ou ena enn quantité l’energie, ou content ou travail, ou ena beaucoup camarade ek ou pena enn sou tracas. Tousala, c’est bann benediction ki ou pou kapav profité kan Royaume Bondié pou dirigé. Christ Jésus, le Roi ki Bondié inn etabli, pou beni bann dimoune ki li pou dirigé ek pou donne zot connaissance lor Jéhovah.

² Jéhovah pou avek so bann serviteur ki fidele pendant ki zot pou enseigne bann dimoune partout lor la terre. En realité, Bondié ek so Garson finn avek bann dimoune fidele pendant plusieurs siecle. Avant ki Jésus monte dan le ciel, li ti donne so bann disciple fidele l’assurance ki li ti pou avek zot. (Lire Matthieu 28:19, 20.) Pou ki nou augmente nou la foi dan sa l’assurance-la, anou examine zis enn phrase ki sorti dan enn prophetie ki Bondié ti’nn inspiré. Sa prophetie-la ti ecrire par prophete Daniel ena plus ki 2,500 an dan ancien la ville Babylone. En rapport avek “lepok la fin” ki nou pé vive zordi, li ti ecrire: “Beaucoup pou rod par-ci par-la, ek vrai connaissance pou en abondance.” (Dan. 12:4) Dapré seki pé arrivé dan nou lepok, nou comprend ki verbe hébreu ki’nn traduire par “rod par-ci par-la” vedir etudié en profondeur. Sa prophetie-la montré couma bann ki etudié en profondeur bann l’Ecriture, pou gagne enn vrai connaissance, enn connaissance exact lor Parole Bondié, ek sa pou enn benediction extraordinaire! Sa prophetie-la dire aussi ki beaucoup pou accepté “vrai connaissance.” En plus, sa connaissance-la pou en abondance. Li pou disponible pou tou bann dimoune ek partout dan le monde zot pou kapav aprann sa bann verité-la. Pendant ki nou examiné couma sa prophetie-la finn realisé, nou pou trouvé ki Jésus li avek so bann disciple zordi ek ki Jéhovah bien kapav realise tou so bann promesse.

BANN CHRETIEN SINCERE TROUVE “VRAI CONNAISSANCE”

3. Ki ti arrive “vrai connaissance” apré la mort bann zapotre?

³ Pareil couma sa ti annoncé, l’apostasie parmi bann vrai chretien ti developpé apré la mort bann zapotre, ek ti fané bien vite couma difé. (Actes 20:28-30; 2 Thess. 2:1-3) Apré sa, pendant plusieurs siecle, “vrai connaissance” pa ti en abondance, pa zis parmi bann dimoune ki pa ti konn nanyé lor la Bible, mais aussi parmi bann ki ti dire ki zot chretien. Mem si bann chef religieux la chretienté ti pretann ki zot ti croire dan bann l’Ecriture, selman zot ti enseigne bann fausseté, “l’enseignement bann demon” ki ti deshonore Bondié. (1 Tim. 4:1) A cause sa, beaucoup dimoune ti dan l’ignorance spirituel. Parmi bann doctrine bann apostat, ti ena fausse l’enseignement ki Bondié enn Trinité, ki nâme pa mort, ek ki nâme certain dimoune tourmenté pou l’eternité dan l’enfer difé.

4. Couma enn groupe chretien dan bann l’année 1870 ti commence rod “vrai connaissance”?

⁴ Selman, dan bann l’année 1870​—environ 40 an avant ki “bann dernier jour” ti commencé​—enn ti groupe chretien sincere dan Pennsylvanie, en Amérique, ti zwenn ensam pou etudié la Bible en profondeur ek pou rod “vrai connaissance.” (2 Tim. 3:1) Zot ti appel-zot-mem bann Étudiants de la Bible. Zot pa ti sa “bann dimoune ki ena la sagesse ek bann intellectuel” ki Jésus ti dire pa pou gagne connaissance-la. (Mat. 11:25) Zot ti bann dimoune ki ti ena l’humilité ek ki ti vrai-mem envie faire volonté Bondié. Avek serieux ek dan la priere, zot ti lire, discute ek medite lor bann l’Ecriture. Zot ti aussi compare different verset la Bible ek zot ti etudié seki bann lezot dimoune ti ecrire lor mem sujet ki zot ti pé faire recherche. Tigit-tigit, bann Étudiants de la Bible ti aprann bann verité ki beaucoup dimoune pa ti koné pendant plusieurs siecle.

