Eski gagne droit pose Bondié question?

CERTAIN dire ki nou pa gagne droit pose Bondié bann question. Zot pensé ki nou pa pou montré respé envers Bondié si nou demandé kifer Bondié permette ou-soit pa permette ki certain kitsoz arrivé. Eski ou aussi ou pense pareil?

Si ou pense coumsa, kitfois ou pou etonné pou aprann ki beaucoup bon dimoune finn pose Bondié bann question. Guette par exemple bann question ki zot ti demandé:

Job, ki ti enn zom fidele, ti demandé: “Kifer bann mauvais dimoune contigne vive? Kifer zot vive longtemps ek mem zot inn vinn bien riche?”​—Job 21:7.

Habaqouq, enn prophete fidele, ti demandé: “Kifer eski to guette bann traitre ek to reste trankil kan enn kikenn ki mauvais faire dominere ar enn kikenn ki pli juste ki li?”​—Habaqouq 1:13.

Jésus Christ ti demandé: “Mo Bondié, mo Bondié, kifer to’nn abandonne moi?”​—Matthieu 27:46.

Si ou lire contexte sa bann verset-la, okenn part ou pa pou trouvé ki Jéhovaha ti offensé kan sa bann dimoune sincere-la ti pose Li sa bann question-la. En realité, nou pa etonné ki Bondié ti permette zot faire sa. Par exemple, Bondié pa offensé kan nou demann Li bann kitsoz ki nou bizin pou vive ek ki aide nou pou ena enn bon la santé. Li content pou donne nou seki nou bizin. (Matthieu 6:11, 33) Pareil aussi, Li content pou donne nou bann renseignement ki kapav aide nou pou ena enn bon la santé lor plan mental ek affectif. (Philippiens 4:6, 7) En realité, Jésus ti dire so bann disciple: “Contigne demandé, ek pou donne zot.” (Matthieu 7:7) Contexte sa verset-la montré ki kan Jésus ti faire sa promesse-la, li pa ti dire ki nou pou gagne zis bann kitsoz materiel, mais aussi bann reponse lor bann question important.

Si ou ti ena possibilité, ki question ladan ou ti pou content demann Bondié?

• Eski mo la vie ena enn but?

• Ki pou arrivé kan mo mort?

• Kifer to permette ki mo souffert?

“Tou l’Ecriture li inspiré par Bondié,” alors, ou pou trouve bann reponse ki Bondié donné dan so Parole, la Bible. (2 Timothée 3:16) Examine bien seki finn pousse certain dimoune pou demann sa trois question-la, ek bann reponse ki la Bible donné, toulé-deux.