Travay U Teritwar Afon—Servi Notes de maison en maison
1 “Mo finn pres afon labonn nuvel konsernan Kris.” (Rom. 15:19) Sa bann parol lapot Pol la montre avek ki zel li ti akonpli misyon ki li ti’nn gayne, setadir prese, anseyne, ek fer bann disip.
2 Nu’si nu anvi donn temwaynaz afon dan nu teritwar. Nu pe viv enn lepok ki byin-byin difisil—lavi bann dimunn an danze. Si nu pa averti nu prosin, nu pu responsab enn det disan. (Eze. 3:18, 19) Parey kuma lapot Pol, nu anvi kapav dir ki nu ‘pir disan tu bann dimunn.’ (Akt 20:26) Donk, kuma eski nu kapav pres ankor plis afon dan nu teritwar? Enn fason se kan nu servi byin bann notes de maison en maison.
3 Bann Absan: Li inportan pran not bann absan enn manyer detaye ek egzak, si nu anvi kuver nu teritwar dan enn fason efikas. Sa li aplike, ki nu travay nu teritwar rarman uswa suvan. Donk, nu bizin persevere pu sey truv dimunn dan sak lakaz. Kan nu pa zwenn personn, nu bizin pran bann not apropriye lor enn fey notes de maison en maison uswa dan enn karne. Apre sa fer sir ki nu revini ek sey donn temwaynaz avek enn manb dan sa lakaz la.
4 Pu kontakte bann ki pa ti la, sertin repran zot bann notes de maison en maison ek zot repase mem zur, zis apre zot aktivite lakaz-lakaz. Ubyin zot sey vinn enn lot zur uswa enn lot moman dan lazurne. Buku finn remarke ki kan pas dan lasware zot gayn bann bon rezilta. Bann proklamater ki pa kapav al pres lakaz-lakaz parski zot bizin res kot zot, finn gayn bann bon rezilta kan zot telefone uswa zot ekrir bann dimunn ki pa kapav zwenn malgre ki rann zot plizir vizit.
5 Kan Nu Truv Lintere: Kan nu devan enn dimunn ki aksepte nu mesaz, pran bann not. Ekrir so non, so ladres ek bann lezot ranseynman ki pu ed nu swiv lintere. Si apre plizir fwa nu pa reysi zwenn dimunn la, kitfwa nu pu reysi si nu sanz zur ek ler ki nu fer vizit la. Antuka, fode pa nu renons vit pu sey repran kontak avek enn kikenn ki’nn montre lintere.
6 Lapot Pol finn les nu enn bon legzanp. Li finn “rann temwaynaz afon” dan teritwar kot li ti bizin prese. Si nu byin servi bann notes de maison en maison, sa pu ed nu donn temwaynaz afon dan nu teritwar. Nu pu vremem resanti lazwa kan nu pu truv buku dimunn vinn bann disip Zezi Kris! Kumsa, nu pu kapav repran sa bann parol lapot Pol la: “Mo pir ar disan tu bann dimunn.”—Akt 20:21, 26.