5. Kifer bann Étudiants de la Bible ti produire enn serie tract ki ti appel La théologie ancienne?

⁵ Mem si bann Étudiants de la Bible ti bien content bann kitsoz ki zot ti pé aprann, sa pa ti faire zot vinn orgueilleux. Zot ti comprend ki sa bann verité-la ti touletan dan la Bible. Alors, zot pa ti dire lezot ki zot ti’nn decouvert enn kitsoz ki nouveau. (1 Cor. 8:1) Mais zot ti plutot publié enn serie tract ki ti appel La théologie ancienne. Sa bann tract-la ti aide bann lecteur pou aprann bann verité ki ena dan la Bible. Premier tract dan sa serie-la ti offert bann dimoune “plus kitsoz pou lire pou aide zot dan zot l’etude la Bible, avek l’objectif pou rejette tou bann fausse tradition bann dimoune ek pou retrouve [ek accepté vrai l’enseignement] nou Seigneur ek bann zapotre.”​—La théologie ancienne (en anglais), no. 1, avril 1889, p. 32.

6, 7. (a) Ki bann verité nou finn aprann depuis bann l’année 1870? (b) Ki bann verité ou-mem ou finn surtout content pou aprann?

⁶ Depuis bann l’année 1870, bann Témoins de Jéhovah finn decouvert beaucoup verité extraordinaire.a Sa bann verité-la, zot pa monotone ni compliké, ki zis bann specialiste dan domaine la religion kapav discuté. C’est bann verité bien interessant, ki libere nou ek ki donne nou la vie enn sens. Zot faire nou heureux ek donne nou enn l’espoir pou l’avenir. Zot aide nou pou konn Jéhovah ki enn Bondié l’amour, konn so personnalité ek so bann projet. Zot aussi faire nou comprend pli bien role ki Jésus ena, kifer li’nn vinn lor la terre, kifer li’nn mort, ek ki li pé faire asterla. Sa bann verité-la ena enn grand valeur ek zot faire nou comprend kifer Bondié permette le mal, kifer nou mort, couma nou bizin prié, ek couma nou kapav vrai-mem heureux.

⁷ Zordi nou kapav comprend bann prophetie ki ti enn “secret” pendant bien longtemps, mais ki pé realisé asterla, dan lepok la fin. (Dan. 12:9) Sa bann prophetie-la trouve dan bann l’Ecriture, surtout dan bann l’Evangile ek dan livre Révélation. Jéhovah finn mem aide nou pou comprend bann l’evenement ki nou pa ti pou trouvé avek nou lizié, par exemple, Jésus inn vinn le Roi, ti ena enn la guerre dan le ciel, ek ti jette Satan lor la terre. (Rév. 12:7-12) Bondié inn aide nou aussi pou comprend bann kitsoz ki nou kapav trouvé​—la guerre, tremblement de terre, l’epidemie, ek la famine. Nou comprend aussi kifer bann dimoune faire bann mauvais kitsoz ek c’est sa-mem ki faire nou lepok “critik . . . difficile pou supporté.”​—2 Tim. 3:1-5; Luc 21:10, 11.

8. Kisannla nou reconette finn aide nou pou comprend bann kitsoz ki nou trouvé ek ki nou tendé?

⁸ Nou comprend bien seki Jésus ti dire so bann disciple: “Heureux bann lizié ki trouve bann kitsoz ki zot pé trouvé. Parski mo dire zot: Beaucoup prophete ek le roi ti envie trouve bann kitsoz ki zot pé trouvé, mais zot pa finn trouve sa, ek zot ti envie tann bann kitsoz ki zot pé tendé, mais zot pa finn tann sa.” (Luc 10:23, 24) Nou reconette ki c’est Jéhovah ki finn faire nou trouve ek tann bann kitsoz coumsa. Ek nou bien reconnaissant ki Bondié servi ‘l’assistant,’ setadir l’esprit saint, pou guide bann disciple Jésus “dan tou seki concerne la verité”! (Lire Jean 16:7, 13.) Fodé jamais nou blié grand valeur ki “vrai connaissance” ena ek partage sa avek lezot!

“BEAUCOUP” ACCEPTÉ “VRAI CONNAISSANCE”

9. Ki l’appel ti faire dan nou periodik en avril 1881?

⁹ En avril 1881, moins ki deux an apré ki ti publié premier numero La Tour de Garde, sa periodik-la ti faire enn l’annonce pou gagne 1,000 proclamateur. Dan enn lartik sa periodik-la, nou ti kapav lire sa: “Pou bann ki zot situation permette-zot consacré la moitié zot le temps ou-soit plus, zis dan travail nou Seigneur, nou propose zot enn [kitsoz] . . . setadir: ki zot al dan bann grand ek bann tipti la ville, dapré zot possibilité, couma bann colporteur (pionnier) ou-soit bann [ki preche l’Evangile], pou rod bann chretien sincere dan chaque l’endroit. Zot pou trouve beaucoup ki pou ena enn grand zele pou Bondié, mais pa dapré la connaissance; essaye faire zot konn la richesse misericorde nou Papa ek beauté So parole.”

10. Couma bann dimoune ti reagir kan ti faire enn l’annonce pou gagne bann proclamateur a plein temps?

¹⁰ Sa l’appel-la ti montré ki bann Étudiants de la Bible ti conscient ki bann vrai chretien ena enn travail important pou faire: preche la bonne nouvelle. Mais bann frere ti bien positif concernant sa l’appel pou gagne 1,000 predicateur-la parski sa lepok-la ti ena zis deux-trois centaine dimoune ki ti pé assisté reunion bann Étudiants de la Bible. Selman, beaucoup dimoune ti reconette son la verité ek ti accepté li apré ki zot ti lire enn tract ou-soit enn periodik. Par exemple, en 1882, dan Londres, en Angleterre, apré ki enn missié ti lire enn La Tour de Garde ek enn brochure ki bann Étudiants de la Bible ti publié, li ti ecrire: “S’il vous plait, dire moi couma pou preché ek ki mo bizin dire, pou mo kapav accompli sa travail beni ki Bondié envie nou faire-la.”

11, 12. (a) Ki l’objectif nou ena pareil couma bann colporteur dan le passé? (b) Couma sa bann colporteur-la ti etabli “bann classe,” setadir bann congregation?

¹¹ En 1885, apepré 300 Étudiants de la Bible ti vinn bann colporteur. Sa bann serviteur a plein temps-la ti ena mem l’objectif ki nou ena zordi​—faire bann disciple Jésus Christ. Selman, zot pa ti servi mem methode ki nou servi. Zordi, en general, nou etudié la Bible avek enn sel dimoune a la fois. Apré sa, nou invite l’etude-la pou assisté reunion dan enn congregation ki’nn deja etabli. Mais longtemps, bann colporteur ti place bann livre ek apré sa, zot ti rassemblé bann dimoune interessé pou faire l’etude ensam. Au lieu ki zot ti etudié avek enn dimoune a la fois, zot ti forme bann congregation ki zot ti appel bann “classe.”

¹² Par exemple, en 1907, enn groupe colporteur ti al partout dan enn la ville pou trouve bann dimoune ki ti deja ena bann copie Aurore du Millénium (ki ti appel aussi Études des Écritures). La Tour de Garde ti dire: “Bann ki [ti interessé] ti rassemblé ensam pou faire enn ti reunion dan lakaz enn parmi zot. Enn colporteur ti koz ar zot lor livre Le divin Plan des Âges pendant enn dimanche net, ek dimanche apré, li ti encourage zot pou faire reunion regulierement.” En 1911, bann frere ti change sa fason faire-la. Cinquante-huit frere ti voyagé pou faire bann discours publik partout en Amérique ek dan Canada. Sa bann frere-la ti prend nom ek l’adresse bann dimoune interessé ki ti vinn ecoute discours, ek ti organise zot pou faire reunion dan bann lakaz ek pou forme bann nouveau “classe.” En 1914, ti ena 1,200 congregation bann Étudiants de la Bible partout dan le monde.

13. Ki kitsoz ou trouve extraordinaire en rapport avek predication?

¹³ Zordi, ena environ 109,400 congregation dan le monde, ek apepré 895,800 frere ek soeur ki pionnier. Apepré huit million dimoune inn accepté “vrai connaissance,” ek zot applik sa dan zot la vie. (Lire Isaïe 60:22.)b C’est enn kitsoz extraordinaire, parski Jésus ti annoncé ki “tou bann dimoune pou ena la haine” pou so bann disciple a cause so nom. Li ti ajouté ki so bann disciple ti pou gagne persecution, ti pou al dan prison ek mem ki bann dimoune ti pou touye zot. (Luc 21:12-17) Malgré l’opposition Satan, so bann demon ek bann dimoune ki opposé, bann serviteur Jéhovah finn konn enn succès extraordinaire dan zot l’activité pou faire bann disciple. Zordi, zot pé preche “partout kot bann dimoune resté lor la terre,” depuis bann la jungle tropical ziska bann toundra glacé (bann l’endroit kot faire bien frais), zot preche dan bann montagne, dan bann desert, dan bann la ville ek dan bann la campagne pli loin ki ena. (Mat. 24:14) Jamais zot pa ti pou kapav accompli enn travail coumsa si zot pa ti ena l’aide Jéhovah.

“VRAI CONNAISSANCE” VINN “EN ABONDANCE”

14. Couma bann dimoune partout lor la terre inn gagne “vrai connaissance” a travers bann publication?

¹⁴ “Vrai connaissance” inn vinn en abondance grace a sa quantité dimoune ki pé annonce la bonne nouvelle-la. Li’nn vinn aussi en abondance a travers bann publication. En juillet 1879, bann Étudiants de la Bible ti imprime premier numero sa periodik-la, ki ti appel Le Phare de la Tour de Sion et Messager de la Présence de Christ. Sa numero-la ti imprimé par enn societé commercial en 6,000 copie, zis en anglais. Charles Taze Russell, ki ti ena 27 an, ti rédacteur en chef sa periodik-la ek cinq lezot Étudiants de la Bible ki ti ena maturité, ti ecrire regulierement bann lartik pou sa periodik-la. Zordi, La Tour de Garde publié dan 195 langue. C’est periodik ki plus distribué lor la terre, ek pou chaque numero, imprime 42,182,000 copie. Deuxieme periodik ki pli distribué lor la terre c’est Réveillez-vous ! ki imprimé en 41,042,000 copie dan 84 langue. En plus, apepré 100 million livre ek la Bible imprimé chaque l’année.

15. Couma nou bann l’imprimerie financé?

¹⁵ Sa grand travail-la financé par bann donation volontaire. (Lire Matthieu 10:8.) Sa-mem assez pou impressionne bann dimoune ki travail dan bann grand l’imprimerie, zot ki koné ki quantité sa couté pou imprime bann livre; zot koné ki bann machine, papier, l’encre ek lezot materiel coute bien cher. Enn frere ki habitué acheté bann kitsoz pou bann l’imprimerie Béthel dire: “[Kan] bann dimoune ki faire business vinn visite nou bann l’imprimerie, zot etonné ki c’est bann donation volontaire ki pé finance sa travail ki bien avancé dan domaine technologie-la ek bann l’equipement [moderne] ki kapav produire sa quantité [publication-la.] Zot aussi bien impressionné ki bann dimoune ki travail dan nou Béthel zot jeune ek heureux.”

CONNAISSANCE BONDIÉ POU REMPLI LA TERRE

16. Pou ki raison Jéhovah inn faire “vrai connaissance” vinn en abondance?

¹⁶ “Vrai connaissance” inn vinn en abondance pou enn bon raison. Bondié envie ki “tou sorte qualité dimoune sauvé ek gagne enn connaissance exact lor la verité.” (1 Tim. 2:3, 4) Jéhovah envie ki bann dimoune konn la verité pou ki zot kapav adore Li couma bizin ek gagne so benediction. A travers predication, Jéhovah inn faire bann dimoune gagne “vrai connaissance,” ek sa inn permette Li rassemblé le reste bann chretien oint ki fidele. Li pé aussi rassemblé “enn grand la foule,” ki sorti dan “tou nation, ek tribu, ek peuple ek langue.” Sa grand la foule-la ena l’esperance pou vive pou touletan lor la terre.​—Rév. 7:9.

17. Ki nou aprann ar l’accroissement ki finn ena parmi bann vrai adorateur?

¹⁷ Bann vrai adorateur ki ena lor la terre finn augmenté depuis sa 130 dernier l’année-la. Sa l’accroissement-la montré bien ki Bondié ek so le roi ki Li’nn etabli, Jésus Christ, zot avek bann serviteur Jéhovah lor la terre pou dirige, protege, organise ek enseigne zot. Sa donne nou aussi l’assurance ki Jéhovah pou tini bann promesse ki Li’nn faire pou l’avenir. “La terre vrai-mem pou rempli avek connaissance Jéhovah, pareil couma de l’eau couvert la mer.” (Is. 11:9) Lerla bann dimoune pou vrai-mem gagne bann grand benediction!

[Note]

[Zimage page 14]

Bann premier Étudiants de la Bible ti bann dimoune humble ki ti vrai-mem envie faire volonté Bondié

[Zimage page 15]

Tou ou bann zeffort pou faire konn “vrai connaissance,” ena valeur pou Jéhovah